شينجياڭ گازەتىنىڭ جالپىلىق اقپارات قۇرالدارى ءتىلشىسى جاۋ شييا 3 - ايدىڭ 22 - كۇنى ۇرىمجىدەن حابارلايدى. 3 - ايدىڭ 23 - كۇنى، بۇكىل شينجياڭنىڭ ورتا، باستاۋىش مەكتەپتەرىندەگى، ورتا دارەجەلى كاسىپتىك مەكتەپتەرىندەگى 4 ميلليون 367 مىڭ 900 وقۋشى مەكتەپكە قايتا ورالىپ، رەسمي وقۋ باستادى.
وقۋ باستاۋ قىزمەتىنىڭ حاۋىپسىز، ءتارتىپتى بولۋىنا شىنايى كەپىلدىك ەتۋ ءۇشىن، اۆتونوميالى رايوندىق پارتكوم ءبىر تۇتاس جوسپارلاپ ورنالاستىرىپ، عىلمي قولباسشىلىق ەتتى، جەر - جەر وقىتۋشى - وقۋشىلاردىڭ سالاماتتىعىن باقىلاۋ - ولشەۋدى كۇشەيتۋ، قىزمەتكەرلەرمەن، زاتتىق بۇيىمدارمەن قامتاماسىز ەتۋ، قورشاعان ورتا تازالىعىن وڭاۋ سياقتى جاقتاردان ءبىر قىدىرۋ شارا قولداندى. بۇكىل رايون اۆتونوميالى رايون، ايماق (وبلىس، قالا)، اۋدان (قالا، رايون) 3 دارەجەلى تەكسەرۋ - زەرتتەۋ، جەتەكشىلىك ەتۋ گرۋپپاسىن قۇرىپ، مەكتەپتەردى جاپپاي تەكسەرىپ، جەتەكشىلىك ەتىپ، ماسەلەلەر تىزىمدىگىن جاساپ، شەشىلگەن ماسەلەلەردى ءبىر - بىردەن تىزىمنەن ءوشىرىپ، رەتتەپ - تۇزەتتى.
بۇكىل رايونىمىزدىڭ جەر - جەرىندەگى وقۋ - اعارتۋ، دەنساۋلىق ساقتاۋ، اۋرۋدان ساقتانۋ جانە تىزگىندەۋ تاراۋلارى بىرلەسىپ وقىتۋشى - وقۋشىلارعا، قىزمەتكەرلەرگە ىندەتتەن ساقتانۋ بىلىمدەرىن ۇگىتتەپ، جالپىلاستىرىپ جانە تاربيە جۇرگىزىپ، وقىتۋشى - قىزمەتكەرلەرگە توسىن تۋىلاتىن وقيعالاردى ءبىر جاقتى ەتۋ جاتتىعۋىن وتكىزدى. سونىمەن بىرگە، جەر - جەر ماسكى، زارارسىزداندىرۋ سۇيىقتىعى سياقتى ءتۇرلى ىندەتتەن ساقتانۋ بۇيىمدارىن ءبىر تۇتاس ۇلەستىرىپ، مەكتەپتەردىڭ وقۋ باستاۋداعى قاجەتىن ەڭ الدىمەن قامتاماسىز ەتىپ، مەكتەپتەرگە كومەكتەسىپ سايكەستى ەمدەۋ - كۇتىمدەۋ كۇشىن ورنالاستىرىپ جانە ىندەتتەن ساقتانۋ، اۋاشالاۋ اۋماعىن قۇرىپ، مەكتەپتەردىڭ وقۋ باستاۋداعى ىندەتتەن ساقتانۋ قىزمەتى قاجەتىن كۇش سالا قامتاماسىز ەتتى.
وقۋ باستاۋ الدىندا، جەر - جەر، ءارقايسى مەكتەپتەر ساباقتى قالپىنا كەلتىرۋ الدىنداعى ءتۇرلى دايىندىق قىزمەتتى تارتىپپەن ىلگەرىلەتىپ، كلاس، اسحانا، تازالىق ءۇيى، مونشا، باسپالداق سياقتى ءتۇيىندى اۋماقتاردى جاپپاي زارارسىزاندىرىپ، اۋاسىن الماستىرىپ، مەكتەپتەردىڭ سۋ، ەلەكتر، گاز، پار، ءورت ءسوندىرۋ، ورتتەن ساقتانۋ، ازىق - تۇلىك حاۋىپسىزدىگى قۇرىلعىلارىن ءبىر - بىرلەپ تەكسەرىپ جوندەپ، حاۋىپسىز جۇمىس جۇرگىزۋىنە كەپىلدىك ەتتى. مۇنان تىس، وقىتۋشىلاردى شينجياڭعا قايتۋعا، جۇمىس ورىندارىنا قايتۋعا جانە كۋرسقا، ساباققا دايىندالۋعا بەلسەنە ورنىقتى ۇيىمداستىرىپ، وقۋشىلارعا ”ساباق باستاۋدان بۇرىن وقۋلىقتى قولدارىنا تيگىزۋدى، ءار وقۋشىعا بىردەن قولدانبا بەرۋدى“ تياناقتاندىردى.
اۆتونوميالى رايوندىق وقۋ - اعارتۋ مەڭگەرمەسى ءارقايسى مەكتەپتەردەن وقۋ باستاعاننان كەيىن مەكتەپ اۋلاسىن تۇگەلدەي جابىق باسقارۋدى قاتاڭ اتقارىپ، قاتىسسىز ادامداردىڭ مەكتەپ اۋلاسىنا كىرۋىنە قاتاڭ تيىم سالىپ، وقۋشىلاردى قاۋىرت كەزگە شوعىرلاندىرماي، ۋاقىت كەزەگىمەن قاتىستى وقىتۋ قىزمەتتەرىن ورىستەتىپ، ادامداردىڭ توپتاسۋىنان، شوعىرلانۋىنان ساقتانىپ، ”تاڭەرتەڭ، تۇستە، كەشتە تەكسەرۋدى“ جانە ”ءار كۇنگى مالىمدەۋدى اقساتپاۋ“ ءتۇزىمىن، ءسوزسىز، قاتاڭ اتقارۋدى تالاپ ەتتى.
اۆتونوميالى رايوندىق وقۋ - اعارتۋ مەڭگەرمەسىنىڭ قاتىستى جاۋاپتىسى مىنانى ءبىلدىردى: وقۋ باستاعاننان كەيىن ءارقايسى مەكتەپتەر وقۋشىلاردىڭ ينتەرنەت جەلىسىندە ۇيرەنۋ دەڭگەيىنە باعالاۋ جۇرگىزىپ، ”نولدىك باستاما“ وقىتۋ پرينسيبىنە ساي، تۇرلىشە جىلدىقتىڭ وقىتۋىنا، سونداي - اق ەمتيحان جوسپارىنا نەگىزدەلىپ، وقىتۋ ورنالاستىرۋىن لايىقتى رەتتەپ، وقىتۋ ۋاقىتىن ۇيلەسىمدى ورنالاستىرىپ، وقىتۋ قيمىلدارىن جۇيەلىلەندىرىپ، ساباقحاناداعى وقىتۋدى ۇيدە ينتەرنەت جەلىسىندە وقىتۋمەن ءونىمدى ۇشتاستىرىپ، وقىتۋ ساپاسىنا كەپىلدىك ەتۋى كەرەك.
