پارتيا مەن مەملەكەتتىڭ باسشى جولداستارى باستاماشىلدىقپەن جىلۋ اتادى
شينحۋا اگەنتتىگىنىڭ 3 - ايدىڭ 2 - كۇنى بەيجيڭنەن بەرگەن حابارى. اۋىر جاعدايدى تىزە قوسا وتكەرىپ، ۋاقىتتىق قيىنشىلىقتى جەڭەيىك، ەل بىرلىگىنەن بەرىك قامال تۇرعىزىپ، جالماۋىز ىندەتپەن شايقاسايىق. جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان بەرى، ورتالىق پەن مەملەكەت ورگاندارىنداعى ءارقايسى تاراۋلار، ورىندار دەرەۋ اتتانىسقا كەلىپ، ىندەتتەن ساقتانۋ - تىزگىندەۋ توسقاۋىل شايقاسىنا بار كۇشپەن ات سالىسۋمەن بىرگە، قالىڭ پارتيا مۇشەلەرى اراسىندا ءوز ەركىمەن جىلۋ اتاۋدى بەلسەنە ورىستەتىپ، جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ قىزمەتىن قولدادى.
پارتيا ورتالىق كوميتەتىنىڭ قالىڭ پارتيا مۇشەلەرىنە شىعارعان ۇندەۋىنە ءۇن قوسىپ، شي جينپيڭ قاتارلى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشە جولداستارى تاياۋدا جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ قىزمەتىن قولداۋ ءۇشىن جىلۋ اتادى. پارتيا مەن مەملەكەتتىڭ باسقا دا باسشى جولداستارى، سونداي - اق باسشىلىق قىزمەت مىندەتىنەن شەگىنگەن ساقا جولداستار دا باستاماشىلدىقپەن جىلۋ اتاپ، ىندەتتەن ساقتانۋ - تىزگىندەۋ كۇرەسىنىڭ ءبىرىنشى شەبىندە كۇرەسىپ جاتقان ەمدەۋ قىزمەتكەرلەرى، نەگىزگى ساتىداعى كادرلار مەن بۇقارا، قوعام حاۋىپسىزدىگى حالىق ساقشىلارى جانە الەۋمەتتىك اۋماق قىزمەتكەرلەرى سياقتىلارعا شىنايى قامقورلىعىن ءبىلدىردى، قالىڭ حالىق بۇقاراسىن جاپا - ماشاقاتتان تايسالماي، ەل بىرلىگىنەن قامال تۇرعىزىپ، وسى رەتكى ىندەتتەن ساقتانۋ - تىزگىندەۋ حالىقتىق شايقاسىنىڭ، جالپى تۇلعالىق شايقاسىنىڭ، توسقاۋىل شايقاسىنىڭ جەڭىسىنە قۇلشىنا قول جەتكىزۋگە ىنتالاندىردى.
سوڭعى كۇندەرى، ورتالىق پەن مەملەكەت ورگاندارىنداعى ءارقايسى تاراۋلاردىڭ، ورىنداردىڭ پارتيا ۇيىمدارى پارتيا مۇشەلەرىن ءوز ەركىمەن جىلۋ اتاۋعا، مەيىر جەتكىزۋگە جابال ۇيىمداستىرىپ، ىدەتتەن ساقتانۋ - تىزگىندەۋ قىزمەتىن ءىس جۇزىندىك ارەكەتتەرىمەن قولدادى. جىلۋ اتاۋعا ات سالىسقان ورتالىق پەن مەملەكەت ورگاندارىنداعى پارتيا مۇشەلەرى اراسىندا، باسشى كادرلار دا، قاراپايىم جۇمىسشى - قىزمەتكەرلەر دە بار؛ دەمالىسقا، پەنسياعا شىققان ساقا جولداستار دا، جاڭادان قىزمەتكە قاتىناسقان جاستار دا بار. كەيبىر جولداستار ۇيىندە اۋاشالانىپ جاتسادا، جاعدايدان حابار تاپقاننان كەيىن دەرەۋ تەلەفون، ينتەرنەت سياقتى تاسىلدەر ارقىلى قىزمەتتەستەرىنە وزدەرى اتىنان جىلۋ اتاۋدى تابىستادى؛ كەيبىر جولداستاردىڭ وتباسىنداعىلار وسى رەتكى ىندەتتە ناۋقاسقا شالدىقسا دا، جىلۋ اتاۋعا بەلسەنە ات سالىستى؛ كەيبىر جولداستاردىڭ وتباسى جاعدايى تومەندەۋ بولعانىمەن، اقشا اتاعاندا تيتتەي دە ءارى - ءسارى بولمادى. شەتەلدە تۇراتىن ءارقايسى قۇرىلىمدارداعى پارتيالى كادرلار دا ارت - ارتىنان كومەك قولدارىن سوزىپ، جات جۇرتتا جۇرسە دە، ەل ىشىندەگى ىندەتتەن ساقتانۋ - تىزگىندەۋگە مەيىر باعىشتادى. ورتالىق پەن مەملەكەت ورگاندارىنداعى كادرلار، جۇمىسشى - قىزمەتكەرلەر جابال مىنانى ءبىلدىردى: پارتيا ورتالىق كوميتەتىنىڭ، مەملەكەتتىك كەڭەستىڭ پارمەندى باسشىلىعىندا، قوعامداعى ءار سالانىڭ قالتقىسىز كومەگىندە، حالىق بۇقاراسىنىڭ ورتاق قۇلشىنىسىندا، ءبىز ىندەتتەن ساقتانۋ - تىزگىندەۋ سىندى وسى قاتاڭ شايقاستىڭ جەڭىسىنە، ءسوز جوق، قول جەتكىزە الامىز.
