5 - ايدىڭ 5 - كۇنى ساياحاتشىلار يانجي حۇيزۋ اۆتونوميالى اۋدانى سىشىليچىڭزى قالاشىعى بوعدا قىستاعىنداعى بانلانگىن ەگىنشىلىك بازاسىندا سەيىلدەۋدە. سۋرەتتى چۋە . حۋرا تۇسىرگەن
شينجياڭ گازەتىنىڭ جالپىلىق اقپارات قۇرالدارى تىلشىلەرى
”1 - مامىر“ دەمالىسىندا تۇتىنۋ بازارى قىزا ءتۇستى. رايونىمىزدىڭ جەر - جەرى ىرىقتىلىقپەن اتتانىسقا كەلىپ، تۇتىنۋدى جانداندىرىپ، ىشكى سۇرانىستى ىسكە قوستى، قولداۋ ساياساتىن شىعارۋ، ساتۋدى كۇش سالا جەبەۋ سياقتى جولدارمەن تۇتىنۋ قامداۋىن كەڭەيتتى، تۇتىنۋ بازارىنىڭ ومىرشەڭدىگى ۇزدىكسىز ارتىپ، كومەسكى كۇشى ۇزدىكسىز جارىققا شىقتى.
تۇتىنۋ بەلەتىنىڭ ىلگەرىلەتۋ سالىستىرمالى شاماسى 15: 1نان استى
5 - ايدىڭ 5 - كۇنى ءۇرىمجى قالاسىنداعى حاۋمەي تۇرمىستىق بۇيىمدار ەرەن بازارىندا، ماسكى تاققان قاريدارلار اقشا تولەۋ ورنىندا كەزەكتە تۇردى.
”ۇكىمەت جىفۋباۋ ارقىلى تۇتىنۋ بەلەتىن تاراتىپ تۇتىنۋ بازارىن جانداندىردى، ەرەن بازاردا ءار كۇنى جىفۋباۋ ارقىلى تولەنگەن اقشا سوماسى 80 − 100 مىڭ يۋانعا جەتىپ، تيجارات سوماسىنىڭ ％35تەن استامىن ۇستادى. ساتۋدى جەبەۋ سياقتى تيىمدىلىك شارالارىنىڭ دەم بەرۋىندە، قاريدارلاردىڭ سانى دەمالىستىڭ الدىنداعىدان ％50 شاماسىندا ارتتى“، - دەدى ەرەن بازاردىڭ قاريدارلارعا قىزمەت وتەۋ جاۋاپتىسى ۋي لينا.
5 - ايدىڭ 1 - كۇنىنەن 10 - كۇنىنە دەيىن ءۇرىمجى قالاسى 3 - كەزەكتەگى تۇتىنۋ بەلەتىن سالدى. جىفۋباۋ تۇعىرىنىڭ ساناعىندا كورسەتىلگەندەي، 5 - ايدىڭ 4 - كۇنى ساعات 24كە دەيىن 3 - كەزەكتەگى تۇتىنۋ بەلەتىنەن جالپى ءبىر ميلليون 960 مىڭ داناسى الىنىپ، تۇتىنۋشىلاردىڭ انىقتاپ ەسەپتەن شىعارعان سوماسى جالپى ءبىر ميلليون 950 مىڭ 200 يۋانعا جەتىپ، جالپى ساتىلۋ سوماسى 29 ميلليون 316 مىڭ 800 يۋان بولىپ، ىلگەرىلەتۋ سالىستىرما شاماسى 15: 1نان ۇلكەن بولعان.
اۆتوموبيلدىڭ ساتىلۋ مولشەرى بۇرىنعى جىلدارداعى ەڭ مول كەزدەگىنىڭ 80 پايىزىنا جەتتى
ءتيىمدى ساياساتتىڭ جەتەكتەۋىمەن، اۆتوموبيل ساتۋ بازارى دا كۇسەتتەنە باستادى. 4 - ايدىڭ 18 - كۇنىنەن 6 - ايدىڭ 30 - كۇنىنە دەيىن ءۇرىمجى قالاسى اۆتوموبيل ساتىپ العاندارعا قاتىناس ءماجبۇري قامسىزداندىرۋ قوسىمشا قاراجاتىن بەرۋ جەڭىلدىك ساياساتىن شىعاردى، ”1 - مامىر“ كەزىندە ءۇرىمجى قالاسىنىڭ تۇڭعىش كەزەكتى ”بۇلت“ اۆتوموبيل كورمەسى دوۋيىن، ۋيچات سياقتىلار ارقىلى جەلىدەگى برەندتى تىكە ساتۋ ورىستەتىپ، جەلىدەن تىسقى اۆتوموبيلدىڭ ساتىلۋىن ىلگەرىلەتتى. 4 - ايدىڭ 18 - كۇنىنەن بەرى، 3508 اۆتوموبيل ساتىلىپ، ساتىلۋ سوماسى 544 ميلليون يۋانعا جەتتى.
5 - ايدىڭ 5 - كۇنى ءتىلشى دۇڭفىڭ نيسسان بوۋاڭ ارناۋلى ساتۋ دۇكەنىندە اۆتوموبيل كورۋگە كەلگەن الارمانداردىڭ دەنە تەمپەراتۋراسىن ولشەتىپ دۇكەنگە كىرىپ جاتقانىن، كەيبىرەۋلەردىڭ اۆتوموبيلدى جۇرگىزىپ كورگەنىن، كەيبىرەۋلەردىڭ جەڭىلدىك شارالارىن ۇعىسىپ جاتقانىن، ەندى كەيبىرەۋلەردىڭ اۆتوموبيل ساتىپ الۋ توقتامىنا قول قويعانىن، دۇكەن ءىشىنىڭ دۋمانعا تولعانىن كوردى.
ارناۋلى ساتۋ دۇكەنىنىڭ ساتۋ باس باقىلاۋشىسى جاڭ گوليان تىلشىگە: ”قازىر ءار كۇنى 20 − 30 اۆتوموبيلگە تاپسىرىس بەرىلەدى، ساتىلۋ مولشەرى بۇرىنعى جىلداردىڭ 5 - ايىنداعى ەڭ مول مەزگىلدىڭ 80 پايىزىنا جەتتى، اۆتوموبيل ساتۋ بازارى قايتا كۇسەتتەنە باستادى“، - دەدى.
تاماق، كيىم، تۇتىنۋ بۇيىمدارى دەمالىستاعى تۇتىنۋدىڭ ءتۇيىنى بولدى
قاشقار ورتا، باتىس ازيا حالىقارالىق ساۋدا بازارىندا كەپتىرىلگەن جەمىس، قولونەر بۇيىمدارى، كيىم - كەشەكتىڭ ءبارى بار، ساۋداگەرلەر باعا تالاسا ءجۇرىپ، قاريدارلاردى شاقىرۋدا.
”بيىلعى ’1 − مامىر‘ دەمالىسى ۇزارتىلدى، ساياحاتشىلار كوبەيدى، ساۋدامىز دا كورنەكتى جاقساردى“، - دەدى ساۋداگەر ازەزايت ءالي، ونىڭ كەپتىرىلگەن جەمىس دۇكەنىنىڭ ءبىر كۇندىك ساۋدا سوماسى 3000 يۋاننان اسادى.
اس - سۋ كاسىبى دە دەمالىستاعى تۇتىنۋدىڭ ماڭىزدى قۇرامداس بولىگى رەتىندە جاندانا ءتۇستى. كوپ تۇرلىلەنۋ، وزگەشەلەنۋ، ساپالىلانۋ تۇتىنۋشىلار بوي ۇرعان قىزۋ تۇيىنگە اينالدى.
ساپ - سارى پالاۋ، سىلەكەيدى شۇبىرتاتىن كاۋاپ... 5 - ايدىڭ 4 - كۇنى قۇلجا قالاسى اشۋ رايونىنا ورنالاسقان جياڭفان - ىر تەز تاماقحاناسىندا ادامدار ءيىن تىرەستى. ”ءبىز نەگىزىنەن پالاۋ، لاڭمان، سامسا سياقتى شينجياڭ ەرەكشەلىگىندەگى تاعامداردى شىعارامىز، 4 - ايدىڭ 30 - كۇنىنەن باستاپ تاماقحانامىزعا كەلگەن تۇتىنۋشىلار كورنەكتى كوبەيىپ، ساۋدا سومامىز ادەتتەگىدەن ％10كە جۋىق ارتتى، تاماقحانامىز كۇنىنە 1000 يۋانعا جۋىق تۇتىنۋ بەلەتىن قابىلدايدى. ءبىز دە زارارسىزداندىرۋدى، دەنە تەمپەراتۋراسىن ولشەۋدى كۇشەيتىپ، كوپشىلىكتىڭ الاڭسىز، كوڭىلدى تاماقتانۋىنا مۇمكىندىك جاسادىق“، - دەدى جياڭفان - ىردىڭ جاۋاپتىسى دۇڭ لياڭ.
قۇمىل قالاسى يجوۋ رايونى سولتۇستىك قالا ماڭى جولىنداعى بيڭفىن گۇلباقشاسىنىڭ جاۋاپتىسى جاڭ يانمەي تىلشىگە وسى بىرنەشە كۇندە گۇلباقشانىڭ ساۋدا مولشەرىنىڭ ”1 - مامىردىڭ“ الدىنداعىدان ％25 ارتقاندىعىن ايتتى. ”دەمالىستى قارسى الۋ ءۇشىن گۇل - ءشوپ، جاسىل وسىمدىكتەردىڭ 20عا جۋىق ءتۇرىن مولايتتىق، ’مارگۋەريتە‘، ’سۋسان ايەل پاتشا‘ تۇگەلدەي وسى رەت جاڭادان كىرگىزىلىپ، ەرەكشە قارسى الۋعا بولەندى“، - دەدى جاڭ يانمەي.
(ءتىلشى جاۋ چۇنحۋا، حاباردى جازۋعا قاتىناسقان تىلشىلەر جاۋ يۋە، ءجازيرا نەسىپبەك، ءرايدا، حان چينيان، ەرىكتى ءتىلشى ۋاڭ ۋىن)
