شينجياڭ گازەتىنىڭ حوتان تىلشىلەر پۋنكتىنەن شى يىڭيىڭ 4 - ايدىڭ 11 - كۇنى گۇمادان حابارلايدى. ”سەرىكتەستىكتە جۇمىس ىستەسەم ەڭبەكاقى الامىن، وعان قوسا باعىمشىلىق تەحنيكاسىن ۇيرەندىم، بۇعان ايرىقشا قۋانامىن“، - دەدى 4 - ايدىڭ 5 - كۇنى گۇما اۋدانى مۇجى قالاشىعى اسار قىستاعىنىڭ تۇرعىنى مامەتقادىر ءسايپوللا ەسەككە جەم بەرىپ قاربالاس بولا ءجۇرىپ. ول مۇجى قالاشىعى ەسەكتى ولشەمدەندىرىلگەن قورادا باعۋ بازاسىندا جۇمىس ىستەگەلى 2 جىلدان استى، تەحنيكتەردەن باعىمشىلىق تەحنيكاسىن دا ۇيرەندى، قازىر ول ايىنا 3000 − 4000 يۋان كىرىس كىرگىزەدى.
جاقىنعى جىلداردان بەرى، گۇما اۋدانى قاز، ەسەك، قويان، قوي، ازىقتىق ساڭىراۋ قۇلاق سىندى ”بەس ءىرى كاسىپتى“ تىرەكتى كاسىپ ەتتى. شارۋالاردىڭ كىرىسىن ارتتىرۋ ارناسىن كەڭەيتۋ ءۇشىن، بۇل اۋدان 2 باستاماشى كاسىپورىن ەنگىزىپ، باستاماشى كاسىپتەرگە سۇيەنىپ، تۇتاس كاسىپتەردىڭ دامۋىن جەبەدى. 2 باستاماشى كاسىپورىن ”2 باسىن ۇستاۋ، ورتاسىن جەتەكتەۋ“ سىندى ۇلگىنى قولدانىپ، باعىمشىلىق، سويىسشىلىق، وڭدەۋ، ساتۋ ءبىر تۇلعالانعان جابىق كاسىپ تىزبەگىن قالىپتاستىرىپ، شارۋالاردى ناعىز تيىمدىلىككە كەنەلۋشىگە اينالدىردى.
گۇما اۋداندىق اۋىل شارۋاشىلىعى، اۋىل - قىستاق مەكەمەسى پارتيا باسشىلىق گرۋپپاسىنىڭ شۋجيى يۋان جين بىلاي دەدى: ”كاسىپورىندار مەن ۇكىمەت بىرگە قارجى قوسىپ، ’كاسىپورىن + شارۋا وتباسى‘ ۇلگىسىن قولدانىپ، كاسىپورىن تەحنيكا، وڭدەۋ، ساتۋ سياقتى بۋىندارعا جاۋاپتى بولسا، شارۋالار باعىمشىلىق پەن ەگىمشىلىككە جاۋاپتى بولىپ، شارۋا وتباسىلارىنىڭ حاۋىپ - قاتەرىن كۇش سالا تومەندەتىپ، اناعۇرلىم كوپ شارۋا وتباسىلارىن كەدەيلىكتەن ارىلىپ كىرىستى ارتتىرۋ جولىنا ءتۇسىردى“.
ەنگىزىلگەن كاسىپورىنداردىڭ ”ىرگە تەبۋىنە“ مۇمكىندىك جاساۋ ءۇشىن، گۇما اۋدانى قولداۋ تەبىنىن ارتتىرىپ، قالامشا ءوسىرۋ، ساپالى تۇقىم جەتىلدىرۋ جاقتارىندا بەلگىلى كومەك قاراجات بەرىپ، كاسىپورىندارعا ％50تەن ％70كە دەيىن تاسىمال قاراجاتى جاردەماقىسىن بەرۋ سياقتى ساياساتتاردى قولدانىپ، كاسىپورىنداردىڭ اينالىم وزىندىك قۇنىن كوپ ءتۇرلى شارالارمەن تومەندەتىپ، كاسىپورىنداردى شارۋالارعا كوبىرەك پايدا بەرۋگە جەبەدى. قازىر بۇل اۋدان ”بەس ءىرى كاسىپتى“ دامىتۋ ارقىلى 310 مىڭ وتباسىنداعى 120 مىڭعا جۋىق ادامدى كىرىستى ارتتىرىپ كەدەيلىكتەن ارىلۋعا جەتەكتەدى.
