تيانشان تورى   ›   جاڭالىقتار   ›   شينجياڭ حابارلارى

ەشتەڭەدەن تايسالماستان اتتانىپ، قايتا ورالدى امان - ەسەن شاتتانىپ

− شينجياڭنان حۋبەيعا كومەككە بارعان سوڭعى توپتاعى ەمدەۋ اترەتى مۇشەلەرىنىڭ شينجياڭعا ورالۋىنان لەزدىك جازبا

شينجياڭ گازەتىنىڭ جالپىلىق اقپارات قۇرالدارى تىلشىلەرى چاۋ جين، جاۋ جىيۇن

 3 - ايدىڭ 30 - كۇنى شينجياڭنان حۋبەيعا كومەككە بارعان ەمدەۋ اترەتىنىڭ سوڭعى توپتاعى 158 مۇشەسى مىندەتتەرىن تابىسپەن ورىنداپ، جالدانعان ۇشاقپەن اۋىلعا قايتىپ كەلدى. سۋرەتتى شينجياڭ گازەتىنىڭ جالپىلىق اقپارات قۇرالدارى ءتىلشىسى زوۋ ي تۇسىرگەن

  3 - ايدىڭ 30 - كۇنى ساعات 16 مولشەرى. تاعى دا ءۇرىمجى ديوپۋ حالىقارالىق اۋەجايىنىڭ ۇشاق الاڭقىسى، ۇشاق ەسىگى اشىلىپ، كوك ءتۇستى، قىزعىلت ءتۇستى، قانىق قىزىل ءتۇستى اترەت كيىمىن كيگەن، شينجياڭنان حۋبەيعا كومەككە بارعان ەمدەۋ اترەتىنىڭ 158 مۇشەسى جۇزدەرىنەن كۇلكى ءۇيىرىلىپ، ۇشاق باسپالداعىنان ءتۇسىپ كەلە جاتىر.

  ”قاھارمانداردىڭ جەڭىسپەن ورالۋىن قارسى الامىز!“، ۇشاق الاڭقىسىنان دۋ قول شاپالاق ءۇنى كوتەرىلدى. ”ءبىز ۇيگە قايتتىق!“ دەپ جاۋاپ بەردى ەمدەۋ اترەتىنىڭ مۇشەلەرى بىركەلكى داۋىسپەن الاقايلاپ.

  ”54 كۇننىڭ الدىندا، مەن ولاردى اتتاندىرا شىققانىمدا، ولار نىق قاداممەن قاسقايا قارسى جۇرگەن ەدى. مىنە بۇگىن، مەن ولاردىڭ امان - ەسەن ورالعانىن قارسى الىپ تۇرمىن“. ۇشاقتىڭ الدىنان شىعۋ ءۇشىن ەرتە كەلىپ كۇتىپ تۇرعان اۆتونوميالى رايوندىق دەنساۋلىق ساقتاۋ - سالاماتتىق كوميتەتى پارتيا باسشىلىق گرۋپپاسىنىڭ مۇشەسى، اۆتونوميالى رايوندىق حالىق شيپاحاناسى پارتكومىنىڭ شۋجيى يۇي ايپيڭنىڭ توتەسىنەن ايتقان بۇل ءسوزى تەرەڭ سۇيىسپەنشىلىك اڭداتتى.

  كوك ءتۇس بايسالدىلىقتىڭ بەلگىسى. كوك ءتۇستى اترەت كيىمىن كيگەن اۆتونوميالى رايوندىق حالىق شيپاحاناسى سالماقتى ناۋقاستاردى قۇتقارۋ - ەمدەۋ اترەتىنىڭ 142 مۇشەسى ۋحان داشۋەسى حالىق شيپاحاناسى شىعىس بولىمشەسىندە جاڭا تيپتى ايدارشا ۆيرۋس وكپە قابىنۋىنا شالدىققان سالماقتى ناۋقاستاردى قۇتقارۋ - ەمدەۋ قىزمەتىن ورىستەتكەن 2 ايعا جۋىق ۋاقىتتا، ”جۇڭگوشا، باتىسشا شيپاگەرلىك بىرلەستىرىلگەن كلينيكالىق دياگنوز قويۋ - ەمدەۋ + ەگجەي - تەگجەيلى گۋمانيتارلىق قامقورلىق“ ەمدەۋ جوباسىن قولدانىپ، كۇردەلى، قيىن، اۋىر، سالماقتى ناۋقاستار بويىنشا ماماندار گرۋپپاسىنىڭ ەمدەپ ساۋىقتىرۋ مولشەرىن جوعارىلاتۋ، اۋرۋدان ءولۋ مولشەرىن تومەندەتۋ جاعىنداعى رولىن ساۋلەلەندىردى. 3 - ايدىڭ 26 - كۇنىنە دەيىن، جيىنى 110 ناۋقاستى ەمدەۋگە الىپ، 86 سالماقتى ناۋقاستىڭ ناۋقاسىن جەڭىلدەتىپ، 84 ادامدى ەمدەپ جازىپ، شيپاحانادان شىعاردى. ولارعا ”مەملەكەتتىك دەنساۋلىق ساقتاۋ - سالاماتتىق جۇيەسى بويىنشا جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ قىزمەتىندەگى وزات كوللەكتيۆ“ اتاعى بەرىلدى.

  قىزعىلت ءتۇس اشىقتىقتىڭ بەلگىسى. 13 ەمدەۋ - كۇتىمدەۋ قىزمەتكەرلەرىنەن قۇرالعان شينجياڭ ۇكىمەتتىك ەمەس ەمدەۋ قۇرىلىمدارىنىڭ، قوعامدارىنىڭ حۋبەيعا كومەككە بارعان ەمدەۋ اترەتى 2 - ايدىڭ 20 - كۇنى ۋحانعا جەتىپ، ىلگەرى - كەيىن ۋحان شاڭجى شيپاحاناسىندا، ۋحان قالاسى حانياڭ شيپاحاناسىندا جەڭىل ناۋقاستاردى قۇتقارۋ - كۇتىمدەۋ قىزمەتىن ارقالادى.

  قانىق قىزىل ءتۇس ىستىق ىنتانىڭ بەلگىسى. 2 - ايدىڭ 17 - كۇنى، قانىق قىزىل ءتۇستى اترەت كيىمىن كيگەن اۆتونوميالى رايوندىق اۋرۋدان ساقتانۋ - تىزگىندەۋ ورتالىعىنىڭ كاسىپتىك تىرەكتىلەرىنەن قۇرالعان شينجياڭنان حۋبەيعا كومەككە بارعان اۋرۋدان ساقتانۋ - تىزگىندەۋ اترەتى ۋحانعا جەتتى. بۇل اترەتتە تەك قانا 3 مۇشە بولعانىمەن، ولار شارشادىق دەمەي، ۋحان قالاسىنىڭ ەكونوميكالىق اشۋ رايونىنداعى، دۇڭحۋ كورىنىس وڭىرىندەگى، دۇڭحۋ جوعارى - جاڭا تەحنيكالىق اشۋ رايونىنداعى 3 اۋرۋدان ساقتانۋ - تىزگىندەۋ تۇيىنىندە ەپيدەمولوگيالىق تەكسەرۋ سياقتى قىزمەتتەرمەن 40 كۇن شۇعىلدانىپ، جۇعىمدالۋ قاينارىن ىزدەپ، تارالۋ تىزبەگىن ءبىر - بىردەن تەكسەرىپ، جۇقپالى اۋرۋ سالاسىنداعى ”حولمىس“ اتاندى.

  كەزىندە ءولىم مەن ءومىر تايتالاسىندا بىرگە بولعاندار مىنە بۇگىن قوشتاساردا كوز جاسىنا ىرىق بەردى، 3 - ايدىڭ 30 - كۇنى تۇستەن بۇرىن، ەمدەۋ اترەتىنىڭ وسى 158 مۇشەسى وزدەرى ەرلىكپەن قورعاعان ۋحان قالاسىنا قوش ايتقان كەزدە، جەرگىلىكتى بۇقارا ىستىق ىقىلاسپەن اتتاندىرىپ سالدى.

  كۇرەڭ قىزىل العىس تۋى، تەرەڭ ىقىلاسپەن باس ءيىپ سالەم بەرۋ، كوزىنە جاس الا قول بۇلعاپ قوشتاسۋ ۋحان حالقىنىڭ قيماس سۇيىسپەنشىلىگى مەن العىسىن ايتىپ تاۋىسا المادى.

  كولىك تەرەزەسىنىڭ ىشىندە اترەت مۇشەلەرىنىڭ كوزىنەن جاس پارلادى. تەرەزە سىرتىنان كوكتەمگى كۇن ساۋلەسى قيىستاي توگىلىپ، اترەت مۇشەلەرىن، جول شەتىندە ولاردى اتتاندىرا شىققان جۇرتشىلىقتى التىن نۇرعا بولەپ، شەكسىز شۋاق شاشىپ تۇر.

  ”امان بول، ۋحان!“، تيانحى اۋەجايىندا، وسىناۋ قاھارمان قالاعا شينجياڭنان حۋبەيعا كومەككە بارعان ەمدەۋ اترەتى ەڭ تەرەڭ سۇيىسپەنشىلىككە تولى تىلەگىن ارناپ جاتتى.

  اق حالات كيسە، ولار اجالدان قايمىقپايتىن جاۋىنگەر؛ جاۋىنگەرلىك ساۋىتىن شەشسە، ولار جان دۇنيەسى نازىك اكە - شەشە نەمەسە پەرزەنتتەر ەدى.

  اۆتونوميالى رايوندىق حالىق شيپاحاناسى سالماقتى ناۋقاستار مەديتسيناسى سەسترالار باستىعى ۋاڭ سايحۇڭ اتتانار كەزدە، ۇلى وعان ”قورعانۋ بەتقالقاسىن“ جاساپ بەرىپ، ”ۋحان، العا، شەشە، العا!“ دەپ جازدى. قايتۋدىڭ الدىندا، ول ۇلىنان: ”قانداي تارتۋ العىڭ كەلەدى؟“ دەپ سۇراعاندا، ۇلى: ”شەشە، امان - ەسەن ورالۋىڭدى عانا تىلەيمىن!“ دەيدى.

  ”ءبىز تەك تاعى ءبىر قالادا ءوز قىزمەتىمىزدى ادا ەتتىك“. ىندەتتەن ساقتانۋ - تىزگىندەۋ كەزىندە، شايقاس مايدانىندا پارتياعا كىرگەن ەمدەۋ اترەتىنىڭ مۇشەسى، اۆتونوميالى رايوندىق حالىق شيپاحاناسى كادرلار دەنساۋلىق ساقتاۋ ورتالىعىنىڭ باس شيپاگەرى سارىن گاۋا بىلاي دەدى: ”قايتار ساتتە كوپتەگەن جەرگىلىكتى ۇيىمدار مەن بۇقارا ىندەتكە قارسى اتتانۋ ەستەلىك بۇيىمدارىن سيلادى، مەن ونى قاستەرلەپ ساقتايمىن! بالام ۇلكەيگەننەن كەيىن، وعان ءبىزدىڭ جۇدىرىقتاي جۇمىلىپ، ىندەتكە قارسى اتتانعانىمىزدى ايتىپ بەرەمىن“.

  ەمدەۋ اترەتىندەگى سەسترا گو يۇيتيڭ باستان - اياق ”ەڭ قىمباتتى تارتۋ“ − حۋبەيعا كومەكتەسىپ ىندەتكە قارسى اتتانۋ ەستەلىگى ۇشاققا شىعۋ مەڭزەمەسىن قىسا ۇستادى. ”مەنشە، بۇل دا ءبىر وردەن، وعان ءبىز ’90 - جىلداردىڭ تۇلەكتەرىنىڭ‘ جاستىق كۇش - قۋاتى، جاۋاپكەرشىلىگى جانە بورىشى سىڭىرىلگەن“، - دەدى ول.

  ”ناۋقاستاردىڭ ساۋىعۋى ءبىزدىڭ ەڭ ۇلكەن داڭقىمىز! بۇل داڭق بۇكىل جاۋىنگەر سەرىكتەردىڭ جۇمىلا كۇش قوسۋىمەن قولعا كەلدى، ءاربىر ادام ەسكە بەرىك ساقتالۋعا تاتيدى!“، مەملەكەتتىك دەنساۋلىق ساقتاۋ - سالاماتتىق جۇيەسى بويىنشا جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ قىزمەتىندەگى وزات جەكە اتاعىن العان اۆتونوميالى رايوندىق حالىق شيپاحاناسى تىنىس جانە حاۋىپتى، سالماقتى ناۋقاستار مەديتسينا ءبولىمىنىڭ ورىنباسار مەڭگەرۋشىسى گوۋ انشۋان مەن وسى شيپاحانانىڭ كۇتىمدەۋ ءبولىمى سىرتقى اۋرۋلار اۋماعىنىڭ سەسترالار باستىعى بىن يانلي بىلاي دەدى: ”مەيلى قايدا بولساق تا، ىندەتتى تۇبەگەيلى جەڭگەنگە دەيىن ۇزدىكسىز شايقاس جۇرگىزە بەرەمىز!“. ولاردىڭ قاراپايىم سوزدەرى قاسىندا تۇرعانداردىڭ جانارىنا تاعى جاس ءۇيىردى.

  قاھارماندار جەڭىسپەن ورالعاندا، ”قۇرىش قوسىن“ قورعاپ وتىردى. ءۇرىمجى قالالىق قوعام حاۋىپسىزدىگى مەكەمەسى قاتىناس ساقشى تارماق اترەتى اۆتوكولىك اترەتىن جىبەرىپ، اۋەجايدان باستاپ جول بويى ەمدەۋ اترەتىمەن بىرگە ءجۇرىپ، تىنىعۋ ورنىنا دەيىن جەتكىزىپ سالدى. ”قاھارمانداردىڭ جەڭىسپەن ورالعاندىعىن قارسى الامىز، ىندەتكە قارسى اتتانۋدىڭ ءبىرىنشى شەبىندەگى قاھارماندارعا قۇرمەت بىلدىرەمىز“ دەگەن جازۋ جازىلعان كەرمە تۋ اسقان اۆتوكولىك اترەتى قالا رايونىنان وتكەندە، جول بويىندا اۆتولىكتەر سيگنال شالىپ قۇرمەت بىلدىرسە، جۇرگىنشىلەر قول بۇلعاپ الاقايلاستى.

  قاھارمانداردىڭ ورالعانىن قارسى الۋ ءۇشىن، ارتقى شەپتى قامتاماسىز ەتۋ قىزمەتكەرلەرى تىنىعۋ دەمالىس ورنىندا اترەتتەگىلەرگە ىجداعاتپەن جىلى جانۇيا ورنالاستىردى. اق شاعالاداي توسەكتە، ءبىر ۇلكەن اق ايۋ جۇرەك ءپىشىندى شوكلات پەن ءبىر كارتچكا قۇشاقتاپ جاتىر، كارتچكاعا: ”سۇيىكتىم: بۇل كۇندەردە ساعان مەن سەرىك بولامىن، سەنى جاقسى كورەمىن!“ دەگەن جازۋلار جازىلعان. بولمە ىشىندە ءتۇرلى كىتاپتار اترەتتەگىلەردىڭ ”شاي ءىشىپ، كىتاپ وقىپ، ۇيدە دەمالۋ“ ارمانىن رەالدىققا اينالدىردى. پالاۋ مەن ءبۇتىن قاقتالعان قوي ەتى مەيمانسارايدىڭ اترەت مۇشەلەرىنىڭ اۋىلدارىنا ورالعانىنا ارناپ ىجداعاتپەن دايىنداعان العاشقى كەشكى قوناعاسى بولدى.

  اپەكەسىنىڭ وزدەرى تۇراتىن مەيمانسارايدىڭ ماڭىنداعى قارسى العان ادامداردىڭ اراسىنان الىستان قول بۇلعاعانىن كورگەندە، ەمدەۋ اترەتىنىڭ مۇشەسى، اۆتونوميالى رايوندىق حالىق شيپاحاناسى قان ءبولىمىنىڭ شيپاگەرى نيە يۇيليڭ بىلاي دەدى: ”بۇل ساپارىما وكىنبەيمىن، ۇيگە قايتقان نەتكەن جاقسى ەدى“، - دەدى.

  جاڭا داۋىردەگى ەڭ سۇيىكتى جاندار، ۇيگە قايتقاندارىڭىزدى قارسى الامىز!

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.