− توڭكەرىستىك قۇربان، جاس ساقشى تۋ حايليدىڭ ءومىر جاۋابى
شينحۋا اگەنتتىگىنىڭ 2 - ايدىڭ 24 - كۇنى ۇرىمجىدەن بەرگەن حابارى (ءتىلشى لي جىحاۋ). ادام ءومىردى قالاي وتكىزۋ كەرەك؟ 13 جىلدىڭ الدىندا جاس ساقشى تۋ حايلي بۇعان ءوز جاۋابىن تاپسىردى.
ءومىرى 25 جاسپەن تىندى، ونىڭ سىناۋ قاعازى وتە قىسقا بولعانىمەن، جاۋابى جەرگە تاق ەتىپ تۇسكەن سىنتاستىڭ ۇنىندەي ۇزاققا دەيىن جاڭعىردى.
جازعىتۇرىمعى ءۇرىمجى، جەردىڭ توڭى قايتپاعان، ىزعار ءالى بار. قارلى بوران قانشا سوقسا دا، قالانىڭ وڭتۇستىك شەتىندەگى قۇرباندار قابىرىستاندىعىنىڭ ىشىندە قاراعاي - تەرەكتەر قاز - قاتار كوك تىرەپ تۇر، تۋ حايلي وسىندا ۇزاق ۇيقىدا جاتىر.
1982 - جىلى تۋ حايلي ءبىر كادر وتباسىندا ومىرگە كەلدى، اتا - اپاسى، اكە - شەشەسى تۇگەلدەي تىڭ يگەرۋشى اسكەرلەر، ول بالا كەزىنەن قاتاڭ وتباسى تاربيەسىندە بولدى.
2006 - جىلى 11 - ايدا 24 جاستاعى ول ارمانىنداعىداي شينجياڭ ءوندىرىس - قۇرىلىس بيڭتۋانى 6 - شى ۋجياچۇي قالالىق قوعام حاۋىپسىزدىگى مەكەمەسىنە ەمتيحان بەرىپ قابىلدانادى. 2007 - جىلى 2 - ايدىڭ 13 - كۇنى تۋ حايلي رەسمي حالىق ساقشىسى بولىپ، مىڭجين ساقشى بولىمشەسىندە قىزمەتىن باستايدى.
بۇل − مەملەكەتتىك تاڭداۋلى قوعام حاۋىپسىزدىگى نەگىزگى ساتى ورنى، 1 - دارەجەلى قوعام حاۋىپسىزدىگى ساقشى بولىمشەسى. وسى كوللەكتيۆكە قوسىلعانىن تۋ حايلي وتە ماقتانىش سانادى ءارى قىسىم دا سەزىندى. 2 - كۇنگى قىزمەت كۇندەلىگىنە: ”قىزمەتتى جاقسى ىستەپ، ءىس - ارەكەتىم ارقىلى تاڭداۋلى جاقسى حالىق ساقشىسى ەكەنىمدى دالەلدەيمىن!“ دەپ جازدى.
نەمەرە ۇلىنىڭ اسكەري كيىم كيگەنىن كورگەن اپايى اياۋشىلىق ءبىلدىرىپ: ”ساقشى بولعان ەكەنسىڭ، قاي - قاشان دا باس اماندىعىڭا كوڭىل ءبولۋىڭ كەرەك“ دەپ ەسكەرتىپ ەدى، ”ۇيتسەك قايتىپ بولادى؟ ساقشى بولعان ادام شۇعىل جاعدايدا اتويلاپ الدا جۇرمەي مە، ايتپەسە ساقشى بولۋدىڭ كەرەگى نە؟“، - دەپ جاۋاپ بەردى تۋ حايلي.
تۋ حايليدىڭ باتىرلىعى مەن ادىلەتشىلدىگى تۋمىسىنان بويىندا بار سىڭايلى.
2007 - جىلى 2 - ايدىڭ 17 - كۇنى كەشتە تۋ حايلي كەزەكشىلىك مىندەتتە تۇرادى. ول ءبي زالىندا ون شاقتى ادامنىڭ توبەلەسىپ جاتقانىن مالىمدەگەن تەلەفوندى قابىلدايدى. ول قىزمەتتەسىمەن بىرگە دەرەۋ ۋاقيعا تۋعان جەرگە جەتىپ بارسا، ءبىر جاعى 7 ادام، ءبىر جاعى 9 ادام بولىپ، 2 توپ توبەلەسىپ جاتادى، اۋەلى كەيبىرەۋلەرى پىشاعىن جالاقتاتىپ جۇرەدى.
تۋ حايلي ادىمداي باسىپ الدىنا بارىپ، ەڭ قانقۇيلى بىرەۋىنىڭ قولىنداعى پىشاقتى تارتىپ الادى. ابىر - سابىردان پايدالانعان بىرەۋى پىشاعىن تاعى ءبىر جاققا سىلتەپ، ىلە - شالا تۇرا قاشادى. تۋ حايلي 100 مەترگە دەيىن كوشەگە قۋالاپ بارىپ ونى ۇستاپ الادى.
جالعىز ءوزى 16 ادامعا توتەپ بەردى! ساقشى بولىمشەسىنە قايتقان قىزمەتتەسىنىڭ وسىنى ويلاعان سايىن بويىن ۇرەي باستى. سول كۇن ونىڭ ساقشى بولىمشەسىنە كەلىپ قىزمەت ىستەگەنىنىڭ 4 - كۇنى. قاراپايىم، ءمۇلايىم، قايىرىمدى، مەيىربان... بۇل وتباسىنداعىلاردىڭ، ۇستازدارىنىڭ، كورشىلەرىنىڭ تۋ حايليگە بەرگەن باعاسى.
اكەسى مەڭگەرمە دارەجەلى كادر بولعانىمەن، ساباقتاس، دوستارىنان بۇنى بىلەتىندەر تىم از ەدى. اۋەلى، ونىڭ باسشىسى، مىڭجين ساقشى بولىمشەسىنىڭ ورىنباسار باستىعى چىن نانىڭ ءوزى تۋ حايلي قۇربان بولعاننان كەيىن عانا ونىڭ وتباسى جاعدايىنان حابار تابادى.
مەيلى وقۋدا بولسىن، الدە قىزمەتتە بولسىن، تۋ حايلي ءار كۇنى ۇيىنە قايتقاندا، قىزمەتىنە باراردا تۇگەلدەي اۆتوبۋزعا تۇسەدى، اكەسىنىڭ قىزمەت كولىگىنە ەجەلدەن وتىرعان ەمەس.
2007 - جىلى 7 - ايدىڭ 13 - كۇنى ساعات 18دە، مىڭجين ساقشى بولىمشەسىنە 12 − 13 جاستاعى ءبىر ورەننىڭ مىڭجين توعانى جاعاسىندا ويناپ ءجۇرىپ ابايسىزدا اساۋ اعىنعا ءتۇسىپ كەتىپ، ومىرىنە حاۋىپ تونگەنى جونىندە مالىمەت كەلىپ تۇسەدى. ءبىر حالىق ساقشىسى مەن 3 كومەكشى ساقشى جەدەل قۇتقارۋعا اتتانادى.
وسى كەزدە كەڭسەدەگى كومپيۋتەرگە ماتەريال كىرگىزىپ وتىرعان تۋ حايلي ەستي سالا جۇگىرىپ شىعىپ، بىرگە بارۋدى تالاپ ەتەدى. قىزمەتتەستەرى وعان: ”2 اي بويى ۇيىڭە قايتپادىڭ، بولىمشە سەنى ۇيىڭە قايتۋعا ورنالاستىردى عوي؟ سەن بارماي - اق قوي“، - دەيدى.
تۋ حايلي كولىككە سەكىرىپ شىعىپ، ”ادام كوبەيسە، كۇش تە كوبەيەدى، جۇرەيىك!“، - دەيدى.
توعان جاعاسىنا جەتكەندە، ولار جوعارى اعىستان قالقىپ اعىپ كەلە جاتقان بالانى كورەدى. تۋ حايلي تومەن قاراي توعاندى جاعالاپ جۇگىرە باسىپ، كيىمدەرىن شەشەدى. ونىڭ سۋعا ءتۇسىپ بالانى قۇتقارۋعا وڭتايلانعانىن كورگەن قىزمەتتەسى ابىرجي: ”اعىن قاتتى ەكەن، ءتۇسۋ قاتەرلى!“ دەپ ايقايلايدى.
”ۇلگىرمەيمىز، بالانى قۇتقارۋدان ءۇمىت بار!“ دەيدى دە، تۋ حايلي ورەكپي اعىپ جاتقان سۋعا سەكىرىپ ءتۇسىپ، اعىپ بارا جاتقان ورەننىڭ بەلىنەن ۇستاپ، ونى جاعاعا قاراي يتەرەدى، ءبىراق تەبىندى سۋ بوي بەرمەيدى، ەڭ سوڭىندا مۇزداي سۋىق توعان سۋى راقىمسىزدىقپەن ونى مەن ورەندى جۇتىپ اكەتەدى.
7 - ايدىڭ 17 - كۇنى تۇستەن بۇرىن جاڭبىر سىركىرەي جاۋىپ تۇردى، 20 مىڭنان استام قالا حالقى تۇس - تۇستان جەتىپ، جاڭبىرلاتا ءجۇرىپ وسى ءبىر جاس ساقشىنى جەر قوينىنا تاپسىردى. ساقشى بولعانىنا نە بارى 5 اي بولعاندا، ول وسىنداي ەرلىگىمەن ادامدار اراسىنا ءوز باسىنىڭ قامىمەن ساناسپاي، ادام قۇتقارعان بيىك تۇلعاسىن كەسكىندەپ كەتتى.
قاراپايىم ءبىر ساقشى وفيتسەر وسىلاي اتتاندى، سوڭىنا جالىندى، ايبىندى سوزدەر تاستاماسا دا، ادامدار اراسىنا باعا جەتپەس مىنەز - قۇلىق قالدىرىپ كەتتى.
ول قايتىس بولعاننان كەيىن، قوعام حاۋىپسىزدىگى مينيسترلىگى وعان مەملەكەتتىك قوعام حاۋىپسىزدىگى جۇيەسىندەگى 2 - دارەجەلى قاھارمان ۇلگىسى اتاعىن تولىقتاپ بەردى، كوممۋنيستىك جاستار وداعى ورتالىق كوميتەتى وعان مەملەكەتتىك تاڭداۋلى وداق مۇشەسى اتاعىن تولىقتاپ بەردى، بيڭتۋان پارتكومى ونى كوممۋنيستىك پارتيا مۇشەسى دەپ تانىدى، بيڭتۋان قوعام حاۋىپسىزدىگى مەكەمەسى پارتكومى وعان جەكە 1 - دارەجەلى ەڭبەك تولىقتاپ جازدى، اۆتونوميالى رايوندىق حالىق ۇكىمەتى وعان توڭكەرىستىك قۇربان داڭقتى اتاعىن تولىقتاپ بەردى.
