− بۇكىل ەلىمىزدىڭ جەر - جەرىندە جاڭا تيپتى ايدارشا ۆيرۋس وكپە قابىنۋ ىندەتىندە قازا بولعان قۇرباندار مەن قايتىس بولعان باۋىرلاستارعا ازا بىلدىرۋدەن ەستەلىك
شينحۋا اگەنتتىگىنىڭ تىلشىلەرى
4 - ايدىڭ 4 - كۇنى، گىڭزى جىلعى چيڭميڭ كۇنى. جۇڭگو، مەملەكەت اتىنان، ەڭ جوعارى مارتەبەمەن جاڭا تيپتى ايدارشا ۆيرۋس وكپە قابىنۋ ىندەتىندە قازا بولعان قۇرباندار مەن قايتىس بولعان باۋىرلاستارعا قايعىلى ازا ءبىلدىردى.
شي جينپيڭ قاتارلى پارتيا مەن مەملەكەت باسشىلارى استانا بەيجيڭدە ازا ءبىلدىرۋ قيمىلىنا قاتىناسىپ، حالىقتىڭ بارىنەن جوعارى، ءومىردىڭ بارىنەن قىمبات ەكەندىگىن ارەكەتتەرىمەن تاعى ءبىر رەت ايگىلەدى.
چاڭجياڭ دارياسىنىڭ تۇستىگى مەن تەرىستىگىندە، ۇلى قورعاننىڭ ءىشى - سىرتىندا، ميلليارد حالىق قايعىعا شومدى، بىرگە ازا تۇتتى، بارشا جۇرت ءبىر نيەتكە كەلدى.
تۇستەن بۇرىن ساعات 10دا، اۋە قورعانىس دابىلى قاعىلدى، اۆتوكولىكتەر سيگنال بەردى، پويەزدار، كەمەلەر گۋدوك شالدى، بۇكىل ەل بويىنشا 3 مينۋت ءۇنسىز ازا ءبىلدىرىلدى.
بەيجيڭ تيان - انمىن الاڭىندا، شەكسىز زەڭگىر اسپان استىندا، مەملەكەت تۋى جارتىلاي ءتۇسىرىلدى، حالىق قاھارماندار ەسكەرتكىشى اسقاق بوي سوزىپ تۇر. الاڭنىڭ ماڭىنداعى ءاربىر جول تۇيىلىستەرىندە، توقتاپ تۇرعان اۆتوكولىكتەر سيگنال بەرىپ ازا ءبىلدىردى. جىڭياڭمىننىڭ شىعىس جاعىندا، بوقشا اسىنعان بويجەتكەن ەلەكترسيكلىن توقتاتىپ، ەلەكترسيكلىنىڭ قاسىندا تۇرىپ، قوس قولىن الدىعا ۇستاپ، باسىن ءيىپ ءۇنسىز ازا ءبىلدىردى.
حۋبەيدىڭ ۋحانىندا، وزەن سۋى باياۋ جىلجىپ اعۋدا، چاڭجياڭ ۇلكەن كوپىرىندە اۆتولىكتەر ءبىر كەلكى سيگنال بەردى. حانكوۋدىڭ جياڭتان ييۋان الاڭى، اعاشتار جاپ - جاسىل، قازا بولعان قۇربانداردىڭ جانە قايتىس بولعان باۋىرلاستاردىڭ وتباسىنداعىلار، ەمدەۋ قىزمەتكەرلەرى، الەۋمەتتىك اۋماق قىزمەتكەرلەرى، ەرىكتىلەر، ت. ب قوعامنىڭ ءار سالاسىنان كەلگەن 500 ادام كەۋدەلەرىنە اق گۇل تاعىپ، ازا ءبىلدىرۋ قيمىلىنا قاتىناستى، بارلىق ادام ىززەتپەن ءۇنسىز تۇرىپ ازا ءبىلدىردى.
لانجوۋدا، حۋاڭحى وزەنىنىڭ جاعاسىنداعى گانسۋ حالىقارالىق كورمە ورتالىعىنىڭ الاڭىندا ءار سالا ۋاكىلدەرىنەن 300گە جۋىق ادام كوللەكتيۆ ازا ءبىلدىرۋ قيمىلىنا قاتىناستى. حۋاڭحى وزەنى ايدىنىنداعى ءۇش كەمە بيڭحى جولىنىڭ شەتىندە توقتاپ تۇرعان اۆتوكولىكتەرمەن بىرگە گۋدوك شالىپ، سيگنال بەردى.
نانجيڭدە، يۇيحۋاتاي قۇرباندار ەسكەرتكىشى الاڭىندا ادامدار قارا كيىم كيىپ، قولدارىنا سارى ءتۇستى كۇرەڭكەي گۇلىن ۇستاپ، ىندەتتە قازا بولعان قۇرباندارعا جانە قايتىس بولعان باۋىرلاستارعا قايعىلى ساعىنىشتارىن ءبىلدىردى. ەسكەرتكىشكە باراتىن باسپالداقتا سارى ءتۇستى جانە كۇلگىن ءتۇستى گۇلدەرمەن ”ەسكە الۋ“ دەگەن ەكى ءارىپ كەستەلەنگەن.
چىڭدۋدا، ولكەلىك حالىق قۇرىلتايى ءماجىلىس ورتالىعىنىڭ اۋلاسى ىشىندە ”سىچۋان ولكەسىنىڭ جاڭا تيپتى ايدارشا ۆيرۋس وكپە قابىنۋ ىندەتىندە قازا بولعان قۇرباندارعا جانە قايتىس بولعان باۋىرلاستارعا ازا ءبىلدىرۋ قيمىلى“ دەپ جازىلعان قارا ءتۇستى تاقتا ايبىنمەن كوزگە تۇسەدى.
...
”ءسىزدىڭ كىم ەكەنىڭىزدى بىلمەيمىن، ءبىراق كىم ءۇشىن ەكەنىڭىزدى بىلەمىن“. ىندەتكە قارسى اتتانعان قيان - كەسكى شايقاس بارىسىندا ءبىر توپ ەمدەۋ قىزمەتكەرى، كادر - قىزمەتشى، الەۋمەتتىك اۋماق قىزمەتكەرى قىزمەت ۇستىندە قازا بولىپ، وزدەرىن قىس قۇشاعىنا تاپسىرىپ، ادامدارعا كوكتەم سيلادى. قاسقايا قارسى اتتانعان قاھارماندار ومىرلەرى ارقىلى اناعۇرلىم كوپ باۋىرلاستاردى قورعادى جانە قۇتقاردى، ولاردىڭ ەسىمدەرى مەملەكەت تاريحىنا جازىلدى، بۇقارانىڭ كوكەيىنە ورنادى.
شىنياڭداعى لياۋنيڭ عيماراتىندا حۋبەيدىڭ شياڭياڭىنا كومەكتەسكەن لياۋنيڭ ەمدەۋ اترەتىنىڭ 100 نەشە مۇشەسى 4 - ايدىڭ 4 - كۇنى مەديتسينالىق وڭاشالاۋدان شىقتى. ساعات 10دا ولار ۇيلەرىنە قايتۋدىڭ دايىندىعىن توقتاتا تۇرىپ، قوناق ءۇي الاڭىندا قاتارعا تۇرىپ، ىندەتتە قازا بولعان قۇرباندارعا جانە قايتىس بولعان باۋىرلاستارعا ءۇنسىز ازا ءبىلدىردى.
1995 - جىلى تۋىلعان ۋاڭ يۇييان سەسترا شياڭياڭدا 40 كۇنگە جۋىق ەرلىكپەن شايقاس جۇرگىزدى. ول بىلاي دەدى: ”ءومىر اتاۋلىنىڭ ءبارى قىمبات. ۇلكەندەردىڭ ءبىزدى باستاپ ەرلىكپەن كومەككە اتتانۋىنىڭ ءوزى ءومىردى اجالدان اراشالاۋ ءۇشىن. بۇگىن بۇكىل ەل بولىپ قازا بولعان قۇرباندارعا جانە باۋىرلاستارعا ازا بىلدىردىك، ءبىز جۇرەگىمىزدەگى قايعىلى ساعىنىشتى بىرگە اماناتتادىق“.
4 - ايدىڭ 4 - كۇنى تاڭ سارىدە، 800گە تارتا قالا تۇرعىنى بەيجيڭ تيان - انمىن الاڭىنا كەلدى. قالا تۇرعىنى شۇي مىرزا باستاۋىشتا وقيتىن ۇلىن ەرتىپ كەلىپ سالتقا قاتىناستى. ”تاريحتىڭ كوشىندە جەكە باسىنىڭ اماندىعىمەن ساناسپاي، مەملەكەتتىڭ تاعدىرى ءۇشىن ءومىرىن ارنايتىن قاھارماندار ءارقاشان جارىققا شىعىپ وتىردى، سوندىقتان ءبىزدىڭ ۇلتىمىز بۇگىنگى كۇنگە جەتتى“، - دەدى ول بالاسىنا ىجداعاتتىلىقپەن.
”ۇزاق جىلدان بەرى، قاھارمانداردىڭ رۋحى جالعاسىپ كەلەدى، قىزىل گەن ءالى دە تامىرىمىزدا اعىپ جاتىر“. نانجيڭ يۇيحۋاتاي قۇرباندار قابىرستانى باسقارۋ مەكەمەسى پارتكومىنىڭ شۋجيى جاۋ يۇڭيان بىلاي دەدى: ءبىز سۋ ىشكەندە قاينارىن ۇمىتپاۋىمىز، باسىپ كەلگەن جولىمىزدى ۇمىتپاۋىمىز، قۇربانداردىڭ ورىندالماعان مۇراتىنا مۇراگەرلىك ەتىپ، قايعىنى قايراتقا اينالدىرىپ، بولاشاق ءۇشىن بىرگە كۇرەس جاساۋىمىز كەرەك.
جۇڭحۋا ۇلتى دامۋىنىڭ ۇزاق كوشىندە كەيبىر ادامدار قاي - قاشان دا تاريحتىڭ كەلەلى كەزەڭدەرىندە ءبىر مەملەكەتكە، ءتىپتى، نەشە ۇرپاق ادامعا ىقپال جاسايدى، ولار ءوز ومىرلەرىن بوداۋ ەتىپ، باسقالاردى قورعايدى. قاھارماندار جونىنەن ەڭ ۇلكەن جۇبانىش ازا ءبىلدىرۋ، ەسكە الۋ عانا ەمەس، ونان دا ماڭىزدىسى، جالعاستىرۋ، ءىس جۇزىندىك ارەكەتىندە كورسەتۋ بولىپ تابىلادى. تەك وسىلاي ىستەگەندە عانا، قاھارمانداردىڭ رۋحى ماڭگى وشپەيدى.
شەتسىز - شەكسىز جاسىل الەم اينالا، كوكجيەك پەن استاسادى داريا. ءاربىر تىرشىلىك يەسىنىڭ ومىردەن ءوتۋى ءبىر ميلليارد 400 ميلليون ادام ءۇشىن ورتاق قايعى. چيڭميڭ سىندى جۇڭحۋا ۇلتى داستۇرىندەگى ومىردەن وتكەندەردى ەسكە الىپ، ازا تۇتاتىن كۇندە، بۇكىل ەل بولىپ بىرگە ازا ءبىلدىرىپ، ىندەتتە ۇزاق ساپارعا اتتانعان ءاربىر تىرشىلىك يەسى ءۇشىن ايبىندى قۇرمەت كورسەتتى.
حانكوۋدىڭ جياڭتانىنداعى ييۋان الاڭىنداعى ازا ءبىلدىرۋ قيمىلىندا ۋحان قالاسى سانياڭ الەۋمەتتىك اۋماعىنىڭ 36 جاستاعى مەڭگەرۋشىسى دىڭ ليڭحاۋ ەمدەۋ قىزمەتكەرلەرىمەن، الەۋمەتتىك اۋماق قىزمەتكەرلەرىمەن، ەرىكتىلەرمەن، ت. ب بىرگە قازا بولعان قۇرباندار مەن قايتىس بولعان باۋىرلاستاردى بىرگە ەسكە الدى. ول بىلاي دەدى: بۇگىن ىندەتكە قارسى اتتانعان ءبىرىنشى شەپ قىزمەتكەرى سالاۋاتىممەن ازا ءبىلدىرۋ قيمىلىنا قاتىناستىم، كوڭىل كۇيىم قاتتى تولقىپ تۇر، قازا بولعانداردىڭ جاتقان جەرى جايلى بولسىن، تىرىلەر بەرىك بولسىن دەگەن تىلەكتەمىن.
ۋحان قالاسىنىڭ قالا گۇلى − قارا ورىك گۇلى. جۇڭگو مادەنيەتىندە قارا ورىك گۇلى قىراۋ مەن قاردى ەلەڭ عۇرلى كورمەيتىن قاسيەتكە يە. ىندەتكە قارسى اتتانۋدىڭ توسقاۋىل شايقاسىندا ادامدار قاھارمان قالاعا، ەرجۇرەك تە ىزگى نيەتتى حالىققا كۋا بولدى، ءومىردىڭ قايسارلىعى مەن مويىماستىعىنا كۋا بولدى، ءبىر - بىرلەگەن قاراپايىم ادامداردىڭ كۇرەسىنە كۋا بولدى. ولار سۇيىسپەنشىلىگىن ارناي ءجۇرىپ، تۇرمىس كەشىرە ءجۇرىپ، ءومىر ءۇشىن قايسارلىقپەن كۇرەستى. ولاردىڭ قاسيەتى مەن ەرلىگىن بولاشاقتاعى ءارقانداي مەزگىلدە وتباسى مەن وتان ماڭگى كوكەيىنەن شىعارمايدى.
سىچۋان ولكەلىك حالىق شيپاحاناسىنان گۋ شياۋحۇي سياقتى ازا ءبىلدىرۋ قيمىلىنا قاتىناسقاندار بىلاي دەدى: مەملەكەت ەڭ جوعارى ازا ءبىلدىرۋ سالتىمەن قاھارماندارعا ازا ءبىلدىردى، حالىق ەڭ تەرەڭ ساعىنىشپەن قاھارمانداردى اقتىق ساپارعا اتتاندىردى، بۇكىل مەملەكەت بويىنشا ازا ءبىلدىرۋ − قازا بولعاندارعا قۇرمەت ءبىلدىرۋ جانە ولاردى ساعىنا ەسكە الۋ، سونداي - اق ءومىردى ايالاۋ جانە قاستەرلەۋ بولىپ تابىلادى. جۇڭگو حالقى ەجەلدەن قيىن - قىستاۋ كەزدەردە باس يمەگەن، ءبىراق ءبىز قازا بولعان قۇرباندارعا جانە قايتىس بولعان باۋىرلاستارعا باس ءيىپ ازا ءبىلدىرىپ، كوڭىلىمىزدەگى ەڭ تەرەڭ قۇرمەت پەن ساعىنىشتى جەتكىزەمىز.
4 - ايدىڭ 4 - كۇنى تاڭ سارىدە ورتالىق پەن جەرگىلىكتى ورىننىڭ اقپارات قۇرالدارى سايت، كليەنت، ميكروبلوگ بەتىن اق - قارا تۇسكە وزگەرتىپ، سوڭىنان ىركەس - تىركەس ازا ءبىلدىرۋ قۇلاقتاندىرۋىن جاريالادى. بۇل كۇنى بۇكىل ەل بويىنشا الەۋمەتتىك كوڭىل اشۋ قيمىلدارى توقتاتىلدى. توراپتاستار قولفون بەتىندە بالاۋىز شام ”تۇتاتىپ“، لەبىز جازىپ، قايعىلى ساعىنىشىن جەتكىزدى:
− قازا بولعانداردى ساعىنا وتىرىپ، وشپەس ءومىردى قارسى الايىق؛
− بىزدەر تالماي تالپىنايىق، وسى شايقاستى ۇمىتپايىق؛
− توگىلگەن بارلىق قان مەن تەر ءۇشىن، بارلىق سۇيىسپەنشىلىك پەن ءۇمىت ءۇشىن؛
− قازا بولعانداردىڭ جاتقان جەرى جايلى بولسىن، باقىل بولىڭىزدار، قاھارماندار، سىزدەر بولعاندىقتان عانا وتانىمىز قۇدىرەتتى؛
− جاقسى تۇرمىس كەشىر، قۇلشىنا قىزمەت ىستە، بۇل جاقىندارىڭا دەگەن ەڭ جاقسى ساعىنىش، سونداي - اق قۇرباندار جونىنەن تەرەڭ جۇباتۋ؛
− ىزگىلىك پەن باتىلدىقتى ەستە ساقتايىق، ءبىر ميلليارد 400 ميلليون حالىق تامىرلاس، جۇرەكتەس؛
...
تابيعات دۇنيەسىندەگى قاۋلاعان جاسىل تىرشىلىك − ءومىردىڭ ءلاززاتى. وسى رەتكى جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ كۇرەسى جۇڭحۋا ۇلتىنىڭ ۇلى گۇلدەنۋى تاريحي ساپارىنداعى تاعى ءبىر رەتكى بۇرىن بولماعان سىناق. سۇراپىل تولقىنداردى باستان وتكەرگەن كۇندەردە، تاريح مەملەكەتتىڭ ومىرگە دەگەن قۇرمەتىن ەستە ساقتايدى، تاريحتىڭ بۇل پاراعى حالىقتىڭ كوكەيىندە ماڭگى ساقتالادى.
بولاشاقتاعى كۇندەردە، قايسار دا باتىل، ءماندى دە ماعىنالى ءومىر ءسۇرۋ قايتىس بولعاندار جونىنەن ەڭ تەرەڭ ەسكە الۋ بولماق؛ جاستار مەن اعا بۋىندار ۇلتتىڭ تىرەگىن بىرگە سومداپ، العان بەتىنەن قايتپايتىن كۇرەس ەركى مەن قاۋلاعان ۇمىتتەر ارقىلى مەملەكەتتىڭ العا باسۋىن ىلگەرىلەتەدى، بۇل قۇرباندار جونىنەن ەڭ شىنايى جۇباتۋ بولماق.
حالىق بارىنەن جوعارى! ءومىر بارىنەن قىمبات! وسى نىسانا ءۇشىن ءبىز ءبىر نيەت، ءبىر تىلەكپەن كۇش - قۋاتتى ۇيىستىرىپ، تالىقپاي كۇرەسىپ، ماڭگى العا باسامىز!
(تىلشىلەر يۇي ۋىنجيڭ، لين حۇي، يۇي پەي، مىڭ جيڭ، چيۋ بيڭچيڭ، لي جىڭ، لي مىڭشين، چىن بين، تاي سىسۇڭ)
(شينحۋا اگەنتتىگىنىڭ 4 - ايدىڭ 4 - كۇنى بەيجيڭنەن بەرگەن حابارى)
