تيانشان تورى   ›   جاڭالىقتار   ›   شينجياڭ حابارلارى

شينجياڭنىڭ حۋبەيعا كومەككە بارعان ەمدەۋ اترەتى ەمدەگەن جاڭا تيپتى ايدارشا ۆيرۋس وكپە قابىنۋىنا شالدىققان العاشقى ناۋقاس ساۋىعىپ شيپاحانادان شىقتى

  شينجياڭ گازەتىنىڭ جالپىلىق اقپارات قۇرالدارى ءتىلشىسى چاۋ جين 2 - ايدىڭ 12 - كۇنى ۇرىمجىدەن حابارلايدى. ”قۋانىشتى حابار، ءبىز ەمدەۋگە قابىلداعاننان كەيىنگى جاڭا تيپتى ايدارشا ۆيرۋس وكپە قابىنۋىنا شالدىققان العاشقى ناۋقاس كەشە ساۋىعىپ شيپاحانادان شىقتى“. 2 - ايدىڭ 12 - كۇنى شينجياڭنان 1 - توپتا حۋبەيعا كومەككە بارعان ەمدەۋ اترەتىنىڭ مۇشەسى، شينجياڭ مەديتسينا داشۋەسىنە قاراستى 2 - شيپاحانا تىنىس جولى اۋرۋلارى ءبولىمىنىڭ تەتە اعا شيپاگەرى مۋ چيڭشۋاڭ تەلەفوندا تىلشىگە وسىنى ايتتى.

  مۋ چيڭشۋاڭ ناۋقاستىڭ جۇكتى بولعانىنا 30 اپتا بولعان ايەل ەكەنىن، 1 - ايدىڭ 29 - كۇنى جاڭا تيپتى ايدارشا ۆيرۋس وكپە قابىنۋىنا شالدىققانى انىقتالىپ دياگنوز قويىلعانىن، 1 - ايدىڭ 31 - كۇنى ۋحان داشۋەسى حالىق شيپاحاناسى شىعىس شيپاحاناسىنىڭ تۋىت بولىمىنە ەمدەۋگە الىنعانىن ايتتى. ”جۇكتى ايەلدەردى ەمدەۋدىڭ قيىندىعى وعان ءدارىنى تاڭداپ ىستەتۋدە، ىندەتتى تىزگىندەۋمەن قاتار ىشتەگى بالاعا جاسايتىن ىقپالىن مۇمكىندىكتىڭ بارىنشا ازايتۋ كەرەك“. مۋ چيڭشۋاڭ بىلاي دەدى: سول ءۇشىن شينجياڭ مەديتسينا داشۋەسىنە قاراستى 5 - شيپاحانانىڭ ىشكى سەكراتسيا ءبولىمىنىڭ شيپاگەرى يۋان لي مەن ۋحان داشۋەسى حالىق شيپاحاناسى تۋىت ءبولىمىنىڭ مەڭگەرۋشىسى ۋي مين باستاعان ۇجىممەن تالاي رەت بىرلەسىپ دياگنوز قويىپ تالقى جۇرگىزدىك. بىرلەسىپ دياگنوز قويۋ ۇجىمى جۇكتى ايەلگە كەرى اسەرى ەڭ از ۆيرۋسقا قارسى دارىلەردى تاڭدادى، سونىمەن بىرگە تىنىس الۋ جۇيەسىندەگى اۋرۋ بەلگىلەرىن ءجىتى باقىلاپ، كۇتۋ جاعىندا جۇكتى ايەلدىڭ دەنە تەمپەراتۋراسى جانە ىشتەگى بالانىڭ جۇرەك سوعۋى سياقتىلاردى ءجيى باقىلاپ ولشەدىك. 2 - ايدىڭ 11 - كۇنى 12 كۇن ەمدەۋ ارقىلى نۋكلەين قىشقىلىن قايتالاي تەكسەرۋدىڭ 2 رەتكى ناتيجەسى بولىمسىز بولىپ شىعىپ، ناۋقاس مەملەكەتتىڭ ەڭ جاڭا ەمدەۋ جوباسىنداعى دياگنوزى تۇراقتاندىرىلعان ناۋقاستاردى اۋاشالاۋدى كۇشىنەن قالدىرۋ جانە شيپاحانادان شىعارۋ ولشەمىنە جەتىپ، ساۋىعىپ شيپاحانادان شىقتى.

  ”ءبىرىنشى ناۋقاس ساۋىعىپ شيپاحانادان شىققان ەكەن، ەكىنشى، ءۇشىنشى دە بولادى... وسى جولعى ىندەتتەن ساقتانۋ - تىزگىندەۋ توسقاۋىل شايقاسىنىڭ جەڭىسىنە ەرتەرەك قول جەتكىزۋگە سەنىمىمىز بار!“، - دەدى مۋ چيڭشۋاڭ تەبىرەنە.

  شينجياڭنان 3 - توپتا حۋبەيعا كومەككە بارعان ەمدەۋ اترەتىنىڭ بايلانىسشىسى لۋ چىڭ وسى ەمدەۋ اترەتىنىڭ ەمدەۋگە كىرىسىپ كەتكەنىن ءارى ۋحان داشۋەسى حالىق شيپاحاناسى شىعىس شيپاحاناسىنىڭ 2 ناۋقاستار رايونىندا قۇتقارۋ - ەمدەۋ قىزمەتىن ورىستەتكەنىن ايتتى. قازىر جاڭا تيپتى ايدارشا ۆيرۋس وكپە قابىنۋىنا شالدىققان 69 ناۋقاستى قاراپ جاتىر، بۇلار نەگىزىنەن سالماقتى ناۋقاستار، شيپاگەرلەر 2 كەزەك بولىپ جۇمىس ىستەيدى، سەسترالار 4 كەزەك بولىپ جۇمىس ىستەيدى.

  سونىمەن قاتار، شينجياڭنان 2 - توپتا حۋبەيعا كومەككە بارعان ەمدەۋ اترەتىندەگى 102 سەسترا ۋحان كىتيڭ فاڭساڭ ەمحانا C رايونىنداعى ناۋقاستاردى 3 كۇن قارادى. 2 - توپتا حۋبەيعا كومەككە بارعان ەمدەۋ اترەتىنىڭ باس جەتەكشىسى چىن حۇي قازىر وسى ”شينجياڭ اترەتى“نىڭ جاڭا تيپتى ايدارشا ۆيرۋس وكپە قابىنۋىنا شالدىققان جەڭىل ناۋقاستاردان 195 ادامدى كۇتىپ جاتقانىن، ناۋقاستار رايونىنداعى 230 توسەككە جاۋاپتى بولىپ، ناۋقاستاردى ۇزدىكسىز قاراپ جاتقانىن ايتتى.

  مۇشەلەردىڭ ناۋقاستار رايونىنداعى كۇتىمدەۋ قىزمەتىنە بار ىنتا - پەيىلىمەن كىرىسۋىنە مۇمكىندىك جاساۋ ءۇشىن، ەمدەۋ اترەتىندەگى 31 پارتيا مۇشەسى فاڭساڭ ەمحانا C رايونىنداعى ەمدەۋ قىزمەتكەرلەرى مەن ناۋقاستاردىڭ ارتقى شەپ قامتاماسىزداندىرۋ قىزمەتىن ىرىقتىلىقپەن ۇستىلەرىنە الدى، 4 كەزەك بويىنشا جۇمىس ىستەيتىن سەسترالار دا فاڭساڭ ەمحاناسىنان شىققان سوڭ زاتتىق ماتەريالداردى تاسىمالداۋعا كومەكتەسۋگە جاپا تارماعاي تىزىمدەلدى. ”ءار كۇنى وسى رايونداعى ناۋقاستاردىڭ ىشۋىنە بەرىلەتىن تازا سۋدىڭ وزىنەن 200 تۇڭدى تاسىمالداپ كىرگىزەمىز“، - دەدى چىن حۇي.

  چىن حۇي بىلاي دەدى: ”جاڭا ەمدەۋگە قابىلدانعان ناۋقاستاردىڭ ابىرجىپ مازاسىزدانىپ تۇرعانىن كوردىك، بۇگىن ءبىزدىڭ ەمدەۋ اترەتىمىزدىڭ ۋاقىتشا پارتيا ياچەيكاسىنىڭ ۇگىت جوراسى دا فاڭساڭ ەمحاناعا كىرىپ ولارعا ۇگىت - تاربيە جۇرگىزىپ، پسيحيكالىق جاقتان ءجون سىلتەپ، ناۋقاستاردى باستاپ شينجياڭ ءبيىن بيلەپ، ولاردىڭ سالاماتتى جانە بەلسەندى كوڭىل كۇيمەن ىندەتتى جەڭۋىنە مۇمكىندىكتەر جاسادى، الداعى ۋاقىتتا ەمدەۋ اترەتى ءار كۇنى ناۋقاستار رايونىندا ناۋقاستاردى ءتۇرلى دەنە شىنىقتىرۋ ارەكەتتەرىن جاساۋعا باستاماشىلدىق ەتەدى“.

  سول كۇنى فاڭساڭ ەمحانا C رايونىنداعى 70 نەشە ناۋقاستىڭ اراسىنداعى پارتيا مۇشەلەرى مەن ەمدەۋ اترەتىندەگى پارتيا مۇشەلەرى پارتياعا كىرگەندەگى سەرتتى ەسكە ءتۇسىرىپ، ىندەتكە قارسى اتتانىپ، قيىن وتكەلدەن بىرگە ءوتۋ جىگەرىن تاسقىنداتىپ، ىندەتتەن ساقتانۋ - تىزگىندەۋ توسقاۋىل شايقاسىنىڭ جەڭىسىنە جەتۋ سەنىمىن سەرپىلتتى.

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.