شينجياڭ گازەتىنىڭ جالپىلىق اقپارات قۇرالدارى ءتىلشىسى لۋ فىڭباۋ، ما ينيڭ 3 - ايدىڭ 12 - كۇنى ۇرىمجىدەن حابارلايدى. قالىپتى ءوندىرىس، تۇرمىس ءتارتىبىنىڭ جاپپاي قالپىنا كەلۋىنە ىلەسە، رايونىمىزدا تەمىر جول، حالىقتىق اۆياتسيا، تاس جول قاتىناسى جاپپاي قالپىنا كەلىپ ىسكە قوسىلدى، جۇرت ەركىن جۇرگەن، كولىكتەر ەركىن قاتىناعان، زات ىركىلىسسىز تاسىمالدانعان كورىنىس قايتا جارىققا شىقتى.
”سالەمەتسىز بە، دەنە تەمپەراتۋراڭىزدى ولشەتىڭىز“، - دەدى 3 - ايدىڭ 12 - كۇنى تۇستەن بۇرىن، تەمىر جول ءۇرىمجى ۆوكزالىنداعى قىزمەتكەر ۆوكزالعا كىرگەن جولاۋشىعا. پويەز كۇتۋ ۇلكەن زالىندا قىزمەتكەرلەر زارارسىزداندىرۋ جۇرگىزۋدە، سونداي - اق اۋا الماستىرۋ، تازالاۋ سياقتى قىزمەتتەردى جاقسى ىستەۋدە.
3 - ايدىڭ 11 - كۇنىنەن باستاپ، شينجياڭ تەمىر جولى شينجياڭ ىشىندەگى جولاۋشىلار پويەزى قاتىناسىن كەڭ كولەمدە قالپىنا كەلتىردى، مۇندا موتورلى ۆاگوندار قۇراماسى مەن قالىپتى جىلدامدىقتاعى جولاۋشىلار پويەزى قامتىلدى. شينجياڭنان شىعاتىن جولاۋشىلار پويەزى 12 جۇپقا، شينجياڭ ىشىندەگى جولاۋشىلار پويەزى 66.5 جۇپقا جەتىپ، شينجياڭعا كىرىپ - شىعاتىن جولاۋشىلار ۇزدىكسىز ارتتى.
حالىقتىق اۆياتسيا جاعىندا، وڭتۇستىك اۆياتسيا شينجياڭ بولىمشە سەرىكتەستىگى تاسىمال قۋاتىن ارتتىرۋعا كۇش سالىپ، اۆياتسيا لەنياسىن، كەزەكشى ۇشاقتاردى دەر كەزىندە قالپىنا كەلتىردى. 3 - ايدان باستاپ، ۇرىمجىدەن قاشقار، حوتان، اقسۋ سياقتى جەرلەرگە قاتىنايتىن شينجياڭ ىشىندەگى نەگىزگى لەنيالار اۋەلگى كۇنىنە 2 كەزەكتەگىدەن كۇنىنە 4 − 6 كەزەككە كوبەيتىلدى، التاي، كۇچار، كورلا سياقتى وڭتۇستىك، سولتۇستىك شينجياڭداعى ءارقايسى تارماق لەنيالارداعى كەزەكشى ۇشاقتار دا قالپىنا كەلتىرىلدى؛ ۇرىمجىدەن شينجياڭ سىرتىنداعى قالالارعا قاتىنايتىن اۆياتسيا لەنيالارىنىڭ سانى، سونداي - اق ۇشاتىن كەزەكشى ۇشاقتار جيىلىگى دەرلىك زور مولشەردە ارتتى؛ حۋابەي وڭىرىندە بەيجيڭ، شي - ان، حىفي، جينان، لانجوۋ اۆياتسيا لەنيالارىن جيىلەتۋ نەگىزىندە، تيانجين، كوكحوت، داليان، چاڭچۇن سياقتى اۆياتسيا لەنيالارىن قالپىنا كەلتىردى، سونىمەن بىرگە بەيجيڭ اۆياتسيا لەنياسىنا B787 كەڭ تۇلعالى جولاۋشىلار ۇشاعىن قوستى؛ حۋادۇڭ وڭىرىندە جىڭجوۋ، شاڭحاي حۇڭچياۋ اۆياتسيا لەنياسىن جيىلەتۋ نەگىزىندە، شاڭحاي پۋدۇڭ، نانياڭ، ي - ۋ، يىنچۋان، شۇيجوۋ، ۋىنجوۋ، نانجيڭ سياقتى اۆياتسيا لەنيالارىن قالپىنا كەلتىردى؛ جۇڭنان وڭىرىندە گۋاڭجوۋ، چىڭدۋ، چۇڭچيڭ، حايكوۋ اۆياتسيا لەنيالارىن جيىلەتۋ نەگىزىندە، چاڭشا، شىنجىن، جۋحاي سياقتى اۆياتسيا لەنيالارىن قالپىنا كەلتىردى، سونىمەن بىرگە، قارامايلى - جىڭجوۋ - گۋاڭجوۋ، التاي - جىڭجوۋ - گۋاڭجوۋ، سونداي - اق قاشقار - اقسۋ - چۇڭچيڭ، حوتان - كورلا - چىڭدۋ سياقتى شينجياڭ ىشىندەگى وڭىرلەردەن شىعىس لەنياداعى قالالارعا توتە ۇشاتىن كەزەكشى ۇشاقتاردى دا قالپىنا كەلتىردى.
شينجياڭ ىشىندەگى تارماق لەنياداعى اۆياتسياعا ارناۋلى دەن قوياتىن حۋاشيا اۆياتسيا جارنا شەكتى سەرىكتەستىگى 3 - ايدىڭ 10 - كۇنىنەن باستاپ شينجياڭ اۆياتسيا لەنياسىن قالپىنا كەلتىرىپ، شينجياڭ ىشىندەگى ءارقايسى قالالاردىڭ اۋەدەگى بايلانىسىن اشتى. جۇڭگو حالىقارالىق اۆياتسيا جارنا شەكتى سەرىكتەستىگى سول كۇننەن باستاپ شينجياڭ ىشىندەگى، شينجياڭ سىرتىنداعى اۆياتسيا لەنيالارىن قالپىنا كەلتىردى.
تاس جول جولاۋشىلار تاسىمالى جاعىندا، قازىر شينجياڭ ىشىندەگى جولاۋشىلار تاسىمال لەنيالارى قالىپتى قاتىناستى قالپىنا كەلتىردى، قالالار ارا، اۋداندار ارا، اۋدان ىشىندەگى جولداردا جولاۋشىلار اۆتوبۋزى جولاۋشى تاسىپ كوزەۋلى جەرلەرىنە اتتاندى. حوتان ايماعىن مىسالعا الساق، ءارقايسى اۋدان، قالا اراسىنداعى جولاۋشى تاسىمالى بۇكىلدەي قالپىنا كەلدى، حوتان شىعىس قالا ماڭى بەكەتى، حوتان باتىس قالا ماڭى بەكەتى، حوتان وڭتۇستىك قالا ماڭى بەكەتى جانە حوتان ۇزاق جولدى اۆتوبۋز بەكەتى 3 - ايدىڭ 1 - كۇنىنەن باستاپ قالىپتى قاتىناسىن قالپىنا كەلتىردى. جوعارى قارقىندى تاس جولدار ىركىلىسسىز قاتىناستى ساقتادى. قازىرگە دەيىن، رايونىمىزداعى 68 جوعارى قارقىندى تاس جولدا قىزمەت وتەۋ اۋماعى قالىپتى ىسكە قوسىلدى، اۆتونوميالى رايوننىڭ قاتىناس - تاسىمال تاراۋلارى اپات وڭاي تۋىلاتىن جول بولىكتەرىندەگى شارلاۋ - تەكسەرۋ جيىلىگىن ارتتىرىپ، تاس جولداردىڭ حاۋىپسىزدىگىنە، ىركىلىسسىزدىگىنە شىنايى كەپىلدىك ەتتى.
