شينحۋا اگەنتتىگىنىڭ ناننيڭنەن بەرگەن حابارى (ءتىلشى حۋاڭ چيڭگاڭ). ”اكە، ۇيگە جاي قايتتىم. ەرتەڭ تاڭەرتەڭ ساعات 8دە تاعى ساقشى بولىمشەسىنە بارىپ دەلو بىتىرەمىن، مەنى وياتا سالىڭىز...“ ارادا 14 جىل ءوتتى، لۋ ۋيچاۋدىڭ ۇيىندەگى كىشكەنە دوسكادا قۇرباننىڭ ءسوزى ءالى تۇر.
لۋ ۋيچاۋ گۋاڭشيدىڭ ۋجوۋ قالاسىندا دۇنيەگە كەلگەن، 2001 - جىلى 7 - ايدا گۋاڭشي حالىق ساقشى مەكتەبىنەن (قازىرگى گۋاڭشي ساقشى شۋەيۋانى) وقۋ تاۋىسقاننان كەيىن، گۋاڭشي ۋجوۋ قالالىق قوعام حاۋىپسىزدىگى مەكەمەسى ناندي ساقشى بولىمشەسىندە حالىق ساقشىسى بولعان. مىندەت وتەگەن كەزدە بەينەسى كورنەكتى بولىپ، قالالىق قوعام حاۋىپسىزدىگى مەكەمەسى جاعىنان 3 رەت سيلانعان.
”ۋيچاۋ جاپادان، شارشاپ - شالدىعۋدان قورىقپايتىن، قىزمەتكە شوگەل، ونىڭ كۇش - قايراتى تاۋسىلمايتىنداي سەزىلەتىن. ول كوبىندە الدىڭعى كۇنى تۇنىمەن كەزەكشىلىك ىستەگەننەن كەيىن، ەرتەڭىندە سانالى تۇردە ساقشى بولىمشەسىندە كەزەكشىلىك ىستەيتىن. كەيدە ۇستەمە جۇمىس ىستەپ قالجىراسا، ول كەزەكشىلىك كەڭسەسىنە جاتا قالىپ، مىزعاپ الاتىن، ويانىسىمەن - اق قىزمەتكە كىرىسىپ كەتەتىن“، - دەدى كاسىپتەسى لۋ جانحۇي ەسكە الىپ.
2002 - جىلى 9 - ايدا لۋ ۋيچاۋ مەن 2 قىزمەتتەسى تاۋعا شىعىپ ەسىرتكى تۇتىنعان جانە ۇرلىق ىستەگەن قىلمىس كۇماندىسىن تۇتقىنداۋعا اتتانادى. تۇتقىنداۋ بارىسىندا قىلمىس كۇماندىسى ۇزىن پىشاقپەن لۋ ۋيچاۋدىڭ سول جاق الاقانىن كەسىپ جارالاسا دا، لۋ ۋيچاۋ جان قيارلىقپەن قىزمەتتەسىمەن بىرگە قىلمىس كۇماندىسىن باعىندىرادى. شيپاحاناعا بارىپ جاراقاتىن تاڭدىرعاننان كەيىن، ول نەبارى ءبىر جارىم كۇن عانا دەمالادى دا، ساقشى بولىمشەسىنە قايتىپ كەلىپ، قىزمەتكە كىرىسىپ كەتەدى.
2005 - جىلى 6 - ايدىڭ ءبىر تاڭىندا، لۋ ۋيچاۋ موتوتسيكلمەن ءبىر قىلمىس كۇماندىسىن قۋعىندايدى، جاڭبىرلى كۇنى جول تايعاق بولعاندىقتان، موتوتسيكل مەڭگەرۋسىز كەتىپ قۇلايدى، سىنعان اينەك پارشاسى لۋ ۋيچاۋدىڭ سانىنىڭ كۇرە تامىرىن كەسىپ كەتەدى دە، قان كوپ اققاندىقتان، ول ەسىنەن تانىپ قالادى، شۇعىل قۇتقارىلعاننان كەيىن ول قاتەردەن امان قالادى. جاراقاتى ەندى عانا جاقسارىسىمەن - اق ول قىزمەت ورنىنا قايتا ورالادى.
2006 - جىلى 3 - ايدىڭ 14 - كۇنى تاڭ سارىدە شارلاۋ مىندەتىن ەندى عانا اياقتاتىپ، دەمالماقشى بولعان لۋ ۋيچاۋ جاسىرىن حابار تاپسىرىپ الىپ، اۋىر زاقىمداۋ دەلوسىنا قاتىستى قىلمىس كۇماندىسى گاۋ XXتىڭ دەرەگىن بايقايدى، وسى دەلونى تەكسەرۋگە جاۋاپتى لۋ ۋيچاۋ دەرەۋ جاعداي جونىندە ساقشى بولىمشەسىنىڭ باسشىلارىنا مالىمەت بەرگەننەن كەيىن، تۇتقىنداۋ ارەكەتىن باستايدى.
تاڭعى ساعات 3تە قىلمىس كۇماندىسى گاۋ XX ۋجوۋ قالاسىنداعى ءبىر قوناقسارايدىڭ الدىندا پايدا بولادى، لۋ ۋيچاۋ نىسانانى تۇراقتاندىرعاننان كەيىن، تاپ بەرىپ گاۋ XXتىڭ بىلەگىن ۇستاي الادى ءارى ءوزىنىڭ ساقشى سالاۋاتىن بىلدىرەدى. گاۋ XX قۇتىرىنا جۇلقىنىپ قاشا جونەلەدى، لۋ ۋيچاۋ وكشەلەي قۋادى ءارى گاۋ XXتى ۇستاپ الادى، گاۋ XX كيىمىنە جاسىرىپ العان قايقى پىشاقتى لۋ ۋيچاۋدىڭ كەۋدەسىنە سۇعىپ الادى، لۋ ۋيچاۋ جارالانىپ قالسا دا ونىڭ سوڭىنان قالماي قۋىپ، اقىرى جەرگە قۇلايدى. گاۋ XXتى ساقشىلار تۇتقىندايدى. قان كوپ كەتكەندىكتەن لۋ ۋيچاۋ قۇتقارۋ ءونىم بەرمەي، قىزمەت ۇستىندە 26 جاسىندا قايتىس بولادى.
حاۋىپ - قاتەر الدىندا تيتتەي دە تايسالماعان لۋ ۋيچاۋ ىستىق قانىمەن ساقشى رۋحىن ايگىلەدى، ايبىندى سەرتىن امالياتتا ايگىلەدى. 2006 - جىلى لۋ ۋيچاۋعا ۋجوۋ قالالىق حالىق ۇكىمەتى ”ۋجوۋ جاس قاھارمانى“، ”وركەنيەتتى قالا تۇرعىنى ۇلگىسى“ اتاعىن تولىقتاپ بەردى. وسى جىلى قوعام حاۋىپسىزدىگى مينيسترلىگى وعان مەملەكەتتىك قوعام حاۋىپسىزدىگى جۇيەسىندەگى 2 - دارەجەلى قاھارمان ۇلگى اتاعىن تولىقتاپ بەردى. 2015 - جىلى توڭكەرىستىك قۇربان دەپ تانىلدى.
”ول قىزمەتتەگى قيىنشىلىعىن ماعان مۇلدە ايتپايدى، تەك كوڭىلدى ىستەردى عانا ايتادى، ءبىزدى الاڭداماسىن دەيتىنىن بىلەمىن. مەن ۋيچاۋدى باسقا قىزمەت ىزدەۋگە ۇنەمى ءناسيحاتتايمىن، ايتسە دە ول قالامايتىن، ەكىنىڭ بىرىندە ’ساقشى كيىمىن قيمايمىن‘ دەيتىن. ۇلىم ءبىزدىڭ ماڭگىلىك ماقتانىشىمىز“، - دەدى لۋ ۋيچاۋدىڭ اكەسى لۋ جىنچۋان.
