ونىڭ ءار كۇنى ناۋقاس بولمەسىن تەكسەرۋدەن باستالادى.
جۋىقتاعى ءبىر ايدان بەرى، ول كۇندىزگى كەزەك، تۇنگى كەزەكتى ارالاس ىستەپ، 3-دارەجەلى قورعانۋ كيمىن كيىپ، قورعانۋ كوزىلدىرىگىن تاققاندا مۇرنىنىڭ قىرى اۋىراتىن بولدى، ءار كۇنى جاڭا تيپتى ايدارشا ۆيرۋس وكپە قابىنۋى دەپ دياگنوز قويىلعان ناۋقاستاردى قايتا-قايتا باقىلايدى.
2-ايدىڭ 12-كۇنى ساعات 21دە، سۇن جىدان ءبىر كۇندىك قىزمەتىن اقىرلاستىرىپ جاتاعىنا قايتتى. ساعات 22 ۇيىنەن كەلگەن بەينە ەكران تەلەفونىن قابىلدادى، بەينە ەكراندا ۇلى: ”شەشە، ۇيگە قايتپاعانىڭا قانشا كۇن بولعانىن بىلەسىڭ بە“،-دەپ سۇرادى.
سۇن جىدان اۆتونوميالى رايوندىق جۇقپالى اۋرۋلار شيپاحاناسى شۇعىل ەمدەۋ ءبولىمىنىڭ شيپاگەرى، جۋىقتاعى ءبىر ايدان بەرى، ول قىزمەت ورنىنان تاپجىلماي، ءبىرىنشى شەپتە ”شايقاسقانىنا“ 21 كۇن بولدى.
9 جاستاعى ۇلى مەن وپەراتسيادان شىققان شەشەسىن ورنالاستىرعاننان كەيىن ءبىرىنشى شەپكە كەتتى
سۇن جىدان جونىنەن الىپ ايتقاندا، بيىلعى كوكتەم وزگەشە بولدى، ول ءسوزسىز قىزمەتتەستەرىمەن بىرگە شيپاحانانىڭ جاتاعىنا جاتىپ، ىندەتتەن ساقتانۋ-تىزگىندەۋدىڭ ءبىرىنشى شەبىندە ابىگەر بولدى.
شاعانعا قاراعان ءتۇنى، شيپاحاناعا كەلىپ ەكىنشى كۇنى جۇقپالى اۋرۋلاردان ساقتانۋ قىزمەتىن قامتاماسىزداندىرۋ جونىندەگى ۇقتىرۋىن تاپسىرىپ الدى، سۇن جىداننىڭ الدىمەن ويلاعانى: ”مەن شيپاحاناعا ءسوزسىز بارۋىم كەرەك، ءبىراق ۇلىم مەن شەشەمە قالاي ايتامىن“.
شەشەسى ەندى عانا وپەراتسيادان شىققان، ورنى ءالى جازىلماعان، ۇلى 9 جاستا عانا، جولداسى دا قىزمەت سەبەبىنەن ۋاقىتشا ۇيگە قايتا المايدى، ول قالاي ايتارىن بىلمەي قينالدى.
قىزىنىڭ ويىن تۇسىنگەن بولسا كەرەك، اناسى قاسىنا كەلىپ يىعىنان قاعىپ: ”بىرەر ءىس بولدى ما؟ بەكىگەن بولساڭ بار، ساقتانۋ مەن حاۋىپسىزدىككە كوڭىل ءبول، مەن ەشتەڭە ەتپەيمىن، نەمەرەم ماعان سەرىك بولادى“،-دەدى.
“شەشە، قاتەرلى جەرگە باراسىڭ با؟“،-دەدى ۇلى جالما-جان.
”بىرەۋ ناۋقاستانىپ قالىپتى، مەن بارىپ ەمدەيمىن، بىرنەشە كۇننەن سوڭ قايتىپ كەلەمىن“،-دەدى سۇن جىدان ءجۇزىن جاسپەن جۋعان ۇلىن جۇباتىپ.
”سەن ءبىزدىڭ كوڭىلىمىزدەگى قاھارمانسىڭ، وتباسى سەنى قاجەت ەتكەنىمەن، ناۋقاسقا ءتىپتى دە قاجەتسىڭ“،-دەدى سۇن جىداننىڭ جولداسى احۋالدان حابار تاپقاننان كەيىن تەلەفون سوعىپ.
وتباسىنداعىلارىن ورنالاستىرىپ بولىپ، ەكىنشى كۇنى سۇن جىدان ۇيىنەن اتتانىپ، شيپاحاناعا باردى.
ول جالعىز شايقاسىپ جاتقان جوق
ناۋقاس بولماسىن تەكسەرۋ، اۋرۋ تاريحىن جازۋ، رەتسەپ جازۋ... شاعاننىڭ ءبىرىنشى كۇنى جۇمىسقا شىققاننان كەيىن، سۇن جىدان شيپاحانادا قاربالاستىققا ءتۇستى، تۇستەن بۇرىن جۇمىستارىمەن ءجۇرىپ، ساعاتقا قاراعاندا بارىپ تۇسكى تاماق ۋاقىتى بولعانىن بىلەدى.
شالا-شارپى تاماقتانا سالىپ، دەمالۋعا دا ۇلگىرمەي، سۇن جىدان ءۇشىنشى دارەجەلى قورعانۋ كيمىن كيىپ، اۋاشالانعان ناۋقاس بولمەسىنە كىرىپ، ناۋقاستىڭ جاعدايىن تەكسەرەدى، ال ادەتتەگى ناۋقاس بولمەسىن ارالاۋعا ول از دەگەندە 2 ساعات جۇمسايدى. كوپتەگەن ناۋقاستاردىڭ كوڭىل-كۇيى تۇسىڭكى نەمەسە مازاسىز بولادى دا ەمدەۋ قىزمەتكەرلەرىنىڭ سابىرلىقپەن ءتۇسىندىرۋىن قاجەت ەتەدى.
”كەيبىر ناۋقاستاردىڭ جاعدايى وتە كۇردەلى، ماڭىزدى تۇيىنە كوڭىل ءبولىپ، ەگجەي-تەگجەيلى تەكسەرۋ مەن سۇراۋدى قاجەت ەتەدى، ناۋقاس بولمەسىن ارالاپ شىققاننان كەيىن، اياعىما تاس بايلانعانداي بولىپ، قاراتەرگە مالشىىپ، بىلەگىمە قورعانۋ كيمىنىڭ ءىزى ءتۇسىپ قالادى“،-دەدى سۇن جىدان، ”ءبىراق ءار جولى ناۋقاستاردىڭ ‹جاپا شەكتىڭىز› نەمەسە ‹راقىمەت› دەگەن سوزدەرىن ەستىگەندە تۇلا بويىمدى كۇش كەرنەيدى “.
كۇندىز قاربالاس بولىپ، ۋاقىت تەز وتكەندەي سەزىلەدى، ال كەشتە تۇنگى كەزەككە شىققاندا ءبىراز قينالامىن، ءتۇن ورتاسىندا ۇيقى كەلەدى، ءبىراق ءبىز رۋحتى بولۋىمىز كەرەك، ويتكەنى شۇعىل جاعدايدىڭ قاي كەزدە تۋىلاتىنىن بىلمەيمىز، ءسوزسىز سەرگەك بولۋىمىز كەرەك“،-دەدى سۇن جىدان.
سۇن جىدان ايتقانداي، بۇل ءبىر شايقاس، ءبىراق وسىنداي كوپ ادام بىرلىكتە شايقاسۋدا.
”بارلىق ادام وتە قاربالاس، بارلىعى قۇربان بەرۋدە، توزە بىلسەك بارلىعى دا جاقسى بولادى“،-دەدى سۇن جىدان.
ەڭ قۋاناتىن ءىس ناۋقاستاردىڭ شيپاحانادان شىعىپ ۇيىنە قايتۋىن كورۋ.
2-ايدىڭ 11-كۇنى، سۇن جىداننىڭ ءبىرىنشى شەپتەن تاپجىلماعانىنا 20 كۇن بولدى، شينجياڭداعى جاڭا تيپتەگى ايدارشا ۆيرۋس وكپە قابىنۋى دەپ دياگنوز قويىلعان تۇڭعىش توپتاعى 3 ناۋقاس تۇبەگەيلى ساۋىعىپ شيپاحانادان شىقتى، بۇعان ول جانە قىزمەتتەستەرى قاتتى قۋاندى. سۇن جىدان بىلاي دەدى: ”تاعى بىرنەشە ناۋقاستاردڭ جاعدايى دا بىرتىندەپ جاقسارۋدا“.
”كوپ كۇننەن بەرى جاپا شەكتىڭىزدەر، ەمدەگەندەرىڭىز بەن قارايلاسقاندارىڭىزعا راقىمەت!“. شيپاحانادان شىعاردا، ءبىر ناۋقاس تاعى دا سۇن جىدانعا كەلىپ العىس ايتتى.
ناۋقاستىڭ شيپاحانادان شىققانىن كورىپ، سۇن جىدان كەزەك الماستىرعاننان كەيىن، وسى قۋانىشتى حاباردى اسىعىس تۇردە اناسىنا جەتكىزدى.
”مەن جاڭالىقتاردى كوردىم، قىزىم جارايسىڭدار، مەنىڭ وپەراتسيادان قالعان جارام دا جازىلايىن دەدى، سەن بىزدەن الاڭداما، قىزمەتىڭدى الاڭسىز ىستە“،-دەدى اناسى تەلەفوندا قاداعالاي تاپسىرىپ.
ۇلى دا تەبىرەنە: ”شەشە، سىزدەر كەرەمەت ەكەنسىزدەر، وقۋ باستاعاننان كەيىن ساباقتاستارىما سىزدەر اۋرۋعا اراشاشى، جارالىعا مەدەت بولعان قاھارمان دەپ ايتامىن“،-دەدى.
”مەن ىندەت جاعدايىنىڭ ەرتەرەك اقىرلاسىپ، ناۋقاستاردىڭ ەرتەرەك ساۋىعىپ وتباسىنداعىلاردىڭ قاسىنا قايتۋىن ءۇمىت ەتەمىن، مەن دە وتباسىمداعىلاردىڭ قاسىنا قايتامىن“. سۇن جىدان:” ۇيگە قايتقاننان كەيىن شەشەم مەن ۇلىمدى جاقسىلاپ قۇشاقتايمىن، ولاردى قاتتى ساعىندىم“،-دەدى.
