شينحۋا اگەنتتىگىنىڭ 5 - ايدىڭ 8 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 5 - ايدىڭ 8 - كۇنى كەشتە رەسەيدىڭ زۇڭتۇڭى پۋتينمەن تەلەفوندا سويلەستى.
شي جينپيڭ جۇڭگو ۇكىمەتى مەن جۇڭگو حالقى اتىنان 5 - ايدىڭ 9 - كۇنى سوۆەت وداعىنىڭ وتان قورعاۋ سوعىسى جەڭىسكە جەتكەندىگىنىڭ 75 جىلدىعى بايلانىسىمەن پۋتينگە جانە رەسەي حالقىنا ىقىلاستى مەرەكەلىك قۇتتىقتاۋ جولدادى. شي جينپيڭ مىنانى باسا دارىپتەدى: دۇنيە جۇزىلىك 2 - سوعىس ادامزات تاريحىندا بۇرىن بولماعان ءبىر رەتكى اۋىر الاپات. جۇڭگو مەن رەسەي ازيا مەن ەۆروپاداعى نەگىزگى سوعىس مايدانى رەتىندە، وراسان زور ۇلتتىق قۇرباندىق بەردى، دۇنيە جۇزىلىك 2 - سوعىستىڭ ەڭ سوڭعى جەڭىسىنە قول جەتكىزۋ، ادامزاتتى جويىلۋ حاۋپىنەن قۇتقارۋ ءۇشىن ورنىن وگەيسىتۋگە بولمايتىن ۇلەس قوستى. بۇل تاريح ەستە ماڭگى ساقتاۋعا تاتيدى. جۇڭگو - رەسەي ەكى ەل حالقى تىزە قوسا شايقاس جۇرگىزىپ، ۇلى دوستىق ورناتىپ، جۇڭگو - رەسەي قارىم - قاتىناسى جانە ەكى ەل حالقىنىڭ ۇرپاقتان - ۇرپاققا جالعاسقان دوستىعى ءۇشىن سارقىلماس قۋاتتى قوزعاۋشى كۇش ازىرلەدى. دۇنيە جۇزىلىك 2 - سوعىستاعى نەگىزگى جەڭىسكە جەتۋشى ەل جانە بىرلەسكەن مەملەكەتتەر ۇيىمى حاۋىپسىزدىك القالار كەڭەسىنە تۇراقتى القا ەل رەتىندە، جۇڭگو - رەسەي دۇنيە ءجۇزىنىڭ بەيبىتشىلىگى مەن حاۋىپسىزدىگىن قورعاۋدا، ادامزاتتىڭ دامۋىن، العا باسۋىن ىلگەرىلەتۋدە ەرەكشە بورىش ارقالاپ وتىر. جۇڭگو جاق رەسەي جاقپەن بىرگە، دۇنيە جۇزىلىك 2 - سوعىستىڭ جەڭىس تابىستارىن جانە حالىقارالىق ادىلدىكتى، تۋراشىلدىقتى باتىل قورعاپ، كوپ جاقتىلىقتى قولداپ جانە امالياتتا ايگىلەپ، قاشاندا دۇنيە ءجۇزى بەيبىتشىلىگىنىڭ قۇرۋشىسى، بۇكىل جەر شارىنىڭ دامۋىنا ۇلەس قوسۋشى، حالىقارالىق ءتارتىپتى قورعاۋشى بولۋدى قالايدى.
شي جينپيڭ مىنانى اتاپ كورسەتتى: كەزەكتە حالىقارالىق قوعام جاڭا تيپتى ايدارشا ۆيرۋس وكپە قابىنۋ ىندەتىمەن كۇرەس جۇرگىزۋدە. ءسىزدىڭ تىكە قولباسشىلىعىڭىزدا رەسەي جاقتىڭ ساقتانۋ - تىزگىندەۋ شارالارىنىڭ ونىمدىلىگى بىرتىندەپ كورنەكتىلەنىپ كەلەدى، جۇڭگو جاق رەسەي جاقتىڭ ەڭ سوڭىندا ىندەتتى جەڭەتىندىگىنە تولىق سەنەدى، رەسەي جاققا ۇزدىكسىز تاباندىلىقپەن قولداۋ كورسەتەدى. حالىقارالىق قوعام فاشيزمگە قارسى دۇنيە جۇزىلىك سوعىستىڭ رۋحىن اسقاقتاتىپ، ءبىر نيەتپەن سەلبەسىپ، ىنتىماقتاسا ءوزارا كومەكتەسىپ، ادامزاتتىڭ تاعدىرلاس ورتاق تۇلعاسى ۇستانىمىن بەلسەنە امالياتتا ايگىلەپ، ءار ەل حالقىنىڭ ءومىرىنىڭ حاۋىپسىزدىگىن جانە دەنساۋلىعىن قورعاۋعا قاتىستى وسى رەتكى شايقاستا قول ۇستاسا جەڭىسكە جەتۋ كەرەك. مەن جۇڭگو مەن رەسەيدىڭ جانە حالىقارالىق قوعامنىڭ بىرگە قۇلشىنۋىندا، ءبىزدىڭ، ءسوزسىز ءتۇرلى ۆيرۋستاردى جەڭىپ، وسى رەتكى شايقاستىڭ تۇبەگەيلى جەڭىسىنە قول جەتكىزەتىندىگىمىزگە سەنەمىن.
پۋتين بىلاي دەدى: رەسەي - جۇڭگو ەكى ەل حالقى دۇنيە جۇزىلىك 2 - سوعىستا وراسان زور قۇرباندىق بەردى، سوۆەت وداعىنىڭ وتان قورعاۋ سوعىسى جەڭىسكە جەتكەندىگىنىڭ 75 جىلدىعىن قۇتتىقتاعان تاريحي ساتتە، رەسەي جاق جۇڭگو جاقپەن جالپى بەتتىك ستراتەگيالىق سايكەستىكتى كۇشەيتىپ، دۇنيە ءجۇزىنىڭ بەيبىتشىلىگىن بىرگە قورعاۋ سەنىمىن ايگىلەۋدى قالايدى، تاريحتى بۇرمالاۋعا، تاريحتى ۇمىتتىرۋعا ۇرىنعان ءارقانداي ءسوز - ارەكەتكە استە جول بەرمەيدى. جۇڭگو جاقتىڭ ادامگەرشىلىك كومەك كورسەتكەندىگىنە جانە ەمدەۋ - قورعانۋ بۇيىمدارىن بەرگەندىگىنە العىس ايتامىن، رەسەي جاق جۇڭگو جاقتىڭ ساقتانۋ - تىزگىندەۋ تاجىريبەلەرىنەن ۇلگى الىپ، ۆاكسينانى زەرتتەۋ - اشۋ سەلبەستىگىن ورىستەتۋدى قالايدى. رەسەي جاق كەيبىر كۇشتەردىڭ ىندەتتەن پايدالانىپ جۇڭگونى جازعىرعاندىعىنا قارسى تۇرادى، جۇڭگو جاقپەن تاباندىلىقپەن بىرگە تۇرادى. رەسەي جاق جۇڭگو جاقپەن بريكس ەلدەرى جانە شاڭحاي سەلبەستىك ۇيىمى سياقتى جۇلگەلەردە تىلدەسۋدى، سەلبەستىك جاساسۋدى كۇشەيتۋدى قالايدى. مەن سىزبەن ۇزدىكسىز قويۋ بايلانىس جاساپ تۇرۋدى كۇتەمىن.
