شينجياڭ گازەتىنىڭ شولۋشىسى
جاڭا تيپتەگى ايدارشا ۆيرۋسپەن جۇعىمدالۋدان بولعان وكپە قابىنۋ ىندەتىنىڭ تارالۋى ۇدەي تۇسكەن قاتاڭ جاعدايدا، بارلىق جۇڭگولىق ىندەتتەن ساقتانۋ - تىزگىندەۋ تىزبەگىندەگى ءبىر بۋىن، ءبىز جۇدىرىقتاي جۇمىلىپ، ەل بىرلىگىنەن بەرىك قامال تۇرعىزىپ، ”ءتۇتىنسىز، ءبىراق ءومىر مەن ولىمگە ساياتىن“ سوعىستىڭ جەڭىسىنە باتىل قول جەتكىزۋىمىز كەرەك.
ايقۇلاقتانا جەتىپ كەلگەن ىندەت جاعدايىنا مەڭزەس، اۆتونوميالى رايوندىق پارتكوم پارتيا ورتالىق كوميتەتىنىڭ شەشىمدەرىن، ورنالاستىرۋلارىن باتىل دايەكتىلەندىرىپ، تياناقتاندىرىپ، ىندەتتەن ساقتانۋ - تىزگىندەۋ قىزمەتتەرىن ناقتى تياناقتاندىردى؛ جەر - جەر، تاراۋلار وسكەلەڭ ءمان بەرىپ، تياناقتاندىرۋدى مىقتاپ يگەرىپ، اركىم ءوز جاۋاپكەرشىلىگىن ءبىلىپ، اركىم ءوز جاۋاپكەرشىلىگىن ادا ەتتى؛ تيانشاننىڭ وڭتۇستىگى مەن سولتۇستىگىنەن قالىڭ ەمدەۋ قىزمەتكەرلەرى حاۋىپ - قاتەردەن تايسالماي، اتويلاپ الدا ءجۇردى؛ قاتىستى سالاداعى كادر، جۇمىسشى - قىزمەتكەرلەر قىزمەت ورىندارىنان تاپجىلماي، ساقاداي سايلاندى. وسى رەتكى شايقاستا كوپتەگەن ادامدار ىرىقتى تۇردە وتباسىنداعىلارمەن باس قوسۋ ورايىنان باس تارتىپ، وتان ءۇشىن وتباسىن قيىپ، جەكە باسىنىڭ حاۋىپ - قاتەرىن ەلەمەي، ىندەتتەن ساقتانۋ - تىزگىندەۋدىڭ ءبىرىنشى شەبىندە قۇلشىنا كۇرەس جاسادى. ولار جاڭا داۋىردەگى ”ەڭ سۇيىكتى ادامدار“، ءدال سولاردىڭ تاباندىلىعى مەن ءوزىن ارناۋى بولعاندىقتان، ءبىزدىڭ ىندەتتەن ساقتانۋ - تىزگىندەۋ توسقاۋىل شايقاسىنىڭ جەڭىسىنە باتىل قول جەتكىزەتىن سەنىمىمىز ءتىپتى دە نىعايا ءتۇستى. ءبىز ءومىردى قورعاعان ءاربىر قاھارمانعا قۇرمەت ءبىلدىرۋىمىز كەرەك، سونىمەن بىرگە، قول ۇستاسىپ، سەنىمدى بەكەمدەپ، قيىن - قىستاۋ شاقتاردا تىزە قوسىپ، قيىن وتكەلدەن بىرگە ءوتۋىمىز كەرەك.
ىندەتتەن ساقتانۋ - تىزگىندەۋ توسقاۋىل شايقاسىنىڭ جەڭىسىنە قول جەتكىزۋدە، ءسوزسىز، يدەيادا باسا ءمان بەرۋ كەرەك. ىندەتتەن ساقتانۋ - تىزگىندەۋ ءاربىر ادامنىڭ ءومىرىنىڭ حاۋىپسىزدىگى مەن دەنساۋلىعىنا تىكە ساياتىن ءىس، استە نەمقورايدى قاراۋعا، استە بويىن اۋلاققا سالۋعا بولمايدى. وسىعان مەڭزەس، اۆتونوميالى رايون ەلەۋلى توسىن الەۋمەتتىك دەنساۋلىق ساقتاۋ وقيعاسىنىڭ 1 - دارەجەلى اتتانىسقا كەلۋ دابىلىن قاعىپ، جان - جاقتى شۇعىل تىزگىندەۋ - ساقتانۋ شاراسىن اتقاردى. ءاربىر ادامدا ايقىن تانىم بولۋ كەرەك، ىندەت جاعدايى الدىندا ”قاتىسسىز ادام جوق“ دەيتىن يدەيانى ورناتىپ، ”وڭايشىلىقتا جۇعا قويمايدى“ دەيتىن دامەدەن باتىل ارىلىپ، بەلسەندى، ىرىقتى تۇردە ءوز ءىسىن ويداعىداي ىستەۋ كەرەك.
ىندەتتەن ساقتانۋ - تىزگىندەۋ توسقاۋىل شايقاسىنىڭ جەڭىسىنە قول جەتكىزۋدە، ءسوزسىز، ارەكەتتە سانالى بولۋ كەرەك. ءتۇسىنۋ جانە سايكەسۋ − ەڭ پارمەندى قولداۋ، قامقورلىق جانە ىنتىماق − ەڭ مەيىرلى جۇباتۋ. ىندەت جاعدايى الدىندا، بارلىق ادام ءوز دەنساۋلىعىنىڭ ءبىرىنشى جاۋاپتى ادامى بولىپ، عىلمي جەتىلىمى مەن مەديتسينالىق قورعانۋ ورەسىن قۇلشىنا جوعارىلاتىپ، سانالىلىقپەن ماسكى تاعۋ، قولدى ۇنەمى جۋۋ، الباتى تۇكىرمەۋ سياقتى تاماشا ادەتتەردى قالىپتاستىرۋ كەرەك. سونىمەن بىرگە ءجون - جوسىندى تانىپ، جالپى قاعيدانى ۇعىپ، جالپى جاعدايمەن ساناسىپ، كوكتەم مەرەكەسى دەمالىسى كەزى بولسا دا ىرىقتى تۇردە تۋىس - تۋعاندارى مەن دوس - جاراندارىنا امانداسا بارۋدان، باس قوسۋ قيمىلدارىنان باس تارتىپ، ادام ءجيى ورىندارعا بارۋدان ساقتانۋ كەرەك. ىندەت جاعدايىنا قاتىستى ءتۇرلى ينفورماتسيالاردى ەگەر دە قۇزىرلى تاراۋلاردىڭ راستاۋىنان وتپەگەن بولسا، سانالى تۇردە سەنبەۋ، تاراتپاۋ، جولداماۋ كەرەك. ءاربىر ادام ءوزىنىڭ دەنساۋلىعىن جانە ءجۇرىس - تۇرىسىن ويداعىداي باسقارىپ، ءىس جۇزىندىك ارەكەتى ارقىلى سالاماتتى تۇرمىس ورتاسى مەن پاراساتتى قوعامدىق پىكىر كۇيىن قالىپتاستىراتىن بولسا، پارتيا مەن ۇكىمەتتىڭ ىندەتتەن ساقتانۋ - تىزگىندەۋ قىزمەتىنە پارمەندى تىرەك قالىپتاستىرا الادى، ىندەتتەن ساقتانۋ - تىزگىندەۋ توسقاۋىل شايقاسىنىڭ جەڭىسىنە جەتۋگە بەلسەندى ۇلەس قوسا الادى.
جۇدىرىقتاي جۇمىلعاندا، اسا المايتىن اسۋ جوق؛ تىزە قوسا ىنتىماقتاسقاندا، وتە المايتىن وتكەل جوق. 1998 - جىلعى تاسقىنعا قارسى اتتانىپ، اپاتتان اراشالاۋدان، 2003 - جىلعى سارسقا قارسى اتتانۋدان، ودان 2008 - جىلعى سىچۋاننىڭ ۋىنچۋانىنداعى جويقىن ءزىلزالاعا قارسى اتتانۋعا دەيىن، ءارقانداي قيىنىشلىق اتاۋلىنىڭ ءبارى جاۋجۇرەك جۇڭگو حالقىنىڭ ەڭسەسىن ويسىراتا العانى جوق. ءبىز جۇدىرىقتاي جۇمىلىپ، ەل بىرلىگىنەن قامال تۇرعىزساق بولعانى، ءسوز جوق، وسى قيىن وتكەلدەن وتە الامىز. ءبىز مىناعان كامىل سەنەمىز: شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعى تۇرعاندا، كۇشتى شوعىرلاندىرىپ، ۇلكەن ىستەردى تىندىرا الاتىن جۇڭگوشا سوتسياليزم ءتۇزىمىنىڭ ابزالدىلىعى تۇرعاندا، شينجياڭ حالقىن قامتىعان بۇكىل ەل حالقىنىڭ ءبىر - بىرىنە قول ۇشىن بەرۋى تۇرعاندا، ءبىز، ءسوزسىز، ىندەتتەن ساقتانۋ - تىزگىندەۋ توسقاۋىل شايقاسىنىڭ ەڭ سوڭعى جەڭىسىنە قول جەتكىزە الامىز.
