شي جينپيڭ جاڭا تيپتەگى ايدارشا ۆيرۋسىمەن جۇعىمدالۋدان بولعان وكپە قابىنۋ ىندەتى جونىندە ماڭىزدى نۇسقاۋ بەرىپ، مىنانى باسا دارىپتەدى
حالىق بۇقاراسىنىڭ باس اماندىعى مەن دەنساۋلىعىن ءبىرىنشى ورىنعا قويىپ، ىندەتتىڭ ءورشۋ اۋقىمىن باتىل تەجەۋ كەرەك
لي كىچياڭ بەكىتۋ جازدى
شينحۋا اگەنتتىگىنىڭ 1 - ايدىڭ 20 - كۇنى بەيجيڭنەن بەرگەن حابارى. جۋىردا حۋبەي ولكەسى ۋحان قالاسى سياقتى كوپتەگەن وڭىرلەردە جاڭا تيپتەگى ايدارشا ۆيرۋسىمەن جۇعىمدالۋدان بولعان وكپە قابىنۋ ىندەتى بەلەڭ بەردى. 1 - ايدىڭ 20 - كۇنى ساعات 18گە دەيىن شەكارا ىشىندە جاڭا تيپتەگى ايدارشا ۆيرۋسىمەن جۇعىمدالۋدان وكپەسى قابىنعان 224 ناۋقاس مالىمدەلدى، مۇنىڭ ىشىندە دياگنوزى انىقتالعانى 217 ناۋقاس (ۋحان قالاسىندا 198، بەيجيڭ قالاسىندا 5، گۋاڭدۇڭ ولكەسىندە 14 ناۋقاس)؛ كۇماندى 7 ناۋقاس بار (سىچۋان ولكەسىندە 2 ناۋقاس، يۇننان ولكەسىندە ءبىر ناۋقاس، شاڭحاي قالاسىندا 2 ناۋقاس، گۋاڭشي جۋاڭزۋ اۆتونوميالى رايونىندا ءبىر ناۋقاس، شاندۇڭ ولكەسىندە ءبىر ناۋقاس). جاپونيا ءبىر ناۋقاستىڭ دياگنوزى انىقتالعانىن، تايلاند 2 ناۋقاستىڭ دياگنوزى انىقتالعانىن، كورەيا ءبىر ناۋقاستىڭ دياگنوزى انىقتالعانىن حابارلاندىردى.
ىندەت تۋىلعاننان كەيىن، پارتيا ورتالىق كوميتەتى، مەملەكەتتىك كەڭەس وسكەلەڭ ءمان بەردى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ بىلاي دەپ ماڭىزدى نۇسقاۋ بەردى: حۋبەيدىڭ ۋحان قالاسى سياقتى جەرلەردە جۋىردا جاڭا تيپتەگى ايدارشا ۆيرۋسىمەن جۇعىمدالۋدان بولعان وكپە قابىنۋ ىندەتى ىركەس - تىركەس بەلەڭ بەردى، ءسوز جوق، وسكەلەڭ ءمان بەرىپ، ساقتانۋ - تىزگىندەۋ قىزمەتىن بار كۇشپەن جاقسى ىستەۋ كەرەك. قازىر ءدال كوكتەم مەرەكەسى مەزگىلى، ادامدار زور كولەمدە شوعىرلى ءجۇرىپ - تۇرادى، ىندەتتەن ساقتانۋ جانە ونى تىزگىندەۋ قىزمەتىن جاقسى ىستەۋ توتەنشە قاجەتتى. ءار دارەجەلى پارتكومدار مەن ۇكىمەتتەر، سونداي - اق قاتىستى تاراۋلار حالىق بۇقاراسىنىڭ باس اماندىعى مەن دەنساۋلىعىن ءبىرىنشى ورىنعا قويىپ، تىڭعىلىقتى جوسپار جاساپ، ءار جاقتىڭ كۇشىن ساقتانۋ - تىزگىندەۋ ورىستەتۋگە جۇمىلدىرىپ، شىن مانىندە ءونىمدى شارا قولدانىپ، ىندەتتىڭ ءورشۋ اۋقىمىن باتىل تەجەۋ كەرەك. ناۋقاستاردى بار كۇشپەن قۇتقارىپ - ەمدەپ، ۆيرۋستىڭ جۇعۋ جانە تارالۋ سەبەبىن تەز ارادا تەكسەرىپ انىقتاپ، سىرقاتتانعانداردى باقىلاۋ - تەكسەرۋدى كۇشەيتىپ، ءبىر جاقتى ەتۋ ءتارتىبىن ارناعا ءتۇسىرۋ كەرەك. ىندەت جاعدايى ينفورماتسيالارىن دەر كەزىندە جاريالاپ، حالىقارالىق سەلبەستىكتى تەرەڭدەتۋ كەرەك. قوعامدىق پىكىر جەتەكشىلىگىن كۇشەيتىپ، قاتىستى ساياسات، شارالاردى ۇگىتتەۋ، ءتۇسىندىرۋ قىزمەتىن كۇشەيتىپ، قوعامنىڭ كەلەلى جاعدايىنىڭ ورنىقتىلىعىن باتىل قورعاپ، حالىق بۇقاراسىنىڭ كوكتەم مەرەكەسىن تىنىش، جاراسىمدى وتكىزۋىنە شىنايى كەپىلدىك ەتۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي كىچياڭ بىلاي دەپ بەكىتۋ جازدى: قاتىستى تاراۋلار جانە جەرگىلىكتى ورىندار حالىق بۇقاراسىنىڭ دەنساۋلىعىنا وسكەلەڭ جاۋاپتى بولۋ پوزيتسياسىمەن، توتەپ بەرۋ جوباسىن كەمەلدەندىرىپ، ساقتانۋ - تىزگىندەۋ قىزمەتىن بار كۇشپەن جاقسى ىستەپ، ەرتە بايقاۋ، ەرتە مالىمدەۋ، ەرتە اۋاشالاۋ، ەرتە ەمدەۋ جانە شوعىرلى قۇتقارۋ - ەمدەۋ شارالارىن تياناقتاندىرۋ كەرەك. ۆيرۋستىڭ قاينارى جانە جۇعۋ، تارالۋ سياقتى زاڭدىلىقتارىن جەدەل تەكسەرىپ انىقتاپ، ىندەت جاعدايىن جانە ساقتانۋ - تىزگىندەۋ قىزمەت ينفورماتسيالارىن دەر كەزىندە، وبيەكتيۆ جاريالاپ، ىندەتتەن ساقتانۋ بىلىمدەرىن عىلمي ۇگىتتەۋ كەرەك. دۇنيە جۇزىلىك دەنساۋلىق ساقتاۋ ۇيىمىمەن، قاتىستى مەملەكەتتەرمەن جانە شياڭگاڭ، اۋمىن، تايۋان رايوندارىمەن بايلانىس جاساۋدى، سايكەسۋدى جاقسى ىستەپ، تىعىز سەلبەسىپ بىرىككەن كۇش قالىپتاستىرىپ، ىندەتتىڭ كەڭەيۋىنەن، ورشۋىنەن باتىل ساقتانۋ كەرەك.
شي جينپيڭنىڭ نۇسقاۋى مەن لي كىچياڭنىڭ تالابىنا ساي، مەملەكەتتىك كەڭەستىڭ بىرلەسىپ ساقتانۋ، بىرلەسىپ تىزگىندەۋ مەحانيزمى 1 - ايدىڭ 20 - كۇنى تەلەۆيزور - تەلەفون ءماجىلىسىن اشىپ، جاڭا تيپتەگى ايدارشا ۆيرۋسىمەن جۇعىمدالۋدان بولعان وكپە قابىنۋ ىندەتىنەن ساقتانۋ جانە ونى تىزگىندەۋ قىزمەتىنە جان - جاقتى ورنالاستىرۋ جاسادى. مەملەكەتتىك دەنساۋلىق ساقتاۋ، سالاماتتىق كوميتەتى جاڭا تيپتەگى ايدارشا ۆيرۋسىمەن جۇعىمدالۋدان بولعان وكپە قابىنۋىنا توتەپ بەرۋ، ءبىر جاقتى ەتۋ قىزمەتىنە باسشىلىق ەتۋ گرۋپپاسىن قۇرىپ، جەرگىلىكتى ورىنداردىڭ ىندەتكە توتەپ بەرۋ، ءبىر جاقتى ەتۋ قىزمەتىنە جەتەكشىلىك ەتتى. حۋبەي ولكەسى قاتارلى قاتىستى جەرلەر جەر قاراستىلىعى جاۋاپكەرشىلىگىن ىشكەرىلەي تياناقتاندىرىپ، شىن مانىندە ءونىمدى شارا قولدانىپ، ىندەتتەن ساقتانۋ جانە ونى تىزگىندەۋ قىزمەتتەرىن باتىل جاقسى ىستەدى.
