شينحۋا اگەنتتىگىنىڭ 1 - ايدىڭ 27 - كۇنى بەيجيڭنەن بەرگەن حابارى. مەملەكەتتىك كەڭەس كەڭسەسىنىڭ 2020 - جىلعى كوكتەم مەرەكەسى دەمالىس ۋاقىتىن ۇزارتۋ جونىندەگى حابارلاندىرۋى، تولىق مازمۇنى تومەندەگىدەي:
ولكەلىك، اۆتونوميالى رايوندىق، توتە قاراستى قالالىق حالىق ۇكىمەتتەرىنە، مەملەكەتتىك كەڭەستىڭ مينيسترلىك - كوميتەتتەرىنە، توتە قاراستى قۇرىلىمدارىنا:
مەملەكەتتىك كەڭەستىڭ بەكىتۋىمەن، جاڭا تيپتەگى ايدارشا ۆيرۋسپەن جۇعىمدالۋدان بولعان وكپە قابىنۋ ىندەتىنەن ساقتانۋ - تىزگىندەۋ قىزمەتىن كۇشەيتىپ، ادامداردىڭ توپتالۋىن ۇتىمدى ازايتىپ، ىندەتتىڭ تارالۋىن ءۇزىپ، حالىق بۇقاراسىنىڭ ءومىرىنىڭ حاۋىپسىزدىگى مەن دەنساۋلىعىن اناعۇرلىم ويداعىداي قامتاماسىز ەتۋ ءۇشىن، قازىر 2020 - جىلعى كوكتەم مەرەكەسى دەمالىس ۋاقىتىن ۇزارتۋدى ناقتى ورنالاستىرۋ جونىندە تومەندەگىدەي حابارلاندىرۋ شىعاردىق:
ءبىرىنشى، 2020 - جىلعى كوكتەم مەرەكەسى دەمالىس ۋاقىتى 2 - ايدىڭ 2 - كۇنىنە دەيىن ۇزارتىلدى (ەگىنشىلىك كالەندارى بويىنشا 1 - ايدىڭ 9 - كۇنى، جەكسەنبى)، 2 - ايدىڭ 3 - كۇنىنەن (دۇيسەنبى) باستاپ قالىپتى قىزمەتكە شىعادى.
ەكىنشى، جەر - جەردەگى جوعارى مەكتەپتەر، تەحنيكۋمدار، ورتا، باستاۋىش مەكتەپتەر، بالاباقشالار وقۋ باستاۋدى كەشىكتىرەدى، ناقتىلى ۋاقىتىن وقۋ - اعارتۋ تاراۋلارى ايىرىم ۇقتىرادى.
ءۇشىنشى، ىندەتتەن ساقتانۋ - تىزگىندەۋ سەبەبىنەن دەمالا الماعان جۇمىسشى - قىزمەتكەرلەرگە «جۇڭحۋا حالىق رەسپۋبليكاسىنىڭ ەڭبەك زاڭىنداعى» بەلگىلەمەلەر بويىنشا تولىقتاپ دەمالىس ورنالاستىرىلادى، دەمالا الماعان دەمالىس ۋاقىتىنداعى ەڭبەكاقىسىن قاتىستى ساياسات بويىنشا قامتاماسىز ەتۋ تياناقتاندىرىلادى.
مەملەكەتتىك كەڭەس كەڭسەسى
2020 - جىلى 1 - ايدىڭ 26 - كۇنى