شينحۋا اگەنتتىگىنىڭ 3 - ايدىڭ 26 - كۇنى بەيجيڭنەن بەرگەن حابارى. 3 - ايدىڭ 26 - كۇنى مەملەكەت ءتوراعاسى شي جينپيڭ دۇنيە جۇزىلىك دەنساۋلىق ساقتاۋ ۇيىمىنىڭ باسالقاسى تان دىسايگە جاۋاپ حات قايتارىپ، تان دىسايدىڭ بۇكىل الەمنىڭ جاڭا تيپتى ايدارشا ۆيرۋس وكپە قابىنۋ ىندەتىنە قارسى تۇرۋدى ىلگەرىلەتۋدە كورسەتكەن قۇلشىنىسىن القاپ، جۇڭگونىڭ حالىقارالىق قوعامنىڭ ىندەتكە قارسى تۇرۋىنا ۇزدىكسىز قولداۋ كورسەتەتىندىگىن ءبىلدىردى.
3 - ايدىڭ 17 - كۇنى تان دىساي مەملەكەت ءتوراعاسى شي جينپيڭگە حات جولداپ مىنالاردى بىلدىرگەن بولاتىن: ءتوراعا شي جينپيڭنىڭ كەمەڭگەر باسشىلىعىندا، جۇڭگو جاڭا تيپتى ايدارشا ۆيرۋس وكپە قابىنۋ ىندەتىنە قارسى تۇرۋدا اسا كەرەمەت قۇلشىنىس جاسادى. جۇڭگو ۇكىمەتىنىڭ باتىل بەكىمى مەن جۇڭگو حالقىنىڭ قاجىرلى قۇلشىنىسىنىڭ، ۇلەس قوسۋىنىڭ ارقاسىندا جاڭا تيپتى ايدارشا ۆيرۋس وكپە قابىنۋ ىندەتىنە جۇڭگو جاپپاي، تەز توتەپ بەردى. بۇل حالىقارالىق قوعامعا تەك ءتۇيىندى ايقىنداپ، كۇشتى شوعىرلاندىرسا، ىندەتتىڭ كەڭەيۋ بارىسىن وزگەرتۋگە بولاتىندىعىن تولىق ايگىلەدى. مەن تاعى جۇڭگو ۇكىمەتىنىڭ دۇنيە جۇزىلىك دەنساۋلىق ساقتاۋ ۇيىمىنىڭ جانە حالىقارانىڭ ىندەتكە قارسى تۇرۋ قىزمەتىنە قارجىلاي قولداۋ كورسەتكەندىگىنە شىنايى العىس ايتامىن. بۇل يگىلىكتى شارا بۇكىل جەر شارىنىڭ ىنتىماقتاسۋ، ءوزارا كومەكتەسۋ رۋحىن ايگىلەدى، ىندەتتى تەز ارادا تەجەۋ جونىنەن اسا ماڭىزدى.
شي جينپيڭ جاۋاپ حاتىندا تان دىسايدىڭ جانە دۇنيە جۇزىلىك دەنساۋلىق ساقتاۋ ۇيىمىنىڭ جۇڭگو جاقپەن تىعىز سەلبەسىپ ىندەتكە قارسى تۇرعاندىعىن ايرىقشا القايتىندىعىن بىلدىرە كەلىپ، بىلاي دەپ اتاپ كورسەتتى: كەزەكتە جۇڭگونىڭ ىندەتتەن ساقتانۋ - تىزگىندەۋ جاعدايى ءۇرتىس جاقساردى، ءوندىرىس، تۇرمىس ءتارتىبىنىڭ جىلدام قالپىنا كەلۋ اۋقىمى ۇزدىكسىز بەكەمدەلدى جانە كەڭەيدى، ساقتانۋ - تىزگىندەۋ جانە ەكونوميكالىق، قوعامدىق دامۋ قىزمەتىن ءبىر تۇتاس جوسپارلاپ ىلگەرىلەتۋدە بەلسەندى تابىسقا قول جەتتى. ءبىز ەل ءىشى - سىرتىنىڭ ىندەتتەن ساقتانۋ - تىزگىندەۋ جانە ەكونوميكالىق جاعدايىنىڭ كەزەڭدىك وزگەرىسىن ءدال يگەرىپ، ۋاقىتقا، جاعدايعا قاراي قىزمەتتىڭ كۇش سالۋ ءتۇيىنىن جانە توتەپ بەرۋ شاراسىن رەتتەپ، ىندەتتەن ساقتانۋ - تىزگىندەۋ حالىقتىق شايقاسىنىڭ جەڭىسىنە قول جەتكىزۋگە شىنايى كەپىلدىك ەتەمىز.
شي جينپيڭ مىنالاردى ءبىلدىردى: ءسىزدىڭ جەتەكشىلىگىڭىزدە دۇنيە جۇزىلىك دەنساۋلىق ساقتاۋ ۇيىمى ىندەتكە قارسى تۇرۋ حالىقارالىق سەلبەستىگىن بەلسەندىلىكپەن ىلگەرىلەتىپ، حالىقارالىق قوعامنىڭ جاپپاي قۇپتاۋىنا يە بولدى، جۇڭگو ءسىزدىڭ جانە دۇنيە جۇزىلىك دەنساۋلىق ساقتاۋ ۇيىمىنىڭ حالىقارالىق ىندەتكە قارسى تۇرۋ سەلبەستىگىندە بەلسەندى باسشىلىق رول اتقارۋلارىڭىزدى ۇزدىكسىز باتىل قولدايدى. جۇڭگو ەجەلدەن ءىس جۇزىندىك ارەكەتى ارقىلى حالىقارالىق قوعامنىڭ ىندەتكە قارسى تۇرۋ قۇلشىنىسىن بەلسەنە قولداپ كەلەدى، دۇنيە جۇزىلىك دەنساۋلىق ساقتاۋ ۇيىمىن قامتىعان حالىقارالىق ۇيىمدارعا، سونداي - اق 80 نەشە مەملەكەتكە كومەك كورسەتتى. جۇڭگو جاق شاماسى كەلەتىن كولەمدە حالىقارالىق قوعامنىڭ ىندەتكە قارسى تۇرۋىنا ۇزدىكسىز قولداۋ كورسەتەدى.
شي جينپيڭ بىلاي دەپ باسا دارىپتەدى: جاڭا تيپتى ايدارشا ۆيرۋس وكپە قابىنۋ ىندەتى ادامزات − بەينەت پەن زەينەتتى بىرگە وتكەرىپ كەلە جاتقان تاعدىرلاس ورتاق تۇلعا ەكەندىگىن تاعى دا ايگىلەدى. حالىقارالىق قوعام ءبىر - بىرىنە قارايلاسىپ، ءوزارا كومەكتەسىپ، قيىندىقتى بىلەك بىرىكتىرە جەڭۋى ءتيىس. ءبىز دۇنيە جۇزىلىك دەنساۋلىق ساقتاۋ ۇيىمىمەن جانە ءار ەلمەن بىرگە بۇكىل جەر شارىنىڭ الەۋمەتتىك دەنساۋلىق ساقتاۋ حاۋىپسىزدىگىن قورعاۋعا ۇلەس قوسۋدى قالايمىز.
