شينحۋا اگەنتتىگىنىڭ 4 - ايدىڭ 29 - كۇنى بەيجيڭنەن بەرگەن حابارى. 13 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ 17 - رەتكى ءماجىلىسى 4 - ايدىڭ 29 - كۇنى 13 - كەزەكتى مەملەكەتتىك حالىق قۇرىلتايى 3 - ءماجىلىسىنىڭ اشىلۋ ۋاقىتى جونىندەگى قاراردى داۋىسقا سالىپ ماقۇلدادى. قارارعا ساي، 13 - كەزەكتى مەملەكەتتىك حالىق قۇرىلتايى 3 - ءماجىلىسى 2020 - جىلى 5 - ايدىڭ 22 - كۇنى بەيجيڭدە اشىلادى.
ءماجىلىس مىنالاردى اتاپ كورسەتتى: شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، بۇكىل ەل بويىنشا جوعارى مەن تومەننىڭ جانە قالىڭ حالىق بۇقاراسىنىڭ جاپالى قۇلشىنىسىندا، كەزەكتە جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ جاعدايى ۇزدىكسىز جاقسارىپ، ەكونوميكالىق، قوعامدىق تۇرمىس بىرتىندەپ قالپىنا كەلدى. ءار جاقتاعى فاكتورلاردى جالپىلاي ويلاستىرۋ ارقىلى 13 - كەزەكتى مەملەكەتتىك حالىق قۇرىلتايىنىڭ 3 - ءماجىلىسىن لايىقتى كەزدە اشۋدىڭ شارت - جاعدايى ازىرلەنىپ بولدى.
2019 - جىلى 12 - ايدىڭ 28 - كۇنى 13 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ 15 - رەتكى ءماجىلىسى 13 - كەزەكتى مەملەكەتتىك حالىق قۇرىلتايى 3 - ءماجىلىسىن 2020 - جىلى 3 - ايدىڭ 5 - كۇنى بەيجيڭدە اشۋدى ۇيعاردى ءارى ءماجىلىستىڭ كەڭەستىك تارتىپتەرى تۋرالى ۇسىنىس قويدى. وسى قارارعا ساي، مەملەكەتتىك حالىق قۇرىلتايى تۇراقتى كوميتەتى ءماجىلىستىڭ اشىلۋى ءۇشىن ءبىرسىپىرا دايىندىق قىزمەتتەردى ىستەدى.
جاڭا تيپتى ايدارشا ۆيرۋس وكپە قابىنۋ ەلەۋلى ىندەتى تۋىلۋىنا بايلانىستى، پارتيا ورتالىق كوميتەتىنىڭ ىندەتتەن ساقتانۋ - تىزگىندەۋ مەن ەكونوميكالىق، قوعامدىق دامۋ قىزمەتىن ءبىر تۇتاس جوسپارلاپ ىلگەرىلەتۋ جونىندەگى كەلەلى شەشىمدەرىن، ورنالاستىرۋلارىن دايەكتىلەندىرىپ، تياناقتاندىرىپ، ىندەتتەن ساقتانۋ - تىزگىندەۋ قىزمەتىن ءۇرتىس ويداعىداي ىستەپ، حالىق بۇقاراسىنىڭ ءومىرىن، سالاماتتىق حاۋىپسىزدىگىن شىن مانىندە قامتاماسىز ەتۋ ءۇشىن، 2020 - جىلى 2 - ايدىڭ 24 - كۇنى 13 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ 16 - رەتكى ءماجىلىسى 13 - كەزەكتى مەملەكەتتىك حالىق قۇرىلتايى 3 - ءماجىلىسىن لايىقتى كەشەۋىلدەتىپ اشۋدى، ناقتى اشىلۋ ۋاقىتىن مەملەكەتتىك حالىق قۇرىلتايى تۇراقتى كوميتەتى ايىرىم بەلگىلەۋدى ۇيعاردى.
ءار جاقتاعى فاكتورلاردى جالپىلىق ويلاستىرۋ ارقىلى 13 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ 17 - رەتكى ءماجىلىسى 13 - كەزەكتى مەملەكەتتىك حالىق قۇرىلتايىنىڭ 3 - ءماجىلىسىن 2020 - جىلى 5 - ايدىڭ 22 - كۇنى بەيجيڭدە اشۋدى ۇيعاردى.
