شينجياڭ گازەتىنىڭ جالپىلىق اقپارات قۇرالدارى تىلشىلەرى
وسى ءبىر وزگەشە كوكتەم مەرەكەسىندە، كوپتەگەن ادامدار قىزمەت ورىندارىنان تاپجىلماي، كاسىبىن ارداقتاۋدىڭ ەڭ تاماشا بەينەسىن كورسەتۋدە. ولار − ەمدەۋ قىزمەتكەرلەرى، پويەز قىزمەتكەرلەرى، ورتا تازالىقشىلارى، كوشە اۆتوبۋزدارىنىڭ شوفەرلەرى، ەرەن بازاردىڭ قىزمەتشىلەرى، ەلەكترمەن، جىلۋمەن قامتاماسىز ەتۋشى قىزمەتكەرلەر... قاراپايىم قىزمەت ورىندارىندا وزگەشە تاباندىلىق كورسەتتى. كوكتەم مەرەكەسى كەزىندە، شينجياڭ گازەتىنىڭ جالپىلىق اقپارات قۇرالدارى تىلشىلەرى قىزمەت ورىندارىنان تاپجىلماعان ءبىرىنشى شەپتەگى ەڭبەكشىلەرگە بارىپ، ولاردىڭ قاربالاس ساتتەرىن ەستەلىككە الدى.
سۇيىسپەنشىلىكتەرىمەن قامقور بولىپ، ىستىق مەيىرلەرىمەن سالاماتتىق سيلادى
1 - ايدىڭ 26 - كۇنى ساعات 9دا، اۆتونوميالى رايوندىق حالىق شيپاحاناسىنىڭ قىزۋدى ولشەۋ امبولاتورياسىنىڭ سەسترالار باستىعى ۋاڭ لۋ امبولاتورياعا ەرتە كەلىپ كەزەكشىلىكتى وتكىزىپ الىپ، ءار بولىمدە كەلەسى كۇنى كەزەكشى بولاتىنداردىڭ ينفورماتسياسىن ءبىر تۇتاس سايكەستىرىپ، قابىلداعان ناۋقاستاردىڭ ساندى مالىمەتتەرى مەن اۋقىمدىق ينفورماتسيالاردى جوعارىعا مالىمدەپ، سەسترالاردىڭ ماسكى، تۇيىق كوزىلدىرىگى سياقتى جەكە قورعانۋ شارالارىندا كىنارات بار - جوقتىعىن تەكسەردى... بۇل ونىڭ ۇزبەي قاربالاس قىزمەت ىستەگەن 3 - كۇنى ەدى. ”مەن پارتيا مۇشەسىمىن، وسىنداي ساتتە، ارينە، اتويلاپ ءبىرىنشى شەپتە ءجۇرۋىم كەرەك. ءبىز وسى ءبىر وزگەشە كوكتەم مەرەكەسىندە بىرگە قۇلشىنىپ، بار كۇشپەن ىندەتكە قارسى اتتانۋىمىز كەرەك“. ۋاڭ لۋدىڭ ايتۋىنشا، ىندەت تۋىلعان سوڭ، ول جاڭا جىلعا قاراعان ءتۇنى قىزمەت ورنىنا قايتۋ حابارلاندىرۋىن تاپسىرىپ الىپتى، ول وپەراتسيادان كەيىن قارايلاسۋدى قاجەت ەتىپ جاتقان شەشەسىن سىڭلىسىنە تاپسىرىپ، ايتىلعان ۋاقىتتا شيپاحاناعا جەتىپ كەلدى.
”ورتالىق قالا اۋماعىندا ءبىر رەتكى قامداۋ سۋىنىڭ تەمپەراتۋراسى 108 سەلتسي گرادۋس، قايتقان سۋدىڭ تەمپەراتۋراسى 56 سەلتسي گرادۋس، قىسىم، تەمپەراتۋرا پارومەترلەرى قالىپتى“. 1 - ايدىڭ 25 - كۇنى ەگىنشىلىك كالەندارى بويىنشا جاڭا جىلدىڭ 1 - كۇنى، التاي قالاسى لانتيان جىلۋمەن قامداۋ پۋنكتىنىڭ ورىنباسار ديرەكتورى جي يانشوۋ ماسكى تاعىپ، جايشىلىقتاعىداي سەح ءىشىن ارالاپ، قاراستى اۋماقتاعى 120 جىلۋمەن قامداۋ ارالىق ستانسياسىنداعى جابدىقتاردىڭ اينالىم پارومەترلەرىن تەكسەرىپ شىقتى. ”ىندەت كەزىندە باس قوسۋدى، سىرتقا شىعۋدى ازايتۋ دارىپتەلىپ جاتىر، ءبىز تۇرعىنداردىڭ ۇيدە كوكتەم مەرەكەسىن جايلى وتكىزۋىن قامتاماسىز ەتۋىمىز كەرەك“. جي يانشوۋدىڭ ايتۋىنشا، كوكتەم مەرەكەسى كەزىندە وسى جىلۋمەن قامداۋ پۋنكتىنىڭ تۇتىنۋشىلارعا قىزمەت وتەۋ ىستىق لەنياسى ىركىلىسسىز جۇمىس ىستەپ، جوندەۋشى قىزمەتكەرلەر 24 ساعات كەزەكشى بولىپ، ساقاداي ساي تۇرعان، قاي جەردە ماسەلە بايقالا قالسا، دەرەۋ بارىپ جەدەل جوندەپ، ءتۇرلى وندىرىستىك توتەنشە جاعداي وقيعالارىنىڭ دەر كەزىندە، جوعارى ونىمدىلىكپەن ءبىر جاقتى ەتىلۋىنە شىنايى كەپىلدىك ەتكەن.
ىندەتتەن ساقتانۋدى ويداعىداي ىستەپ، امان - ساۋ ساپارعا شىعۋعا كەپىلدىك ەتتى
1 - ايدىڭ 26 - كۇنى 14 ساعات 20 مينۋتتا، Z70 كەزەكشى پويەزى ءۇرىمجى ۆوكزالىنان شىعىپ، جاڭا ساپارىن باستادى. پويەز باستىعى حى حايبين ماسكى تاعىپ، ۆاگونداردى ارالاپ، جولاۋشىلاردىڭ جۇكتەرىن جايعاستىرىپ، سۇراۋلارىنا جاۋاپ بەرىپ، ىندەتتەن ساقتانۋ بىلىمدەرىن ۇگىتتەدى. پويەز راديوسىندا ىندەتتەن ساقتانۋ بىلىمدەرى بەرىلىپ، حى حايبين باسقا دا پويەز قىزمەتكەرلەرىمەن بىرگە ۆاگون ىشىنە بەلگىلەنگەن ۋاقىتتا دەزينفەكسيا سۇيىقتىعىن شاشىپ تۇردى، ”كوپشىلىك ماسكىلارىڭىزدى دۇرىستاپ تاعىپ الىڭىزدار، قولدى ءجيى جۋىپ تۇرىڭىزدار، دەنساۋلىعى جايسىز سەزىلگەن جولاۋشىلار ىرىقتى تۇردە بىزبەن حابارلاسىڭىزدار“. حى حايبين قاربالاس جۇمىس ىستەي ءجۇرىپ جولاۋشىلارعا اقىل - كەڭەس ايتۋمەن بولدى. حى حايبين تىلشىگە بىلاي دەدى: ”ىندەتتەن ساقتانۋدىڭ قاتىستى تالاپتارى بويىنشا، جولاۋشىلاردان قىزۋى ورلەدى دەگەن كۇدىكتى بەلگىلەر بايقالا سالىسىمەن دەرەۋ دەنە تەمپەراتۋراسىن ولشەۋ، وقشاۋلاۋ سياقتى شارالار قولدانىپ، جولاۋشىلاردىڭ امان - ساۋ ساپارعا شىعۋىن قامتاماسىز ەتەمىز“.
”اۆتوبۋزعا ابايلاپ شىعىڭىزدار، دالاعا شىققاندا ماسكى تاعىپ، جۇقپالى اۋرۋدان ساقتانىڭىزدار“. 1 - ايدىڭ 26 - كۇنى ساعات 14تە، ءۇرىمجى قالاسىنىڭ 2005 - جول الەۋمەتتىك اۆتوبۋزىنىڭ باستاپقى ايالداماسىندا، اۆتوبۋز شوفەرى گۋ شياڭفىڭ ماسكى تاعىپ، اۆتوبۋزعا شىققان جولاۋشىلارعا سابىرلىلىقپەن ەسكەرتىپ جاتتى. كوكتەم مەرەكەسى كەزىندە، گۋ شياڭفىڭ جايشىلىقتاعىداي 2005 - جول الەۋمەتتىك اۆتوبۋزىن تاباندىلىقپەن جۇرگىزدى. جاڭا جىلعا قاراعان ءتۇنى، ول سوڭعى كەزەگىندە 3 جولاۋشىنى تاسىدى. ءجۇرىس كەزەگى اياقتاعان سوڭ، ول اۆتوبۋزعا جانار گازدى تولتىرىپ، كولىكتى ابدەن تازالاپ شىققان سوڭ عانا ۇيىنە قايتىپ باس قوسۋ اسىن ءىشتى، بۇل كەزدە ساعات ءتىلى باياعىدا 23تى كورسەتكەن ەدى. گۋ شياڭفىڭنىڭ تىلشىگە ايتۋىنشا، سەرىكتەستىكتىڭ تالابى بويىنشا، ءار ءجۇرىس كەزەگى باستالاردان بۇرىن كولىكتى دەزينفەكسيالاۋ، اۆتوبۋز شوفەرلەرى، ءسوز جوق، ماسكى تاعۋ كەرەك ەكەن. ”ءوزىڭدى قورعاۋمەن بىرگە، جولاۋشىلار الدىندا دا جاۋاپتى بولۋىڭ كەرەك“، - دەيدى گۋ شياڭفىڭ.
قاراپايىم قىزمەت ورنىندا ءۇن - ءتۇنسىز ۇلەس قوستى
1 - ايدىڭ 26 - كۇنى ساعات 9دا، ءۇرىمجى قالاسى سايباق رايونىنىڭ ورتا تازالىقشىسى قادىر وشۇر قاربالاس جۇمىسقا كىرىسىپ، كوشە بويىنداعى قاعاز قيقىمدارى مەن تەمەكى تۇقىلدارىن سىپىرا باستادى. ورتا تازالىقشىسى بولعان 13 جىلدا، ءار جىلى كوكتەم مەرەكەسىنىڭ بارىندە ول قىزمەت ورنىنان تاپجىلمايدى. ”وسى 2 كۇندە، كۇندەلىكتى تازالاۋ جانە باپتاۋ جۇمىستارىنان سىرت، ءبىز تاعى جۇمىس قۇرىلعىلارىنا دەزينفەكسيالاۋ جۇرگىزىپ، كوشەدەگى قوقىر - قوقسىقتاردىڭ كۇنبە - كۇن تازالانىپ بىتۋىنە شىنايى كەپىلدىك ەتتىك“، - دەيدى ماسكى تاققان قادىر.
جول ءۇستى، گۇل باعى، قوقسىق ساندىقتار... قوقىر - قوقسىق بار جەردىڭ بارلىعىن قادىر قالت جىبەرمەيدى. ”جۋىقتا مەكەمەمىز ءبىرىنشى شەپتەگى ورتا تازالىقشىلارىنا ىندەتتەن قورعانۋ شەبەرلىگىنە تاربيەلەۋ ورىستەتتى، ءبىز ءوزىمىزدى جاقسى قورعاۋمەن بىرگە، كوكتەم مەرەكەسى كەزىندەگى قالا كەلبەتىنىڭ رەتتى، تازا بولۋىنا كەپىلدىك ەتىپ، تۇرعىنداردىڭ تازا ءجۇرىس - تۇرىس ورتاسى بولۋىن قامتاماسىز ەتەمىز“، - دەيدى قادىر.
”ناق اقشا ما، جوق، ۋيچات پا؟“، ”قالتا كەرەك پە؟“. 1 - ايدىڭ 26 - كۇنى شاۋەشەك قالاسىنداعى بايجيا ەرەن بازارىندا، كاسسر زاينۇر مۇحامەت اقشا الىپ تۇرىپ الارماننان سۇراپ جاتتى. ماسكى تاعىپ العاندىقتان، الارمان ەستىمەي قالماسىن دەپ، ول داۋىسىن كوتەرە سويلەدى. دۇكەننەن دەزينفەكسيا سۇيىقتىعىنىڭ سولعىن ءيىسى سەزىلەدى، الارماندار ماسكى تاعىپ، قاجەتتى زاتتارىن دەن قويا تاڭداپ ءجۇر، ءبارى ءتارتىپتى، قاز - قالپىندا. ”تالاي جىل بولدى، كوكتەم مەرەكەسىن قىزمەت ورنىمدا وتكىزىپ كەلەمىن، بيىلعى كوكتەم مەرەكەسى وزگەشە بولعانىمەن، ءبىز قورعانۋدى جاقسى ىستەپ، تاۋارمەن قامداۋدى قامتاماسىز ەتىپ، الارماندارعا ەتەنە قىزمەت وتەيمىز“، - دەيدى زاينۇر.
(تىلشىلەر لي چۇنشيا، چاۋ جين، يۇي شي، ۋي حۇڭپيڭ، جاڭ تيڭ، لۋ فىڭباۋ، ۋاڭ دۇڭ، رايدا جازعان)
