شينحۋا اگەنتتىگىنىڭ چاڭچۇننان بەرگەن حابارى (ءتىلشى جوۋ ليچۋان).بيىل رۇي جىجياڭنىڭ قۇربان بولعانىنا 15 جىل بولدى. كوزى تىرىسىندە جيلين ولكەسى بايچىڭ قالالىق قوعام حاۋىپسىزدىگى مەكەمەسى قىلمىستىق ىستەر ساقشى تارماق اترەتىنىڭ ورىنباسار باستىعى بولعان ول جالعىز ءوزى 4 قاراقشىمەن الىسىپ، دەنەسىنىڭ 21 جەرىنە پىشاق ءتيىپ قىزمەت ۇستىندە ەرلىكپەن قۇربان بولدى.
2005 - جىلى 11 - ايدىڭ 27 - كۇنى تۇستە بۇقارا بايچىڭ قالاسى تاۋبەي رايونى لينحاي قالاشىعىنىڭ لۇڭۋان قىستاعى 5 - كووپەراتيۆىنەن سولتۇستىككە قاراي 1.5 كيلومەتر جەردە جول شەتىندەگى ءبىر كەرەكسىز قۇدىقتان ءبىر ەر ادامنىڭ سۇيەگى بايقالعانىن مالىمدەيدى. بايچىڭ قالالىق قوعام حاۋىپسىزدىگى مەكەمەسىنىڭ قىلمىستىق ىستەر ساقشى تارماق اترەتى سول جەردە بارلاۋ ارقىلى بىرەۋلەردىڭ ءولتىرىپ كەتكەنىن تۇراقتاندىرادى. ىشكەرىلەي بارلاپ تەكسەرۋ ارقىلى ءولۋشىنىڭ ۋاڭ XX، ەر، 41 جاس، تاكسي شوفەرى ەكەنىن بىلەدى. 11 - ايدىڭ 26 - كۇنى ساعات 16دا كەزەكتى جۇمىسىن تاپسىرىپ الىپ، تيجاراتقا كىرىسكەننەن كەيىن قاستىقپەن ولتىرىلگەن. بۇل ادام ايداعان قىزىل ءتۇستى، ءۇش ورىندى شيالي كىرەكولىگى جانە الىپ جۇرگەن قول تەلەفونى مەن اقشاسى تونالعان ەكەن.
11 - ايدىڭ 28 - كۇنى كەشتە بايچىڭ قالالىق قوعام حاۋىپسىزدىگى مەكەمەسى قىلمىستىق ىستەر ساقشى تارماق اترەتىنىڭ ورىنباسار باستىعى رۇي جىجياڭ جاۋىنگەر سەرىكتەرىنە بارلاپ دەلو اشۋ قىزمەتىن جان - جاقتى ورنالاستىرعاننان كەيىن، قىلمىستىق ىستەر ساقشى تارماق اترەتىنەن وتە كەش قايتادى. ول كولىگىن ايداپ ۇيىنە قايتىپ بارا جاتقان جولدا الدىڭعى جاقتا ءنومىر تاقتاسى جوق قىزىل ءتۇستى، ءۇش ورىندى شيالي كىرەكولىگىنىڭ باياۋ كەتىپ بارا جاتقانىن كورەدى. ول بۇل كولىكتىڭ تونالعان كىرەكولىگىمەن ۇقساس ەكەنىن بايقاپ، دەرەۋ سوڭىنا تۇسەدى، سونىمەن ءبىر ۋاقىتتا 110 ساقشىعا مالىمدەۋ قىزمەت ەتۋ تۇعىرىنا مالىمدەيدى ءارى كومەك بەرۋدى تالاپ ەتەدى.
رۇي جىجياڭنىڭ ويلاعانىنداي، شيالي كولىگىندە 4 بۇزاقى وتىرعان ەكەن. ولار ارتتارىنان ىلەسىپ كەلە جاتقان كولىكتى كوپ وتپەي - اق بايقايدى. شيالي اۆتوكولىگى بايچىڭ تەمىر جول 1 - ورتا مەكتەبىنىڭ ماڭىنداعى ءبىر قيىس جەرگە جەتكەندە تورموزدى قاتتى باسىپ توقتاي قالادى، رۇي جىجياڭ كولىكتەگى 4 بۇزاقىنىڭ قاشۋعا وقتالعانىن كورىپ، دەرەۋ ساقشى كولىگىن بار جىلدامدىقپەن جۇرگىزگەن بەتى شيالي اۆتوكولىگىنىڭ الدىنا كولدەنەڭىنەن توقتاتىپ، قاشقالى تۇرعان بۇزاقىلارمەن ءبىر ۋاقىتتا كولىكتەن سەكىرىپ تۇسەدى. 8 ساعاتتىق قىزمەتتىڭ سىرتىندا بولعاندىقتان، رۇي جىجياڭنىڭ جانىندا مىلتىق جوق ەدى. بۇزاقىلار الدىندا ول تيتتەي دە شەگىنشەكتەمەي، قولدارىنا پىشاق ۇستاعان بۇزاقىلارمەن جان قيارلىقپەن الىسا كەتەدى، ءوزى جالعىز، جاۋلار كوپ بولعاندىقتان، بۇزاقىلار ونىڭ 21 جەرىنە پىشاق سالادى... 110 حالىق ساقشىلارى ناق مايدانعا جەتكەندە رۇي جىجياڭ ايداعان ساقشى كولىگى مەن تونالعان شيالي كولىگىن بۇزاقىلاردىڭ ورتەپ جىبەرگەنىن، رۇي جىجياڭنىڭ ەرلىكپەن قۇربان بولعاندىعىن كورەدى.
رۇي جىجياڭ 1970 - جىلى 2 - ايدا جيلين ولكەسى جىنلاي اۋدانىنداعى ءبىر شالعاي اۋىل - قىستاقتا تۋعان، 1994 - جىلى 7 - ايدا جيلين قوعام حاۋىپسىزدىگى جوعارى دارەجەلى ارناۋلى كۋرس مەكتەبىنەن وقۋ ءبىتىرىپ، سول جىلى 9 - ايدا قوعام حاۋىپسىزدىگى قىزمەتىنە قاتىناسقان، ىلگەرىندى - كەيىندى بارلاۋشى، ساقشى بولىمشەسىنىڭ ورىنباسار باستىعى، قىلمىستىق ىستەر ساقشى تارماق اترەتىنىڭ باستىعى سياقتى مىندەتتەر وتەگەن، 2003 - جىلى 5 - ايدا بايچىڭ قالالىق قىلمىستىق ىستەر ساقشى تارماق اترەتىنىڭ ورىنباسار باستىعىنا تاعايىندالعان، كوزى تىرىسىندە تالاي رەت ەڭبەك ءسىڭىرىپ، ماراپاتتالعان.
رۇي جىجياڭنىڭ جۇبايىنىڭ نازارىندا، كۇيەۋى قىزمەتتى ماڭگى ءبىرىنشى ورىنعا قوياتىن. رۇي جىجياڭ ءتىرى كەزىندە ۇنەمى وعان: مەنىڭ بۇل ومىردەگى نىسانام اقىل - پاراساتىم جانە تالماي تالپىنۋىم ارقىلى قوعام ءۇشىن از دا بولسا ءىس ىستەپ بەرۋ دەيدى ەكەن. ول باسقانى كوكسەمەيدى، تەك زەينەتكە شىققاندا بۇقارانىڭ ونى جاقسى ساقشى دەپ ايتۋىن عانا ويلايدى. ول تاعى ۇنەمى بىلاي دەيتىن: ”ساقشى بولعاندىقتان، كاسىبىمنىڭ سيپاتىنا بايلانىستى، قاتەرلى ساتتە، ءسوز جوق، باسىمدى ءباي تىگۋىم كەرەك! ءوزىمنىڭ اماندىعىم مەن ءومىرىم كەيىن تۇرادى“.
رۇي جىجياڭ قۇربان بولعاننان كەيىن، بايچىڭ قالالىق قوعام حاۋىپسىزدىگى مەكەمەسى تىزگىن ۇشىمەن بارلاۋ - تەكسەرۋ ورىستەتەدى. 2005 - جىلى 11 - ايدىڭ 29 - كۇنى ادام ءولتىرىپ، كولىك توناعان 4 قىلمىس كۇماندىسىن تۇراقتاندىرادى ءارى ولاردى ىركەس - تىركەس قولعا الادى. ىلە - شالا بايچىڭ قالالىق ورتا حالىق سوتى مەكەمەسى رۇي جىجياڭدى قاستاندىقپەن ءولتىرۋ دەلوسىنا اشىق تەرگەۋ جۇرگىزەدى ءارى سول جەردە ۇكىم شىعارىپ، 4 ادامدى ءولىم جازاسىنا ۇكىم ەتەدى، ءبىر قىدىرۋ زاڭدىق تارتىپتەردەن كەيىن، 4 قىلمىسكەرگە ءولىم جازاسى اتقارىلادى.
2005 - جىلى 12 - ايدىڭ 31 - كۇنى رۇي جىجياڭعا مەملەكەتتىك قوعام حاۋىپسىزدىگى جۇيەسىندەگى 1 - دارەجەلى قاھارمان ۇلگى اتاعى تولىقتاپ بەرىلەدى.
