تيانشان تورىنىڭ حابارى (حابارىن جازىپ، سۋرەتىن تۇسىرگەن ءتىلشىمىز گو ليڭ). اۋەجايعا كىرگەن-شىققان جولاۋشىلاردىڭ دەنە تەمپەراتۋراسىن العاشقى قادامدا ولشەدى، جولاۋشىلار بولمەسىن زالالسىزداندىردى، كەزەكشى ۇشاقتاردى اداقتاپ-تەكسەردى... جاڭا تيپتەگى ايدارشا ۆيرۋسىمەن جۇعىمدالۋدان بولعان وكپە قابىنۋ ىندەتىنەن ساقتانۋ-تىزگىندەۋ قىزمەتى ءۇرىمجى حالىقارالىق اۋەجايدا جاپپاي باستالدى.
1-ايدىڭ 24-كۇنى كەشتە، ءتىلىشىنىڭ ۇعىسۋىنشا، ىندەتتەن ساقتانۋ-تىزگىندەۋ قىزمەتىن ويداعىداي ىستەۋ ءۇشىن، شينجياڭ اۋەجاي توبى وكپە ىندەتىنەن ساقتانۋ-تىزگىندەۋ باسشىلىق گرۋپپاسىن قۇرىپ، الدىڭعى شەپتە قولباسشىلىق ەتىپ، تۋىلۋى مۇمكىن ىندەتكە قاراتا شۇعىل توتەپ بەرۋ شارالارىن سايكەستىرگەن، تياناقتاندىرعان. 1-ايدىڭ 22-كۇنى، اۋەجايعا كىرگەن-شىققان جولاۋشىلاردىڭ دەنە تەمپەراتۋراسىن العاشقى قادامدا ولشەۋدى باستاعاننان بەرى، اۋەجاي قىزمەتكەرلەرى 3 اۋەجاي تەرمينال عيماراتىنداعى 9 ەسىكتە جولاۋشىلاردىڭ جانە قىزمەتكەرلەردىڭ دەنە تەمپەراتۋراسىنا العاشقى ولشەۋ جۇرگىزگەن. ءار كۇنى ۇشاق كۇتۋ عيماراتتارىنىڭ تەرەزەسىن اشىپ، اۋا الماستىرعان ءارى ۋاقتىلى زالالسىزداندىرعان. كەزەكشى ۇشاقتاردى اداقتاپ-تەكسەرىپ، جولاۋشىلار بولمەسىن زالالسىزداندىرعان، اۋەجايداعى جۇعىمدالعان دەپ كۇماندانىلعان اۆتوكولىكتەر مەن جۇك ساقتاۋ ورىندارىن زالالسىزداندىرعان.
مۇنان سىرت، اۋەجايدىڭ شۇعىل قۇتقارۋ ورتالىعى ءار كۇنى دياگنوز قويۋعا قابىلدانعان دەنەسى قىزعان، كۇماندى جانە ناۋقاسى تۇراقتاندىرىلعان ناۋقاستاردى ساناققا العان ءارى اۆتونوميالى رايوندىق دەنساۋلىق ساقتاۋ، سالاماتتىق كوميتەتىنە مالىمدەپ وتىرعان. ءبىرىنشى شەپتەگى قىزمەتكەرلەرگە ساقتانۋ زاتتىق قۇرال-جابدىقتارىن تاراتقان.
ءتىلشىنىڭ وڭتۇستىك اۆياتسيا شينجياڭ بولىمشە سەرىكتەستىگىنەن ۇعىسۋىنشا، ىندەت تۋىلعان سوڭ جولاۋشىلارعا قاراتا، ۇشاق جول سەرىك گرۋپپاسىن تازالىق-ىندەتتەن ساقتانۋ دورباسىمەن جابدىقتاپ، ءبىر رەت ىستەتىلەتىن ماسكا مەن N95 ماسكانىڭ سانىن كوبەيتكەن، دەنەسى قىزعان جولاۋشىلار بايقالسا شۇعىل تۋىلعان الەۋمەتتىك دەنساۋلىق ساقتاۋ وقيعاسىن ءبىر جاقتى ەتۋ ءتارتىبى بويىنشا قاتاڭ جۇمىس ىستەپ، جولاۋشىلاردىڭ دەنساۋلىق حاۋىپسىزدىگىنە كەپىلدىك ەتكەن. ۇشاقتارعا قاراتا، ءار كۇنگى ۇشاق كەزەكتەرى اقىرلاسقان كەيىن تازالاۋدىڭ الدىندا الدىن الۋ سيپاتتى زالالسىزداندىرۋ جۇرگىزگەن، دەنەسى قىزعان جولاۋشىلار وتىرعان ءار ءتۇرلى كەزەكشى ۇشاقتاردى دەر كەزىندە زالالسىزداندىرعان، ۇشاق كەزەكتەرى اقىرلاسقان سوڭ تۇبەگەيلى زالالسىزداندىرعان. قىزمەتكەرلەرگە قاراتا، ءبىرىنشى شەپتەگى قىزمەتكەرلەرگە ماسكا، قولقاپ، ديزەنفەكسيالى قول جۋۋ سۇيىقتىعىن تاراتقان، جولاۋشىلار بولمەسىندە جۇمىس ىستەيتىن بارلىق قىزمەتكەرلەردىڭ اۋەجايدان شىعاردا دەنە تەمپەراتۋراسىن ولشەگەن، جوتەلۋ جايتى بار-جوعىن سۇراستىرعان. حيرۋرگيالىق ماسكا، قول جۋۋ سۇيىقتىعىن تاراتىپ، سالاماتتىق ۇگىت-تاربيەسىن كۇشەيتكەن.
مۇنان سىرت، 2020-جىلى 1-ايدىڭ 24-كۇنى ساعات 0 دەن باستاپ، وسىندان بۇرىن كەزەكشى ۇشاقتاردىڭ بەلەتىن ساتىپ العان جولاۋشىلار ءوز ەركىمەن بەلەت قايتارسا، اۆياتسيا سەرىكتەستىكتەرى جانە جولاۋشىلار بەلەتىن ۋاكىلدىك ساتۋ قۇرىلىمدار بەلەتتى تەگىن قايتارۋ ءراسيماتىن وتەيدى، ءارقانداي اقى الىنبايدى.
