شينحۋا اگەنتتىگىنىڭ 2 - ايدىڭ 20 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 2 - ايدىڭ 20 - كۇنى ۇسىنىس بويىنشا كورەيانىڭ زۇڭتۇڭى ۋىن زاييىنمەن تەلەفوندا سويلەستى.
شي جينپيڭ مىنالاردى اتاپ كورسەتتى: جۇڭگو حالقى جاڭا تيپتى ايدارشا ۆيرۋس وكپە قابىنۋ ىندەتىنە كۇش سالا قارسى اتتانعان توتەنشە ساتتە، زۇڭتۇڭ مىرزا ارناۋلى تەلەفون بەرىپ، حال سۇراپ، قولداۋ كورسەتەتىندىگىڭىزدى ءبىلدىردىڭىز، ەكى جاقتى قارىم - قاتىناستى تەرەڭدەتۋ جونىندە مەنىمەن پىكىر اۋىستىردىڭىز، بۇل جۇڭگو مەن كورەيانىڭ جاقىن كورشى رەتىندە ءوزارا قارايلاساتىن، قيىندىقتى بىلەك بىرىكتىرە جەڭەتىن دوستىق سۇيىسپەنشىلىگىن ايگىلەيدى.
شي جينپيڭ مىنالاردى باسا دارىپتەدى: جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان بەرى، جۇڭگو ۇكىمەتى وسكەلەڭ ءمان بەرىپ، بۇكىل ەل بولىپ جۇمىلىپ، ءبىر نيەتپەن ىنتىماقتاسىپ، ەڭ جان - جاقتى، ەڭ قاتاڭ، ەڭ تۇبەگەيلى ساقتانۋ - تىزگىندەۋ شارالارىن قولداندى. قاجىرلى قۇلشىنىس ارقىلى ىندەت جاعدايىندا بەلسەندى وزگەرىس بولدى. ىندەت جۇڭگونىڭ ۇزىن مەزگىلدىك ورنىقتى دامۋىنىڭ بەرىك نەگىزىن شايقالتا المايدى. ءبىز ىندەت ىقپالىن ەڭ تومەنگە تۇسىرۋگە قۇلشىنىپ، بەلگىلەنگەن ەكونوميكالىق، قوعامدىق دامۋ نىسانالارىن، مىندەتتەرىن جۇزەگە اسىرۋعا قۇلشىنامىز. جۇڭگو جاقتىڭ قولدانعان پارمەندى ساقتانۋ - تىزگىندەۋ شاراسى جۇڭگو حالقىنىڭ ءومىرىنىڭ حاۋىپسىزدىگى مەن دەنساۋلىعىن قورعاۋ عانا ەمەس، دۇنيە ءجۇزىنىڭ الەۋمەتتىك دەنساۋلىق ىستەرىنە دە ۇلەس قوسۋ بولىپ تابىلادى، ىندەت تۋىلعاننان بەرى، كورەيا ۇكىمەتى مەن ءارقايسى سالالارى جۇڭگو جاققا كوڭىل بولەتىندىكتەرىن، حال سۇرايتىندىقتارىن ءارى قىرۋار كومەك بەرىپ، قولدايتىندىقتارىن جابال ءبىلدىردى، ءبىز بۇعان ەرەكشە العىس ايتامىز. جۇڭگو جاق ۇزدىكسىز اشىق، جاريا پوزيتسيا ۇستانىپ، كورەيا جاقتى قامتىعان ءار ەلمەن تىلدەسۋدى، سەلبەسۋدى كۇشەيتىپ، ىندەتكە بىرگە قارسى تۇرىپ، دۇنيە ءجۇزى حالقىنىڭ سالاماتتىعىن، باقىتىن جەبەيدى.
شي جينپيڭ مىنالاردى اتاپ كورسەتتى: جۇڭگو مەن كورەيا ءوزارا جاقىن كورشى جانە سەلبەستىك سەرىك. قازىر جۇڭگو مەن كورەيانىڭ قارىم - قاتىناسى تاماشا دامۋ ارىنىن ساقتاۋدا. وتكەن جىلدىڭ سوڭىندا، مەن زۇڭتۇڭ مىرزامەن بەيجيڭدە ءديدارلاسىپ، كوپتەگەن ماڭىزدى ورتاق تانىمعا كەلدىك. ەكى جاقتىڭ جۇڭگو مەن كورەيانىڭ ستراتەگيالىق سەلبەستىك سەرىكتەستىك قارىم - قاتىناسىنىڭ اناعۇرلىم جوعارى ورەگە قادام تاستاۋىن ىلگەرىلەتۋىن ءۇمىت ەتەمىن. جاڭا تيپتى ايدارشا ۆيرۋس وكپە قابىنۋ ىندەتى جۇڭگو مەن كورەيانىڭ ەكونوميكا، ساۋدا سەلبەستىگىنە جانە ادامداردىڭ بارىس - كەلىسىنە جاساعان ىقپالى ۋاقىتتىق. ىندەتتى جەڭگەن سوڭ، جۇڭگو مەن كورەيا ەكى ەل حالقىنىڭ دوستىق سۇيىسپەنشىلىگىنىڭ تەرەڭدەپ، ەكى جاقتىڭ ءار سالاداعى بارىس - كەلىسى، سەلبەستىگى ءتىپتى دە جاندانا تۇسەتىندىگىنە كامىل سەنەمىن.
ۋىن زاييىن مىنالاردى ءبىلدىردى: كورەيا ۇكىمەتى مەن حالقى جۇڭگو حالقىنىڭ جاڭا تيپتى ايدارشا ۆيرۋس وكپە قابىنۋ ىندەتىنە ۇشىراعاندىعى جونىندە شىنايى حال سۇرايدى. كورەيا جاق جۇڭگو جاقتىڭ ىندەتكە توتەپ بەرۋدە جاساعان زور قۇلشىنىسىن بەلسەندى باعالايدى، ءتوراعا شي جينپيڭنىڭ پارمەندى باسشىلىعىندا، جۇڭگو حالقىنىڭ ءبىر نيەتپەن ىنتىماقتاسىپ، ىندەتتەن ساقتانۋ - تىزگىندەۋ توسقاۋىل شايقاسىنىڭ جەڭىسىنە، ءسوزسىز، كۇنى بۇرىن قول جەتكىزەتىندىگىنە كامىل سەنەمىن. كورەيا مەن جۇڭگو جاقىن كورشى، جۇڭگونىڭ قيىنشىلىعى كورەيانىڭ قيىنشىلىعى. كورەيا جاق باتىلدىقپەن جۇڭگو جاقپەن بىرگە بولىپ، جۇڭگو جاقتىڭ ىندەتكە قارسى اتتانۋىنا ءۇرتىس كومەك كورسەتىپ، جۇڭگو جاقپەن ىندەتتەن ساقتانۋ سەلبەستىگىن ورىستەتۋدى ءارى وسىنى وراي ەتىپ، ەكى جاقتىڭ دەنساۋلىق ساقتاۋ، سالاماتتىق سالاسىنداعى سەلبەستىكتى كۇشەيتۋدى قالايدى. ۋىن زاييىن مىنالاردى ءبىلدىردى: بيىل كورەيا مەن جۇڭگو قارىم - قاتىناسىن دامىتۋداعى ماڭىزدى ءبىر جىل، كورەيا جاق جۇڭگو جاقپەن بىرگە قۇلشىنىپ، ەكى ەلدىڭ ءار سالاداعى سەلبەستىگىن تەرەڭدەتىپ، ەكى ەل قارىم - قاتىناسىنىڭ جاڭا دامۋشىلىققا قول جەتكىزۋىن ىلگەرىلەتۋدى قالايدى.
شينحۋا اگەنتتىگىنىڭ 2 - ايدىڭ 20 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 2 - ايدىڭ 20 - كۇنى ۇسىنىس بويىنشا پاكيستاننىڭ زۇڭليى يمران حانمەن تەلەفوندا سويلەستى.
شي جينپيڭ بىلاي دەپ اتاپ كورسەتتى: جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋ جۇڭگو ۇكىمەتىنىڭ كەزەكتەگى ماڭداي الدى ءىرى ءىسى. قالىڭ ەمدەۋ قىزمەتكەرى مەن بۇكىل ەلدەگى ءار ۇلت حالقىنىڭ قاجىرلى قۇلشىنىسىندا، قازىر ىندەت جاعدايىندا بەلسەندى وزگەرىس جارىققا شىعا باستادى. وسى رەتكى ىندەتتەن ساقتانۋ - تىزگىندەۋ توسقاۋىل شايقاسىندا جەڭىسكە قول جەتكىزۋگە سەنىمىمىز، قابىلەتىمىز، قارىمىمىز بار بولىپ قانا قالماستان، ىندەتتىڭ ىقپالىن ەڭ تومەنگە ءتۇسىرىپ، بيىلعى ەكونوميكالىق، قوعامدىق دامۋ نىسانالارىن، مىندەتتەرىن دە قۇلشىنا جۇزەگە اسىرا الامىز. ءبىز قازىرگىنى تياناق ەتىپ، ىندەتتەن ساقتانۋ - تىزگىندەۋ توسقاۋىل شايقاسىنىڭ جەڭىسىنە باتىل قول جەتكىزۋمەن بىرگە، وناندا ماڭىزدىسى، الىسقا كوز جىبەرىپ، دەر كەزىندە تاجىريبە قورىتىندىلاپ، ەلەۋلى ىندەتتەن ساقتانۋ - تىزگىندەۋ ءتۇزىلىس مەحانيزمىن كەمەلدەندىرىپ، مەملەكەتتىڭ الەۋمەتتىك دەنساۋلىق ساقتاۋ بويىنشا شۇعىل جاعدايعا توتەپ بەرۋ، باسقارۋ جۇيەسىن اقاۋسىزداندىرۋىمىز كەرەك.
شي جينپيڭ مىنانى باسا دارىپتەدى: جۇڭگو - پاكيستان جان - جاقتىلى ستراتەگيالىق سەلبەستىك سەرىكتەر، ءوزارا كومەكتەسىپ تۇراتىن تاماشا داستۇرگە يە. جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان كەيىن، پاكيستان جاق ەڭ الدىمەن ءۇن قاتىپ جۇڭگو جاققا قولداۋ كورسەتىندىگىن ءبىلدىرىپ، قيىندىقتاردى جەڭىپ، قىمباتتى زاتتىق ماتەريالداردى جىلۋعا بەرىپ، ەكى ەلدىڭ بارلىق قالىپتى بارىس - كەلىسىن ساقتادى. جۋىردا ەلدەرىڭىزدىڭ حالىقتىق پارلامەنتى مەن كەڭەس پالاتاسى جەكە - جەكە قاۋلى ماقۇلداپ، جۇڭگو جاقتىڭ ىندەتكە قارسى تۇرۋىن بار كۇشپەن قولدادى. بۇگىن زۇڭلي مىرزا ارنايى تەلەفون بەرىپ حال سۇرادى جانە قولداۋ ءبىلدىردى. اماليات مىنانى تاعى ءبىر رەت دالەلدەدى: جۇڭگو - پاكيستان ەكى ەل قيىندىقتاردى بىرگە وتكەرگەن ناعىز دوستار، جاپا - ماشاقاتتى بىرگە كورگەن جاقسى اعايىندار. ءبىز جۇڭگوداعى پاكيستاندىق باۋىرلاستارعا ءوز ەلىمىزدىڭ ازاماتتارىنا مامىلە جاساعانداي جاقسى قارايلاسامىز.
شي جينپيڭ بىلاي دەپ اتاپ كورسەتتى: جۇڭگو مەن پاكيستان قارىم - قاتىناسى جوعارى دەڭگەيدە دامۋدى ساقتاپ كەلەدى. جۇڭگو جاق باستان - اياق پاكيستاندى توڭىرەكتىك ديپلوماتيادا ەڭ الدىمەن ويلاستىراتىن بەتالىس ەتىپ، پاكيستان جاقپەن بىرگە جۇڭگو - پاكيستان ەكونوميكالىق ءدالىزىن جوعارى ساپامەن بىرگە قۇرۋدى جالعاستىرادى، كەلەلى حالىقارالىق جانە وڭىرلىك ماسەلەلەردە ءوزارا قولداپ، سايكەسىپ، جۇڭگو - پاكيستان قارىم - قاتىناسىنىڭ ادامزاتتىڭ تاعدىرلاس ورتاق تۇلعاسىن ىلگەرىلەتۋدىڭ ۇلگىسى بولۋىنا مۇمكىندىك جاسايدى.
يمران حان پاكيستان ۇكىمەتى جانە حالقى اتىنان جۇڭگو حالقىنىڭ جاڭا تيپتى ايدارشا ۆيرۋس وكپە قابىنۋ ىندەتىنە ۇشىراعاندىعى جونىندە شىنايى حال سۇرادى، جۇڭگو جاقتىڭ پارمەندى شارا قولدانىپ، ىندەتكە توتەپ بەرگەندىگىن بارىنشا القادى. يمران حان مىنانى ءبىلدىردى: جۇڭگو جاقتىڭ ءونىمدى ساقتانۋ - تىزگىندەۋىمەن، ىندەت دۇنيە جۇزىنە ورشىگەن جوق. بۇكىل دۇنيە ءجۇزى جۇڭگو جاقتىڭ ىندەتكە توتەپ بەرۋدەگى قۇلشىنىستارى مەن ناتيجەلەرىنە العىس ايتادى ءارى القايدى. ەشقانداي ەل جۇڭگوداي جاقسى ىستەي المايدى. پاكيستان جاق جۇڭگو جاقتىڭ پاكيستان جاقتىڭ جۇڭگوداعى ازاماتتارىنا قاپىسىز قارايلاسقاندىعىنا جانە كومەك كورسەتكەندىگىنە العىس ايتادى، جۇڭگو جاقتىڭ ىندەتكە قارسى اتتانۋىنا ءۇرتىس كومەك كورسەتۋدى قالايدى. پاكيستان جاق جۇڭگو جاقتىڭ ىندەتتى، ءسوزسىز، جەڭەتىندىگىنە كامىل سەنەدى. قانداي جاعدايعا جولىقسا دا، بۇكىل پاكيستان حالقى بۇلجىماستان بىرگە تۋىسقان اعا - باۋىرداي جۇڭگو حالقىمەن بىرگە بولادى.
