− 20 ەل توبى باسشىلارىنىڭ ەل باسىلارى ەرەكشە كەڭەسىندە سويلەنگەن ءسوز
(2020 - جىلى 3 - ايدىڭ 26 - كۇنى، بەيجيڭ)
جۇڭحۋا حالىق رەسپۋبليكاسىنىڭ ءتوراعاسى شي جينپيڭ
قۇرمەتتى سالمان پاتشا،
كاسىپتەستەر:
كوپشىلىك سالەمەتسىزدەر! الدىمەن مەن سالمان پاتشانىڭ جانە ساۋد ارابياسى جاقتىڭ وسى رەتكى كەڭەس ءۇشىن قىرۋار بايلانىس جاساۋ، سايكەستىرۋ قىزمەتتەرىن ىستەگەندىگىنە شىن جۇرەكتەن العىس ايتامىن!
توسىننان كەلگەن جاڭا تيپتى ايدارشا ۆيرۋس وكپە قابىنۋ ىندەتى الدىندا، جۇڭگو ۇكىمەتى، جۇڭگو حالقى قيىندىق پەن قاتەردەن تايسالماي، حالىقتىڭ ءومىرىنىڭ حاۋىپسىزدىگى مەن دەنساۋلىعىن باستان - اياق ءبىرىنشى ورىنعا قويىپ، سەنىمدى بەكەمدەۋ، قيىندىقتى بىلەك بىرىكتىرە جەڭۋ، عىلمي ساقتانۋ - ەمدەۋ، دالمە - ءدال شارا قولدانۋ جالپى تالابىنا ساي، جالپى حالىقتى اتتانىسقا كەلتىرۋگە، بىرلەسىپ ساقتانۋعا، بىرلەسىپ تىزگىندەۋگە، اشىق، جاريا بولۋعا تاباندى بولىپ، ىندەتكە قارسى تۇرۋدىڭ حالىقتىق شايقاسىن جۇرگىزدى. قاجىرلىلىقپەن قۇلشىنىپ، زور بوداۋ بەرۋدىڭ ناتيجەسىندە، قازىر جۇڭگونىڭ ەل ىشىندە ىندەتتەن ساقتانۋ - تىزگىندەۋ جاعدايى ۇزدىكسىز جاقسارىپ، ءوندىرىس، تۇرمىس ءتارتىبى جەدەل قالپىنا كەلۋدە، ءبىراق قىراعىلىقتى تيتتەي دە بوساڭسىتۋىمىزعا بولمايدى.
جۇڭگو جاق توتەنشە قيىنشىلىقتا قالعان ساتتە، حالىقارالىق قوعامنىڭ كوپتەگەن مۇشەلەرى جۇڭگو جاققا ىزگى نيەتتى كومەك بەردى جانە قولداۋ كورسەتتى، ءبىز قاشاندا ەسىمىزدە بەرىك ساقتايمىز ءارى بۇل دوستىقتى قاستەرلەيمىز.
ەلەۋلى جۇقپالى اۋرۋلار − بۇكىل ادامزاتتىڭ جاۋى. جاڭا تيپتى ايدارشا ۆيرۋس وكپە قابىنۋ ىندەتى بۇكىل جەر شارىندا تارالىپ، حالىقتىڭ ءومىرىنىڭ حاۋىپسىزدىگى مەن دەنساۋلىعىنا وراسان زور قاتەر ءتوندىرىپ، بۇكىل جەر شارىنىڭ الەۋمەتتىك دەنساۋلىق ساقتاۋ حاۋىپسىزدىگىنە وراسان زور سىن - سايىس اكەلدى، جاعداي ادامدى ايرىقشا الاڭداتادى. كەزەكتە حالىقارالىق قوعامعا ەڭ قاجەتتىسى، سەنىمدى بەكەمدەپ، ءبىر نيەتپەن سەلبەسىپ، ىنتىماقتاسا توتەپ بەرىپ، حالىقارالىق سەلبەستىكتى جاپپاي كۇشەيتىپ، ىندەتتى جەڭۋدىڭ قۋاتتى بىرىككەن كۇشىن ۇيىستىرىپ، ادامزاتتىڭ وسى رەتكى ەلەۋلى جۇقپالى اۋرۋمەن كۇرەسىنىڭ جەڭىسىنە قول ۇستاسا قول جەتكىزۋ كەرەك.
وسىعان وراي، مەن تومەندەگىدەي 4 دارىپتەمەنى العا قويماقپىن.
ءبىرىنشى، جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋدىڭ الەمدىك توسقاۋىل شايقاسىن باتىل تۇردە ويداعىداي جۇرگىزۋ. حالىقارالىق قوعام جەدەل ارەكەتتەنىپ، ىندەتتىڭ تارالۋ جاعدايىن باتىل تىزگىندەۋ كەرەك. وسىعان وراي، مەن مىنالاردى ۇسىنىس ەتەمىن: 20 ەل توبىنىڭ دەنساۋلىق ساقتاۋ مينيسترلەرىنىڭ ءماجىلىسىن ەرتەرەك اشىپ، ينفورماتسيالاردان ورتاق پايدالانۋدى كۇشەيتىپ، ءدارى، ۆاكسينا زەرتتەۋ - اشۋ، ىندەتتەن ساقتانۋ سەلبەستىگىن ورىستەتىپ، ىندەتتىڭ شەكارا اسىپ تارالۋىنان ءونىمدى تۇردە ساقتانۋ كەرەك. الەۋمەتتىك دەنساۋلىق ساقتاۋ جۇيەسى ءالسىز وركەندەۋ جولىنداعى ەلدەردىڭ توتەپ بەرۋ قابىلەتىن جوعارىلاتۋىنا قول ۇستاسا كومەكتەسۋ كەرەك. مەن 20 ەل توبىنىڭ ىندەتكە قارسى تۇرۋ بويىنشا كومەك بەرۋ دارىپتەمەسىن العا قويىپ، دۇنيە جۇزىلىك دەنساۋلىق ساقتاۋ ۇيىمىنىڭ قولداۋىندا ينفورماتسيا بايلانىسىن، ساياسات سايكەستىگىن، ارەكەت سەلبەستىگىن كۇشەيتۋدى ۇسىنامىن. جۇڭگو جاق ادامزات تاعدىرلاس ورتاق تۇلعا ۇستانىمىنان جازباي، ءار ەلمەن ساقتانۋ - تىزگىندەۋدىڭ ءونىمدى ادىستەرىنەن ورتاق پايدالانىپ، ءدارى جانە ۆاكسينانى بىرلەسىپ زەرتتەۋ - اشۋدى ءارى ىندەت تاراعان مەملەكەتتەرگە قولىنان كەلگەنىنشە كومەك بەرۋدى قالايدى.
ەكىنشى، حالىقارالىق بىرلەسىپ ساقتانۋدى، بىرلەسىپ تىزگىندەۋدى ءونىمدى تۇردە ورىستەتۋ. ۆيرۋستا مەملەكەت شەكاراسى بولمايدى. ىندەت ءبىزدىڭ ورتاق جاۋىمىز. ءار ەل، ءسوز جوق، قول ۇستاسا بىرلەسىپ ساقتانۋ، بىرلەسىپ تىزگىندەۋدىڭ ەڭ بەرىك تورىن قۇرۋ كەرەك. جۇڭگو جاق جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ بويىنشا ينتەرنەتتەگى ءبىلىم ورتالىعىن قۇردى، ونى بارلىق مەملەكەتكە اشىق ۇستايدى. ءار ەلدىڭ كۇشىن بىرىكتىرىپ، بىرگە سەلبەسىپ، ءدارى، ۆاكسينا، تەكسەرۋ جاقتارىنداعى عىلمي زەرتتەۋدەن قامال الۋدى جەدەلدەتىپ، كۇللى ادامزاتقا تيىمدىلىك جەتكىزەتىن كورنەكتى ناتيجەلەرگە ەرتەرەك قول جەتكىزۋگە قۇلشىنۋ كەرەك. وڭىرلىك الەۋمەتتىك دەنساۋلىق ساقتاۋ بويىنشا شۇعىل جاعدايعا توتەپ بەرۋ بايلانىس مەحانيزمىن ورناتۋدى قاراستىرىپ، توسىن الەۋمەتتىك دەنساۋلىق ساقتاۋ ۋاقيعالارى شۇعىل جاعدايىنا توتەپ بەرۋ، اتتانىسقا كەلۋ قارقىنىن تەزدەتۋ كەرەك.
ءۇشىنشى، حالىقارالىق ۇيىمداردىڭ رول اتقارۋىن بەلسەنە قولداۋ. جۇڭگو جاق دۇنيە جۇزىلىك دەنساۋلىق ساقتاۋ ۇيىمىنىڭ باسشىلىق رولىن ساۋلەلەندىرىپ، عىلمي، ۇيلەسىمدى ساقتانۋ - تىزگىندەۋ شاراسىن بەلگىلەۋىن، ىندەتتىڭ شەكارا اسىپ تارالۋىن مۇمكىندىكتىڭ بارىنشا توسۋىن قولدايدى. مەن مىنانى ۇسىنىس ەتەمىن: 20 ەل توبى دۇنيە جۇزىلىك دەنساۋلىق ساقتاۋ ۇيىمىنا سۇيەنىپ، ىندەتتەن ساقتانۋ - تىزگىندەۋگە قاتىستى ينفورماتسيالاردان ورتاق پايدالانۋدى كۇشەيتىپ، جان - جاقتى، جۇيەلى، ءونىمدى ساقتانۋ - تىزگىندەۋ باعدارناماسىن جالپىلاستىرۋ كەرەك. 20 ەل توبىنىڭ بايلانىس جاساۋ، سايكەستىرۋ رولىن ساۋلەلەندىرىپ، ساياساتتىق تىلدەسۋ مەن اۋىس - كۇيىستى كۇشەيتىپ، لايىقتى كەزدە الەمدىك الەۋمەتتىك دەنساۋلىق ساقتاۋ حاۋىپسىزدىگى بويىنشا جوعارى دارەجەلىلەر ءماجىلىسىن وتكىزۋ كەرەك. جۇڭگو ءار ەلمەن بىرگە قاتىستى حالىقارالىق جانە وڭىرلىك ۇيىمداردى قولداۋ سەرپىنىن كۇشەيتەدى.
ءتورتىنشى، حالىقارالىق ماكرولىق ەكونوميكالىق ساياساتتى سايكەستىرۋدى كۇشەيتۋ. ىندەت الەمدىك ءوندىرىس پەن سۇرانىسقا جالپى بەتتىك سوققى بولدى، ءار ەل ماكرولىق ساياساتتىڭ تەڭگەرۋ تەبىنىن سەلبەسە كۇشەيتىپ، دۇنيە ءجۇزى ەكونوميكاسىن قۇلدىراۋدان ساقتاۋى كەرەك. پارمەندى، ءونىمدى قازىنا جانە اقشا ساياساتىن اتقارىپ، ءار ەلدىڭ اقشا سىندىرىلىمى مولشەرىنىڭ نەگىزىنەن تۇراقتى بولۋىن جەبەۋ كەرەك. فينانستى باقىلاۋ - باسقارۋ، سايكەستىرۋدى كۇشەيتىپ، بۇكىل جەر شارى فينانس بازارىنىڭ ورنىقتىلىعىن قورعاۋ كەرەك. بۇكىل جەر شارى كاسىپ سالاسى تىزبەگىنىڭ، قامداۋ تىزبەگىنىڭ ورنىقتىلىعىن بىرگە قورعاۋ كەرەك، جۇڭگو حالىقارالىق بازاردى ءدارى شيكىزاتتارى، تۇرمىستىق قاجەتتى بۇيىمدار، ىندەتتەن ساقتانۋ زاتتىق ماتەريالدارى سياقتى ونىمدەرمەن قامداۋ سەرپىنىن ارتتىرادى. ايەلدەردى، بالالاردى قورعاپ، قارتتار، مۇگەدەكتەر قاتارلى ءالسىز قاۋىمدى قورعاپ، حالىقتىڭ نەگىزگى تۇرمىسىن قامتاماسىز ەتۋ كەرەك. جۇڭگو بەلسەندى قازىنا ساياساتى مەن ورنىقتى اقشا ساياساتىن ۇزدىكسىز اتقارىپ، تاباندىلىقپەن رەفورمانى كەڭەيتىپ، ەسىكتى ايقارا اشىپ، بازارعا كىرۋ رۇقساتىن كەڭەيتىپ، تيجارات - ساۋدا ورتاسىن ۇزدىكسىز ساپالىلاندىرىپ، يمپورتتى بەلسەنە كەڭەيتىپ، سىرتقا قارجى قوسۋدى كەڭەيتىپ، دۇنيە ءجۇزى ەكونوميكاسىنىڭ ورنىقتىلىعىنا ۇلەس قوسادى.
مەن 20 ەل توبى مۇشەلەرىن ورتاق شارا قولدانىپ، كەدەن سالىعىن ازايتىپ، كەشىرىپ، قامالدى كۇشىنەن قالدىرىپ، ساۋدانى ىركىلىسسىزدەندىرىپ، پارمەندى سيگنال تاراتىپ، دۇنيە ءجۇزى ەكونوميكاسىنىڭ قالپىنا كەلۋ ارىنىن ارتتىرۋعا ۇندەيمىن. ءبىز 20 ەل توبىنىڭ ارەكەت جوسپارىن جاساۋىمىز ءارى ىندەتكە قارسى تۇرۋ ماكرولىق ساياساتىن سايكەستىرۋ جونىندە دەر كەزىندە قاجەتتى مەحانيزمدىك بايلانىس جانە ورنالاستىرۋ جاساۋىمىز كەرەك.
كاسىپتەستەر!
وسى شەشۋشى ساتتە، ءبىز سىن - سايىسقا بەتپە - بەت كەلىپ، جەدەل قيمىلداۋىمىز كەرەك. ءبىز قيىندىقتى بىلەك بىرىكتىرە جەڭىپ، ءوزارا قارايلاساتىن، ءوزارا كومەكتەسەتىن بولساق بولعانى، ءسوز جوق، ىندەتتى تۇبەگەيلى جەڭىپ، ادامزاتتىڭ دامۋىنىڭ اناعۇرلىم جارقىن بولاشاعىن قارسى الاتىندىعىمىزعا كامىل سەنەمىن!
كوپشىلىككە راقىمەت.
(شينحۋا اگەنتتىگىنىڭ 3 - ايدىڭ 26 - كۇنى بەيجيڭنەن بەرگەن حابارى)
