شينجياڭ گازەتىنىڭ جالپىلىق اقپارات قۇرالدارى ءتىلشىسى يۋان لەي 4 - ايدىڭ 23 - كۇنى ۇرىمجىدەن حابارلايدى. جۇڭگو ۇكىمەتىنىڭ قازاقستاننىڭ ىندەتكە قارسى تۇرۋىنا كومەككە بارعان ەمدەۋ ماماندار گرۋپپاسىنداعى 10 ادام قىزمەت مىندەتىن تابىسپەن ورىنداپ، 4 - ايدىڭ 23 - كۇنى ءۇرىمجى ديوپۋ حالىقارالىق اۋەجايىنا جەتتى. اۆتونوميالى رايوندىق پارتكومنىڭ تۇراقتى مۇشەسى، ۇگىت ءبولىمىنىڭ باستىعى تيان ۋىن اۋەجايعا بارىپ قارسى الدى.
وتكەن 14 كۇندە ەمدەۋ ماماندار گرۋپپاسىنداعىلار ىلگەرىندى - كەيىندى نۇرسولتانعا، قاراعاندىعا جانە الماتىعا بارىپ، قازاقستان جاقتاعى كاسىپتەستەرمەن بىرگە ءبىرىنشى شەپكە بارىپ، قازاقستان الەۋمەتتىك دەنساۋلىق ساقتاۋ ورتالىعى شۇعىل ارەكەت ورتالىعى، مەملەكەتتىك عىلىم جۇرەك سىرتقى اۋرۋلار ءبولىمى ورتالىعى، بەلگىلەنگەن اۋاشالاۋ ورىندارى سياقتى جەرلەرگە بارىپ قىزمەت ورىستەتتى. قازاقستان دەنساۋلىق ساقتاۋ مينيسترلىگى، الەۋمەتتىك دەنساۋلىق ساقتاۋ ورتالىعى، مەديتسينا جوعارى مەكتەپتەرى سياقتى تاراۋلارمەن بىرگە 44 مايدان - رەت ينتەرنەت جەلىسىندە، ينتەرنەت جەلىسىنىڭ سىرتىندا ءماجىلىس اشىپ اۋىس - كۇيىس جاساپ، جۇڭگو جاقتىڭ ناۋقاستاردان ۇلگى الىپ تەكسەرۋ، جۇقپالى اۋرۋلاردان ساقتانۋ - تىزگىندەۋ، ناۋقاستاردى باسقارۋ، كلينيكالىق دياگنوز قويۋ - ەمدەۋ، سالماقتى ناۋقاستاردى باقىلاۋ - كۇتىمدەۋ، الەۋمەتتىك اۋماق سالاماتتىق باسقارۋ جانە تاجىريبەحانا سياقتى جاقتارداعى تاجىريبەلەردى ورتاقتاسىپ، قازاقستان جاقتىڭ قازاقستاننىڭ جاڭا تيپتى ايدارشا ۆيرۋس وكپە قابىنۋىنا دياگنوز قويۋ جونىندەگى 6 - نۇسقاداعى باعدارناماسىن جاساۋىنا كومەكتەستى، سونداي - اق 10 مىڭنان استام ەمدەۋ قىزمەتكەرىنە، الەۋمەتتىك دەنساۋلىق ساقتاۋ قىزمەتكەرىنە، تاجىريبەحانا قىزمەتكەرىنە، الەۋمەتتىك اۋماق ساقتانۋ - تىزگىندەۋ قىزمەتكەرىنە 35 مايدان - رەت كەڭەس بەردى جانە باۋلۋ جۇرگىزدى. ماماندار گرۋپپاسى تاعى بەينەكەسكىندە بايلانىس جاساۋ تاسىلىمەن قازاقستانداعى حۋارىن، حۋاچياۋلارعا، ەلىمىزدىڭ قازاقستاندا وقىپ جاتقان وقۋشىلارىنا جانە سول جەردەگى جۇڭگو قارجىلاندىرعان كاسىپورىنداردىڭ قىزمەتكەرلەرىنە جاڭا تيپتى ايدارشا ۆيرۋس وكپە قابىنۋىنان ساقتانۋ، ونى ەمدەۋ بىلىمدەرىنەن لەكسيا جاسادى.
ەمدەۋ ماماندار گرۋپپاسىنىڭ جەرگىلىكتى جاعدايعا قاراي بەرگەن ۇسىنىستارى، كاسىپتىك تۇرعىدا، شىنايى وي ورتاقتاستىرۋلارى قازاقستان ۇكىمەتىنىڭ، ەمدەۋ سالاسىنداعى كاسىپتەستەردىڭ، ءار سالا جۇرتشىلىعىنىڭ جاپپاي مويىنداۋىنا جانە القاۋىنا يە بولدى. قازاقستان دەنساۋلىق ساقتاۋ مينيسترى ءبىرتانوۆ بىلاي دەپ اتاپ كورسەتتى: جۇڭگو جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋ جاعىندا مول تاجىريبە توپتادى، بۇل جولى جۇڭگونىڭ ەمدەۋ ماماندار گرۋپپاسىن جىبەرۋى قازاقستاننىڭ ىندەتتەن ساقتانۋ - تىزگىندەۋى جونىنەن ماڭىزدى ءمان الادى. قازاقستاننىڭ ءبىرىنشى ورىنباسار سىرتقى ىستەر مينيسترى نۇرىشەۆ: جۇڭگو جاق ءىس جۇزىندىك ارەكەتى ارقىلى جۇڭگو مەن قازاقستاننىڭ تاتۋ كورشىلىك دوستىعىن جانە ستراتەگيالىق سەرىكتەستىك قارىم - قاتىناسىن ايگىلەدى، - دەپ قارادى، ول جۇڭگونىڭ ەمدەۋ ماماندارىنىڭ ۇستەم ونەرىن، ىقىلاستى دوستىعىن، قازاقستانداعى كاسىپتەستەرگە جانە قازاقستان حالقىنا تەرەڭ اسەر قالدىرعاندىعىن، قازاقستاننىڭ ىندەتتى جەڭۋىنە پارمەندى كومەك بەرگەندىگىن القادى.
