گازەتىمىزدىڭ جالپىلىق اقپارات قۇرالدارى تىلشىلەرى
”باس قوسۋ ازايسا، ۆيرۋستىڭ تارالۋ ورايى ازايادى“، ”ىندەتتەن ساقتانۋ - تىزگىندەۋدە بارلىق ادامنىڭ جاۋاپكەرشىلىگى بار، ۇيدە وتىرۋدىڭ ءوزى ۇلەس قوسقاندىق“. ىندەتتىڭ ءورشۋ قاتەرىن ازايتۋ ءۇشىن، رايونىمىزداعى ءار ۇلت بۇقاراسى سانالى تۇردە ۇيلەرىندە اكە - شەشەلەرىنىڭ، بالالارىنىڭ قاسىندا بولىپ، وتباسىنىڭ شاتتىعىنا شومدى نەمەسە ۇيلەرىندە كىتاپ وقىپ، ءبىلىم ۇيرەنىپ، ءوز قابىلەتتەرىن ءوسىردى...
مەيىرىمنىڭ شۋاعىنا بولەندى
ۇيىندەگىلەرگە تاماق ىستەپ بەردى، اكە - شەشەسىمەن شۇيىركەلەستى، بالاسىنىڭ جانىندا وتىرىپ تەلەۆيزور كوردى... ءۇرىمجى جوعارى، جاڭا تەحنيكا كاسىپتەرىن اشۋ رايونى (جاڭا قالا رايونى) يىنچۋان كوشەسى ءمالىسى جينيۋان الەۋمەتتىك اۋماعىنىڭ تۇرعىنى جاۋ حايشيا وسى كوكتەم مەرەكەسىن وتە ماعىنالى وتكىزدى.
اكە - شەشەسىمەن بىرگە تۇرعانىمەن، جاۋ حايشيا جايشىلىقتا ەرتەدەن كەشكە دەيىن قاربالاس قىزمەتتە بولىپ، اكە - شەشەسىمەن كەشتە عانا بىرگە بولادى. قىزمەت ورنىندا كوبىندە ۇستەمە جۇمىس ىستەيتىندىكتەن، ول جۇمىستان قايتقاندا اكە - شەشەسى الدەقاشان دەمالىپ قالادى. ”كوكتەم مەرەكەسىندە ءار كۇنى اكە - شەشەممەن بىرگە بولىپ، جانۇيانىڭ مەيىرىن كوپ سەزىندىم“، - دەدى 1 - ايدىڭ 31 - كۇنى جاۋ حايشيا تىلشىگە.
بۇرىندارى كوكتەم مەرەكەسى كەزىندە اكە - شەشەسى كونە دوستارىن ۇيلەرىنە باس قوسۋعا شاقىراتىن. بۇل جولى جاۋ حايشيا اكە - شەشەسىمەن قايتا - قايتا سىر شەرتىسىپ، ولارعا ىندەت جاعدايىن ايتىپ بەردى، ىندەت جاعدايىنان حابارلار بەرەتىن سايتتاردى، ينتەرنەت پاراقتارىن كومپيۋتەرىندە ساقتاپ الىپ، اكە - شەشەسىن باس قوسۋدى كۇشىنەن قالدىرۋعا يلاندىردى. قازىر اكە - شەشەسى تاڭەرتەڭ ەرتەمەن كومپيۋتەردەن ىندەتتەن ساقتانۋ - تىزگىندەۋدىڭ ەڭ جاڭا ينفورماتسياسى مەن بىلىمدەرىن كورىپ، ەندىگى جەردە جاۋ حايشيانىڭ وزىنە ۇيرەتەتىن بولدى. قازىر ءبىر وتباسىنداعى ادامدار بىرگە وتىرىپ حابار - جاڭالىقتاردى كورىپ، اڭگىمەلەسەدى ەكەن، جايشىلىقتا سوزگە ساراڭ شەشەسى دە اڭگىمەگە كىرىسەدى ەكەن. جاۋ حايشيا ءار كۇنى اكە - شەشەسىنە تۇرلەندىرىپ ءدامى ءتىل ۇيىرەتىن تاماق ىستەپ بەرەدى، ءبىر وتباسىنداعىلاردىڭ ءبىر داستارقاندا وتىرىپ تاماقتانۋى ەڭ مەيىرىمدى ساتتەرگە اينالدى.
دەمالىس كەزىندە ءبىلىم تولىقتادى
”ءمورالى اسقاق ادامنىڭ جولى داڭعىل، ۇيرەنۋگە بەرىلگەن ادام ’قام - قايعى‘ دەگەندى ۇمىتادى!“ 1 - ايدىڭ 31 - كۇنى تۇستەن كەيىن قۇلجا اۋدانىندا تۇراتىن گو لين دوستار شەڭبەرىندە وسىنداي جازبا وشار جولدادى.
ىندەت سەبەبىنەن وسى كوكتەم مەرەكەسىنىڭ دەمالىسى ۇزارتىلىپ، ادامدار ۇيلەرىندە تۇرىپ ىندەتكە قارسىلىق كورسەتتى. العاشىندا گو لين ءبىراز ابىرجىعانداي بولدى، ءار كۇنى ينتەرنەت پەن تەلەۆيزورداعى ىندەتتەن ساقتانۋ - تىزگىندەۋ جونىندەگى حابارلارعا نازار اۋداردى، الايدا كوپ وتپەي ءوزىنىڭ كۇيىن تەز رەتكە كەلتىردى.
”جۇرتشىلىقتىڭ ۇيلەرىندە تۇرىپ ىندەتكە قارسى تۇرۋىن قولداۋ ءۇشىن، كەيبىر جەلى تۇعىرلارىنىڭ جايشىلىقتا اقى الاتىن كينو، بەينە جازبالاردى جۇرتشىلىققا اقىسىز كورسەتەرىن ويلاماپپىن. ءوزىم ەڭ جاقسى كورەتىن ءبىر كىتاپ وقۋ Appىندا 200 يۋانعا جۋىق اقى تولەگەندە بارىپ كورەتىن مازمۇنداردى قازىر اقىسىز ەستي الاتىن بولدىم. الگىندە عانا «چيان مۋ شىعارمالارى: كۇڭزىنىڭ ءومىر بايانىن» تىڭدادىم، يگىلىگىن ەرەكشە كورگەندەي بولدىم “، - دەدى گو لين.
”جاقسى كىتاپ ادامعا جىگەر مەن مەيىر باعىشتايدى. وسى كوكتەم مەرەكەسىنىڭ دەمالىسىندا بۇرىن ساتىپ العان، ءبىراق وقۋعا ۇلگەرمەگەن بىرنەشە كىتاپتى وقىپ شىعىپ، ءبىلىمىمدى ءوسىردىم“. ءۇرىمجى قالاسىنىڭ تۇرعىنى گو جيڭنىڭ ايتۋىنشا، وسى كوكتەم مەرەكەسىندە ۇيدە جاتىپ كىتاپ وقىعانىنا ەرەكشە قۋانىشتى ەكەن.
”ىندەت كەزىندە، ءبىزدىڭ قولىمىزدان كەلەرى سىرتقا شىقپاي ۇيدە جاتۋ، اۋرەشىلىك اكەلمەۋ“. گو جيڭ تىلشىگە بيىل مەرەكەلىك تىلەكتەرىن تەلەفون ارقىلى نەمەسە ۋيچاتتا بەينە جازبا ارقىلى جەتكىزگەنىن ايتتى. بىرنەشە كۇن بويى ۇيدەن شىقپاسا دا، گو جيڭ ۇيدە جاتقان ساتتەردەن ەرەكشە ءلاززات الىپتى. كىتاپ وقۋدان سىرت، ءۇي شارۋالارىن ىرىقتىلىقپەن ىستەپ، تاماق جاساپ، جايشىلىقتا قولدارى جۇمىستان بوسامايتىن قاريالاردى دەمالدىرىپتى.
مادەني كوكتەم مەرەكەسىن وتكىزدى
وسىنىڭ الدىنداعى كۇندەردە ديڭ شياۋنيڭ ۋيچاتتاعى دوستار شەڭبەرىنە بالاسىنىڭ حاتكەرلىك تۋىندىلارىن شىعارىپ، دوستارىنىڭ القاۋىنا بولەندى.
ديڭ شياۋنيڭ بىلاي دەدى: ”كوكتەم مەرەكەسى كەزىندە بالاما «باتىسقا ساياحات»تىڭ بالالار اڭگىمەسى نۇسقاسىن قويىپ بەردىم. اڭگىمەنى بىرنەشە رەت تىڭداعان سوڭ، بالاممەن بىرگە «باتىسقا ساياحات»تاعى كەيىپكەرلەردىڭ رولىن الىپ ويناپ، بالانىڭ وقيعا جەلىسى جونىندەگى تۇسىنىگىن تەرەڭدەتتىك، سونىمەن بىرگە ارەكەت ەتىپ قيمىلداپ قالدىق. سىرتقا شىعا الماساق تا، ۇيدە وتىرىپ تا ۇيرەنۋگە، اتا - انا مەن بالا اراسىنداعى قارىم - قاتىناستى كۇشەيتۋگە بولادى ەكەن“.
90 - جىلداردىڭ تۇلەگى چىن يحان مادەنيەت تاراتۋ سەرىكتەستىگىندە قىزمەت ىستەيدى، جايشىلىقتا حۇجاتتى فيلم كورگەندى ۇناتادى، كوكتەم مەرەكەسىنىڭ دەمالىسىندا ول «كوك ءتۇستى عالامشار»، «كوركەمونەردىڭ كۇشى»، «مەن گۋگۇڭدا مادەني ەسكەرتكىشتەردى جوندەدىم» سياقتى كوپتەگەن حۇجاتتى فيلمدەردى كوردى. ول بىلاي دەدى: ”وسى حۇجاتتى فيلمدەردى كورۋ مەن ءۇشىن العاندا ءبىر ءتۇرلى ۇيرەنۋ جانە قىزمەت ماتەريالىن توپتاۋ بولدى، سونداي - اق ۇيدەن شىقپاي - اق ’جەر شارىن اينالىپ ساياحاتتاعانمەن‘ بارابار بولدى!“
(تىلشىلەر رىن جياڭ، لي لي، جيا چۇنشيا جازعان)
