شينحۋا اگەنتتىگىنىڭ 3 - ايدىڭ 12 - كۇنى بەيجيڭنەن بەرگەن حابارى. 3 - ايدىڭ 12 - كۇنى كەشتە مەملەكەت ءتوراعاسى شي جينپيڭ ۇسىنىس بويىنشا بىرلەسكەن مەملەكەتتەر ۇيىمىنىڭ باس حاتشىسى گۋتەرەسپەن تەلەفوندا سويلەستى.
شي جينپيڭ بىلاي دەپ اتاپ كورسەتتى: جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان كەيىن، باس حاتشى مىرزا ماعان حات جولداپ حال سۇرايتىندىعىن ءبىلدىرىپ، جۇڭگو جاقتىڭ قولدانعان ساقتانۋ - تىزگىندەۋ شارالارىن بەلسەندى باعالادى، سونداي - اق كوپ رەت اشىق ءسوز سويلەپ جۇڭگونىڭ ىندەتكە قارسى اتتانۋداعى قۇلشىنىستارىن قولدادى، جۇڭگولىقتار ”شىن سۇيىسپەنشىلىك قيىن كۇندەردە سىنالادى“ دەيدى، مەن سىزگە العىس بىلدىرەمىن. جاپالى قۇلشىنىستار ارقىلى جۇڭگونىڭ ەل ىشىندە ىندەتتەن ساقتانۋ - تىزگىندەۋ جاعدايىندا ۇزدىكسىز جاقسارعان، ءوندىرىس - تۇرمىس ءتارتىبى تەز قالپىنا كەلگەن جاعداي جارىققا شىقتى. كەلەسى قادامدا، ءبىز باستان - اياق ساق بولىپ، ىندەتتەن ساقتانۋ - تىزگىندەۋدى كۇشەيتىپ، ۇزدىكسىز مىقتاپ يگەرەمىز، ناقتى يگەرەمىز، ەگجەي - تەگجەيلى يگەرەمىز، سونىمەن بىرگە، ەكونوميكالىق، قوعامدىق دامۋ قىزمەتتەرىن مىقتاپ يگەرە وتىرىپ ىلگەرىلەتەمىز. جۇڭگو حالقى، ءسوز جوق، وسى ىندەتتى جەڭەدى ءارى، ءسوز جوق، مەجەدەگى ەكونوميكالىق، قوعامدىق دامۋ نىسانالارىن جۇزەگە اسىرا الادى، مەنىڭ بۇعان سەنىمىم كامىل.
شي جينپيڭ بىلاي دەپ باسا دارىپتەدى: جۇڭگو حالقىنىڭ جاپالى قۇلشىنىسى دۇنيە جۇزىندەگى ءار ەلدىڭ ىندەتتەن ساقتانۋ - تىزگىندەۋى ءۇشىن قىمباتتى ۋاقىت ۇتىپ، ماڭىزدى ۇلەس قوستى. سوڭعى ۋاقىتتا، ىندەت كوپ ەلدە، كوپ جەردە تۋىلىپ، جاعداي ادامدى الاڭداتتى. حالىقارالىق قوعام جەدەل ارەكەتتەنىپ، بىرلەسىپ ساقتانۋدىڭ، بىرلەسىپ تىزگىندەۋدىڭ حالىقارالىق سەلبەستىگىن ءونىمدى ورىستەتىپ، ىندەتتى جەڭۋدىڭ قۋاتتى بىرىككەن كۇشىن ۇيىستىرۋى كەرەك. جۇڭگو جاق قاتىستى مەملەكەتتەرمەن ساقتانۋ - تىزگىندەۋ تاجىريبەلەرىن ءبولىسىپ، ءدارى - دارمەك جانە ۆاكسينانى بىرلەسىپ زەرتتەپ اشۋدى، سونداي - اق ىندەت تارالا باستاعان كەيبىر مەملەكەتتەرگە قولىنان كەلگەنىنشە كومەك كورسەتۋدى قالايدى. جۇڭگو جاق بىرلەسكەن مەملەكەتتەر ۇيىمىنىڭ، دۇنيە جۇزىلىك دەنساۋلىق ساقتاۋ ۇيىمىنىڭ حالىقارالىق قوعامدى ساياساتتىق سايكەسۋدى كۇشەيتىپ، بايلىق ۇسىنىلىمىن ارتتىرىپ، اسىرەسە، الەۋمەتتىك دەنساۋلىق ساقتاۋ جۇيەسى ءالسىز وركەندەپ كەلە جاتقان ەلدەردىڭ ساقتانۋ جانە توتەپ بەرۋ دايىندىعىن جاقسى ىستەۋىنە كومەكتەسۋگە اتتانىسقا كەلتىرۋىن قولدايدى. جۇڭگو دۇنيە جۇزىلىك دەنساۋلىق ساقتاۋ ۇيىمىنا 20 ميلليون دوللار جىلۋ اتاپ، دۇنيە جۇزىلىك دەنساۋلىق ساقتاۋ ۇيىمىنىڭ ىندەتكە قارسى اتتانۋدىڭ حالىقارالىق ارەكەتىن ورىستەتۋىن قولدايتىندىعىن جاريالادى.
شي جينپيڭ بىلاي دەپ باسا دارىپتەدى: جاڭا تيپتى ايدارشا ۆيرۋس وكپە قابىنۋ ىندەتىنىڭ تۋىلۋى ادامزاتتىڭ بەينەت پەن زەينەتتى بىرگە وتكەرىپ كەلە جاتقان تاعدىرلاس ورتاق تۇلعا ەكەندىگىن تاعى ءبىر رەت ءتۇسىندىردى. ەكونوميكا جاھاندانعان داۋىردە، مۇنداي ەلەۋلى توسىن ۋاقيعالار ەڭ سوڭعى رەت تۋىلىپ وتىرعان جوق، ءتۇرلى ءداستۇرلى حاۋىپسىزدىك جانە داستۇردەن تىسقارى حاۋىپسىزدىك ماسەلەلەرى تىڭ سىن - سايىستاردى تاعى ۇزدىكسىز الا كەلەتىن بولادى. حالىقارالىق قوعام، ءسوز جوق، ادامزات تاعدىرلاس ورتاق تۇلعا تانىمىن ورناتىپ، ءبىر - بىرىنە قارايلاسىپ، حاۋىپ - قاتەر، سىن - سايىستارعا قول ۇستاسا بىرگە توتەپ بەرىپ، كورىكتى جەر شارى مەكەنىن بىرگە قۇرۋ كەرەك. بيىل بىرلەسكەن مەملەكەتتەر ۇيىمى قۇرىلعاندىعىنىڭ 75 جىلدىعى، ءبىز حالىقارالىق قوعامنىڭ وسىنى وراي ەتىپ، كوپ جاقتىلىق جونىندەگى ۋادەسىن قايتالاي دارىپتەپ، بىرلەسكەن مەملەكەتتەر ۇيىمىن وزەك ەتكەن الەمدىك جونگە سالۋ جۇيەسىن كۇشەيتۋىن جانە كەمەلدەندىرۋىن قولدايمىز. جۇڭگو جاق بىرلەسكەن مەملەكەتتەر ۇيىمىنىڭ قىزمەتىن ۇزدىكسىز قولدايدى.
گۋتەرەس مىنالاردى ءبىلدىردى: مەن جۇڭگودا جاڭا تيپتى ايدارشا ۆيرۋس وكپە قابىنۋىنا شالدىققان ناۋقاستاردىڭ قاۋىرت ازايعانىنا ەرەكشە قۋاندىم ءارى مۇنى قۇتتىقتايتىنىمدى بىلدىرەمىن. مەن جۇڭگونىڭ بەرىك بەكىمى مەن قۋاتتى توزىمدىلىگى ارقىلى ىندەتتى تەز ارادا جەڭىپ عانا قالماستان، ونىڭ ۇستىنە ەكونوميكالىق ءتارتىپتى تەز قالپىنا كەلتىرەتىندىگىنە سەنەمىن، بۇل جۇڭگو حالقىنىڭ مۇددەسىنە پايدالى بولىپ قالماستان، دۇنيە ءجۇزى ءۇشىن دە ماڭىزدى ۇلەس قوسقاندىق. بىرلەسكەن مەملەكەتتەر ۇيىمى جۇڭگو جاقتىڭ قازىر قيىن جاعدايدا تۇرعان مەملەكەتتەردىڭ ىندەتكە قارسى اتتانۋىنا كومەك كورسەتكەنىنە العىس ايتادى، جۇڭگونىڭ وركەندەپ كەلە جاتقان ەلدەرمەن ىندەتتەن ساقتانۋ - تىزگىندەۋ تاجىريبەلەرىن بولىسكەندىگىن، سونداي - اق ەمدەۋ زاتتىق ماتەريالدارى جانە ۆاكسينا، ءدارى - دارمەك سياقتى جاقتاردا قىمباتتى كومەكتەرمەن قامداعاندىعىن القايدى. جۇڭگونىڭ قولداۋى كوپ جاقتىلىق ءۇشىن ايرىقشا ماڭىزدى، بىرلەسكەن مەملەكەتتەر ۇيىمى جۇڭگومەن كليمات وزگەرىسى، باياندى دامۋ سياقتى ءارقايسى سالادا سەلبەستىكتى ۇزدىكسىز تەرەڭدەتۋدى ءۇمىت ەتەدى، جۇڭگونىڭ حالىقارالىق ىستەردە ماڭىزدى باسشىلىق كۇشىن ساۋلەلەندىرۋىن كۇتەدى.
