باس شۋجي شي جينپيڭنىڭ ماڭىزدى ءسوزىنىڭ رۋحىن باتىل دايەكتىلەندىرىپ، سەنىمدى بەكەمدەپ، شىنايى يگەرىپ، ناقتى ىستەپ، ىندەتتەن ساقتانۋ - تىزگىندەۋ توسقاۋىل شايقاسىنىڭ جەڭىسىنە بار كۇشپەن قول جەتكىزەيىك
چىن چۋانگو ماجىلىسكە قاتىناستى ءارى ءسوز سويلەدى
شينجياڭ گازەتىنىڭ جالپىلىق اقپارات قۇرالدارى تىلشىلەرى ياۋ تۇڭ، ۋاڭ شيڭرۇي 2 - ايدىڭ 4 - كۇنى ۇرىمجىدەن حابارلايدى. 2 - ايدىڭ 4 - كۇنى تۇستەن بۇرىن اۆتونوميالى رايون ىندەتتەن ساقتانۋ - تىزگىندەۋ قىزمەتى بەينە جازبا ءماجىلىسىن اشىپ، جۇڭگو كوممۋنيستىك پارتياسى ورتالىق كوميتەتى ساياسي بيۋروسى تۇراقتى كوميتەتى ءماجىلىسىنىڭ رۋحىن، اسىرەسە، باس شۋجي شي جينپيڭنىڭ ماڭىزدى ءسوزىنىڭ رۋحىن جەتكىزىپ، ۇيرەنىپ، دايەكتىلەندىرىپ، جاعدايعا ىشكەرىلەي تالداۋ جاساپ، زەرتتەۋ جۇرگىزىپ، تۇتاس رايوننىڭ ىندەتتەن ساقتانۋ - تىزگىندەۋ قىزمەتىن ويداعىداي ىستەۋدى قايتالاي ورنالاستىردى، قايتالاي جايعاستىردى. اۆتونوميالى رايوندىق پارتكومنىڭ شۋجيى، اۆتونوميالى رايوننىڭ جاڭا تيپتەگى ايدارشا ۆيرۋسپەن جۇعىمدالۋدان بولعان وكپە قابىنۋ ىندەتىنەن ساقتانۋ - تىزگىندەۋ قىزمەتى باسشىلىق گرۋپپاسىنىڭ باستىعى چىن چۋانگو ماجىلىسكە قاتىناستى ءارى ءسوز سويلەدى.
ءماجىلىس مىنالاردى اتاپ كورسەتتى: ىندەت تۋىلعاننان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتى وسكەلەڭ ءمان بەردى، باس شۋجي شي جينپيڭ ءوزى قولباسشىلىق ەتىپ، ءوزى ورنالاستىرۋ جاساپ، تالاي رەت ءماجىلىس اشىپ، مالىمەت تىڭداپ، ماڭىزدى نۇسقاۋ بەردى، بۇل حالىقتىڭ كوسەمى باس شۋجي شي جينپيڭنىڭ حالىقتى سۇيەتىن شىنايى سۇيىسپەنشىلىگىن تولىق ايگىلەدى، پارتيا ورتالىق كوميتەتىنىڭ ءار ۇلت حالىق بۇقاراسىنىڭ ءومىرىنىڭ حاۋىپسىزدىگى مەن دەنساۋلىعىنا وسكەلەڭ جاۋاپتى بولۋ جاۋاپكەرشىلىگىن ارقالاعاندىعىن تولىق ايگىلەدى، ىندەتتەن ساقتانۋ - تىزگىندەۋ قىزمەتىن ويداعىداي ىستەۋگە ءتۇبىرلى بويسۇنۋ ولشەمىن ازىرلەدى. باس شۋجي شي جينپيڭنىڭ ماڭىزدى ءسوزىنىڭ، ماڭىزدى نۇسقاۋىنىڭ رۋحىن مۇقيات ۇيرەنىپ، دايەكتىلەندىرىپ، قىزمەتتەردى بۇلجىماي ناقتى، ەگجەي - تەگجەيلى تياناقتاندىرىپ، ىندەتتەن ساقتانۋ - تىزگىندەۋ توسقاۋىل شايقاسىنىڭ جەڭىسىنە باتىلدىقپەن قول جەتكىزۋ كەرەك.
ءبىرىنشى، ساياسي دەڭگەيدى تاعى دا جوعارىلاتۋ كەرەك. تۇتاس رايوندا جوعارىدان تومەنگە دەيىن شىنايى تۇردە ”ءتورت تانىم“دى كۇشەيتىپ، ”ءتورت سەنىم“دى بەكەمدەپ، ”ەكىنى قورعاۋ“دى ورىنداپ، يدەيا مەن ارەكەتتى باتىل تۇردە باس شۋجي شي جينپيڭنىڭ ماڭىزدى نۇسقاۋىنىڭ رۋحىمەن بىرلىككە كەلتىرىپ، پارتيا ورتالىق كوميتەتىنىڭ شەشىمدەرىمەن، ورنالاستىرۋلارىمەن بىرلىككە كەلتىرىپ، حالىق بۇقاراسىنىڭ ءومىرىنىڭ حاۋىپسىزدىگى مەن دەنساۋلىعىن ءبىرىنشى ورىنعا قويۋعا تاباندى بولىپ، كەلەلى جاعداي تانىمى مەن جالپى جاعداي كوزقاراسىن شىنايى كۇشەيتىپ، پارتيا ورتالىق كوميتەتىنىڭ ءبىر تۇتاس قولباسشىلىعىنا، ءبىر تۇتاس سايكەستىرۋىنە، ءبىر تۇتاس ىڭعايلاستىرۋىنا باتىل بويسۇنىپ، بۇيرىقتى العان زامان اتتانىسقا كەلىپ، بۇيرىقتى بۇلجىتپاي اتقارىپ، ىندەتتەن ساقتانۋ - تىزگىندەۋ قىزمەتتەرىن تىڭعىلىقتى ويداعىداي ىستەۋ كەرەك.
ەكىنشى، يدەيالىق تانىمدى ونان ارى تەرەڭدەتۋ كەرەك. حاۋىپ - قاتەر تانىمىن، تاۋقىمەت تانىمىن اناعۇرلىم كۇشەيتىپ، ماسەلەنى باعدار ەتۋدى، تومەنگى شەكتە ويلاۋدى كۇشەيتىپ، ىندەت جاعدايىنىڭ دامۋ وزگەرىسىن ءجىتى قاداعالاپ، وعان دەر كەزىندە تالداۋ جاساپ، جەدەل ارەكەتتەنىپ، جاپالى، قاتەرلى بولعان سايىن، سولعۇرلىم شىنىمەن العا ۇمتىلىپ، پارتيا مەن حالىق ىسىنە وسكەلەڭ جاۋاپتى بولۋ پوزيتسياسىمەن ونان ارى شارالاردى كۇشەيتىپ، جاۋاپكەرشىلىكتى قاتايتىپ، ستيلگە بۇرىلىس جاساپ، تياناقتاندىرۋدى مىقتى يگەرىپ، ىندەتتەن ساقتانۋ - تىزگىندەۋدىڭ قىزمەتتەرىن باتىل، پارمەندى تۇردە، تيتتەي دە سالعىرتسىماي ويداعىداي ىستەۋ كەرەك.
ءۇشىنشى، ساقتانۋ - تىزگىندەۋ شاراسىن ونان ارى قاتايتۋ كەرەك. سەنىمدى بەكەمدەۋ، قيىندىقتى بىلەك بىرىكتىرە جەڭۋ، عىلمي ساقتانۋ جانە ەمدەۋ، دالمە - ءدال شارا قولدانۋ تالابىن جاپپاي دايەكتىلەندىرىپ، ىندەتتى باقىلاۋ - ولشەۋدى جانە قاينارىنان باسقارۋ - تىزگىندەۋدى كۇشەيتىپ، سوڭىنا ءتۇسىپ باسقارۋدى، مەديتسينالىق باقىلاۋدى جانە اۋاشالاۋ شاراسىن قاتاڭ تياناقتاندىرىپ، كوكتەم مەرەكەسىنەن كەيىن قايتاتىن ادامداردىڭ ىندەتتەن ساقتانۋ - تىزگىندەۋ قىزمەتىن ويداعىداي ىستەۋ؛ ناۋقاستاردى شوعىرلاندىرۋ، مامانداردى شوعىرلاندىرۋ، بايلىقتى شوعىرلاندىرۋ، قۇتقارۋ - ەمدەۋدى شوعىرلاندىرۋ پرينسيبىنە تاباندى بولىپ، سىرقاتى تۇراقتاندىرىلعان ناۋقاستاردى بار كۇشپەن قۇتقارىپ - ەمدەپ، ەمدەۋ قىزمەتكەرلەرىنىڭ حاۋىپسىزدىك قورعانۋىن ويداعىداي ىستەۋ؛ بىرلەسىپ ساقتانۋ، بىرلەسىپ تىزگىندەۋ شاراسىن قاتاڭ تياناقتاندىرىپ، الەۋمەتتىك اۋماقتاردى، اۋىل - قىستاقتاردى توركوزدەندىرىپ باسقارۋدى كۇشەيتىپ، ەندىك باعىتتا شەتىنە، بويلىق باعىتتا تاعانىنا جەتكەن، قامتىمى تىعىز ىندەتتەن ساقتانۋ - تىزگىندەۋ تورىمەن تولىق قامتۋ؛ الۋان ارنا جانە تاسىلدەرمەن ساقتانۋ - تىزگىندەۋ زاتتىق ماتەريالدار دايىندىعىن مىقتى يگەرىپ، تۇرمىستىق قاجەتتى بۇيىمدارمەن جانە سۋ، ەلەكتر، مۇناي، گازبەن قالىپتى قامداۋعا شىنايى كەپىلدىك ەتىپ، جاسىل ارنا اشىپ، زاتتىق ماتەريالدار تاسىمالىنا كەپىلدىك ەتۋ؛ ءبىر جاعىنان، ىندەتتەن ساقتانۋ - تىزگىندەۋدى يگەرۋگە، ەندى ءبىر جاعىنان، ورنىقتىلىقتى قورعاۋدى يگەرۋگە تاباندى بولىپ، تۇتاس رايوننىڭ قوعامدىق كەلەلى جاعدايىنىڭ ۇزدىكسىز ورنىقتى بولۋىنا شىنايى كەپىلدىك ەتۋ كەرەك.
ءتورتىنشى، قىزمەت جاۋاپكەرشىلىگىن ونان ارى قاتايتۋ كەرەك. پارتيا، ۇكىمەت، ارميا، ساقشى، بيڭتۋان، حالىق سايكەسىپ بىرلەسە ارەكەتتەنۋگە تاباندى بولىپ، تۇتاس شينجياڭ ”ءبىر تۇتاس جۇيە“، بيڭتۋان مەن جەرگىلىكتى ورىن ”ءبىر تۇتاس جۇيە“ دەگەنگە تاباندى بولىپ، ءار دارەجەلى پارتيا، ۇكىمەت ورىندارىنىڭ ءبىرىنشى باسشىسى ءبىرىنشى جاۋاپتى ادام بولۋ جاۋاپكەرشىلىگىن، سول سالاعا جاۋاپتى باسشىلاردىڭ تىكەلەي جاۋاپكەرشىلىگىن، قاراستى جەرلەردىڭ جاۋاپكەرشىلىگىن جانە تاراۋلاردىڭ فۋنكتسيالىق جاۋاپكەرشىلىگىن كۇشەيتىپ، اۆتونوميالى رايون، ايماق، اۋدان، اۋىل 4 دارەجەلى باسشى كادرلارىنىڭ ءبولىپ كوتەرمەگە الۋ جاۋاپكەرشىلىگىن باتىل تياناقتاندىرىپ، فورماشىلدىق پەن تورەشىلدىككە باتىل قارسى تۇرىپ جانە ودان ساقتانىپ، قۋزاۋ - تەكسەرۋ گرۋپپاسىنىڭ جانە ءتارتىپ تەكسەرۋ كوميتەتىنىڭ، باقىلاۋ - تەكسەرۋ كوميتەتىنىڭ فۋنكتسيالىق رولىن تولىق ويداعىداي ساۋلەلەندىرىپ، ىندەتتەن ساقتانۋ - تىزگىندەۋ شارالارىنىڭ تياناقتانۋىنا، ناقتىلانۋىنا شىنايى كەپىلدىك ەتۋ كەرەك. پارتيا ورتالىق كوميتەتىنىڭ شەشىمدەرىن، ورنالاستىرۋلارىن دايەكتىلەندىرۋى، تياناقتاندىرۋى دارمەنسىز بولعان، ءبىر تۇتاس قولباسشىلىققا جانە جۇمىلدىرۋعا بويسۇنباعان، وزىمشىلدىگى اۋىر بولعانداردىڭ، جاۋاپكەرلىكتى باتىل ارقامالاعان، ستيلى تۇرلاۋسىز، جالتارعان، سالعىلاسقان، ءتىپتى، الدامكوستىك ىستەگەن، مىندەتىن اتقارماعان، جاۋاپكەرسىزدىك ىستەگەندەردىڭ ءتارتىپ، زاڭ بويىنشا جاۋاپكەرشىلىگىن قۋزاستىرۋ، ولاردى جاۋاپقا تارتۋ كەرەك.
بەسىنشى، اۆانگاردتىق رولدى ونان ارى ساۋلەلەندىرۋ كەرەك. نەگىزگى ساتى پارتيا ۇيىمدارىنىڭ جاۋىنگەر قورعاندىق رولى مەن قالىڭ پارتيالى كادرلاردىڭ اۆانگارد، ۇلگىلىك رولىن تولىق جۇمىلدىرىپ، ويداعىداي ساۋلەلەندىرىپ، اۋەلگى ماقساتتى ۇمىتپاي، بورىشتى ەستە بەرىك ساقتاپ، ىندەتتەن ساقتانۋ - تىزگىندەۋدىڭ ءبىرىنشى شەبىندە باتىلدىقپەن اۋىر مىندەت ارقالاپ، اتويلاپ الدا ءجۇرىپ، ءار ۇلت بۇقاراسىن ساقتانۋ - تىزگىندەۋ قىزمەتىن تىڭعىلىقتى ىستەۋگە ىنتىماقتاستىرا باستاپ، پارتيا تۋىن ىندەتتەن ساقتانۋ - تىزگىندەۋ كۇرەسىنىڭ ءبىرىنشى شەبىندە اسقاق جەلبىرەتۋ كەرەك. ىندەتتەن ساقتانۋ - تىزگىندەۋدىڭ ءبىرىنشى شەبىندە بەينەسى كورنەكتى بولعانداردى ماداقتاۋ - ماراپاتتاۋ، جۇرەكتىلىكپەن ىستەتۋ، باعداردى ويداعىداي سومداۋ كەرەك.
التىنشى، بۇقارالىق ساقتانۋعا، بۇقارالىق تىزگىندەۋگە ونان ارى كۇش سالۋ كەرەك. قوعامدىق پىكىرگە جەتەكشىلىك ەتۋ قىزمەتىن اناعۇرلىم ويداعىداي ىستەپ، باس شۋجي شي جينپيڭنىڭ ماڭىزدى نۇسقاۋىنىڭ رۋحىن كەڭ كولەمدە، ىشكەرىلەي ۇگىتتەپ، پارتيا ورتالىق كوميتەتىنىڭ ىندەتتەن ساقتانۋ - تىزگىندەۋ قىزمەتى جونىندەگى شەشىمدەرىن، ورنالاستىرۋلارىن ۇگىتتەپ، ىندەتتەن ساقتانۋ - تىزگىندەۋ بىلىمدەرىن ۇگىتتەپ، ءار ۇلت بۇقاراسىنىڭ وركەنيەت ساپاسى مەن ءوزىن قورعاۋ قابىلەتىن جوعارىلاتىپ، تيانشاننىڭ تۇستىگى مەن تەرىستىگىندە ىندەتتەن ساقتانۋ، ىندەتكە قارسى اتتانۋ ءبىرىنشى شەبىندە ەرلىكپەن شايقاس جاساپ جاتقانداردىڭ اسەرلى ىزگى ىستەرىن جاندى اڭگىمەلەپ، اناعۇرلىم سەنىمدى كۇشەيتۋ، جۇرت كوڭىلىن جادىراتۋ، حالىق تىلەگىن ۇيىستىرۋ كەرەك. ءار ۇلت بۇقاراسىنىڭ بەلسەندىلىگىن، ىرىقتىلىعىن تولىق ساۋلەلەندىرىپ، شارالاردى ءاربىر ورىنعا، ءاربىر مالىگە، ءاربىر اۋىل - قالاشىققا، ءاربىر الەۋمەتتىك اۋماققا، ءاربىر قىستاققا، ءاربىر وتباسىنا شىنايى تياناقتاندىرىپ، بۇقارالىق ساقتانۋدىڭ، بۇقارالىق جونگە سالۋدىڭ بەرىك قورعانىس شەبىن ورناتۋ، بۇقارالىق ساقتانۋدىڭ، بۇقارالىق جونگە سالۋدىڭ قۋاتتى بىرىككەن كۇشىن ۇيىستىرۋ كەرەك.
ءماجىلىس مىنالاردى باسا دارىپتەدى: ىندەتتەن ساقتانۋ - تىزگىندەۋ قىزمەتىن ويداعىداي يگەرۋمەن بىرگە، ءبىر تۇتاس جوسپارلاپ، تەڭ ءمان بەرۋگە، عىلمي ورنالاستىرۋعا تاباندى بولىپ، ورنىقتىلىق، دامۋ، رەفورما قىزمەتتەرىن ويداعىداي ىستەپ، جاپپاي دوڭگەلەك داۋلەتتى قوعام ورناتۋدىڭ شەشۋشى جەڭىسىنە، كەدەيلىكتەن ارىلتۋدان قامال الۋدىڭ شەشۋشى شايقاسىنا جەتۋگە ساياتىن ءتۇيىندى مىندەتتەردى ويداعىداي تياناقتاندىرۋ كەرەك.
