شينجياڭ گازەتىنىڭ حابارى. جاڭا تيپتى ايدارشا ۆيرۋس وكپە قابىنۋ ىندەتىنىڭ شەكارا سىرتىنان كىرۋىنەن ءونىمدى ساقتانىپ جانە توتەپ بەرىپ، قالىڭ بۇقارانىڭ دەنساۋلىعى مەن ءومىرىنىڭ حاۋىپسىزدىگىن شىنايى قامتاماسىز ەتۋ ءۇشىن، 3 - ايدىڭ 18 - كۇنى اۆتونوميالى رايوننىڭ جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ قىزمەتى قولباسشىلىق شتابى جالپى حابارلاندىرۋ شىعارىپ، شەكارا سىرتىنان شينجياڭعا كەلگەن، شينجياڭعا ورالعان ادامدارعا قاتىستى ىندەتتەن ساقتانۋ - تىزگىندەۋ قىزمەتىن اناعۇرلىم كۇشەيتتى.
جالپى حابارلاندىرۋدا مىنالار تالاپ ەتىلدى: 3 - ايدىڭ 19 - كۇنى ساعات نولدەن باستاپ، شەكارا سىرتىنان شينجياڭعا كەلگەن، شينجياڭعا ورالعان جۇڭگو ازاماتتارىنىڭ نەمەسە شەتەل ازاماتتارىنىڭ شەكارا سىرتىنان تىكەلەي كىرگەندەرى نەمەسە ەل ىشىندەگى باسقا قالالار ارقىلى رايونىمىزعا كىرگەندەرى، ءسوزسىز، ەڭ الدىمەن ىرىقتىلىقپەن پويەز ستانسياسى، اۋەجاي سياقتى ورىندارداعى كارانتيندەۋشىلەر مەن الەۋمەتتىك اۋماق قىزمەتكەرلەرىنە قاتىستى ينفورماتسيالارىن دۇرىس مالىمدەۋى، سونداي - اق قاتىستى ورىنداردىڭ نۋكلەين قىشقىلىن تەكسەرۋ، 14 كۇن شوعىرلى اۋاشالاۋ سياقتى ىندەتتەن ساقتانۋ - تىزگىندەۋ شارالارىنا بەلسەندى سايكەسۋى كەرەك، قاتىستى قاراجاتتاردى جەكە ادام ءوزى تولەيدى.
جالپى حابارلاندىرۋدا مىنالار ايقىن ايتىلدى: شەكارا سىرتىنان شينجياڭعا كەلگەن، شينجياڭعا ورالعان جۇڭگو ازاماتتارىندا نەمەسە شەتەل ازاماتتارىندا اۋاشالانعان كەزىندە ەگەر اۋرۋ بەلگىلەرى بايقالسا، دەرەۋ جەكە ساقتانۋدى جەدەل ويداعىداي ىستەۋمەن بىرگە، ءارقايسى شوعىرلى اۋاشالاۋ ورىندارىنىڭ ارناۋلى اۆتوموبيلىمەن قىزۋ امبولاتورياسىنا جەتكىزىپ دياگنوز قويىپ، ءبىر - بىرلەپ تەكسەرۋ كەرەك. تەكسەرۋ اقىسى جانە دياگنوزى تۇراقتاندىرىلعان ناۋقاستاردىڭ، كۇماندى ناۋقاستاردىڭ ەمدەلۋ اقىسى ەمدەۋ قامسىزداندىرۋ ساياساتى بويىنشا ەسەپتەن كوتەرىلەدى. ەمدەۋ قامسىزداندىرۋىنا قاتىناسپاعان ادامدار ەمدەۋ اقىسىن پرينسيپتىك جاقتان جەكە ءوزى تولەيدى.
جالپى حابارلاندىرۋدا مىنالار تالاپ ەتىلدى: تۇتاس رايونىمىزداعى ءار دارەجەلى پارتيا، ۇكىمەت ورگاندارىنداعى، كاسىپورىندارداعى، ءىسورىندارىنداعى قىزمەتكەرلەر تۋىستارىنىڭ، دوستارىنىڭ، سونداي - اق قاتىستى ادامداردىڭ شەكارا سىرتىنان شينجياڭعا كەلگەن، شينجياڭعا ورالعان ينفورماتسياسىن بىلىسىمەن، ءسوزسىز، حابار تابا سالىسىمەن ءوزى تۇرعان ورىندارعا جاعدايدى مالىمەت ەتۋى، مەكەمە ورىن ەڭ الدىمەن ينفورماتسيانى جەرگىلىكتى ورىنداعى ىندەتتەن ساقتانۋ - تىزگىندەۋ تاراۋلارىنا مالىمەت ەتۋى كەرەك. جۋىسۋ تاريحىن، ۋاقىتشا تۇرۋ تاريحىن جاسىرعان، اۋرۋ جاعدايىنان جالعان مالىمەت بەرگەن نەمەسە ىندەتتەن ساقتانۋ - تىزگىندەۋ شارالارىن اتقارۋدان باس تارتقان، جاڭا تيپتى ايدارشا ۆيرۋس وكپە قابىنۋ ىندەتىنىڭ تارالۋىن تۋدىرعان نەمەسە تارالۋ حاۋپىن تۋدىرعان شەكارا سىرتىنان شينجياڭعا كەلگەن، شينجياڭعا ورالعان ادامداردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.
