حالىق گازەتىنىڭ شولۋشىسى
”سۇراپىل تولقىندا ەگەي ەرلەر ەرەكشە كوزگە تۇسەدى“. سىزدەر اجالعا اراشاشى، جارالىعا مەدەت بولۋدى، ۇلى سۇيىسپەنشىلىكتە شەك - شەكارا بولمايتىندىعىن شىن مانىندە ورىندادىڭىزدار. سىزدەر ارايلى شۇعىلانىڭ ەلشىسىسىزدەر، ءۇمىتتىڭ ەلشىسىسىزدەر، ەڭ كورىكتى پەرىشتەسىزدەر، ناعىز قاھارمانسىزدار! پارتيا مەن حالىق سىزدەرگە العىس ايتادى!
3 - ايدىڭ 10 - كۇنى باس شۋجي شي جينپيڭ حۋبەي ولكەسىنىڭ ۋحان قالاسىنا ارنايى بارىپ، ىندەتتەن ساقتانۋ - تىزگىندەۋ قىزمەتىن تەكسەرىپ، ءبىرىنشى شەپتە ەرلىكپەن كۇرەس جاساپ جاتقان ەمدەۋ قىزمەتكەرلەرىنە وسكەلەڭ باعا بەرىپ، قىزۋ القاپ، ولاردى ”جاڭا داۋىردەگى ەڭ سۇيىكتى ادامدارسىزدار“ دەپ اتادى. باس شۋجي بىلاي دەپ اتاپ كورسەتتى: حۋبەي مەن ۋحان حالقى ىندەتتىڭ سوققىسىنا ۇشىراعان قىسىلتاياڭ كەزدە، قالىڭ ەمدەۋ قىزمەتكەرلەرى قاجىر - قايرات جۇمساپ، قايسارلىقپەن سايىسىپ، قالتقىسىز ۇلەس قوسىپ، ەمدەۋ قىزمەتكەرلەرىنىڭ مەيىرىمدى وسكەلەڭ رۋحىن ايگىلەپ، جاڭا داۋىردەگى ەمدەۋ قىزمەتكەرلەرىنىڭ تاماشا وبرازىن ايگىلەپ، جۇڭگونى اسەرلەندىردى، دۇنيە ءجۇزىن اسەرلەندىردى. كەزەكتە ىندەتتىڭ ءورشۋ، تارالۋ جاعدايى نەگىزىنەن تىزگىندەلدى، ىندەت جاعدايى بىرتىندەپ جاقسارۋعا بەت الدى. بۇل بۇكىل پارتيانىڭ، بۇكىل ەلدىڭ، بۇكىل قوعامنىڭ بىرگە قۇلشىنۋىنىڭ، ىنتىماقتاسا كۇرەس جۇرگىزۋىنىڭ ناتيجەسى، سىزدەر ەڭبەگى ەرەن ۇلەسكەرلەرسىزدەر، پارتيا مەن حالىق باس ەڭبەكتى سىزدەرگە جازادى!
ىندەت تۋىلعاننان بەرى، باس شۋجي شي جينپيڭ اۋەل باستان - اق حالىق بۇقاراسىنىڭ ءومىرىنىڭ حاۋىپسىزدىگى مەن دەنساۋلىعىن ءبىرىنشى ورىنعا قويۋدى ايقىن تالاپ ەتتى، پارتيا ورتالىق كوميتەتى قولدانعان بارلىق ساقتانۋ - تىزگىندەۋ شارالارى، ەڭ اۋەلى، اسا زور قۇلشىنىس جاساپ، اناعۇرلىم كوپ بۇقارانى جۇعىمدالۋدان ساقتاۋدى، مۇمكىندىكتىڭ بارىنشا اناعۇرلىم كوپ ناۋقاستىڭ ءومىرىن قۇتقارۋدى ويلاستى. سۇراپىل كەلگەن ىندەت الدىندا، تۇتاس حۋبەي ولكەسىندەگى جانە ارميانى قامتىعان بۇكىل مەملەكەتتىڭ جەر - جەرىنەن حۋبەيعا كومەككە بارعان ەمدەۋ اترەتىنىڭ مۇشەلەرى مۇزداي قارۋلانىپ، شايقاسقا اتتانىپ، ەشنارسەدەن تايسالماي، ادىلەت جولىندا ەشتەڭەدەن تايىنباي، ۇرەيدەن جاسقانباي، ىندەتتەن ساقتانۋ - تىزگىندەۋ، قۇتقارۋ - ەمدەۋ قىزمەتىنە ات سالىسىپ، ەرەكشە قاجىرلىلىق كورسەتۋ، ەرەكشە شايقاس جاساۋ رۋحىن ساۋلەلەندىرىپ، كۇنى - ءتۇنى ەرلىكپەن شايقاسىپ، باسىن ءباي تىگىپ، ماڭىزدى تاپسىرمانى ارقالاپ، بورىشتارىن وتەپ، ۋاقىتپەن جارىسىپ، ىندەت ازابىمەن ايقاسىپ، شايقاس شەبىندەگى ەل تىرەگى رولىن ساۋلەلەندىرىپ، ۋحاننىڭ ىندەتتەن ساقتانۋ - تىزگىندەۋ قىزمەتىنە ماڭىزدى ۇلەس قوستى. وسى ءتۇتىنسىز شايقاستا ءبىرىنشى شەپتەگى ەمدەۋ قىزمەتكەرلەرى ايرىقشا جاپا شەگىپ، ويلاۋعا دا كەلمەيتىن دەنساۋلىق جانە پسيحيكالىق قىسىمعا توزۋدە، كەيبىرەۋلەرى، وكىنىشكە وراي، ۆيرۋسپەن جۇعىمدالدى، ءتىپتى، قىزمەت ۇستىندە قازا بولىپ، قىمباتتى ءومىرىن ارنادى. ولار ناۋقاستارعا ءۇمىت اكەلدى، شۋاق شاشتى، ولاردىڭ ىزگى ىستەرى ادامدى اسەرلەندىرەدى، جىرلاۋعا تاتيدى، ولار ايتسا ايتقانداي ەڭ كورىكتى پەرىشتە، ناعىز قاھارمان، جاڭا داۋىردەگى ەڭ سۇيىكتى ادامدار!
التىن وتتا، ەر مايداندا سىنالادى. وسى رەتكى قاتاڭ شايقاس بارىسىندا قالىڭ ەمدەۋ قىزمەتكەرلەرى ءبىرىنشى شەپتە قايسارلىق كورسەتىپ، ۇزدىكسىز كۇرەس جاساپ، ءومىردى قورعاۋ، اجالعا اراشاشى، جارالىعا مەدەت بولۋ، بوداۋسىز ۇلەس قوسۋ، ۇلى سۇيىسپەنشىلىكتە شەك - شەكارا بولماۋ سىندى كاسىپتىك رۋحتى ايگىلەپ، قاتەردەن قورىقپايتىن، ەشنارسەدەن تايسالمايتىن، جۇرەكتىلىكپەن العا ۇمتىلاتىن، وزگەلەردى قۇتقارۋدا ءوزىن ارنايتىن جاۋاپكەرشىلىك ارقالاۋدى كورنەكتىلەندىرىپ، قايسار ەرىك قاسيەتىن ايگىلەپ، قۋاتتى رۋحاني كۇشىن بايقاتتى. ولاردىڭ اراسىنان حالىق ”90 - جىلداردىڭ تۋمالارىنىڭ“، ”2000 - جىلداردىڭ تۋمالارىنىڭ“ تۇلعاسىن كوردى، اسىرەسە، حۋبەيعا كومەككە بارعان 42 مىڭنان ارتىق ەمدەۋ قىزمەتكەرلەرىنىڭ اراسىندا 12 مىڭنان ارتىعى ”90 - جىلداردىڭ تۋمالارى“، مۇنىڭ ىشىندە باسىم كوبى ”95 - جىلدان كەيىنگى تۋمالار“، ءتىپتى، ”2000 - جىلدان كەيىنگى تۋمالار“. ولار جاپا - ماشاقاتتان قورىقپاي، قۇربان بەرۋدەن قورىقپاي، جۇرەكتىلىكپەن اۋىر مىندەت ارقالاپ، سىننان ءوتىپ، ءىس جۇزىندىك ارەكەتتەرى ارقىلى جاس داۋرەننىڭ جاۋاپكەرشىلىگىن، جاۋاپكەرشىلىكتى ۇستىنە الۋىن جانە قۇنىن دالەلدەدى، قاھارماندىق ەرلىك ىستەرى ارقىلى جاڭا داۋىردەگى جۇڭگو جاستارىنىڭ ۇلگىسىن تىكتەدى.
”ءدارى ىستەتۋ اسكەر ىستەتۋگە ۇقسايدى، شيپاگەر ىستەتۋ جياڭجۇن ىستەتۋگە ۇقسايدى“. ەمدەۋ قىزمەتكەرلەرى − ىندەت جەڭىسىنە جەتۋدىڭ تىرەكتى كۇشى، ەمدەۋ قىزمەتكەرلەرىنىڭ سالاماتتىعى − ىندەتتى جەڭۋدىڭ ماڭىزدى كەپىلى. ولاردى قورعاۋعا، ايالاۋعا، ءسوز جوق، وسكەلەڭ ءمان بەرۋىمىز كەرەك. ءار دارەجەلى پارتكوم مەن ۇكىمەت ولارعا كوڭىل ءبولىپ، قامقورلىق جاساۋى، قاتىستى تاراۋلار قورعانۋ زاتتىق ماتەريالدارىمەن، تۇرمىستىق زاتتىق ماتەريالدارىمەن قامتاماسىز ەتۋدى ويداعىداي تياناقتاندىرىپ، ەڭبەكاقى مامىلەسىن، ۋاقىتتىق ەڭبەكاقى كومەك قاراجاتىن، دەنساۋلىق ساقتاۋ، ىندەتتەن ساقتانۋ ۇستەمە قاراجاتى مامىلەسىن ويداعىداي تياناقتاندىرىپ، ءبىرىنشى شەپتەگى ەمدەۋ قىزمەتكەرلەرىنە قامقورلىق جاساۋ، ايالاۋ ساياساتتىق شارالارىن تەز ارادا شىعارىپ، كوپشىلىكتىڭ قام - قايعىدان ارىلۋىنا كومەكتەسىپ، كوپشىلىكتىڭ كوكىرەك كەرنەگەن رۋحاني كۇيمەن قىزمەتكە كىرىسۋىنە شىنايى كەپىلدىك ەتۋ كەرەك.
ىندەتتەن ساقتانۋ - تىزگىندەۋ شەشۋشى كەزەڭگە ءوتتى، قالىڭ ەمدەۋ قىزمەتكەرلەرى مىعىم قايراتقا كەلىپ، قاجىماس قايسارلىق كورسەتىپ، ەڭ سوڭعى جەڭىسكە جەتكەنگە دەيىن تاباندىلىق كورسەتۋ كەرەك. ەمدەۋ - قۇتقارۋ قىزمەتى ءالى دە ماڭداي الدى ورىندا، عىلمي، دالمە - ءدال ەمدەۋ - قۇتقارۋ جاعىنا كۇش سالىپ، ابزال ەمدەۋ بايلىقتارىن جانە تەحنيكالىق كۇشتەردى شوعىرلاندىرىپ ناۋقاستاردى قۇتقارىپ، ەمدەپ، ەمدەپ ساۋىقتىرۋ مولشەرىن ەڭ جوعارى دەڭگەيگە جەتكىزىپ، اۋرۋدان ءولۋ مولشەرىن بارىنشا تومەندەتىپ، قۇتقارۋ - ەمدەۋ ورەسىن جوعارىلاتۋعا قۇلشىنىس جاساۋ كەرەك. ”پارتيا ورتالىق كوميتەتى مەن بۇكىل ەل حالقى ماڭگى سىزدەرمەن بىرگە، ماڭگى سىزدەردىڭ بەرىك قالقاندارىڭىز!“ باس شۋجي شي جينپيڭنىڭ بەكەم ءسوزى قالىڭ ەمدەۋ قىزمەتكەرلەرىنە سەنىم جانە كۇش سيلادى، ءبىز قالىڭ ەمدەۋ قىزمەتكەرلەرىنىڭ پارتيا مەن حالىق جۇكتەگەن قاسيەتتى بورىشتى، ءسوزسىز، ورىندايتىنىنا كامىل سەنەمىز!
(شينحۋا اگەنتتىگىنىڭ 3 - ايدىڭ 12 - كۇنى بەيجيڭنەن بەرگەن حابارى)
