شينجياڭ گازەتىنىڭ جالپىلىق اقپارات قۇرالدارى تىلشىلەرى
توسىننان تاراعان جاڭا تيپتەگى ايدارشا ۆيرۋسپەن جۇعىمدالۋدان بولعان وكپە قابىنۋ ىندەتى الدىندا، سان مىڭداعان جاندار وتباسىنداعىلارمەن باس قوسىپ جاتقان ساتتە، ولار وتباسىنداعىلارمەن قوشتاسىپ، قاراپايىم قىزمەت ورىندارىندا تاباندىلىقپەن قىزمەت ىستەپ، سانسىزداعان ادامدارعا ەڭ مەيىرىمدى تىرەك بولا ءبىلدى؛ ولار ىندەتكە قارسى تۇرۋدىڭ ءبىرىنشى شەبىندە شايقاس جۇرگىزىپ، ”قاسقايا قارسى جۇرۋشىلەر“دىڭ تايسالمايتىن بەينەسىمەن ايازدى ۇسكىرىك ىشىندەگى ەڭ قاستەرلى سۇيىسپەنشىلىكتى جەتكىزدى.
ەرلى - زايىپتى ەمدەۋ قىزمەتكەرلەرى:
تىزە قوسا شايقاس جۇرگىزىپ، ۋاقىتپەن جارىستى
وسى جولعى جالپى حالىق اتتانىسقا كەلگەن ىندەتتەن ساقتانۋ - تىزگىندەۋ توسقاۋىل شايقاسىندا ەمدەۋ قىزمەتكەرلەرىنىڭ نەگىزگى كۇش بولعاندىعى ءشۇباسىز. شينجياڭ مەديتسينا داشۋەسىنە قاراستى 1 - شيپاحاناسى ينفەكسيا 1 - ءبولىمىنىڭ ورىنباسار مەڭگەرۋشىسى تاڭ لي 12 جاستاعى ۇلىن ۇيىندە قالدىرىپ، شيپاحانانىڭ شۇعىل قۇتقارۋ ورتالىعىندا قىزمەت ىستەيتىن جۇبايى ياڭ شينۋىنمەن بىرگە ون نەشە كۇن بويى ۇزدىكسىز شايقاس جۇرگىزىپ، ۋاقىتپەن جارىسا ىندەتتەن ساقتانۋ - تىزگىندەۋ قىزمەتىن ورىستەتتى. وسى تاتۋ - ءتاتتى جۇبايلار ىندەتكە قارسى تۇرۋدىڭ ءبىرىنشى شەبىندە تىزە قوسا شايقاسقان جاۋىنگەر سەرىك تە بولا ءبىلدى.
ينفەكسيا ءبولىمىنىڭ جۋىساتىندارىنىڭ كوبى باقىلاۋعا الىپ قالعان ادامدار، الدا - جالدا ىندەتكە شالدىققان دەگەن كۇمان تاعىلسا، دەرەۋ بۇكىل شيپاحانانىڭ شۇعىل بىرىگىپ تەكسەرۋىنە تۋرا كەلەدى. ىندەتتەن ساقتانۋ - تىزگىندەۋ شايقاسى باستالعاننان بەرى، تاڭ ليدىڭ شەشەسى كۇن سايىن وعان تەلەفون شالىپ، وعان بارىنشا ساقتانىپ، قورعانۋدى تاپسىرادى، سونداي - اق ءار دايىم الاڭداپ، شيپاحانانىڭ قورعانۋ كيىمى جەتكىلىكتى مە دەپ سۇرايدى، ”بۇكىل كۇشتى ءبىرىنشى شەپتى قامتاماسىزداندىرۋعا جۇمساپ وتىرعان تۇرسا، قورعانۋ جابدىقتارى جەتىسپەي قالسىن با؟ الاڭداماڭىز، بىزدە ءبارى جاقسى، قايتا ءوزىڭىز قازىرشە سىرتقا شىعا كورمەڭىز...“، - دەيدى تاڭ لي كوز جاسىن ارەڭ تەجەپ، ”قانشا كوكتەم مەرەكەسىندە اكە - شەشەممەن بىرگە بولماعانىمدى ۇمىتىپ تا قالدىم“.
ۇقساس ءبىر شيپاحانادا بولعانىمەن، ەرلى - زايىپتى ەكەۋى تىم سيرەك كەزىگەدى ەكەن. ءار جولى شۇعىل قۇتقارىلاتىن ناۋقاستى جەتكىزگەندە، تاڭ لي ۇنەمى قورعانۋ بەت قالقاسىن تاعىنىپ تۇرىپ جۇبايىنا: ”سەندەر تەرەزەدە تۇرسىڭدار، قورعانۋعا ءتىپتى دە ءمان بەرۋلەرىڭ كەرەك“، - دەپ تاپسىرادى دا، ءارقايسىسى اسىعىس - ۇسىگىس ءوز جۇمىستارىنا جونەلەدى...
بۇل ءبىر قاتاڭ سىناق، دەگەنمەن ولاردىڭ جۇرەگى سەنىمگە تولى. ”مەملەكەت، اۆتونوميالى رايون وسىنشاما قاتاڭ ساقتانۋ - تىزگىندەۋ ورنالاستىرۋىن جاساپ وتىر، ءبىز، ءسوز جوق، قاقاعان قىستان ءوتىپ، ىندەتتى جەڭەمىز“، - دەدى تاڭ لي.
جوعارى قارقىندى تاس جول قاتىناس ساقشىسى:
ءۇرتىس 50 نەشە ساعات بويى قىزمەت ىستەدى
وسى بىرنەشە كۇن دەمالىستان قايتا ورالعان جولاۋشى اعىنىنىڭ قاۋىرت مەزگىلى بولدى، 1 - ايدىڭ 28 - كۇنى اۆتونوميالى رايوندىق قوعام حاۋىپسىزدىگى مەڭگەرمەسى قاتىناس ساقشى باس اترەتى جوعارى دارەجەلى تاس جول تارماق اترەتى ۇلانباي ۇلكەن اترەتىنە قاراستى رايونعا زور مولشەردەگى اۆتوكولىك كەلىپ كىردى، ۇلانباي ۇلكەن اترەتى وزدەرىن قورعاۋدى ويداعىداي ىستەۋمەن بىرگە، ارناۋلى كەزەكشىلىك قىزمەت ورىستەتتى.
ۇزاق جول باسىپ كەلگەندىكتەن، كەيبىر اۆتوكولىكتەردە جانار ماي جانە ازىق - تۇلىك جەتىسپەۋ جاعدايى تۋىلدى. اۆتونوميالى رايوندىق قوعام حاۋىپسىزدىگى مەڭگەرمەسى قاتىناس ساقشى باس اترەتى جوعارى دارەجەلى تاس جول تارماق اترەتى ۇلانباي ۇلكەن اترەتىنىڭ ورىنباسار باستىعى ساي ۋي مەن قىزمەتتەستەرى 2 ماي قۇياتىن كولىككە بايلانىس جاساپ، الىپ جۇرۋگە قولايلى ماي قۇياتىن شاۋگىم دايىنداپ، قاجەتى تۇسكەن اۆتوكولىكتەرگە ماي قۇيىپ قىزمەت وتەدى.
”كوكتەم مەرەكەسىنىڭ الدىندا، ۇلكەن اترەت 1 - ورتا اترەتىنىڭ شاعىن اسحاناسىنان ءبىراز نان، بۋنان جانە جۇمىرتقا ساتىپ اكەلگەن بولاتىنبىز، ءبىز بارلىق ازىق - تۇلىگىمىزدى الىپ شىعىپ، ازىق - تۇلىگى جەتىسپەگەن اۆتوكولىكتەگىلەرگە بەردىك. جوعارى دارەجەلى تاس جول تارماق اترەتى دە 30 نەشە ساقشىنى شىعارىپ ارناۋلى كەزەكشىلىك قىزمەتتى قولدادى، تاعى دا بۇقاراعا مينەرال سۋ جانە ازىق - تۇلىك اكەپ بەردى“، - دەدى 1 - ايدىڭ 31 - كۇنى ارناۋلى كەزەكشىلىك قىزمەتتى اقىرلاستىرعان ساي ۋي ەسىنە الىپ.
شوفەرلەر مەن جولاۋشىلاردىڭ ۇيلەرىنە امان - ەسەن جەتۋىن قامتاماسىزداندىرۋ ءۇشىن، حالىق ساقشىلارى ساقشى اۆتوكولىگىمەن كۇش جالعاپ جول باستاۋ ارقىلى بىرگە ءجۇرىپ جەتكىزىپ سالدى.
”ءبىزدىڭ ۇلكەن اترەتىمىزدە 21 پارتيا مۇشەسى بار، ولار ءبىرىنشى شەپتە اتوي سالىپ، ءۇرتىس 30 نەشە ساعاتتان استام جول باستاپ جۇرگەننەن سوڭ بارىپ قىسقا ۋاقىت دامىلداپ رەتتەلىپ الادى“. ساي ۋي مەن قىزمەتتەستەرى جولدا ءۇرتىس 50 نەشە ساعات بويى قىزمەت ىستەۋ رەكوردىن جاراتتى. ال ولاردى ەڭ اسەرلەندىرگەنى كوپشىلىكتىڭ ءبىر - بىرىنە قول ۇشىن بەرگەندىگى بولدى.
”كەيبىر بۇقارا تەك جارتى ستاكان عانا قايناعان سۋ الدى، كەيبىرەۋى ازىق - تۇلىك العاننان سىپايىلىقپەن باس تارتتى، ولار مۇنى ەڭ قاجەت ەتەتىن اۆتوكولىككە قالدىرايىق دەستى. كوپشىلىكتىڭ ءبارى قاتتى شارشاعاندارىمەن، ءبىراق ءبىزدىڭ جۇرەگىمىز وڭ ەنەرگيا مەن كۇش - قۋاتقا تولى، ءبىز تەك ەل بىرلىگىنەن بەرىك قامال تۇرعىزىپ، جالپى حالىق ءبىر نيەت، ءبىر تىلەكتە بولعاندا، ەشقانداي قيىنشىلىق ءبىزدى مۇقالتا المايتىندىعىنا، وسى رەتكى ىندەتكە قارسى تۇرۋدىڭ توسقاۋىل شايقاسىنىڭ جەڭىسىنە، ءسوز جوق، قول جەتكىزەتىندىگىمىزگە سەنەمىز!“ - دەدى ساي ۋي.
الەۋمەتتىك اۋماقتاعى ”انالى - بالالى اسكەر“:
بىرگە تاماقتانۋ ورايى بولمادى
ءبىر كيلوگرام جۇمىرتقا، ءبىر كيلوگرام كارتوپيا... 1 - ايدىڭ 31 - كۇنى ساعات 16دا، ءۇرىمجى قالاسى سايباق رايونى شيشان اۋماعىن باسقارۋ كوميتەتى شيشان شىعىس كوشەسى سولتۇستىك الەۋمەتتىك اۋماعىندا، قىزمەتكەر ءشامسيا ادىل ءبىر جاعىنان، تۇرعىنداردان كەلگەن تەلەفوندى قابىلداپ، ەندى ءبىر جاعىنان، ەستەلىك داپتەرگە جازىپ الىپ جاتىر. بۇل ونىڭ وسى كۇنى قابىلداعان 2 - تاپسىرىس ءتىزىمى ەدى.
شيشان شىعىس كوشەسى سولتۇستىك الەۋمەتتىك اۋماعىنداعى ”انالى - بالالى اسكەر“ رەتىندە، ءشامسيا مەن شەشەسى ءشامشىقۇمار مامەت ىندەتتەن ساقتانۋ - تىزگىندەۋدىڭ ءبىرىنشى شەبىندە كۇرەس جۇرگىزۋدە. ءشامسيا وتباسىلارىن كوتەرمەگە الۋشى كادر، 150 وتباسىنداعى تۇرعىندى باسقارادى، قىزمەت وتەيدى. وسى بىرنەشە كۇندە، شاعىن اۋماقتىڭ قاقپاسىندا تۇرعىنداردىڭ دەنە تەمپەراتۋراسىن ولشەۋدەن، اۆتوكولىكتەردى زارارسىزداندىرۋدان سىرت، ءشامسيا تاعى ”تاۋار ەنگىزۋ“ جولىندا شاپقىلاپ ءجۇردى.
سىرتقا شىعۋى قولايسىز قارتتارعا جانە ءوز ۇيىندە اۋاشالاندىرىلعان ادامدارعا كومەكتەسۋ ءۇشىن، ءشامسيا قىزمەتتەسىمەن بىرگە ”وكىلەتتى ساتىپ اكەلۋشى“گە اينالدى، كوكونىس، جەمىس - جيدەك سياقتى تۇرمىستىق بۇيىمدار، قورعانۋ بۇيىمدارى... ءار كۇنى ءبىرسىپىرا ”تاپسىرىس“ قابىلدايدى. ”تۇرعىندار دا توتەنشە سايكەسەدى، مەيلى كۇنىنە قانشا رەت تەلەفون سوقساق تا، قانشاما ۇيلەردىڭ ەسىگىن قاقساق تا، وعان كەييتىن نەمەسە ءبىزدى ۇيگە كىرگىزبەي قوياتىن ەشكىم بولمايدى“، - دەدى ءشامسيا.
شەشەسى ءشامشىقۇمار چيماشان الەۋمەتتىك اۆتوبۋز ايالداماسىندا كۇزەتتە تۇرادى. ”ءار جولى جۇرگىنشىلەردىڭ دەنە تەمپەراتۋراسىن ولشەگەندە، ولار ’جاپا شەكتىڭىز‘ دەسە بولدى، جۇرەگىم جىلىنىپ سالا بەرەدى“. قاربالاس ىندەتتەن ساقتانۋ - تىزگىندەۋ قىزمەتىنە كىرىسكەننەن بەرى، انالى - بالالى ەكەۋىنىڭ بىرگە تاماق ىشەتىن ۋاقىتتارى ازايدى. ”شەشەم الەۋمەتتىك اۆتوبۋز بەكەتىندە تىكەسىنەن تىك تۇرىپ كۇزەتتە بولادى، مەن تۇندە قىزمەتتەن وتە جاي قايتامىن. ءبىز ءار كۇنى تەلەفون، ۋيچات ارقىلى اماندىعىمىزدى ءبىلدىرىسىپ تۇرامىز. وسى جولعى ىندەتكە قارسى تۇرۋ توسقاۋىل شايقاسىنىڭ جەڭىسىنە قول جەتكىزگەن سوڭ، مەن، ءسوزسىز، شەشەمە دامدەپ تاماق جاساپ بەرەمىن!“ - دەدى ءشامسيا.
(تىلشىلەر جاۋ چۇنحۋا، چاۋ جين، سۇي يۇنيان، سۋ لۋپيڭ جازعان)
