ٴتىلشى جاۋ مەي، ەرىكتى ٴتىلشى جاڭ حىفان حابارلايدى. 2 ـ ايدىڭ 15 ـ كۇنى، ماناس مەملەكەتتىك سازدىق باقشاسىندا بىردە - ٴبىر ساياحاتشىلار مەن فوتو اپپارات اۋەسكەرلەرىنىڭ قاراسى كورىنبەدى، توپ ـ توپ اققۋلار، جاسىل باستى ۇيرەكتەر سۋدا تىنىش ٴجۇزىپ ٴجۇر. شينجياڭداعى كوپتەگەن جابايى حايۋاناتتاردىڭ ماڭىزدى قونىسىمەن ۇقساس، جاڭا تيپتى ايدارشا ۆيرۋس وكپە قابىنۋ ىندەتىمەن قارسى شايقاسۋ قىزمەتى ورىستەتىلگەننەن كەيىن، ماناس مەملەكەتتىك سازدىق باقشاسىنداعى قىزمەتكەرلەر وسى قونىستاعى جابايى حايۋاناتتارعا كۇندىز - ٴتۇنى شارلاۋ - تەكسەرۋ جانە جان - جاقتى باقىلاۋ - تىزگىندەۋ جۇرگىزدى.
«1 ـ ايدىڭ باسىنان باستاپ، فوتو اپپارات اۋەسكەرلەرى مەن ساياحاتشىلاردىڭ كەلۋىن جاپپاي توقتاتتى». ماناس مەملەكەتتىك سازدىق باقشاسىن باسقارۋ مەكەمەسى قورعاۋ ٴبولىمىنىڭ باستىعى چاي شىيۋاننىڭ ايتۋىنشا، ىندەت تۋىلعاننان كەيىن، سازدىق باقشاسى جان ـ جاقتى ساقتانۋ ـ تىزگىندەۋ تەبىنىن كۇشەيتتى، بارلىق قىزمەتكەرلەر 24 ساعات كەزەكتەسىپ قىزمەت ورىندارىنان تاپجىلمادى، تاعى 3 جەم بەرۋ ورنىن قۇردى، سونىمەن بىرگە جەم بەرۋ مولشەرىن ارتتىردى. قىزمەتكەرلەر ٴار كۇنى جوعارى ەسەلى تەلەسكوپپەن جانە ۇشقىشسىز ۇشاقپەن اققۋ، جاسىل باستى ۇيرەك سياقتى جىل قۇستارىنا شارلاۋ جۇرگىزەدى جانە باقىلايدى. «جىل قۇستارىندا، رۋحاني جاعدايى قالىپسىز بولۋ، قاۋىرسىنى قوبىراپ، سەبەبى انىقسىز ماڭقا اعۋ سياقتى اۋرۋ بەلگىلەرى بايقالسا، ٴبىز دەرەۋ جەرگىلىكتى ۇكىمەتكە جانە ٴبىر دارەجە جوعارى ورمان شارۋاشىلىعى مەن جايىلىم تاراۋلارىنا مالىمدەپ، دەرەۋ جوتكەپ ٴبىر جاقتى ەتەمىز»،- دەدى شاي شىيۋان. قىزمەتكەرلەر مەن اققۋلاردىڭ حاۋىپسىزدىگىنە كەپىلدىك ەتۋ ٴۇشىن، سازدىق باقشاسى قىزمەتكەرلەرگە، جىل قۇستارىنا نەمەسە ولاردىڭ ناجىسىنە جاقىن جۋىسقاندا ٴسوزسىز قورعانۋ كيىمىن كيىپ، قولعاپ جانە ماسكى سياقتى قورعانىس بۇيىمدارىن تاعۋدى تالاپ ەتتى.
اقسۋ مەملەكەتتىك سازدىق باقشاسىندا قىزمەتكەرلەر ٴار كۇنى باقشاداعى شارلاۋ ـ قورعاۋ تەبىنىن كۇشەيتىپ، قۇستارعا جەم بەرۋ مولشەرىن ارتتىرىپ، قۇستارعا كۇندىز ـ ٴتۇنى باقىلاۋ ـ تىزگىندەۋ جۇرگىزۋمەن بىرگە، جاياۋلار جولى سياقتى جەرلەرگە دە تۇراقتى مەرزىمدە زارارسىزداندىرۋ سۋىن شاشادى. «بىلاي ىستەۋدەگى ماقسات، باستىسى ىندەتكە جۇعىمداندىراتىن بارلىق فاكتورلاردىڭ تۋىلۋ مۇمكىندىگىن ٴۇزۋ ٴۇشىن»،- دەدى سازدىق باقشاسى تيجاراتىن باسقارۋ ٴبولىمىنىڭ قاتىستى جاۋاپتىسى.
مۇنان سىرت، شينجياڭ جابايى جىلقى ٴوسىرۋ - زەرتتەۋ ورتالىعى دا 90 جابايى جىلقىنى جيناپ، بىتەپ الىپ باسقاردى.
شينجياڭ جابايى جىلقى ٴوسىرۋ ـ زەرتتەۋ ورتالىعىنىڭ مەڭگەرۋشىسى ما شينپيڭنىڭ تانىستىرۋىنشا، ىندەت تۋىلعاننان كەيىن، بۇل اراعا كەلۋگە جانە ەكسكۋرسيالاۋعا تيىم سالىنعان. دەنە تەمپەراتۋراسىن تەكسەرۋ پۋنكتتەرى مەن اۋاشالاۋ بولمەلەرىن ارنايى قۇرىپ، ٴار كۇنى بارلىق قىزمەتكەرلەردىڭ دەنە تەمپەراتۋراسىن 2 رەت ولشەپ، جابايى جىلقىنى باعۋ رايونى، ٴشوپ قامباسى، پار قازان ٴۇيى، ەلەكتر ۇلەستىرۋ بولمەسى، كەڭسە رايونى سياقتى ٴتۇيىندى وڭىرلەرگە 2 رەت حاۋىپسىز ٴوندىرىس تەكسەرۋىن جۇرگىزىپ، زارارسىزداندىرعان.
ٴتىلشىنىڭ اۆتونوميالى رايوندىق ورمان شارۋاشىلىعى جانە جايىلىم مەكەمەسىنەن ۇعىسۋىنشا، 1 ـ ايدىڭ 29 ـ كۇنىنەن باستاپ، شينجياڭ جابايى حايۋاناتتاردى باسقارۋ - تىزگىندەۋگە قاتىستى قىزمەتتەردى ورنالاستىرىپ، ايماق، وبلىس، قالالارعا ىندەتتەن ساقتانۋ - تىزگىندەۋ مەزگىلىندە، شارلاۋ - قورعاۋ، كۇزەتۋ قىزمەتىن ونان ارى كۇشەيتىپ، جابايى حايۋاناتتاردى اۋلاۋ ارەكەتىنە باتىل تيىم سالۋدى تالاپ ەتكەن ؛ جابايى حايۋاناتتارداعى ىندەت كوزى مەن ىندەتتى باقىلاۋدى شىنايى كۇشەيتىپ، ٴتۇرلى ينفورماتسيالاردى مالىمدەۋ ٴتۇزىمىن قاتاڭ تياناقتاندىرعان . سوڭىنان، شينجياڭنىڭ ايماق، وبلىس، قالالارى جابايى حايۋاناتتاردىڭ ىندەتىنەن ساقتانۋ - تىزگىندەۋ ارەكەتىن جاپپاي ورىستەتىلگەن .
