شينحۋا اگەنتتىگىنىڭ 3 - ايدىڭ 27 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 3 - ايدىڭ 27 - كۇنى ۇسىنىس بويىنشا امەريكانىڭ زۇڭتۇڭى ترامپپەن تەلەفوندا سويلەستى.
شي جينپيڭ بىلاي دەپ باسا دارىپتەدى: جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان بەرى، جۇڭگو جاق باستان - اياق اشىق بولۋ، جاريا بولۋ، جاۋاپتى بولۋ پوزيتسياسىن نەگىزگە الىپ، دۇنيە جۇزىلىك دەنساۋلىق ساقتاۋ ۇيىمىنا جانە امەريكانى ءوز ىشىنە العان قاتىستى ەلدەرگە ىندەت ينفورماتسيالارىن دەر كەزىندە حابارلاپ، ۆيرۋستىڭ گەن تىزبەگى سياقتىلاردى قامتىعان ينفورماتسيالاردى دەر كەزىندە جاريالاپ، ەش بۇكپەسىز تۇردە ءارقايسى جاقپەن ساقتانۋ - تىزگىندەۋ جانە ەمدەۋ تاجىريبەلەرىن ورتاق پايدالاندى ءارى قاجەت ەتكەن ەلدەرگە قولىنان كەلگەنىنشە قولداۋ كورسەتتى جانە كومەك بەردى. ءبىز ۇزدىكسىز وسىلاي ىستەپ، حالىقارالىق قوعاممەن بىرگە وسى ىندەتتى جەڭىپ شىعامىز.
شي جينپيڭ بىلاي دەپ اتاپ كورسەتتى: تارالعىش اۋرۋلار مەملەكەت شەكاراسىنا جانە ناسىلگە بولىنبەيدى، ول ادامزاتتىڭ ورتاق جاۋى. حالىقارالىق قوعام بىرگە توتەپ بەرگەندە عانا، جەڭىسكە جەتۋگە بولادى. ءارقايسى جاقتىڭ بىرگە قۇلشىنۋىندا، كەشە وتكىزىلگەن 20 ەل توبى باسشىلارىنىڭ جاڭا تيپتى ايدارشا ۆيرۋس وكپە قابىنۋ ىندەتىنە توتەپ بەرۋ جونىندەگى ەل باسىلارى ەرەكشە كەڭەسى كوپتەگەن ورتاق تانىمعا كەلىپ، بەلسەندى ناتيجەگە قول جەتكىزدى. ءارقايسى جاقتىڭ سايكەسۋدى جانە سەلبەسۋدى كۇشەيتىپ، ەل باسىلارى ەرەكشە كەڭەسىنىڭ ناتيجەسىن ناقتاپ تياناقتاندىرىپ، ىندەتكە قارسى اتتانۋدىڭ حالىقارالىق سەلبەستىگىن كۇشەيتۋىن، الەم ەكونوميكاسىن ورنىقتىرۋعا قۋاتتى قوزعاۋشى كۇش ۇستەۋىن ءۇمىت ەتەمىن. جۇڭگو جاق امەريكا جاقتى قامتىعان ءارقايسى جاقپەن بىرگە دۇنيە جۇزىلىك دەنساۋلىق ساقتاۋ ۇيىمىنىڭ ماڭىزدى رولىن ساۋلەلەندىرۋىن ۇزدىكسىز قولداپ، ساقتانۋ - تىزگىندەۋ ينفورماتسياسىنان جانە تاجىريبە اۋىس - كۇيىسىنەن بىرگە يگىلىكتەنۋدى كۇشەيتىپ، عىلمي زەرتتەۋدەن قامال الۋ سەلبەستىگىن تەزدەتىپ، الەمدىك دەنساۋلىق ساقتاۋ ىستەرىن جونگە سالۋدى كەمەلدەندىرۋدى ىلگەرىلەتۋدى؛ ماكرولىق ەكونوميكالىق ساياساتتى سايكەستىرۋدى كۇشەيتىپ، بازاردى ورنىقتىرىپ، ارتۋدى ساقتاپ، حالىق تۇرمىسىنا كەپىلدىك ەتىپ، الەمدىك قامداۋ تىزبەگىنىڭ اشىق، ورنىقتى، حاۋىپسىز بولۋىنا شىنايى كەپىلدىك ەتۋدى قالايدى.
شي جينپيڭ ۇسىنىس بويىنشا جۇڭگو جاقتىڭ ىندەتتەن ساقتانۋ - تىزگىندەۋ توسقاۋىل شايقاسىن ويداعىداي جۇرگىزۋدە قولدانعان شارالارىن ەگجەي - تەگجەيلى تانىستىردى. شي جينپيڭ بىلاي دەپ باسا دارىپتەدى: مەن امەريكاداعى ىندەتتىڭ كەڭەيۋىنە ايرىقشا نازار اۋدارۋدامىن جانە الاڭداۋدامىن، سونداي - اق زۇڭتۇڭ مىرزانىڭ قازىر قولدانعان ءبىر قىدىرۋ ساياسات - شارالارىنا نازار اۋدارۋدامىن. جۇڭگو حالقى امەريكانىڭ ىندەتتىڭ تارالۋ اۋقىمىن ەرتەرەك تىزگىندەۋىن، ىندەتتىڭ امەريكا حالقىنا اكەلەتىن زيانىن ازايتۋىن شىنايى ءۇمىت ەتەدى. جۇڭگو جاق حالىقارالىق ساقتانۋ - تىزگىندەۋ سەلبەستىگىن ورىستەتۋگە بەلسەندى پوزيتسيا ۇستاپ كەلەدى. قازىرگى جاعدايدا، جۇڭگو مەن امەريكا ىنتىماقتاسا ىندەتكە قارسى اتتانۋ كەرەك. جۇڭگو - امەريكا ەكى ەلدىڭ دەنساۋلىق ساقتاۋ تاراۋلارى مەن ساقتانۋ - تىزگىندەۋ ماماندارى حالىقاراداعى ىندەت جاعدايى، جۇڭگو - امەريكا ساقتانۋ - تىزگىندەۋ سەلبەستىگى جونىندە باستان - اياق بايلانىستى ساقتاپ كەلەدى، جۇڭگو جاق ەش بۇكپەسىز تۇردە امەريكا جاقپەن ينفورماتسيادان جانە تاجىريبەدەن ۇزدىكسىز بىرگە يگىلىكتەنۋدى قالايدى. جۇڭگونىڭ ءىشىنارا ولكە - قالالارى مەن كاسىپورىندارى ىركەس - تىركەس امەريكا جاققا ەمدەۋ زاتتىق ماتەريالدارىن كومەككە بەردى. جۇڭگو جاق امەريكانىڭ قازىرگى قيىن جاعدايىن تۇسىنەدى، قولىنان كەلگەنىنشە قولداۋ كورسەتۋدى قالايدى. شي جينپيڭ بىلاي دەپ باسا دارىپتەدى: قازىر امەريكادا وقۋشىلاردى قامتىعان قىرۋار جۇڭگو ازاماتتارى بار. جۇڭگو ۇكىمەتى ولاردىڭ ءومىرىنىڭ حاۋىپسىزدىگى مەن دەنساۋلىعىنا ايرىقشا ءمان بەرەدى. امەريكا جاقتىڭ شىنايى ءونىمدى شارالار قولدانىپ، ولاردىڭ ءومىرىنىڭ حاۋىپسىزدىگى مەن دەنساۋلىعىن ويداعىداي قورعاۋىن ءومىت ەتەدى.
شي جينپيڭ بىلاي دەپ باسا دارىپتەدى: قازىر جۇڭگو - امەريكا قارىم - قاتىناسى ماڭىزدى وتكەلدە تۇر. جۇڭگو - امەريكا سەلبەسسە ەكى جاققا ءتيىمدى، تىرەسسە ەكى جاققا دا زياندى، سەلبەستىك − بىردەن - ءبىر دۇرىس تالعام. امەريكا جاقتىڭ جۇڭگو - امەريكا قارىم - قاتىناسىن جاقسارتۋ جاعىندا ناقتى ارەكەتتەر قولدانۋىن، ەكى جاقتىڭ بىرگە قۇلشىنىس جاساپ، ىندەتكە قارسى اتتانۋ سياقتى سالالارداعى سەلبەستىكتى كۇشەيتۋىن، قاقتىعىسپايتىن، قارسىلاسپايتىن، ءوزارا قۇرمەت ەتەتىن، سەلبەسىپ تەڭ يگىلىككە كەنەلەتىن قارىم - قاتىناستى دامىتۋىن ءۇمىت ەتەمىن.
ترامپ مىنالاردى ءبىلدىردى: مەن ءتوراعا مىرزانىڭ كەشە كەشتە 20 ەل توبى ەل باسىلارىنىڭ ەرەكشە كەڭەسىندە سويلەگەن ءسوزىن مۇقيات تىڭدادىم، مەن جانە ءار ەل باسشىلارى تۇگەلدەي ءسىز ورتاعا قويعان كوزقاراستار مەن دارىپتەمەلەردى القاپ وتىرمىز.
ترامپ شي جينپيڭنەن جۇڭگو جاقتىڭ ىندەتتەن ساقتانۋ - تىزگىندەۋگە قاتىستى شارالارىن ەگجەي - تەگجەيلى سۇراپ ۇعىسىپ، مىنالاردى ءبىلدىردى: امەريكا - جۇڭگو ەكى ەل قازىر جاڭا تيپتى ايدارشا ۆيرۋس وكپە قابىنۋ ىندەتىنىڭ سايىسىنا ءدوپ كەلىپ وتىر، مەن جۇڭگو جاقتىڭ ىندەتكە قارسى اتتانۋ جاعىندا قول جەتكىزگەن بەلسەندى ىلگەرىلەۋشىلىكتەرىن كورىپ قۋاندىم. جۇڭگو جاقتىڭ تاجىريبەلەرى ماعان كوپ وي سالدى. مەن امەريكا - جۇڭگو ەكى ەلدىڭ كەدەرگىلەردى الاستاپ، زەيىن - زەردەنى شوعىرلاندىرىپ، ىندەتكە قارسى اتتانۋ سەلبەستىگىن ورىستەتۋگە شىنايى كەپىلدىك ەتۋلەرىن قاداعالاپ وتىرامىن. جۇڭگو جاقتىڭ امەريكا جاقتى ىندەتكە قارسى اتتانۋ ەمدەۋ زاتتىق ماتەريالدارىمەن قامداعانىنا ءارى ىندەتكە قارسى اتتانۋدىڭ ءونىمدى ءدارى - دارمەكتەرىن زەرتتەپ اشۋ جاعىنداعى سەلبەستىكتى قامتىعان ەكى ەلدىڭ ەمدەۋ - دەنساۋلىق ساقتاۋ سالاسىنداعى اۋىس - كۇيىستى كۇشەيتكەندىگىنە العىس ايتامىن. مەن الەۋمەتتىك اقپارات قۇرالدارىندا امەريكا حالقىنىڭ جۇڭگو حالقىن ەرەكشە قۇرمەتتەيتىندىگىن جانە قادىرلەيتىندىگىن، شەتەلدە وقيتىن جۇڭگولىق وقۋشىلاردىڭ امەريكانىڭ وقۋ - اعارتۋ ىستەرىندە توتەنشە ماڭىزدى ەكەندىگىن، امەريكا جاقتىڭ امەريكادا وقىپ جاتقان جۇڭگولىق وقۋشىلاردى قامتىعان جۇڭگو ازاماتتارىن ويداعىداي قورعايتىندىعىن اشىق ايتقان بولاتىنمىن.
ەكى ەلدىڭ مەملەكەت باسشىلارى ورتاق كوڭىل ءبولىپ وتىرعان ماسەلەلەر جونىندە بايلانىستى ساقتاۋعا قوسىلدى.
شينحۋا اگەنتتىگىنىڭ 3 - ايدىڭ 27 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 3 - ايدىڭ 27 - كۇنى كەشتە ساۋد ارابياسىنىڭ پاتشاسى سالمانمەن تەلەفوندا سويلەستى.
شي جينپيڭ بىلاي دەپ باسا دارىپتەدى: مارتەبەلى پاتشانىڭ باسقارۋىندا، كەشە ءبىز 20 ەل توبى باسشىلارىنىڭ جاڭا تيپتى ايدارشا ۆيرۋس وكپە قابىنۋ ىندەتىنە توتەپ بەرۋ جونىندەگى ەل باسىلارى ەرەكشە كەڭەسىن ءساتتى وتكىزدىك، ءارقايسى جاق ىنتىماقتاسا وتىرىپ ىندەتكە قارسى اتتانۋ، دۇنيە ءجۇزى ەكونوميكاسىن ورنىقتىرۋ جونىندە ماڭىزدى ورتاق تانىمعا كەلىپ، حالىقارالىق قوعامعا بەلسەندى سيگنال تاراتتى. جۇڭگو جاق ساۋد ارابياسى جاقتىڭ بيىل 20 ەل توبىنا ءتوراعا ەل رەتىندە، بۇل جاعىندا قىرۋار قىزمەتتەر ىستەگەندىگىن القايدى. ۆيرۋستا مەملەكەت شەكاراسى بولمايدى، تەك حالىقارالىق قوعام سەلبەسە توتەپ بەرگەندە عانا، جەڭىسكە جەتۋگە بولادى. 20 ەل توبى مۇشەلەرى ادامزات تاعدىرلاس ورتاق تۇلعا ۇستانىمىنان جازباي، ىنتىماقتى، سايكەستىكتى، سەلبەستىكتى كۇشەيتىپ، ىندەتتىڭ ءورشۋىن باتىل تەجەپ، دۇنيە ءجۇزى ەكونوميكاسىن كۇش سالا ورنىقتىرۋ ءتيىس. جۇڭگو جاق ساۋد ارابياسى جاقپەن تىعىز بايلانىستى ساقتاپ، 20 ەل توبىنىڭ سەلبەسۋ ارىنىن ساقتاۋدى جانە كۇشەيتۋدى قالايدى.
شي جينپيڭ بىلاي دەپ اتاپ كورسەتتى: جۇڭگودا جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان كەيىن، ءسىز دەرەۋ ماعان حال سۇرايتىندىعىڭىزدى جانە قولداۋ كورسەتەتىندىگىڭىزدى بىلدىردىڭىز، ساۋد ارابياسى ۇكىمەتى مەن ءار سالاسى تۇس - تۇستان كومەك قولدارىن سوزىپ، جۇڭگو جاققا نەشە توپتا زاتتىق ماتەريال كومەك كورسەتتى، جۇڭگو جاق مۇنى ەسىنەن شىعارمايدى. جۇڭحۋا ۇلتى العىس ايتا بىلەتىن، قارىمجىسىن قايتارا بىلەتىن ۇلت. كەزەكتە، ساۋد ارابياسى دا ىندەتتىڭ قاتاڭ سايىسىنا ءدوپ كەلىپ وتىر. جۇڭگو جاق ساۋد ارابياسى جاقتىڭ ىندەتكە قارسى اتتانۋىن باتىل قولدايدى، قولىنان كەلگەنىنشە كومەك كورسەتىپ، ساۋد ارابياسى جاقپەن ساقتانۋ - تىزگىندەۋ تاجىريبەلەرىنەن ورتاق پايدالانىپ، ساۋد ارابياسى جاقتىڭ ەمدەۋ زاتتىق ماتەريالدارىن ساتىپ الۋىنا كومەكتەسىپ جانە قولايلىلىق تۋدىرىپ، ەكى ەل حالقىنىڭ ءومىرىنىڭ حاۋىپسىزدىگى مەن دەنساۋلىعىن ويداعىداي قورعاپ، الەمدىك جانە وڭىرلىك الەۋمەتتىك دەنساۋلىق ساقتاۋ حاۋىپسىزدىگىن بىرگە قورعاۋدى قالايدى. جۇڭگو جاق ساۋد ارابياسى جاقپەن قول ۇستاسا قۇلشىنىپ، ساياسي ءوزارا سەنىمدىلىكتى ۇزدىكسىز نىعايتىپ، ءتۇرلى سالاداعى ناقتى سەلبەستىكتى تەرەڭدەتىپ، جۇڭگو مەن ساۋد ارابياسىنىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ تاعى دا تىڭ ساتىعا كوتەرىلۋىن ىلگەرىلەتۋدى قالايدى.
سالمان مىنالاردى ءبىلدىردى: جۇڭگو ۇكىمەتى باتىل دا پارمەندى شارا قولدانىپ، جاڭا تيپتى ايدارشا ۆيرۋس وكپە قابىنۋ ىندەتىن ءساتتى تىزگىندەدى، مەن ايرىقشا القايمىن ءارى شىن جۇرەكتەن قۇتتىقتايمىن. جۇڭگونىڭ تابىسقا جەتۋى بۇكىل الەمگە بەلسەندى سيگنال تاراتتى. مەن جۇڭگو ۇكىمەتى مەن جۇڭگو حالقىنا كامىل سەنەمىن. جۇڭگونىڭ كوپ وتپەي - اق ىندەتتى جەڭەتىندىگىنە ءارى اناعۇرلىم قۇدىرەتتەنە تۇسەتىندىگىنە سەنەمىن. ساۋد ارابياسى مەن جۇڭگو تاۋقىمەتتى بىرگە تارتقان دوستار، ەكى ەلدىڭ قارىم - قاتىناسى جوعارى دەڭگەيدە دامۋدا. جۇڭگو جاقتىڭ ساۋد ارابياسىنىڭ ىندەتكە قارسى اتتانۋىنا تەكسەرۋ - ولشەۋ جانە ەمدەۋ زاتتىق ماتەريالدارىن كومەككە اتاعاندىعىنا العىس ايتامىن، مۇنى ساۋد ارابياسى حالقى ۇمىتپايدى، باستان - اياق باتىلدىقپەن جۇڭگو جاقپەن بىرگە تۇرادى. ساۋد ارابياسى جاق جۇڭگو جاقتىڭ تابىستى تاجىريبەلەرىن ۇلگى ەتىپ، دەنساۋلىق ساقتاۋ، ەمدەۋ سياقتى سالالارداعى اۋىس - كۇيىستى، سەلبەستىكتى كۇشەيتۋدى ءۇمىت ەتەدى. ىندەتكە بىرگە قارسى اتتانۋ ارقىلى ساۋد ارابياسى - جۇڭگو دوستىق قارىم - قاتىناسىنىڭ ونان ارى تەرەڭدەپ، بەكەمدەلە تۇسەتىندىگىنە سەنەمىن. ءتوراعا مىرزانىڭ ساۋد ارابياسى جاقتىڭ 20 ەل توبى باسشىلارىنىڭ ەل باسىلارى ەرەكشە كەڭەسىن ۇيىمداستىرۋىنا قولداۋ كورسەتكەندىگىنە العىس ايتامىن. ساۋد ارابياسى جاق جۇڭگو جاقپەن 20 ەل توبى جۇلگەسىندەگى سايكەستىكتى، سەلبەستىكتى ۇزدىكسىز كۇشەيتىپ، دۇنيە ءجۇزىنىڭ كوز الداعى وسى داعدارىستى تەزىرەك جەڭۋىنە بىرگە كومەكتەسۋدى ءۇمىت ەتەدى.
