شينجياڭ گازەتىنىڭ جالپىلىق اقپارات قۇرالدارى ءتىلشىسى لۋ فىڭباۋ، ەرىكتى ءتىلشى ۋاڭ شىيىڭ 3 - ايدىڭ 30 - كۇنى ۇرىمجىدەن حابارلايدى. 3 - ايدىڭ 30 - كۇنى G219 جەلىسى اقشي − سەگىزتاش تاس جول قۇرىلىسى نىسانى جاپپاي جۇمىستى قالپىنا كەلتىرىپ، 2022 - جىلى تامامداپ اۆتوموبيل قاتىناتۋدى جوسپارلاۋدا.
”جۇمىس جاپپاي قالپىنا كەلتىرىلگەنىمەن، ىندەتتەن ساقتانۋ - تىزگىندەۋدى تيتتەي دە بوساڭسىتۋعا بولمايدى“. قىزىلسۋ قىرعىز اۆتونوميالى وبلىستىق قاتىناس - تاسىمال پارتيا قىزمەت كوميتەتىنىڭ شۋجيى، قاتىناس - تاسىمال مەكەمەسى پارتيا باسشىلىق گرۋپپاسىنىڭ شۋجيى ۋ شيانجۇن بىلاي دەدى: ”ءبىز ىندەتتەن ساقتانۋ زاتتىق ماتەريالدارىن جەتكىلىكتى دايىندادىق، جۇمىس باسىن كۇندە كوپ رەت زارارسىزداندىرامىز، قۇرىلىسشىلار ماسكى تاعادى ءارى دەنە تەمپەراتۋراسىن ۋاعىندا ولشەتىپ تۇرادى، سىرتتان كەلىپ - كەتكەن اۆتوموبيلدەردى تىزىمدەپ، ادامداردىڭ دەنە تەمپەراتۋراسىن ولشەيمىز. ىندەتتەن ساقتانۋ قىزمەتىن جاقسى ىستەۋ العى شارتىندا قۇرىلىستى تەزدەتىپ، ىندەت اقساتقان قۇرىلىس مەزگىلىن ۇتۋعا قۇلشىنۋدامىز“.
اقشي − سەگىزتاش تاس جول قۇرىلىسى نىسانى اقشي اۋدانىنان باستالىپ، اتۇش قالاسى كاتتايلاق اۋىلىنان اياقتالادى، جەلىنىڭ جالپى ۇزىندىعى 254.8 كيلومەتر، تۇتاس جەلى قوس باعىتتا 2 اۆتوموبيل ارناسى بار 2 - دارەجەلى تاس جول ولشەمى بويىنشا سالىنادى. بۇل نىسان اقشي اۋدانىنىڭ سىرتپەن قارىم - قاتىناس، اۋىس - كۇيىس جاساۋىنداعى جانە كۇندەلىكتى قاتىناۋىنداعى ماڭىزدى تاس جول ارناسى بولىپ، اقشي اۋدانىنىڭ، اتۇش قالاسىنىڭ جول قاتىناۋ ولشەمىن جوعارىلاتۋدا، مەملەكەتتىڭ تاس جول تورابىن جانە شينجياڭنىڭ نەگىزگى ارنالى تاس جول تورابىن كەمەلدەندىرۋدە، جول بويىنداعى وڭىرلەردىڭ ەكونوميكالىق دامۋىن تەزدەتۋدە بەلسەندى جەبەۋ رولىن اتقارادى.
وسىدان بۇرىن، اقشي اۋدانىنان اتۇش قالاسىنا دەيىنگى جولدىڭ دارەجەسى تومەن، قاتىناس احۋالى كۇردەلى، قاتىناۋ قولايسىز بولعان. بۇل نىسان اياقتالعاننان كەيىن، ەكى جەردىڭ اراسىنداعى تاس جولدىڭ دارەجەسى جوعارىلاپ، قاتىناۋ ۋاقىتى ءبىر ساعات مولشەرىندە ۇنەمدەلەدى.