جاۋ شينميننىڭ سۋرەتى (ماتەريال سۋرەت). شينحۋا اگەنتتىگى تاراتقان
شينحۋا اگەنتتىگىنىڭ 1 - ايدىڭ 14 - كۇنى ۇرىمجىدەن بەرگەن حابارى (ءتىلشى ليۋ بيڭ). ءار جىلى 2 - ايدىڭ 1 - كۇنى جانە چيڭميڭ كەزىندە ءۇرىمجى قالالىق شيمىن ساقشى بولىمشەسىنىڭ حالىق ساقشىلارى ”ەرجۇرەك قۇربانداردىڭ ىزگى ىستەرىن ەسكە ءتۇسىرىپ، ەرجۇرەك قۇربانداردىڭ رۋحىن جالعاستىرۋ“دى نەگىزگى تاقىرىپ ەتكەن ەرجۇرەك قۇربانداردى ەسكە الۋ قابىر سىپىرۋ قيمىلىن وتكىزىپ، حالىق بۇقاراسىنىڭ ءومىرىنىڭ، مال - مۇلكىنىڭ حاۋىپسىزدىگىن قورعاپ، دەنەسىنە جارىلعىش ءدارى بايلاعان بۇزاقىمەن الىسۋ بارىسىندا داڭقپەن قۇربان بولعان ءبىرىنشى دارەجەلى قاھارمان ۇلگى، شيمىن ساقشى بولىمشەسىنىڭ بۇرىنعى ساياسي تاربيەشىسى جاۋ شينميندى ساعىنا ەسكە تۇسىرەدى.
جاۋ شينمين، 1956 - جىلى 2 - ايدىڭ 13 - كۇنى دۇنيەگە كەلگەن، سانشي ولكەسى ۋىنشۇي اۋدانىنىڭ ادامى. ول 1976 - جىلى 11 - ايدا قوعام حاۋىپسىزدىگى قىزمەتىنە قاتىناسقان، 1990 - جىلى 12 - ايدا جۇڭگو كوممۋنيستىك پارتياسىنا مۇشە بولعان، كوزى تىرىسىندە ءۇرىمجى قالالىق قوعام حاۋىپسىزدىگى مەكەمەسى تيانشان رايوندىق بولىمشە مەكەمەسى شيمىن ساقشى بولىمشەسىنىڭ ساياسي تاربيەشىسى بولعان، ەكىنشى دارەجەلى باقىلاۋشى ساقشى شەنى بار. قوعام حاۋىپسىزدىگى قىزمەتىنە قاتىناسقان 26 جىلدا، جاۋ شينمين قىزمەتىنە شىنايى ادال بولىپ، ادىلدىكپەن زاڭ اتقارىپ، اتويلاپ الدىدا ءجۇرىپ، توپ جارا العا ۇمتىلىپ، ىلگەرىندى - كەيىندى تالاي رەتكى قىلمىستىق ىستەر دەلوسىن اشكەرەلەۋگە قاتىناسىپ، ءۇرىمجىنىڭ قوعام ورنىقتىلىعىن قورعاۋعا كورنەكتى ۇلەس قوستى. 1976 - جىلدان 2001 - جىلعا دەيىنگى ارالىقتا، ول ءۇرىمجى قالالىق قوعام حاۋىپسىزدىگى مەكەمەسى جاعىنان تالاي رەت ماراپاتتالدى، سونداي - اق داڭقپەن ءبىر رەت 3 - دارەجەلى ەڭبەك ءسىڭىردى.
1994 - جىلدىڭ باسىندا جاۋ شينمين اترەتتى باستاپ ءبىر قىلمىستى ەلەمەنتتى ۇستايدى. سول كەزدە جاعداي شۇعىل بولىپ، حالىق ساقشىلارى وق وتكىزبەيتىن كيىمدى جەتكىلىكتى الماعان ەدى، جاۋ شينمين وق وتكىزبەيتىن كيىمدى جاۋىنگەر سەرىگىنە بەرىپ، ءوزى حاۋىپ - قاتەرگە قاراماي، بۇزاقىلاردىڭ اپانىنا ەڭ الدىمەن ۇمتىلادى.
قىلمىستى ەلەمەنتتەردىڭ الدىندا جاۋ شينميننىڭ ”بوي بەرمەس“ ەكەندىگىن ەلدىڭ ءبارى بىلەتىن. كەزىندە ول ۇستاعان ءبىر قىلمىس كۇماندىسى: ”ابايلا، كۇندەردىڭ بىرىندە كەك الامىن“، - دەپ قۇقاي كورسەتكەندە، جاۋ شينمين ىزبارمەن: ”مەن دە ساعان ايتىپ قويايىن، ولىمنەن قورىقسام ساقشى بولماۋشى ەدىم!“، - دەيدى.
2002 - جىلى 2 - ايدىڭ 1 - كۇنى ساعات 11 مولشەرىندە ءبىر بۇزاقى دەنەسىنە جارىلعىش ءدارى بايلاپ، قالىڭ ادام جينالعان دۋماندى بازاردا پالە شىعارماق بولادى. مالىمەتتى تاپسىرىپ العاننان كەيىن، جاۋ شينمين حالىق ساقشىلارىن باستاپ سول جەردىڭ وزىنە دەرەۋ جەتىپ بارادى. قانىپەزەر بۇزاقى الدىندا ول ەش يمەنبەستەن، ۇستامدىلىقپەن توتەپ بەرەدى.
شەشۋشى ساتتە، جاۋ شينمين جان قيارلىقپەن بۇزاقىنىڭ بارار جولىن بوگەي بەرگەندە، بۇزاقى تۇتقيىلدان جارىلعىش ءدارىنى جارىپ جىبەرەدى. سول كۇنى ساعات 14تەن 55 مينۋت وتكەندە جاۋ شينمين جاراقاتى تىم سالماقتى بولعاندىقتان، بار كۇشپەن قۇتقارىلسا دا قۇتقارۋ ءونىم بەرمەي، ەرلىكپەن قۇربان بولادى.
جاۋ شينمين حالىق ساقشىلارىنىڭ پارتياعا ادال بولۋ، وتانعا ادال بولۋ، حالىققا ادال بولۋ، زاڭعا ادال بولۋ سەرتىن ءومىرى ارقىلى امالياتتا ايگىلەدى. 2002 - جىلى 3 - ايدىڭ 21 - كۇنى قوعام حاۋىپسىزدىگى مينيسترلىگى جاۋ شينمينگە مەملەكەتتىك قوعام حاۋىپسىزدىگى جۇيەسىندەگى ”1 - دارەجەلى قاھارمان ۇلگى“ اتاعىن بەرەدى؛ 2002 - جىلى 3 - ايدىڭ 25 - كۇنى ءۇرىمجى قالالىق پارتكوم ونى ”تاڭداۋلى كوممۋنيستىك پارتيا مۇشەسى“ دەپ تانيدى؛ 2002 - جىلى 5 - ايدىڭ 20 - كۇنى شينجياڭ ۇيعۇر اۆتونوميالى رايوندىق حالىق ۇكىمەتى وعان ”توڭكەرىستىك قۇربان“ اتاعىن بەرەدى.
شيمىن ساقشى بولىمشەسىنىڭ ساياسي تاربيەشىسى جاڭ لياڭ بىلاي دەيدى: جاۋ شينميننىڭ قالتقىسىز ءوزىن ارناعان قاھارماندىق رۋحى مەن حالىقتى ءسۇيىپ، حالىق ءۇشىن قىزمەت ىستەگەن سۇيىسپەنشىلىگى توپ - توپ جاۋىنگەر سەرىكتەرىن شينجياڭنىڭ قوعام ورنىقتىلىعىن قورعاۋعا تىنباي كۇرەس جاساۋعا جىگەرلەندىرىپ كەلەدى!
