شينجياڭ گازەتىنىڭ جالپىلىق اقپارات قۇرالدارى ءتىلشىسى شى شين
”سەرىكتەستىكتىڭ قويماسىنداعى ازىق - تۇلىكتەردى جەتكىزىپ بولدىق، وسى 2 كۇندە ءبىز كومەك سۇراعانداردىڭ قاجەتىنە قاراي ەرەن بازارلارعا بارىپ ساتىپ الىپ، ونان سوڭ ۋحانداعى جوعارى مەكتەپتەرگە جانە ءبىر ءبولىم قالا تۇرعىندارىنىڭ قولدارىنا تەگىن جەتكىزىپ بەرەمىز“، - دەدى 2 - ايدىڭ 1 - كۇنى ۋحانداعى شينجياڭدىق جىگىت ەلشات ابدۇسالام تىلشىگە تەلەفوندا، ول باسقا مەكەمەنىڭ 5 قىزمەتكەرىنە جاڭا عانا جۇمىرتقا جانە ءسۇت جەتكىزىپ بەرىپ قايتىپتى.
1 - ايدىڭ 25 - كۇنىنەن بەرى ەلشات قىزمەتتەستەرى راپحات ابىلەزبەن، كانديار جاپارمەن بىرگە ۋحان كوشەلەرىن ارالاپ، از دەگەندە 1.86 توننا ازىق - تۇلىك، ماسكى، سونداي - اق كەيبىر تۇرمىستىق قاجەتتى بۇيىمداردى ۋحانداعى 18 جوعارى مەكتەپكە، ۋحان دۇڭحۋ ورتا مەكتەبىنە جانە ءبىر ءبولىم كومەك سۇراۋشىلارعا جەتكىزىپ بەرىپ، بۇل قالاعا جىلۋلىق اكەلىپ، سەنىم سيلادى.
ەلشات سىندى 3 ادام مايكار عىلىم - تەحنيكا قارجى قوسۋ توبى شەكتى سەرىكتەستىگىنىڭ قىزمەتكەرلەرى، اتالعان سەرىكتەستىك، باستىسى، شينجياڭ ەرەكشەلىگىندەگى ازىق - تۇلىك ساۋداسىمەن شۇعىلدانادى، 2019 - جىلى سەرىكتەستىك باس شتابىن شينجياڭنان ۋحانعا كوشىرگەن بولاتىن.
كوكتەم مەرەكەسىندە ۇرىمجىگە قايتقاننان بەرى ۇيىندە اۋاشالانىپ جاتقان سەرىكتەستىكتىڭ جاۋاپتىسى شوكىرات راسۇل قاشاندا ۋحاننىڭ قامىن ويلاپ جاتتى. ينتەرنەت قولدانۋشىلاردىڭ ءبىرى ”ۋحانداعى جەرگىلىكتى ەرىكتىلەردىڭ داشۋە جاتاقحاناسىندا جالعىز قالعان دوسىما كوڭىل ءبولۋىن ءۇمىت ەتەمىن“ دەپ جازعان جولداماسىن كورگەن ول ۋحاندا مەكتەپتە قالعان وقىتۋشى - وقۋشىلار ءۇشىن جىلۋ اتاۋدى ۇيعارىپ، ەلشات سىندى 3 ادامعا ءزارۋ ادامدارعا سەرىكتەستىك قويماسىندا ساقتالعان ازىق - تۇلىكتەردى جەتكىزىپ بەرىڭدەر دەگەن ماڭىزدى مىندەت ورنالاستىرادى.
كىمگە بەرەمىز؟ ەلشات سىندى 3 ادام اڭتارىلىپ وتىرعاندا، ”مەن شينجياڭنان كەلدىم“ ۋيچات الەۋمەتتىك تۇعىرىنداعى ەرىكتىلەر ولارمەن حابارلاستى. الەۋمەتتىك تۇعىر ينتەرنەتتە جىلۋ اتاۋ ۇيىمداستىرىپ، ينتەرنەتتە كومەك سۇراعانداردىڭ ينفورماتسياسىنا نەگىزدەلىپ زاتتىق ماتەريالدار جەتكىزىپ بەردى.
”1 - ايدىڭ 25 - كۇنى تۇستەن كەيىن ءبىز جۇك اۆتوموبيلىمەن ازىق - تۇلىكتەر مەن كەيبىر تۇرمىستىق قاجەتتى بۇيىمداردى جەتكىزىپ بەرە باستادىق“، - دەيدى ەلشات، كومەك كورسەتۋمەن ءبىر ۋاقىتتا ەلگە اۋرەشىلىك تاۋىپ بەرمەۋ ءۇشىن، جولعا شىعاردان بۇرىن ولار تولىق ساقتانۋ - قورعانۋ شارالارىن جاساعان.
جۇڭنان ۇلتتار داشۋەسى، جۇڭگو گەولوگيا داشۋەسى، ۋحان تەحنيكالىق عىلىمدار داشۋەسى... سول كۇنى قۇيىپ تۇرعان جاۋىنعا قاراماي ولار 8 مەكتەپكە زاتتىق ماتەريال جەتكىزىپ بەرىپتى.
”ۋحانعا كەلگەنىمە 4 جىل بولدى، كوشەلەردىڭ وسىنداي بوس قالعانىن ەشقاشان كورگەن ەمەسپىز، الايدا كوڭىلىمىز مەيىرگە تولى بولدى. سول كۇنى كەشتە، العىس ايتقان سوزدەردى كوپ ەستىدىك، ءبىراق ءبىز تەك ىستەۋگە ءتيىستى ىستەردى عانا ىستەدىك“، - دەدى راپحات.
1 - ايدىڭ 26 - كۇنى اۆتوكولىك قاتىناسىنا شەكتەۋ جاريالاعاندا، ولار ۆەلوسيپەدپەن زات جەتكىزە باستادى.
ۇيىندە جاس بالاسىمەن وتىرعان ءبىر انانىڭ كوكونىسى مەن كۇرىشى تاۋسىلىپتى... ولار جەتكىزىپ بەردى!
وپەراتسيا جاساتىپ اۋرۋحانادان ەندى شىققان، ءجۇرىپ - تۇرۋى قولايسىز ءبىر وقۋشىنىڭ قارايلاساتىن ادامى جوق ەكەن... ولار جەتكىزىپ بەردى!
پراكتيكا جاسايمىز دەپ ۋحاندا قالعان بىرنەشە ەمدەۋ قىزمەتكەرلەرىنىڭ جەيتىن ازىق - تۇلىگى قالماپتى... ولار جەتكىزىپ بەردى! وسى ەمدەۋ قىزمەتكەرلەرىندە ماسكى جانە تۇيىق كوزىلدىرىك تاپشى ەكەنىن كورىپ، ولار ارتىق ماسكىلارى مەن تۇيىق كوزىلدىرىكتەرىن ولارعا بەرىپ كەتتى.
قويماداعى ازىق - تۇلىكتەردى جەتكىزىپ تاۋىسقان سوڭ، ولار ءوز قاراجاتتارىمەن ساتىپ الا باستادى...
”العاشقى بىرنەشە كۇندە كومەك سۇراعانداردىڭ ينفورماتسيالارىن دەرلىك كوز ىلمەي ساناققا الىپ وتىردىق، ەكى جىگىتىمىز دە كۇن - ءتۇن دەمەي زات جەتكىزىپ، ابدەن شارشادى، ءبىراق حۋبەيدەن شينجياڭعا كومەككە بارعان سونشا كوپ كادرلاردىڭ ءبىزدىڭ مەكەنىمىز ءۇشىن ىستەگەن ىستەرىمەن سالىستىرعاندا، ءبىزدىڭ بۇل ىستەگەنىمىز نەگە تۇرادى“، - دەيدى كومەك سۇراعانداردىڭ ينفورماتسياسىن ساناققا الۋعا جاۋاپتى بولعان كانديار.
جىلۋلىق اكەلىپ، سەنىم سيلادى، سونىمەن بىرگە وزدەرى قامقورلىق جانە اسەرگە بولەندى.
”ولاردىڭ مەيىربان ارەكەتتەرىنەن 3000نان استام ادامنىڭ قولىنا ءزارۋ بولىپ وتىرعان ازىق - تۇلىك جەتكىزىلدى. مەن ينتەرنەتتە باستان - اياق ولارعا نازار اۋدارىپ كەلەمىن، ولارعا ىزگى تىلەك تىلەيمىن...“ دەپ لەبىز قالدىرىپتى نافيسا ەسىمدى ينتەرنەت قولدانۋشى.
ەلشاتتىڭ ايتۋىنشا، وسى بىرنەشە كۇندە بىرەۋلەر ولارعا ماسكى جىلۋ اتاسا، بىرەۋلەر وزدەرىڭدى جاقسى قورعاڭدار دەپ تاپسىرىپ، ينتەرنەتتەن كوپتەگەن لەبىزدەر جانە ىزگى تىلەكتەر كەلىپ تۇسكەن، بۇلاردىڭ بارلىعى ولاردىڭ كۇشىن تاسقىنداتقان، سۇيىسپەنشىلىكتىڭ قادامى ماڭگى كىدىرمەيدى دەگەن وسى. سونىمەن بىرگە، شوكىراتتىڭ باستاۋىندا، ۋحاندا قالعان شينجياڭدىق كاسىپورىنشىلار، قوعامنىڭ ءار سالاسىنداعى قايراتكەرلەر دە ىركەس - تىركەس اقشا، زات جىلۋ اتادى. ”مەن ۋحاندا شارۋاشىلىق قۇرعاندا كوپتەگەن ادامنىڭ كومەگىنە يە بولدىم، ۋحاندىقتار ءبىزدى جاقىن تۋىسىنا بالادى، مەن ۋحاننىڭ باسىنا اۋىر كۇن تۋعاندا تيتتەي بولسا دا كۇشىمدى قوسسام دەيمىن. ۋحان حالقى قاجەت ەتسە بولعانى، مەن مەيىرىمدىلىك ارەكەتىن جالعاستىرا بەرەمىن“، - دەيدى شوكىرات.
