− اۆتونوميالى رايونىمىزداعى قالىڭ پارتيالى كادرلار ىندەتكە قارسى تۇرۋدىڭ ءبىرىنشى شەبىندە ەرلىكپەن شايقاس جاسادى
شينجياڭ گازەتىنىڭ جالپىلىق اقپارات قۇرالدارى تىلشىلەرى
قاتاڭ دا كۇردەلى ىندەتتەن ساقتانۋ - تىزگىندەۋ جاعدايى الدىندا، سوڭعى كۇندەردەن بەرى، بۇكىل رايونىمىزداعى ءار دارەجەلى پارتيا ۇيىمى مەن قالىڭ پارتيالى كادرلار ”مەن پارتيا مۇشەسىمىن، مەن الدىمەن اتتانامىن“ دەپ ۇرانداپ، 80 مىڭعا تاياۋ نەگىزگى ساتى پارتيا ۇيىمى، ءبىر ميلليون 420 مىڭ ءار ۇلت پارتيالى كادرلارى ىندەتتەن ساقتانۋ - تىزگىندەۋدىڭ ءبىرىنشى شەبىندە شايقاس جاساپ، ءبىر ءسات تە تىنىم الماي، تيتتەي دە بوساڭسىماي، باستان - اياق اتويلاپ الدا ءجۇرىپ، پارتيا تۋىن ىندەتتەن ساقتانۋ - تىزگىندەۋ شايقاسىنىڭ ءبىرىنشى شەبىندە بيىكتەن اسقاق جەلبىرەتتى.
ءبىرىنشى شەپتەن مىزعىمادى
1 - ايدىڭ 30 - كۇنى ساعات 6دا شينجياڭ اۋەجاي توبى ءۇرىمجى حالىقارالىق اۋەجاي بولىمشە سەرىكتەستىگى شۇعىل قۇتقارۋ ورتالىعى (حالىقتىق اۆياتسيا شيپاحاناسى) پارتكومىنىڭ شۋجيى ما يان ءۇرتىس 12 ساعاتقا جالعاسقان قىزمەتىن اياقتاتتى. ”اۋەجايعا كىرۋدىڭ ءبىرىنشى وتكەلىن قاتاڭ يگەرۋىمىز كەرەك“، - دەدى ما يان.
ىندەتتەن ساقتانۋ - تىزگىندەۋ قىزمەتىنىڭ ءتارتىپتى ورىستەتىلۋىنە، جولاۋشى تاسىمالىنىڭ قالىپتى جۇرىلۋىنە شىنايى كەپىلدىك ەتۋ ءۇشىن، ءاربىر كەزەكشى ۇشاق قونعاندا ءۇرىمجى حالىقارالىق اۋەجاي بولىمشە سەرىكتەستىگى شۇعىل قۇتقارۋ ورتالىعىنىڭ قىزمەتكەرلەرى ۇشاققا شىعىپ جولاۋشىلاردىڭ دەنە تەمپەراتۋراسىن ولشەپ باقىلادى، دەنە تەمپەراتۋراسى 37.3 سەلتسي گرادۋستان اسقان جولاۋشىلاردى دەرەۋ بەلگىلەنگەن شيپاحاناعا ەمدەلۋگە جونەلتتى.
ما يان تىلشىگە بىلاي دەدى: كوكتەم مەرەكەسى دەمالىسى اياقتاپ، قايتا ورالۋدىڭ قاۋىرت مەزگىلىنىڭ كەلۋىنە بايلانىستى، كەزەكشى ۇشاق سانى كوبەيدى، قىزمەت مولشەرى دە ارتتى، 24 ەمدەۋ قىزمەتكەرى 2 ادام ءبىر گرۋپپا بولىپ، ءاربىر وتكەلدى تىنىم الماستان ويداعىداي يگەردى. ”ولاردىڭ باسىم كوبى پارتيا مۇشەسى، سوڭعى كۇندەردەن بەرى ءبىرىنشى شەپتەن مىزعىماي، قورعانۋ كيىمىن كيىپ، قورعانۋ ماسكىسىن تاعىپ، اۋەجايعا كەلگەن جولاۋشىلاردى تەكسەردى، ماسكىنى ۇزاق تاققاندىقتان، قاڭسار تەرىسى ويىلىپ قالدى، سويتە تۇرا كوپشىلىك قىراعىلىقتى اۋەلگىدەي بارىنشا ساقتاپ، ەشقانداي ەنجارلىق ىستەمەدى“، - دەدى ما يان.
اۆتونوميالى رايوندىق جۇقپالى اۋرۋلار شيپاحاناسىندا ەمدەۋ قىزمەتكەرلەرى ساقتانۋ - ەمدەۋدىڭ ءبىرىنشى شەبىندە تاباندى بولدى، مۇندا 78 پارتيا مۇشەسى بار، ICUدىڭ شيپاگەرى جاڭ جيانفىڭ سولاردىڭ ءبىر مۇشەسى. 1 - ايدىڭ 23 - كۇنى ەمدەۋ اۋماعىنا بارعاننان بەرى، جاڭ جيانفىڭ مەن كاسىپتەستەرى ءۇرتىس قاربالاس ىستەدى، ەڭ ۇزاق بولعان ءبىر جولى ءۇرتىس توقتاماي 18 ساعات قىزمەت ىستەدى. سالماقتى ناۋقاستاردى باقىلاۋ ۇيىنەن شىققاندا تالىقسىپ كەتە جازدادى.
بەلگىلەمە بويىنشا قۇتقارۋ - ەمدەۋ اۋماعىنداعى ەمدەۋ قىزمەتكەرلەرى ءار 4 ساعاتتا ءبىر رەت قورعانۋ كيىمىن اۋىستىرۋى كەرەك. قايتا - قايتا كىرىپ - شىعۋدى ازايتۋ ءۇشىن، جاڭ جيانفىڭ مەن كاسىپتەستەرىنىڭ كوبى ەرەسەكتەرگە ارنالعان نەسەپ سىمىرگىش تاعىپ ەمدەۋ اۋماعىنا كىردى، ەمدەۋ اۋماعىنا كىرۋدەن ىلگەرى ەمدەۋ قىزمەتكەرلەرى تاماق جەمەيدى، سۋ ىشپەيدى، مەديتسينالىق قورعانۋ بۇيىمدارى اۋا وتكىزبەيدى، 4 ساعات بويىندا بۇكىل دەنەنى تەر باسىپ كەتەدى، ءبىراق جاڭ جيانفىڭ مەن كاسىپتەستەرى بۇعان ەش رەنىش بىلدىرگەن ەمەس. ول: ”ىندەتتەن ساقتانۋ - تىزگىندەۋ قىزمەتىندە اۋەلگى ماقسات پەن بورىشتى امالياتتا ايگىلەۋىمىز كەرەك“، - دەدى.
”ايەلىم ەكەۋىمىز دە پارتيا مەن مەملەكەت باۋلىپ جەتىلدىرگەن مەديتسينا ماماندارىمىز، ىندەتكە قارسى ءبىز اتتانباعاندا، كىم اتتانادى؟“ 1 - ايدىڭ 30 - كۇنى قۇلجا اۋداندىق جۇڭگوشا شيپاگەرلىك شيپاحاناسىنىڭ اعا شيپاگەرى، قىزۋ امبولاتورياسىنىڭ مەڭگەرۋشىسى حان ۋىنچاڭ بەكەم تۇردە وسىنى ايتتى.
حان ۋىنچاڭنىڭ ايەلى ما كىحۇي قۇلجا اۋداندىق جۇڭگوشا شيپاگەرلىك شيپاحاناسىنىڭ اعا سەستراسى. سوڭعى كۇندەردە ەرلى - زايىپتى ەكەۋى ىندەتتەن ساقتانۋ - تىزگىندەۋدىڭ ءبىرىنشى شەبىندە ءبىر ءسات تە توقتاماستان قاربالاس جۇمىس ىستەدى. ما كىحۇي، باستىسى، ەمدەۋ قىزمەتكەرلەرىنە ىندەتتەن ساقتانۋ - تىزگىندەۋ بىلىمدەرىن ۇيرەتۋگە جاۋاپتى بولدى، حان ۋىنچاڭ كەڭسەدە جاتىپ - تۇرىپ، كۇن - ءتۇن دەمەي بالنيتسانى شارلاپ تەكسەردى، قىزۋ امبولاتورياسىنداعى ناۋقاستاردىڭ دەنساۋلىق جاعدايىن تەكسەرىپ، باقىلاپ تىزگىندەدى. ەرلى - زايىپتى ەكەۋى تاماق ىشۋگە دە مۇرسالارى تيمەي، قارىندارى اشسا دايىن كەسپە جەي سالدى. ”پارتيا مۇشەلەرى بارلىق جەردە اۆانگارد، ونەگەلىلىك، باستاماشىلدىق رولدارىن ساۋلەلەندىرىپ، جاۋاپكەرشىلىك ارقالاۋعا، ۇلەس قوسۋعا باتىل بولۋ كەرەك“، - دەدى حان ۋىنچاڭ.
ءوز جاۋاپكەرشىلىكتەرىن ادا ەتتى
1 - ايدىڭ 30 - كۇنى تاڭ سارىدە ءۇرىمجى حالىقارالىق اۋەجاي كەدەن تەكسەرۋ 1 - ءبولىمىنىڭ باستىعى نايىل قابيەۆ ماسكىسىن تاعىپ، قولعابىن كيىپ، سول كۇنگى كەزەكشىلىك جۇمىسىن باستادى. ىندەت تۋىلعان سوڭ ءۇرىمجى كەدەنى بارلىق كەدەن قىزمەتكەرلەرىنە ”كوكتەم مەرەكەسىندە مەن قىزمەت ورنىندامىن“ دەگەن ۇندەۋ شىعاردى، ءۇرىمجى حالىقارالىق اۋەجاي كەدەنىندەگى پارتيا مۇشەلەرى بەلسەنە ءۇن قوسىپ، پارتيا مۇشەلەرىنىڭ 3 شاعىن اترەتىن دەرەۋ قۇرىپ، ساياحاتشىلاردىڭ شەكارادان كىرىپ - شىعۋىن تەكسەرۋ، زات تەكسەرۋ سياقتى كاسىپتەردىڭ ءبىرىنشى شەبىنە اتتاندىردى. نايىل 20 جىلدان استام پارتيالىلىق ستاجى بار ساقا پارتيا مۇشەسى رەتىندە ەڭ الدىمەن ىرىقتىلىقپەن ءوتىنىش بەرىپ، پارتيا مۇشەلەرى شاعىن اترەتىنىڭ ءبىر مۇشەسى بولدى.
”قازىر بارلىق پارتيا مۇشەسى جولاۋشىلارمەن تىكە جۋىساتىن قىزمەت ورىندارىندامىز، قىزمەت سالماعى اۋىر، حاۋپى جوعارى بولعانىمەن، وزىمىزگە استە بوساڭسىماۋ تالابىن قويدىق“، - دەدى نايىل.
ءبىرىنشى شەپتى قاتاڭ ساقتاپ جاتقانداردىڭ ىشىندە ”شىعىس قاقپانى“ كۇزەتىپ جاتقان پارتيالى كادرلار دا بار.
1 - ايدىڭ 28 - كۇنى ءتىلشى قۇمىل قالاسى يجوۋ رايوندىق قوعام حاۋىپسىزدىگى مەكەمەسىنىڭ شيڭشيڭشيا قوعام حاۋىپسىزدىگى تەكسەرۋ پۋنكتىندە اشىلعان 5 تەكسەرۋ وتكەلىنىڭ بارىندە حالىق ساقشىلارىنىڭ كەزەكشىلىك قىزمەت ىستەپ جاتقاندىعىن، كەيبىرەۋىنىڭ اۆتوكولىكتەرگە جول كورسەتىپ، كەيبىرەۋىنىڭ اۆتوكولىكتەردى زارارسىزداندىرىپ جاتقاندىعىن كوردى. يجوۋ رايونى شيڭشيڭشيا قالاشىعى پارتكومىنىڭ شۋجيى، شيڭشيڭشيانىڭ قوعام حاۋىپسىزدىگى تەكسەرۋ پۋنكتىنىڭ باستىعى جيا شينميڭ شيڭشيڭشيا شينجياڭنىڭ ”شىعىس قاقپاسى“ بولعاندىقتان، كوكتەم مەرەكەسى كەزىندە قىرۋار اۆتوكولىك كىرەتىندىگىن ايتتى.
”شينجياڭعا كىرگەن اۆتوكولىكتەر مەن ادامداردى قاتاڭ تەكسەرۋمەن قاتار، قىزمەت وتەۋ قىزمەتىن دە ويداعىداي ىستەپ، ارناۋلى ادام ورنالاستىرىپ، ’ادام اۋىسقانىمەن اۆتوكولىكتى توقتاتپاۋ، زاتتاردى قولعا جەتكىزۋ‘ ءتاسىلىن قولدانىپ، جول بويىنداعى شينجياڭعا كىرەتىن اۆتوكولىكتەردى جىلى سۋ، ازىقتىق، جانار ماي سياقتىلارمەن 24 ساعات بويى قامداۋ قىزمەتىن وتەيمىز، ىندەت الدىندا ءبىز تيتتەي دە بوساڭسىمايمىز“، - دەدى جيا شينميڭ.
ىندەت جاعدايى الدىندا، فۋكاڭ قالاسى فۋشيڭ ءمالىسى فۋشيڭيۋان الەۋمەتتىك اۋماعى پارتيا باس ياچەيكاسىنىڭ شۋجيى شۇي يىڭ ءوزىنىڭ ءىس جۇزىندىك ارەكەتىمەن ”پارتيا مۇشەسى“ دەگەن ءسوزدىڭ ماعىناسىن ءتۇسىندىردى.
1 - ايدىڭ 30 - كۇنى تاڭ اتىسىمەن، شۇي يىڭ الەۋمەتتىك اۋماقتىڭ قىزمەتكەرلەرىمەن بىرگە وتباسىلارىن ءبىر - بىردەن ارالاپ ىندەت جاعدايىن تەكسەرىپ، قاتىستى جاعدايلاردى ەگجەي - تەگجەيلى تىزىمدەپ، تۇرعىنداردىڭ دەنە تەمپەراتۋراسىن ولشەپ، ىندەتتەن ساقتانۋ بىلىمدەرىن ۇگىتتەدى. سونىمەن بىرگە كەزەكشىلەردى ءارقايسى شاعىن اۋماقتىڭ قاقپاسىندا كىرگەن - شىققانداردىڭ ينفورماتسياسىن تىزىمدەۋگە، الەۋمەتتىك ورىندارعا زارارسىزداندىرۋ سۇيىقتىعىن شاشۋعا ۇيىمداستىردى... جاڭا جىلعا قاراعان كۇننەن تارتىپ قازىرگە دەيىن، شۇي يىڭ ءار كۇنى الەۋمەتتىك اۋماق قىزمەتكەرلەرىمەن بىرگە الەۋمەتتىك اۋماقتىڭ بۇرىش - بۇرىشىن ارالادى.
ول: ”پارتيا مۇشەسى رەتىندە، وسى رەتكى ىندەت الدىندا اتويلاپ الدا ءجۇرۋ، ءبىر - بىرلەپ تەكسەرۋ، ساقتانۋ - تىزگىندەۋ قىزمەتىن بەلسەنە ويداعىداي ىستەۋ، بىردە - ءبىر وتباسىن، بىردە - ءبىر ادامدى قاعىس قالدىرماي، ىندەتتەن ساقتانۋ - تىزگىندەۋ توسقاۋىل شايقاسىن باتىلدىقپەن ويداعىداي جۇرگىزۋ جاۋاپكەرشىلىگىم بار“، - دەدى.
باتىلدىقپەن جاۋاپكەرشىلىك ارقالادى
دەنە تەمپەراتۋراسىن ولشەدى، ينفورماتسيالاردى انىقتادى... ءۇرىمجى قالاسى ۇلانباي تەكسەرۋ پۋنكتىندە قىزىل ءتۇستى كۇرمە كيگەن ما چاۋ قاربالاستاپ ءجۇر، ەندى ءبىر جاقتا ونىڭ ايەلى سومكەسىنەن ءشي كامپيت الىپ شىعىپ، اۆتوكولىكتەگى بالاعا ۇستاتتى.
ما چاۋ ءۇرىمجى قالاسى جوعارى، جاڭا عىلىم - تەحنيكا كاسىپ اشۋ رايونى (جاڭا قالا رايونى) باجياحۋ اۋماعىن باسقارۋ كوميتەتى لييۇيشان وڭتۇستىك جول الەۋمەتتىك اۋماعىنان كەلگەن ءبىر كانديدات پارتيا مۇشەسى، 1 - ايدىڭ 28 - كۇنى كەشتە الەۋمەتتىك اۋماقتىڭ ۋيچات توبىنان ىندەتتەن ساقتانۋ - تىزگىندەۋ جاس ەرىكتىلەر قىزمەت وتەۋ اترەتىنىڭ مۇشە قابىلداپ جاتقان ينفورماتسيانى كورگەندە، ول ايەلىمەن بىرگە تىزىمدەلدى.
جۇڭگو تەمىر جول ءۇرىمجى مەكەمەسى توبى شەكتى سەرىكتەستىگى ءۇرىمجى جولاۋشى تاسىمال بولىگىندەگى پارتيالى كادرلار پويەزداعى ىندەتتەن ساقتانۋ - تىزگىندەۋ قىزمەتىنە قاتىناسۋدى بەلسەنە ءوتىنىش ەتتى، ەڭ سوڭىندا، وسى بولىك ولاردىڭ اراسىنان قىزمەت تاجىريبەسى بار 46 پارتيالى كادردان ۇيىمداسقان ”پارتيا مۇشەلەرى ەكپىندىلەر اترەتىن“ تاڭداپ پويەزگە شىعاردى، ولار وزگە قىزمەتكەرلەرمەن بىرگە پويەزدە جولاۋشىلارعا قىزمەت وتەدى.
1 - ايدىڭ 30 - كۇنى ساعات 13 تەن 5 مينۋت وتكەندە Z291 كەزەكشى پويەزى لانجوۋ ۆوكزالىنا كەلىپ توقتادى، ءۇرىمجى جولاۋشىلار تاسىمال بولىگى جونەلتۋ قولباسشىلىق ورتالىعى پارتيا ياچەيكاسىنىڭ شۋجيى ساي يدى 8 - ءنومىرلى ۆاگوننىڭ ەسىگىندە تۇرىپ، جولاۋشىلاردىڭ پويەزگە شىعۋىن قارسى الدى. پويەز جۇرگەننەن كەيىن، ول ۆاگوندى زارارسىزداندىرىپ، جولاۋشىلارعا كوڭىل بولەتىن ىستەردى ەسكەرتىپ، جۇكتەرىنىڭ حاۋىپسىزدىگىن تەكسەردى.
ساي يدى − ەكىنشى توپتا اتتانعان ەكپىندىلەر اترەتىنىڭ مۇشەسى، ول قاتتى ورىندىقتى ۆاگوندا قىزمەت ىستەۋدى ىرىقتىلىقپەن تالاپ ەتتى. ”پارتيا مۇشەسى رەتىندە اتويلاپ الدا ءجۇرۋ بۇلتارتپاس جاۋاپكەرشىلىگىمىز، قىزمەت ورنىنان تاپجىلماي، ەل بىرلىگىنەن بەرىك قامال تۇرعىزساق بولعانى، ءسوز جوق، جولاۋشىلاردىڭ سالاماتتىلىعىن قامتاماسىز ەتىپ، ىندەتتى جەڭە الامىز“، - دەدى ول.
ءبىر جاق قيىنشىلىققا ۇشىراعاندا، كوپ بولىپ كومەك كورسەتتى. ىندەتكە قارسى تۇرۋ شايقاسىندا ءار دارەجەلى پارتيا ۇيىمى مەن قالىڭ پارتيالى كادرلار قۋاتتى كۇش توپتادى.
”ەكىنشى توپتاعى مەديتسينالىق قورعانۋ زاتتىق ماتەريالدارىنىڭ ەڭ سوڭعى ءبىر بولىگى بۇگىن تۇستەن كەيىن ۋحانعا جەتەدى، زاتتى تاپسىرىپ الۋعا جاقسى دايىندال“. 1 - ايدىڭ 30 - كۇنى شينجياڭ تيانساي جيۋجۋاڭ شەكتى جاۋاپكەرشىلىك سەرىكتەستىگى پارتيا ياچەيكاسىنىڭ شۋجيى چىن ليجۇڭ ۋحانداعى سەرىكتەستىكتىڭ ورىنباسار باس ديرەكتورى لي شياۋپيڭگە تەلەفون سوقتى.
ۋحاندا مەديتسينالىق قورعانۋ زاتتىق ماتەريالدارىنىڭ تاپشىلىعىن ۇعىسقان سوڭ، 1 - ايدىڭ 24 - كۇنى چىن ليجۇڭ كاسىپورىن قىزمەتكەرلەرىن ۋحانعا ناقتى ءىس - ارەكەتتەرىمەن كومەكتەسۋگە جۇمىلدىرىپ، مەديتسينالىق قورعانۋ زاتتىق ماتەريالدارىن ساتىپ الىپ شيپاحانالارعا اتادى. ءبىرىنشى توپتا اتاعان 50 مىڭ ماسكى، 2000 قورعانۋ كيىمى 1 - ايدىڭ 26 - كۇنى ۋحانعا جەتكىزىلىپ، 13 شيپاحاناعا ۇلەستىرىلىپ بەرىلدى.
”ءبىز پارتيا مۇشەسىمىز، ىندەت الدىندا اتويلاپ الدا ءجۇرۋىمىز كەرەك، كاسىپورىن تىپتەن قوعامدىق جاۋاپكەرشىلىكتى ىرىقتىلىقپەن ارقالاپ، ەرلىكپەن ءىس تىندىرۋى كەرەك“، - دەدى چين ليجۇڭ.
(تىلشىلەر ءرايدا، ما ينيڭ، چىن چياڭۋي، ءپاريزات ابدۇل، حان چينيان، لۋ فىڭباۋ، دۋ جيانحۇي، گى يوۋجۇن، ءجازيرا نەسىپبەك، ەرىكتى تىلشىلەر شيڭ باۋيۇي، گاڭ ليچياڭ، سۇي دۇڭ، جاڭ چۇيفىڭ جازعان)
