شينجياڭ گازەتىنىڭ جالپىلىق اقپارات قۇرالدارى ءتىلشىسى حان چينيان
1 - ايدىڭ 18 - كۇنى ءتىلشى پوسكام اۋدانى تۇڭان اۋىلىنىڭ جاڭا اۋات قىستاعىنا كەلدى. قىستاققا كىرگەندە تازا جولدار، رەتتى سالىنعان بەيقۇت ۇيلەر ادامعا تىرشىلىك لەبىن سەزىندىرەدى. ءۇي - ۇيلەر تۇگەلدەي نارت قىزىل كوكتەم بوساعالىعىن جاپسىرىپ، مەرەكەلىك بەينەگە شومعان.
”قازىر ايتىپ جەتكىزگىسىز قۋانىپ جانە تەبىرەنىپ تۇرمىن، تاعاننان جىلىتاتىن پار جاتقىزىلعان جاڭا ۇيگە كوشىپ كىرەتىنىم ويىما دا كىرمەگەن بولاتىن. بيىل وسى ارادا كوكتەم مەرەكەسىن وتكىزەتىندىگىمدى ويلاسام، ىشتەي جادىراپ سالا بەرەم“، - دەدى قىستاق تۇرعىنى تۇماحان ءيۇساننىڭ جۇزىنەن باقىت كۇلكىسى ەسىپ.
تۇماحان بۇرىن تۇرمىس كەشىرگەن اقتاۋ اۋدانىنىڭ كوسىراپ اۋىلى تاۋلى جەر اۋماعى ％95تەن اساتىن كۇنلۇن تاۋى وڭىرىنە ورنالاسقان.
”پارتيا مەن ۇكىمەت بولماسا، مەن بۇل ومىرىمدە مۇنداي كەڭ دە جارىق، جىلى جاڭا ۇيگە كوشىپ كىرە الماۋشى ەدىم!“، - دەدى تۇماحان تەبىرەنە.
تۇماحاندى ايرىقشا قۋانىشقا بولەگەنى، جاڭا ۇيگە سۋ جىلىتقىش ورناتىلدى، قاي كەزدە دە جىلى سۋ ىستەتۋگە بولادى. بۇرىن مونشاعا تۇسكەندە ولار تەگەنەمەن سۋ الىپ، ورامالدى سۋلاپ دەنەسىن سۇرتە سالاتىن.
”تاۋدا تۇرعان كەزدە مەكتەپكە بارۋ، اۋرۋ كورسەتۋ قولايسىز بولاتىن. ال قازىر ۇيدەن الەۋمەتتىك اۋماق قيمىل ورتالىعىنا، ەرەن بازارعا، شيپاحاناعا بىرنەشە مينۋتتا عانا جەتۋگە بولادى“. تۇماحان تاۋدا تۇرعاندا ءوزىنىڭ تەك ەگىن ەگىپ، قوي باعاتىندىعىن، كوشىپ شىققاننان كەيىن قىستاقتىڭ كەدەيلەردى سۇيەمەلدەۋ سەحىندا قىزمەت ىستەي باستاعاندىعىن ايتتى. ءوزىنىڭ دە ءبىر كۇنى ”قىزمەتكەر“ بولاتىنى تۇماحاننىڭ ويىنا دا كىرمەگەن بولاتىن.
جارتى جىلدىڭ الدىندا ءاشىم ءيۇسان وتباسى دا كۇنلۇن تاۋى وڭىرىنەن تۇڭان اۋىلىنا كوشىپ كەلىپ، وتىرىقتاندى. كوشىپ كەلگەندەرىنە ۇزاق بولماسا دا، جاڭا تۇرمىستىڭ كارتيناسى جايىلا باستادى.”بيىلعى كوكتەم مەرەكەسىندە ءبىر ۇيدەگى 5 جان ەندىگارى تار ۇيدە قىسىلمايتىن بولدىق، جاڭا ۇيدە كوكتەم مەرەكەسىن وتكىزۋ قانداي تاماشا!“ جاڭا ۇيگە كوشىپ كىرگەنىنە جارتى جىل بولعان ءاشىمنىڭ قۋانىشى ءالى باسىلار ەمەس.
”بۇرىن ءار جىلى 8 -، 9 - ايلاردا تاۋدان سەل، لاي تاسقىنى ءجۇرىپ، نە ءۇيدى سۋ باسىپ قالاتىن، نە جەردى سۋ الىپ كەتەتىن“. تاۋ ىشىندە 48 جىل تۇرعان ءاشىمنىڭ كەدەيلىكتەن ارىلۋعا امالى، دارمەنى جوق، ”كەدەيلىك انا تاۋ سياقتى، ءبىز تۋمىسىمىزدان ولاردىڭ اراسىندامىز“.
”پارتيا مەن ۇكىمەت قاشاندا ءبىز بۇقارانىڭ قامىن ويلاپ، بىزگە كومەكتەسىپ جاڭا ءۇي سالىپ بەرىپ، اۋلانى جوندەپ، جىلى قورا سالىپ بەردى، تاعى بىزگە 8. 8 مۋ جەم - شوپتىك جەر جانە 4 مۋ ەگىستىك جەر ءبولىپ بەرىپ، تۇرمىسىمىزدى جاقسارتتى“. ءاشىم اسەرلەنە: ”قازىر قويىم 30 تۇياققا جەتتى“، - دەدى.
تۇڭان اۋىلىنا كوشىپ بارعاننان كەيىن، ءاشىم كىشكەنە جۇك اۆتوكولىگىن ساتىپ الىپ، جەم - ءشوپ جانە قوي تاسۋمەن اينالىستى، سونىمەن بىرگە، ىنىسىمەن بىرىگىپ شاعىن مينبۋس ساتىپ الىپ، جولاۋشى تاسىمالىمەن شۇعىلداندى. ”ءبىر جىلدا از دەگەندە 100 مىڭ يۋان تابا الامىن“. جاڭا ءبىر جىلدا ءاشىم وتباسى ۇمىتكە تولى.
