شينجياڭ گازەتىنىڭ جالپىلىق اقپارات قۇرالدارى تىلشىلەرى لۋ فىڭباۋ، ما ينيڭ 5 - ايدىڭ 6 - كۇنى ۇرىمجىدەن حابارلايدى. ”1 - مامىر“ دەمالىس كەزىندە رايونىمىزدا ءتۇيىندى قاتىناس نىساندارى قۇرىلىسى تولاسسىز جۇرگىزىلدى، قۇرىلىسشىلار قۇرىلىس مەرزىمىن مىقتى يگەرىپ، نىسان قۇرىلىسىن تەزدەتتى.
”دەمالىس كەزىندە ءبىز دەمالمادىق، بارلىق جۇمىسشىلار جۇمىس ورىندارىندا ۇستەمە جۇمىس ىستەپ، قۇرىلىس مەرزىمىن قاۋىرت يگەرىپ، نىساننىڭ ەرتەرەك سالىنىپ بىتۋىنە كۇش سالدى“، - دەدى 5 - ايدىڭ 6 - كۇنى تۇستەن بۇرىن G30 شياۋساۋحۋ - ءۇرىمجى بولىگىن وزگەرتىپ، كەڭەيتىپ سالۋ ينجەنەريا نىسانىنىڭ ورىنباسار قولباسشىسى گۋان چىڭجياڭ. شياۋساۋحۋ - ءۇرىمجى بولىگى − شينجياڭ تۇرپان - ءۇرىمجى - داحۋاڭشان جوعارى دارەجەلى تاس جولىنىڭ قۇرامداس ءبولىمى، وزگەرتىپ، كەڭەيتىپ سالىنعاننان كەيىن قارقىنى جاپپاي تەزدەپ، شينجياڭعا كىرىپ - شىعاتىن جوعارى قارقىندى تاس جولداردىڭ قاتىناۋ قۋاتى ارتادى. بۇل نىسان 2018 - جىلى تۇتاس جەلى بويىنشا باستالعان، بيىل 6 - ايدىڭ 30 - كۇنىنە دەيىن تۇتاس جەلى تۇتاستىرىلىپ، 8 - ايدىڭ سوڭىندا اۆتوكولىك قاتىناۋ شارتىن ازىرلەيدى.
G575 جەلىسى باركول - قۇمىل تاس جول قۇرىلىس نىسانى دا قاۋىرت جۇرگىزىلۋدە. ”1 - مامىر“ قارساڭىندا، وسى نىساننىڭ ءتۇيىنى شىعىس تيانشان تۋنەلى شىعار اۋزىنىڭ وڭ جاعىنداعى ۇڭگىر 5000 مەتردەي قازىلىپ، ناتيجە جاراتىپ، وسى نىسان جۇمىستى قالپىنا كەلتىرگەننەن بەرگى العاشقى ەلەۋلى ىلگەرىلەۋشىلىككە قول جەتكىزدى. كەلەر جىلى سالىنىپ ءبىتىپ، جاپپاي اۆتوكولىك قاتىناۋ نىساناسىنىڭ ورىندالۋىنا شىنايى كەپىلدىك ەتۋ ءۇشىن، نىسان قۇرىلىسى ”1 - مامىر“ دەمالىسى كەزىندە ءبىر كۇن دە توقتاتىلمادى.
التاي - كوكتوعاي - جۇندۇڭ تەمىر جولىنىڭ التايدان كوكتوعايعا دەيىنگى بولىگىنە رەليس توسەۋ جۇمىسى دا جابال جۇرىلۋدە، 96 جۇمىسشى دەمالىس كەزىندە قىزمەت ورىندارىنان تاپجىلماي، ۇشكە ءبولىنىپ كەزەكپەن ىستەۋ ءتاسىلىن قولدانىپ، ارقالىق جابدىقتارىنىڭ قالىپتى ءوندىرىس اينالىمىنا شىنايى كەپىلدىك ەتتى. قازىر التاي - كوكتوعاي بولىگىنىڭ 59.2 كيلومەتر جەرىنە رەليس جاتقىزىلىپ بولدى.
گولمۋت - كورلا تەمىر جولى (شينجياڭ بولىگى) بيىل جۇمىس قالپىنا كەلگەننەن بەرى رەليس جاتقىزۋ جۇمىسىن دامىلسىز جۇرگىزدى، 5 - ايدىڭ 6 - كۇنىنە دەيىن 638 كيلومەتر جەرگە رەليس جاتقىزىلدى، 7 - ايدا رەليس جاتقىزۋ قىزمەتىن تامامداپ، جىل سوڭىنا دەيىن تۇتاس لەنيا بويىنشا پويەز قاتىناپ، اينالىمعا تۇسۋىنە شىنايى كەپىلدىك ەتىلەتىندىگى مەجەلەنۋدە.
حوتان - چارقىلىق تەمىر جول نىسانى جۇمىس قالپىنا كەلگەننەن بەرى، قۇرىلىس جابدىقتارى، جۇمىسشىلار جاپپاي قالىپتى ورەگە قايتا ورالدى، قازىر كوپىر وتكىنى قوسالقىسى، جول تاعانى جيەگىندەگى قيالاردان ساقتانۋ، قالعان بولىگىندەگى كوپىر وتكىنى جۇمىستارى جۇرگىزىلۋدە. قازىرگە دەيىن، جالپى ينجەنەريا مولشەرىنىڭ ％91.80ى سالىنىپ ءبىتتى، الدا قۇرىلىس جۇمىسشىلارى ينجەنەريانىڭ اياق الىسى مەن تۇيىنىنە قاراي، ۇيلەسىمدى ورنالاستىرۋ جاساپ، نىساننىڭ اياق الىسىن جەدەل ىلگەرىلەتىپ، نىسان قۇرىلىسى مىندەتىن دەر كەزىندە ساپالى ورىنداۋعا قۇلشىنباق.
دەمالىس كەزىندە، تاشقورعان اۋەجايىن سالۋ، تۇرپان اۋەجايىن كەڭەيتىپ سالۋ ينجەنەرياسى، ءۇرىمجى ديوپۋ حالىقارالىق اۋەجايىن كەڭەيتىپ سالۋ ينجەنەرياسى سياقتى قۇرىلىستار دا قاۋىرت جۇرگىزىلدى.
