شينحۋا اگەنتتىگىنىڭ 2 - ايدىڭ 28 - كۇنى بەيجيڭنەن بەرگەن حابارى. 2020 - جىلى 2 - ايدىڭ 28 - كۇنى كەشتە مەملەكەت ءتوراعاسى شي جينپيڭ ۇسىنىس بويىنشا كۋبانىڭ مەملەكەت ءتوراعاسى دياس كارنەلامەن تەلەفوندا سويلەستى.
شي جينپيڭ بىلاي دەپ اتاپ كورسەتتى: جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان كەيىن، ءبىرىنشى شۋجي راۋل جانە ءسىز ماعان دەر كەزىندە تەلەگرامما جولداپ، حال سۇرادىڭىزدار، ءسىز تاعى جۇڭگونىڭ كۋبادا تۇراتىن ەلشىلىگىنە ارناۋلى بارىپ، جۇڭگو جاقتى قولدايتىندىعىڭىزدى ءبىلدىردىڭىز، بۇل جۇڭگو مەن كۋبانىڭ تەرەڭ ءداستۇرلى دوستىعىن تولىق ايگىلەدى. كۋبا جاق دۇنيە جۇزىلىك دەنساۋلىق ساقتاۋ ۇيىمىنىڭ كاسىپتىك پىكىرى بويىنشا، ەكى ەلدىڭ قالىپتى بارىس - كەلىسىن، سەلبەستىگىن قورعاۋعا تاباندى بولدى، بۇل جۇڭگو جاقتىڭ ساقتانۋ - تىزگىندەۋ قىزمەتىنە دەگەن قۇرمەتى جانە سايكەسۋى، جۇڭگو جاق كۋبا جاقتىڭ جانە ءوزىڭىزدىڭ جۇڭگو جاقتىڭ ىندەتكە قارسى اتتانعان قۇلشىنىسىن تۇسىنگەندىگىن جانە قولداعاندىعىن بارىنشا القايدى.
شي جينپيڭ بىلاي دەپ باسا دارىپتەدى: جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان كەيىن، مەن ءوزىم قولباسشىلىق ەتىپ، ورنالاستىرۋ جاسادىم، بۇكىل ەل جوعارىدان تومەنگە دەيىن جۇدىرىقتاي جۇمىلىپ، ەل بىرلىگىنەن بەرىك قامال تۇرعىزىپ، ەڭ جان - جاقتى، ەڭ قاتاڭ، ەڭ تۇبەگەيلى ساقتانۋ - تىزگىندەۋ شاراسىن قولداندى. ءبىز ەرتە بايقاۋ، ەرتە مالىمدەۋ، ەرتە اۋاشالاۋ، ەرتە ەمدەۋ سىندى ساقتانۋ - تىزگىندەۋ تالابىن جانە ناۋقاستاردى شوعىرلاندىرۋ، مامانداردى شوعىرلاندىرۋ، بايلىقتى شوعىرلاندىرۋ، قۇتقارۋ - ەمدەۋدى شوعىرلاندىرۋداي قۇتقارۋ - ەمدەۋ تالابىن ورتاعا قويىپ، ەمدەۋگە الۋ مولشەرى مەن ەمدەپ ساۋىقتىرۋ مولشەرىن جوعارىلاتۋدى، جۇعىمدالۋ مولشەرى مەن اۋرۋدان ءولۋ مولشەرىن تومەندەتۋدى كورنەكتى مىندەت رەتىندە يگەردىك. جاپالى قۇلشىنىستىڭ ارقاسىندا، كەزەكتە ىندەتتەن ساقتانۋ - تىزگىندەۋ اۋقىمىندا ءتيىمدى جاققا قاراي جاقسارۋ بەتالىسى كەڭەيۋدە. ءبىزدىڭ وسى رەتكى ىندەتتەن ساقتانۋ - تىزگىندەۋ توسقاۋىل شايقاسىنىڭ جەڭىسىنە قول جەتكىزۋگە تولىق سەنىمىمىز، قابىلەتىمىز، قارىمىمىز بار.
شي جينپيڭ بىلاي دەپ باسا دارىپتەدى: بۇل رەتكى ىندەتتەن ساقتانۋ - تىزگىندەۋ كۇرەسى بارىسىندا، ءبىز باستان - اياق ادامزاتتىڭ تاعدىرلاس ورتاق تۇلعاسى ۇستانىمىنان جازباي، اشىق، جاريا، جاۋاپتى بولۋ پوزيتسياسىن نەگىزگە الىپ، دۇنيە جۇزىلىك دەنساۋلىق ساقتاۋ ۇيىمىمەن جانە حالىقارالىق قوعاممەن دەر كەزىندە ينفورماتسيانى بىرگە ءبولىسىپ، ءار جاقتىڭ ءجىتى قاداعالاپ وتىرعان ىستەرىنە بەلسەنە جاۋاپ بەرىپ، حالىقارالىق سەلبەستىكتى كۇشەيتىپ، ىندەتتىڭ دۇنيە جۇزىنە كەڭەيۋىنەن، ورشۋىنەن ساقتانۋعا قۇلشىندىق. ءبىز تاعى پارمەندى شارا قولدانىپ، كۋبا ازاماتتارىن قامتىعان ءار ەلدىڭ جۇڭگوداعى ادامدارىنىڭ سالاماتتىعى مەن حاۋىپسىزدىگىن قامتاماسىز ەتتىك. جۇڭگو جاقتىڭ ساقتانۋ - تىزگىندەۋ قىزمەتى دۇنيە جۇزىلىك دەنساۋلىق ساقتاۋ ۇيىمىنىڭ جانە حالىقارالىق قوعامنىڭ بەلسەندى باعاسىنا يە بولدى. جۇڭگو جاق كۋبا جاقپەن ەمدەۋ، ءدارى - دارمەك جانە ىندەتتەن ساقتانۋ - تىزگىندەۋ سالاسىندا اۋىس - كۇيىستى، سەلبەستىكتى ۇزدىكسىز ورىستەتۋدى قالايدى.
شي جينپيڭ بىلاي دەپ اتاپ كورسەتتى: جۇڭحۋا ۇلتى تاريحتا تالاي تاۋقىمەتتى باستان كەشىرگەن، ءبىراق ەشقاشان ەڭسەسىن تۇسىرمەگەن. ىندەتتىڭ جۇڭگونىڭ ەكونوميكاسىنا سوققىسى قىسقا مەرزىمدى، جۇڭگو ەكونوميكاسىنىڭ ۇزاق ۋاقىت جاقسارۋداي نەگىزگى جاعى وزگەرگەن جوق. ءبىز ىندەتتەن ساقتانۋ - تىزگىندەۋدى جانە ەكونوميكالىق، قوعامدىق دامۋدى ءبىر تۇتاس جوسپارلاپ ىلگەرىلەتىپ، ساقتانۋ - تىزگىندەۋ قىزمەتىن ناقتى، ەگجەي - تەگجەيلى يگەرۋمەن بىرگە، ءبىر قىدىرۋ ساياسات - شارالار قولدانىپ، ءوندىرىس، تۇرمىس ءتارتىبىن بىرتىندەپ قالپىنا كەلتىرىپ، بيىلعى ەكونوميكالىق، قوعامدىق دامۋ نىسانالارى مەن مىندەتتەرىن جۇزەگە اسىرۋعا شىنايى كەپىلدىك ەتۋگە قۇلشىنامىز. ءبىز بۇعان تولىق سەنىمدەمىز.
شي جينپيڭ بىلاي دەپ باسا دارىپتەدى: جۇڭگو مەن كۋبا قيىندىقتى بىلەك بىرىكتىرە جەڭەتىن، ءبىرىن - ءبىرى سۇيەنىش ەتەتىن جاقسى دوستار، جاقسى جولداستار، جاقسى باۋىرلاستار، جۇڭگو - كۋبا قارىم - قاتىناسى تار جول، تايعاق كەشۋلەردىڭ سىنىنان وتكەن، ۋاقىت وتكەن سايىن جاڭارىپ، ومىرشەڭدىك كۇشىن ماڭگى ساقتايدى. جۇڭگو كوممۋنيستىك پارتياسى مەن جۇڭگو ۇكىمەتى كۋبا جاقتىڭ ءوز ەلىنىڭ مەملەكەت جاعدايىنا ۇيلەسەتىن سوتسياليزم جولىمەن ءجۇرۋىن بۇرىنعىداي قولدايدى، كۋبانىڭ مەملەكەتتىڭ يەلىك ۇقىعىن قورعاۋ، سىرتتىڭ كيلىگۋىنە قارسى تۇرۋ ادىلەتتى كۇرەسىن قولدايدى ءارى كۋباعا شاماسىنىڭ جەتىسىنشە ۇزدىكسىز قولداۋ كورسەتۋدى جانە كومەك بەرۋدى قالايدى. بيىل جۇڭگو مەن كۋبانىڭ ديپلوماتيالىق قارىم - قاتىناس ورناتقاندىعىنىڭ 60 جىلدىعى، ءبىز كۋبا جاقپەن بىرگە قاتىستى قۇتتىقتاۋ قيمىلدارىن ويداعىداي وتكىزۋدى ءارى وسىنى وراي ەتىپ، ەكى ەل قارىم - قاتىناسىنىڭ دامۋى قول جەتكىزگەن تابىستى تاجىريبەلەردى قورىتىندىلاپ، جاڭا تاريحي باستامادا ءار سالاداعى بارىس - كەلىستىڭ، سەلبەستىكتىڭ جاڭا ساتىعا كوتەرىلۋىن ىلگەرىلەتۋدى قالايمىز.
دياس كارنەلا مىنالاردى ءبىلدىردى: كۋبا جاق جۇڭگو جاقتىڭ ىندەتكە قارسى اتتانۋداعى قۇلشىنىسىن بارىنشا القايدى ءارى باتىل قولدايدى، جۇڭگو جاقتىڭ جۇڭگوداعى كۋبا ازاماتتارىنا كومەكتەسكەندىگىنە جانە قامقورلىق جاساعاندىعىنا العىس ايتادى. جۇڭگو جاق قاتاڭ ىندەت سىن - سايىسى الدىندا، بۇكىل ەل بويىنشا جوعارىدان تومەنگە دەيىن ءبىر نيەتپەن ىنتىماقتاسىپ، تەز ارادا پارمەندى شارا قولدانىپ، بىرتىندەپ بەلسەندى ونىمدىلىككە قول جەتكىزىپ، پارمەندى ۇيىمداستىرۋ، جۇمىلدىرۋ قابىلەتىن تولىق كورسەتتى، سوتسياليستىك ءتۇزىمنىڭ زور ابزالدىلىعىن ايگىلەدى. جۇڭگو جاق دەر كەزىندە ءونىمدى توتەپ بەرىپ، ىندەتتىڭ دۇنيە ءجۇزى كولەمىندە ورشۋىنەن ساقتانۋعا كورنەكتى ۇلەس قوستى، بۇل بىرلەسكەن مەملەكەتتەر ۇيىمىن جانە دۇنيە جۇزىلىك دەنساۋلىق ساقتاۋ ۇيىمىن قامتىعان حالىقارالىق قوعامنىڭ وسكەلەڭ القاۋىنا يە بولدى. شي جينپيڭ جولداستى ۇيتقى ەتكەن جۇڭگو كوممۋنيستىك پارتياسىنىڭ پارمەندى باسشىلىعىندا، جۇڭگو جاقتىڭ قۇدىرەتتى جالپىلىق مەملەكەت قۋاتىنا، سونداي - اق 2003 - جىلعى سارس ىندەتىنە قارسى اتتانۋدا توپتاعان تاجىريبەسىنە سۇيەنىپ، ءسوز جوق، ىندەتتى تۇبەگەيلى جەڭەتىندىگىنە سەنەمىن. كۋبا جاق وسى ءبىر قيىن - قىستاۋ كەزەڭدە جۇڭگو جاقپەن باتىل بىرگە بولادى ءارى جۇڭگولىق باۋىرلاستارعا قاي - قاشان دا شاماسىنىڭ جەتىسىنشە كومەكتەسۋدى قالايدى. كۋبا جاق جۇڭگو جاقتىڭ ۇزاق ۋاقىتتان بەرى كۋبانىڭ ادىلەت ىسىنە كورسەتكەن قولداۋىنا جانە كۋبانىڭ دامۋىنا، قۇرىلىسىنا بەرگەن كومەگىنە شىن جۇرەكتەن العىس ايتادى، كۋبا مەن جۇڭگونىڭ ءداستۇرلى دوستىعىن ۇزدىكسىز بەكەمدەپ، كۋبا مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 60 جىلدىعىن وراي ەتىپ، ءار سالاداعى ناقتى ىستەر سەلبەستىگىن كەڭەيتىپ، تەرەڭدەتىپ، ەكى جاقتى قارىم - قاتىناستى ىلگەرىلەتۋدە اناعۇرلىم زور دامۋشىلىققا قول جەتكىزۋدى، ەكى ەل حالقىنا باقىت جاراتۋدى قالايدى.
شينحۋا اگەنتتىگىنىڭ 2 - ايدىڭ 28 - كۇنى بەيجيڭنەن بەرگەن حابارى. 2020 - جىلى 2 - ايدىڭ 28 - كۇنى كەشتە مەملەكەت ءتوراعاسى شي جينپيڭ ۇسىنىس بويىنشا چيليدىڭ زۇڭتۇڭى پينەرامەن تەلەفوندا سويلەستى.
شي جينپيڭ بىلاي دەپ اتاپ كورسەتتى: بۇل رەتكى جاڭا تيپتى ايدارشا ۆيرۋس وكپە قابىنۋ ىندەتى جاڭا جۇڭگو قۇرىلعاننان بەرى تۋىلعان تارالۋ جىلدامدىعى ەڭ تەز، جۇعىمدالۋ كولەمى ەڭ كەڭ، ساقتانۋ - تىزگىندەۋ قيىندىعى ەڭ زور بولعان ءبىر رەتكى ەلەۋلى توسىن الەۋمەتتىك دەنساۋلىق ساقتاۋ وقيعاسى. ىندەت تۋىلعاننان كەيىن، مەن ءوزىم قولباسشىلىق ەتىپ، ورنالاستىرۋ جاسادىم، بۇكىل ەل جوعارىدان تومەنگە دەيىن جۇدىرىقتاي جۇمىلىپ، ەل بىرلىگىنەن بەرىك قامال تۇرعىزىپ، ەڭ جان - جاقتى، ەڭ قاتاڭ، ەڭ تۇبەگەيلى ساقتانۋ - تىزگىندەۋ شاراسىن قولداندى. جاپالى قۇلشىنىستىڭ ارقاسىندا، ىندەتتەن ساقتانۋ - تىزگىندەۋ اۋقىمىنىڭ ءتيىمدى جاققا قاراي جاقسارۋ بەتالىسى كەڭەيۋدە. ءبىزدىڭ وسى رەتكى ىندەتتەن ساقتانۋ - تىزگىندەۋ توسقاۋىل شايقاسىنىڭ جەڭىسىنە قول جەتكىزۋگە تولىق سەنىمىمىز، قابىلەتىمىز، قارىمىمىز بار.
شي جينپيڭ بىلاي دەپ باسا دارىپتەدى: بۇل رەتكى ىندەتكە قارسى اتتانۋ كۇرەسىندە، جۇڭگو جاق باستان - اياق ادامزاتتىڭ تاعدىرلاس ورتاق تۇلعاسى ۇستانىمىنان جازباي، اشىق، جاريا، جاۋاپتى بولۋ پوزيتسياسىن نەگىزگە الىپ، دۇنيە جۇزىلىك دەنساۋلىق ساقتاۋ ۇيىمىمەن جانە حالىقارالىق قوعاممەن دەر كەزىندە ينفورماتسيانى بىرگە ءبولىسىپ، ءار جاقتىڭ ءجىتى قاداعالاپ وتىرعان ىستەرىنە بەلسەنە جاۋاپ بەرىپ، حالىقارالىق سەلبەستىكتى كۇشەيتىپ، ىندەتتىڭ دۇنيە جۇزىنە كەڭەيۋىنەن، ورشۋىنەن ساقتاندى. دۇنيە جۇزىلىك دەنساۋلىق ساقتاۋ ۇيىمى جانە حالىقارالىق قوعام جۇڭگو جاقتىڭ ساقتانۋ - تىزگىندەۋ قىزمەتىن بەلسەندى باعالادى. چيليدى قامتىعان كوپتەگەن ەل ۇكىمەتتەرى مەن حالقى ءتۇرلى جولدارمەن جۇڭگو جاقتى بار كۇشپەن قولدادى، ءبىز بۇعان شىن جۇرەكتەن العىس ايتامىز.
شي جينپيڭ بىلاي دەپ اتاپ كورسەتتى: جۇڭحۋا ۇلتى تاريحتا تالاي تاۋقىمەتتى باستان كەشىرگەن، ءبىراق ەشقاشان ەڭسەسىن تۇسىرمەگەن. ىندەتتىڭ جۇڭگونىڭ ەكونوميكاسىنا سوققىسى قىسقا مەرزىمدى، جالپى جاقتان مەڭگەرۋگە بولادى، جۇڭگو ەكونوميكاسىنىڭ ۇزاق ۋاقىت جاقسارۋداي نەگىزگى جاعى وزگەرگەن جوق. ءبىز ساقتانۋ - تىزگىندەۋ قىزمەتىن تيتتەي دە بوساڭسىماي مىقتى، ناقتى، ەگجەي - تەگجەيلى يگەرۋمەن بىرگە، ءبىر قىدىرۋ ساياسات - شارالار قولدانىپ، ءوندىرىس، تۇرمىس ءتارتىبىن بىرتىندەپ قالپىنا كەلتىرىپ، بيىلعى ەكونوميكالىق، قوعامدىق دامۋ نىساناسى مەن مىندەتتەرىن جۇزەگە اسىرۋعا شىنايى كەپىلدىك ەتۋگە قۇلشىنامىز.
شي جينپيڭ بىلاي دەپ باسا دارىپتەدى: جۇڭگو مەن چيلي ءوزارا جان - جاقتى ستراتەگيالىق سەرىكتەس، ەكى ەلدىڭ قارىم - قاتىناسى ۇزاق ۋاقىت بويى جۇڭگو - لاتىن امەريكاسى قارىم - قاتىناسىنىڭ الدىڭعى لەگىندە كەلەدى. بىلتىر زۇڭتۇڭ مىرزا جۇڭگودا تابىستى ساپاردا بولىپ، مول تابىسقا قول جەتكىزدى. بيىل جۇڭگو مەن چيليدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعى، ءبىز وسىنى وراي ەتىپ، جوعارى جىكتەگىلەردىڭ ءجيى بارىس - كەلىس بەتالىسىن ساقتاپ، ديپلوماتيالىق قارىم - قاتىناس ورناتقاندىعىنىڭ 50 جىلدىعىن قۇتتىقتاۋ قيمىلدارىن ويداعىداي وتكىزىپ، ”ءبىر بەلدەۋ، ءبىر جولدى“ بىرگە قۇرۋدى جوعارى ساپامەن ىلگەرىلەتۋدى تۇتقا ەتىپ، ساۋدا، قارجى قوسۋ، عىلىم - تەحنيكادا جاڭالىق اشۋ، نەگىزدىك قۇرىلعى قۇرىلىسى سياقتى سالالارداعى سەلبەستىكتى كەڭەيتۋىمىز، سونىمەن بىرگە، كوپ جاقتىلىقتى ۇزدىكسىز باتىل قورعاپ، ساۋدا، قارجى قوسۋدىڭ ەركىن بولۋىن جانە قولايلى بولۋىن ىلگەرىلەتىپ، كليمات وزگەرىسى سياقتى الەمدىك سىن - سايىسقا بىرگە توتەپ بەرىپ، جۇڭگو - چيلي دوستىعىن ويداعىداي جالعاستىرىپ، جۇڭگو - چيلي سەلبەستىگىن ويداعىداي دامىتىپ، ەكى ەل حالقىن اناعۇرلىم باقىتقا كەنەلدىرۋىمىز كەرەك.
پينەرا چيلي ۇكىمەتى مەن حالقى اتىنان جۇڭگو حالقىنىڭ جاڭا تيپتى ايدارشا ۆيرۋس وكپە قابىنۋ ىندەتىنە ۇشىراۋ بايلانىسىمەن شىنايى حال سۇرادى، جۇڭگو حالقىنىڭ ءبىر نيەتپەن ىنتىماقتاسىپ ىندەتكە قارسى اتتانعاندىعىن باتىل قولدايتىندىعىن ءبىلدىردى. پينەرا مىنالاردى ءبىلدىردى: جۇڭگو كوممۋنيستىك پارتياسى مەن جۇڭگو ۇكىمەتىنىڭ پارمەندى باسشىلىعىندا، جۇڭگو جاق ءونىمى كورنەكتى توتەپ بەرۋ شاراسىن قولداندى، ىندەتتىڭ ءورشۋ جاعدايى بىرتىندەپ تىزگىندەلدى. جۇڭگو تاريحتا تالاي تاۋقىمەتتى باستان كەشىرگەن ۇلى ەل، بۇرىن سانسىزداعان قيىنشىلىقتار مەن جاپا - ماشاقاتتى جەڭگەن. ءتوراعا شي جينپيڭنىڭ پارمەندى باسشىلىعىندا، جۇڭگو جاقتىڭ، ءسوز جوق، ىندەتتى كۇنى بۇرىن تۇبەگەيلى جەڭەتىندىگىنە سەنەمىن. چيلي جاق جۇڭگو جاقپەن سەلبەستىكتى كۇشەيتىپ، جۇقپالى اۋرۋ سىن - سايىسىنا بىرگە توتەپ بەرىپ، الەمدىك الەۋمەتتىك دەنساۋلىق ساقتاۋ حاۋىپسىزدىگىن قورعاۋدى قالايدى. چيلي جاق جۇڭگومەن قارىم - قاتىناسىن دامىتۋدى ءوز ديپلوماتياسىندا باستان - اياق الدىمەن ەسكەرۋ بەتالىسى ەتەدى، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن وراي ەتىپ، ءتۇرلى سالاداعى سەلبەستىكتى تەرەڭدەتىپ، ”ءبىر بەلدەۋ، ءبىر جولدى“ بىرگە قۇرۋدى ىلگەرىلەتىپ، كوپ جاقتىلىقتى بىرگە قورعاپ، حالىقارالىق ىستەردە سايكەستىكتى كۇشەيتىپ، چيلي - جۇڭگو قارىم - قاتىناسىنىڭ جاڭا ساتىعا كوتەرىلۋىن ىلگەرىلەتۋدى قالايدى.
