5 جىلدا 8 ميلليون ەتتى قوي، 200 مىڭ ءسۇتتى سيىر، 300 مىڭ ەتتى سيىر تىڭنان كوبەيتىلەدى
شينجياڭ گازەتىنىڭ جالپىلىق اقپارات قۇرالدارى تىلشىلەرى ليۋ ي، جاۋ جىيۇن 3 - ايدىڭ 24 - كۇنى ۇرىمجىدەن حابارلايدى.ءتىلشىنىڭ اۆتونوميالى رايوندىق مال شارۋاشىلىعى، مال شيپاگەرلىگى مەكەمەسىنەن ۇعىسۋىنا قاراعاندا، بيىلدان باستاپ، رايونىمىز ەگىن شارۋاشىلىق وڭىرلەرىندە مال شارۋاشىلىعىن گۇلدەندىرۋ ارەكەتىن اتقارۋدى باستاپ، ساياساتپەن، نىسانمەن قولداۋدى كۇشەيتىپ، 5 جىل ۋاقىتتا 8 ميلليون ەتتى قويدى، 200 مىڭ ءسۇتتى سيىردى، 300 مىڭ ەتتى سيىردى تىڭنان كوبەيتۋگە كۇش سالىپ، رايونىمىز ىشىندە مال ونىمدەرىمەن قامداۋعا كەپىلدىك ەتۋمەن بىرگە، جوعارى دەڭگەيلى بازار سۇرانىسىن تياناق ەتىپ، ساپانى ءوسىرىپ، مولشەرىن ارتتىرىپ، ەرەكشە مال شارۋاشىلىعىن بارىنشا دامىتىپ، وسى زامانعى مال شارۋاشىلىعىن دامىتۋدىڭ جاڭا جاعدايىن اشادى ەكەن.
تانىستىرۋعا قاراعاندا، تۇتاس رايونىمىز مال شارۋاشىلىعىنىڭ ەكولوگيالىق دامۋ بەتالىسىنا تاباندى بولىپ، سولتۇستىك شينجياڭنىڭ جۇگەرى ساباعى سياقتى جەم - ءشوپ باسىمدىعىنان تولىق پايدالانىپ، جەم - شوپتەن پايدالانۋ قىزمەتىن ويداعىداي ىستەپ، ەگىن شارۋاشىلىق ءوڭىرىنىڭ كولەمدەنگەن، ولشەمدەنگەن باعىمشىلىعىن ويداعىداي يگەرۋدى كورنەكتىلەندىرىپ، ەتتى قوي، ەتتى سيىر باعىمشىلىعىن كەڭەيتىپ، قازىرگى شوشقا ءوندىرىسىنىڭ كولەمىن ورنىقتىرادى ەكەن. تيانشاننىڭ سولتۇستىك بوكتەرىندە، ىلە وزەنى اڭعارىندا ءبىر توپ كولەمدەنگەن ءسۇتتى سيىر باعىمشىلىعى بازاسىن قۇرۋدى جوسپارلاپ، ءسۇت ءوندىرىسى قۋاتىن جىلدام كەڭەيتەدى، ارتتىرادى. ءسۇت شارۋاشىلىعى، ەت مانەرلەيتىن مال شارۋاشىلىعى باستاماشى كاسىپورىندارىن جەتىلدىرۋدى نەگىزگى دامۋ نىساناسى ەتىپ، جوعارى ولشەمدى وسى زامانعى مال شارۋاشىلىعى كاسىپ سالاسىنان ۇلگى كورسەتۋ رايونىن قۇرىپ، ەگىنشى - مالشىلاردىڭ كىرىستەرىن ورنىقتى ارتتىرۋىنا شىنايى كەپىلدىك ەتەدى.
وسىعان وراي، تۇتاس رايونىمىز قوسىمشا قاراجات بەرۋ ساياساتىن ويداعىداي تياناقتاندىرىپ، سۇرلەمدىك جۇگەرى، جوڭىشقا سياقتى ساپالى جەم - ءشوپ ەگۋ كولەمىن كەڭەيتىپ، ”ءبيداي + سۇرلەمدىك جۇگەرىنى“ قايتالاي ەگۋ ۇلگىسىن جالپىلاستىرىپ، ”استىقتى جەم - شوپكە اينالدىرۋ“ كولەمىن ءبىر ميلليون مۋدان اسىرۋدى ورىندايدى. ءشوپتى، ەگىس داقىلدارى ساباعىن مانەرلەپ جەمگە اينالدىرۋ تەحنيكاسىن جالپىلاستىرىپ، جەمنەن پايدالانۋ مولشەرىن جوعارىلاتىپ، جەم - شوپكە تۇساۋ بولىپ وتىرعان ماسەلەنى شىنايى شەشەدى.
بيىل تۇتاس رايونىمىز كەدەي وڭىرلەردە ەرەكشە قۇس باعىمشىلىعىن بەلسەنە دامىتىپ، قويان، ەسەك سياقتى ەرەكشە كاسىپ سالاسىنىڭ دامۋىن قولداپ، جەرگىلىكتى جاعدايعا قاراي سيىر، قوي شارۋاشىلىعىن دامىتىپ، جوعارى - تومەنگى جەلىدەگى كاسىپ سالاسى تىزبەگىن ۇزارتادى. وڭتۇستىك شينجياڭ ءوڭىرى ”ءىرى قارانى ۇيلەسىمدى دامىتۋ، ءۇي قۇستارىن دامىتۋدى كورنەكتىلەندىرۋ، ەرەكشە باعىمشىلىقتى سۇيەمەلدەپ دامىتۋ“ وي جەلىسى بويىنشا، ”استىقتى جەم - شوپكە اينالدىرۋ“ كولەمىن ءتارتىپتى كەڭەيتىپ، ەگىنشىلىك پەن باعىمشىلىقتى بىرلەستىرۋ ۇلگىسىن جالپىلاستىرىپ، حايۋاناتتار ىندەتىنەن ساقتانۋ - تىزگىندەۋ تورى قۇرىلىسىن ويداعىداي يگەرىپ، سان مىڭداعان وتباسىلارىنىڭ باعىمشىلىقتى دامىتۋ جاعدايىن قالىپتاستىرادى.
سونىمەن بىرگە، تۇتاس رايونىمىز مال، قۇس تۇقىمى كاسىبىن اناعۇرلىم كۇشەيتىپ، وڭتۇستىك شينجياڭنىڭ ەگىن شارۋاشىلىق وڭىرىندە جوعارى ءونىمدى ەتتى قوي سورتىن سۇرىپتاپ جەتىلدىرۋ، جالپىلاستىرۋ، دولان قويى تۇقىمىن سۇرىپتاپ جەتىلدىرۋ، جالپىلاستىرۋ سياقتى 5 سيىر، قوي تۇقىمى كاسىبىنىڭ دەڭگەيىن ءوسىرۋ جوسپارىن باستاپ اتقارادى، ەسەك، قويان، ەرەكشە قۇس سياقتى اسىل تۇقىمداردى ءوسىرۋ - جەتىلدىرۋ جۇيەسىن ورنالاستىرىپ قۇرىپ، اسىل تۇقىم قوسىمشا قاراجاتى ساياساتىن تياناقتاندىرىپ، شينجياڭنىڭ ەرەكشە مال، قۇس گەنەتيكالىق بايلىعىن قورعاۋ، پايدالانۋ قىزمەتىن ويداعىداي ىستەپ، ساپالى مال، قۇس تۇقىمىمەن ءوزىن - ءوزى قامداۋ قابىلەتىن جوعارىلاتادى.
2019 - جىلى وڭتۇستىك شينجياڭنىڭ 4 ايماق - وبلىسىندا ەرەكشە مال، قۇس باعىمشىلىعى جىلدام دامىپ، 40 مىڭنان استام ءۇي قۇستارىن قولدان شىعارۋ قابىلەتىن تىڭنان ارتتىرىپ، قويان، قاز، ۇيرەك سياقتى ەرەكشە كاسىپ سالاسى جوقتان بارلىققا كەلىپ، باستاپقى قادامدا كولەم قالىپتاستىردى، ەسەك، كەپتەر كاسىپ سالاسى ۇزدىكسىز دامىپ، زورايىپ، مال شارۋاشىلىعى كەدەيلىكتەن ارىلتۋدان قامال الۋعا كۇش ۇستەۋ، شارۋالار كىرىسىنىڭ ۇزدىكسىز ورنىقتى ارتۋىن دەمەۋ جاقتارىندا بەلسەندى رول اتقاردى.
