شينجياڭ گازەتىنىڭ جالپىلىق اقپارات قۇرالدارى ءتىلشىسى ما ينيڭ 4 - ايدىڭ 15 - كۇنى ۇرىمجىدەن حابارلايدى. اۆتونوميالى رايوندىق ونەركاسىپ جانە ينفورماتسيالاندىرۋ مەڭگەرمەسىنەن ۇعىسۋىمىزشا، 4 - ايدىڭ 14 - كۇنىنە دەيىن تۇتاس رايونىمىزداعى جۇمىستى، ءوندىرىستى قالپىنا كەلتىرگەن ورتا، شاعىن، ۇساق كاسىپورىنداردىڭ سانى مەن جۇمىستى قالپىنا كەلتىرۋ سالىستىرماسى جەكە - جەكە 3 - ايدىڭ 21 - كۇنىندەگى 167 مىڭ 800دەن، ％91.31تەن 230 مىڭ 500گە، ％98.88كە جوعارىلاعان، مۇنىڭ ىشىندە سانجى حۇيزۋ اۆتونوميالى وبلىسىنىڭ، قارامايلى قالاسىنىڭ، قىزىلسۋ قىرعىز اۆتونوميالى وبلىسىنىڭ، بۇراتالا موڭعۇل اۆتونوميالى وبلىسىنىڭ، حوتان ايماعىنىڭ جۇمىس باستاۋ سالىستىرماسى ％100كە جەتكەن.
گۇما اۋدانىنداعى حوتان حايلو پىشىندەلگەن ماتەريالدار شەكتى جاۋاپكەرشىلىك سەرىكتەستىگى 2 - ايدىڭ 15 - كۇنى جۇمىستى، ءوندىرىستى قالپىنا كەلتىرگەننەن بەرى، 2 اي حاۋىپسىز، ورنىقتى جۇمىس جۇرگىزدى. وسى سەرىكتەستىكتىڭ باس ديرەكتورى يۇي جاۋيوۋ تەلەفوندا بىلاي دەدى: ”وسى مەزگىلدە سەرىكتەستىكتىڭ قوعامدىق قامسىزداندىرۋ، ەمدەۋ قامسىزداندىرۋى، تۇرعىن ءۇي الەۋمەتتىك قورى جانە توك اقىسى سياقتى جاقتاردا يگىلىكتەنگەن تيىمدىلىكتەرى مەن قوسىمشا قاراجاتتارى جيىنى 500 مىڭ يۋاننان استى“.
ورتا، شاعىن، ۇساق كاسىپورىنداردىڭ جۇمىستى، ءوندىرىستى قالپىنا كەلتىرىپ، اقاۋسىز دامۋىن قولداۋ ءۇشىن اۆتونوميالى رايون «جاڭا تيپتى ايدارشا ۆيرۋس وكپە قابىنۋ ىندەتىنە توتەپ بەرىپ، ورتا، شاعىن، ۇساق كاسىپورىنداردىڭ جۇمىستى، ءوندىرىستى قالپىنا كەلتىرىپ، اقاۋسىز دامۋىن قولداۋ جونىندەگى 16 تارماقتى شارانى» شىعاردى. اۆتونوميالى رايوندىق ونەركاسىپ جانە ينفورماتسيالاندىرۋ مەڭگەرمەسى ورتا، شاعىن، ۇساق كاسىپورىنداردىڭ قىزمەتكەر ىستەتۋىن قامتاماسىز ەتۋ، جۇمىستى، ءوندىرىستى قالپىنا كەلتىرۋ، شەبەرلىككە باۋلۋ سياقتى قىزمەتتەردى ويداعىداي ىستەۋگە بەلسەنە جەتەكشىلىك ەتتى، كومەكتەستى. سونىمەن بىرگە، اۆتونوميالى رايون ىلگەرىندى - كەيىندى 347 رەت ينتەرنەت جەلىسىندە قىزمەتكەر قابىلداۋ جينالىسىن ۇيىمداستىرىپ وتكىزدى. 4 - ايدىڭ 14 - كۇنىنە دەيىن ينتەرنەت جەلىسىندە قىزمەتكەر قابىلداۋعا 5112 ورتا، شاعىن، ۇساق كاسىپورىن جانە جەكەشە ساۋدا - ونەركاسىپشىلەر تىركەلگەن، قاتىناسقان، 62 مىڭنان استام ءتۇرلى قىزمەت ورنىمەن قامداپ، 12 مىڭ ادام - رەتتەن استام جۇمىستانۋ تىلەكناماسىن جاساسىپ، 6900 نەشە ادام جۇمىستانعان.
قازىر ءۇرىمجى ەكونوميكالىق - تەحنيكالىق اشۋ رايونىنداعى (توۋتۇنحى رايونى) شينجياڭ جۇمساق بولشەك باقشاسىنا 200 نەشە ورتا، شاعىن، ۇساق كاسىپورىن ىرگە تەپكەن. كاسىپورىنداردىڭ تيجارات وزىندىك قۇنىن تومەندەتۋ ءۇشىن، شينجياڭ جۇمساق بولشەك باقشاسى شەكتى جاۋاپكەرشىلىك سەرىكتەستىگى 2 - ايدان باستاپ باقشا وڭىرىنە ىرگە تەپكەن كاسىپورىنداردىڭ 3 ايلىق ءۇي ماياقىسىن المادى، سونىمەن بىرگە جاڭادان ىرگە تەپكەن كاسىپورىندارعا ءۇي ماياقىسىن ازايتۋ، كەشىرىم ەتۋدەي تيىمدىلىك جاسادى.
اۆتونوميالى رايوندىق ونەركاسىپ جانە ينفورماتسيالاندىرۋ مەڭگەرمەسى تۇتىنۋ بۇيىمدارى ونەركاسىبى باسقارماسىنىڭ 1 - دارەجەلى تەكسەرىپ - زەرتتەۋشىسى ۋاڭ كايشۇن تانىستىرىپ بىلاي دەدى: ونەركاسىپ جانە ينفورماتسيالاندىرۋ مەڭگەرمەسى وسىدان كەيىن ءارقايسى ايماقتارمەن (وبلىس، قالا) ءار كۇنى تەلەفون، ۋيچات ارقىلى بايلانىس جاساپ، جەر - جەردىڭ قولداۋ سيپاتتى ساياساتتى تياناقتاندىرۋىنا جەتەكشىلىك ەتىپ، ورتا، شاعىن، ۇساق كاسىپورىنداردىڭ قىزمەتكەر ىستەتۋدى قامتاماسىز ەتۋ، شەبەرلىككە باۋلۋ سياقتى قىزمەتتەرىن ويداعىداي ىستەۋىنە كومەكتەسىپ، ورتا، شاعىن، ۇساق كاسىپورىنداردىڭ جۇمىستى، ءوندىرىستى قالپىنا كەلتىرۋىنە ءتيىمدى شارت - جاعداي جاسايدى.
