شينجياڭ گازەتىنىڭ جالپىلىق اقپارات قۇرالدارى ءتىلشىسى ما ينيڭ 4 - ايدىڭ 25 - كۇنى ۇرىمجىدەن حابارلايدى. 4 - ايدىڭ 24 - كۇنى شينجياڭ جۇندۇڭ ەكونوميكالىق - تەحنيكالىق اشۋ رايونىنا ورنالاسقان اۆتونوميالى رايوننىڭ ءتۇيىندى نىسانى − جۇڭگو ەلەكتر كۇشى قارجى قوسۋ توبى شينجياڭ ەنەرگيا حيميا ونەركاسىپ توبى ۋسايۋان ەلەكتر تاراتۋ شەكتى جاۋاپكەرشىلىك سەرىكتەستىگى سولتۇستىك ەكىنشى ەلەكتر ستانسياسىنىڭ 2 × 660 مىڭ كيلوۆات اسقىن سۋپەركريزيستىك وت ەلەكتر 2 - ءنومىرلى گەنەراتورلار تىزبەگى ورناتىلۋ ساتىسىنا ءوتتى. ”قازىر ءبىز جەدەل قۇرىلىس جۇرگىزۋدەمىز، وسى گەنەراتور تىزبەگىنىڭ 6 - ايدا سالىنىپ بولىپ، ىسكە قوسىلۋىنا شىنايى كەپىلدىك ەتەمىز“. سەرىكتەستىكتىڭ ورىنباسار باس ديرەكتورى، باس ينجەنەر شياۋ شيۇڭ گەنەراتورلار تىزبەگى وندىرىسكە قوسىلىپ، اينالىمعا تۇسكەننەن كەيىن، جىلدىق ەلەكتر تاراتۋ مولشەرىنىڭ 6 ميلليارد 600 ميلليون كيلوۆات - ساعاتقا جەتەتىندىگىن، جىلىنا 80 ميلليون يۋاننان ارتىق پايدا مەن سالىق تاپسىراتىندىعىن، ەلەكتر ەنەرگياسىنىڭ شىعىس جۇڭگو وڭىرىنە جەتكىزىلىپ، 2 ميلليون 400 مىڭنان ارتىق وتباسىنىڭ جىلدىق ەلەكتر پايدالانۋىن قاناعاتتاندىراتىندىعىن تانىستىردى.
ىندەتتەن ساقتانۋ - تىزگىندەۋ جاعدايىنىڭ ۇزدىكسىز جاقسارۋىنا ىلەسە، شينجياڭ جۇمىستى، ءوندىرىستى قالپىنا كەلتىرۋدىڭ اياق الىسىن امالدىڭ بارىنشا جەدەلدەتىپ، ۋاقىت ۇتاتىن، ءبىر سەكۋندتى دا زايا جىبەرمەيتىن رۋحپەن قيىن تۇيىندەردى شەشىپ، بوگەتتى تۇيىندەردى اشىپ، ءۇزىلىس تۇيىندەرىن تولىقتاپ، كاسىپورىنداردىڭ ءوندىرىستى قالپىنا كەلتىرۋىن، ءوندىرىس قۋاتىنا جەتۋىن ىلگەرىلەتىپ، قيىن جاعدايدا ارتقان ونەركاسىپ ناتيجەسىن تاپسىردى. 1 - توقساندا بۇكىل رايونىمىزداعى كولەمنەن جوعارى ونەركاسىپ كاسىپورىندارىنىڭ ارتقان قۇنى سايكەس مەزگىلدەگىدەن ％2. 2، ارتۋ قارقىنى بۇكىل ەلىمىزدەگىدەن 6. 10 پايىز جوعارى بولىپ، بۇكىل ەل بويىنشا ءبىرىنشى ورىندى يەلەدى.
”اۆتونوميالى رايون جاڭا تيپتى ايدارشا ۆيرۋس وكپە قابىنۋ ىندەتىنىڭ بۇكىل رايونىمىز ونەركاسىبىنىڭ دامۋىنا اكەلگەن ءتيىمسىز ىقپالىن بەلسەنە جەڭىپ، كاسىپورىنداردىڭ جۇمىستى، ءوندىرىستى قالپىنا كەلتىرۋدە ءدوپ كەلگەن قيىن ماسەلەلەرىن كۇش سالا شەشىپ، كاسىپورىن قىزمەتكەرلەرىنىڭ شينجياڭعا، جۇمىس ورنىنا قايتا ورالۋىن عىلمي تۇردە تارتىپپەن ىلگەرىلەتىپ، ءتۇيىندى كاسىپتەردەگى تىرەكتى كاسىپورىنداردىڭ ءوندىرىس قۋاتىنا جەتىپ، ونىمدىلىكتى ارتتىرۋىن جانە ءىرى نىسانداردىڭ جۇمىس باستاپ، قۇرىلىس جۇرگىزۋىن مىقتاپ يگەرىپ، جۇمىستى، ءوندىرىستى قالپىنا كەلتىرۋ قارقىنىن بار كۇشپەن ىلگەرىلەتىپ، كولەمىن كەڭەيتىپ، كەزەڭدىك تابىسقا قول جەتكىزدى“، - دەدى اۆتونوميالى رايوندىق ونەركاسىپ جانە ينفورماتسيالاندىرۋ مەڭگەرمەسى پارتيا باسشىلىق گرۋپپاسىنىڭ مۇشەسى، ورىنباسار مەڭگەرمە باستىعى سىلاين سىمايىل.
جۇمىستى، ءوندىرىستى قالپىنا كەلتىرۋ اياق الىسىن جەدەلدەتۋ ءۇشىن، اۆتونوميالى رايون بۇكىل رايونىمىزداعى شينجياڭدا تۇراتىن ورتالىق كاسىپورىندارىمەن، تىرەكتى حالىقتىق كاسىپورىندارمەن ”بىرگە ءبىر“ بايلانىس جاساپ، كومەكتەسىپ، سۇيەمەلدەۋ مەحانيزمىن ورناتىپ، شيكىزاتپەن قامداۋ، جابدىق ساتىپ الۋ سياقتى 30 نەشە ماسەلەنى ۇستىندە كومەكتەسىپ شەشتى؛ كاسىپورىنداردىڭ جۇمىستى، ءوندىرىستى قالپىنا كەلتىرۋ قىزمەت وتەۋ تۇعىرىن ورناتىپ، ءتۇيىندى كاسىپورىنداردىڭ قىزمەتكەر قابىلداۋ ينفورماتسياسىن الدىمەن جاريالاپ، 8806 قىزمەتكەر قابىلداۋ قاجەتىن شەشتى؛ ”كاسىپورىن ميكرو ساباعى“ بويىنشا ينتەرنەت جەلىسىندە تاربيەلەۋ تۇعىرىنىڭ رولىن ساۋلەلەندىرىپ، 1000عا تارتا كاسىپورىندى ينتەرنەت جەلىسىندە تاربيەلەدى ءارى شينجياڭعا كەلىپ تۇرمىستىق زاتتىق ماتەريالداردى ءوندىرۋ، تاسىمالداۋ ماسەلەسىنەن 320 نەشەسىن سايكەستىرىپ شەشتى.
1 - توقساندا، ونەركاسىپتىڭ 41 ۇلكەن تۇرىندە 10 كاسىپ ارتۋدى جۇزەگە اسىردى، بۇلار ەلەكتر كۇشى، جىلۋ كۇشى ءوندىرىسى جانە قامداۋ كاسىبىن، كومىر قازۋ جانە جۋىپ تاڭداۋ كاسىبى، مەتاللويد كەن ونىمدەرىنەن جاسالعان بۇيىمدار، مۇناي - تابيعي گاز اشۋ كاسىبى قاتارلىلار. مۇندا كەن اشۋ كاسىبىنىڭ ارتقان قۇنى سايكەس مەزگىلدەگىدەن ％7.7، ەلەكتر كۇشى، جىلۋ كۇشى جانە سۋ ءوندىرىسى مەن قامداۋ كاسىبىنىڭ ارتقان قۇنى سايكەس مەزگىلدەگىدەن ％19 ارتتى.
اۋىر ونەركاسىپتىڭ ءوندىرىس قارقىنى تەزدەدى. اۋىر ونەركاسىپتىڭ ارتقان قۇنى سايكەس مەزگىلدەگىدەن ％4 ارتتى، ارتۋ قارقىنى 1 -، 2 - ايداعىدان 1.8 پايىز جوعارىلادى، بىلتىرعى سايكەس مەزگىلدەگىدەن 1.4 پايىز جوعارىلادى.
مۇنايعا جاتپايتىن ونەركاسىپتىڭ ءوندىرىسى مۇناي ونەركاسىبىنەن جاقسى بولدى. مۇنايعا جاتپايتىن ونەركاسىپتىڭ ارتقان قۇنى سايكەس مەزگىلدەگىدەن ％3.2 ارتتى، ارتۋ قارقىنى بىلتىرعى سايكەس مەزگىلدەگىدەن 0.7 پايىز جوعارىلادى، بۇل مۇناي ونەركاسىبىنەن 2.5 پايىز جوعارى بولدى.
مۇناي ونەركاسىبىنىڭ ارتقان قۇنى سايكەس مەزگىلدەگىدەن ％0.7 ارتتى. مۇندا مۇناي جانە تابيعي گاز اشۋ كاسىبىنىڭ ارتقان قۇنى ％6.7 ارتتى.
