شينجياڭ گازەتىنىڭ جالپىلىق اقپارات قۇرالدارى ءتىلشىسى جاۋ يۋە 4 - ايدىڭ 7 - كۇنى ۇرىمجىدەن حابارلايدى. تاياۋدا رايونىمىزدىڭ دەربەس زەرتتەپ اشقان جاڭا ءدارىسى ءنازلا تۇيىرشىگى مەملەكەتتىك ءدارى - دارمەك باقىلاۋ - باسقارۋ مەكەمەسىنىڭ بەكىتۋىمەن كلينيكالىق سىناق ساتىسىنا ءوتتى.
ءنازلا تۇيىرشىگىن − جۇڭگو عىلىم اكادەمياسى شينجياڭ فيزيكا، حيميا تەحنيكاسىن زەرتتەۋ ورنىنىڭ ورىنباسار باستىعى، اعا زەرتتەۋشى اجىاكبار ايسا جەتەكشىلىك ەتكەن تاقىرىپ گرۋپپاسى زەرتتەپ اشقان تۇماۋدى، اسىرەسە، ىستىق تۇماۋدى ەمدەيتىن ءدارى.
2013 - جىلى جۇڭگو عىلىم اكادەمياسى فيزيكا، حيميا تەحنيكاسىن زەرتتەۋ ورنى مەن ءۇرىمجى جوعارى، جاڭا تەحنيكالىق كاسىپ سالاسىن اشۋ رايونى (جاڭا قالا رايونى) سەلبەسىپ، پايدا كوزدەمەۋ سيپاتىنداعى عىلمي زەرتتەۋ ورگانى − شينجياڭ بيولوگيالىق ءدارى - دارمەكتەردە جاڭالىق اشۋ، زەرتتەۋ ورنىن بىرلەسىپ قۇردى. وسى زەرتتەۋ ورنىندا دارىگە تالداۋ جاسايتىن وزىق ولشەۋ اسپاپتارى، جابدىقتارى جانە وسى زامانعى جۇڭگوشا ءدارى، ءدارى شيكىزاتى، اۋىز ەرىتىندى سياقتى ءدارى پىشىندەرىنىڭ ورتا كولەمدى سىناق لەنياسى بار، كەمەلدى اسپاپتار، جابدىقتار جانە تاجىريبە ورتاسى جاڭا ءدارىنى زەرتتەپ اشۋعا پارمەندى قولداۋ ازىرلەدى. قازىر شينجياڭ بيولوگيالىق ءدارى - دارمەكتەردە جاڭالىق اشۋ، زەرتتەۋ ورنى 9 ءتۇرلى جاڭا ءدارى جونىندە زەرتتەۋ ورىستەتۋدە، ءنازلا تۇيىرشىگى ءبىرىنشى بولىپ كلينيكالىق سىناق ەتۋگە بەكىتىلگەن ءدارى بولدى.
اۆتونوميالى رايوندىق ءدارى - دارمەك باقىلاۋ - باسقارۋ مەكەمەسىنىڭ بەرگەن ساندى مالىمەتتە كورسەتىلۋىنشە، 2004 - جىلدان قازىرگە دەيىن شينجياڭنىڭ جەرگىلىكتى كاسىپورىندارىنان مەملەكەتتىك ءدارى - دارمەكتى كلينيكادا سىناق ەتۋ بەكىتۋىنە يە بولعان تۇردەن 27سى بار، بازارعا شىعارۋعا بەكىتىلگەن جاڭا دارىدەن (”مەملەكەت ءدارى بەكىتۋ كۋالىگى“ بەكىتۋ حۇجات ءنومىرى) 6سى بار ەكەن.