جۇڭگو كوممۋنيستىك پارتياسى ورتالىق كوميتەتى پارتيا سىرتىنداعى قايراتكەرلەردىڭ اڭگىمە ءماجىلىسىن اشتى
جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ قىزمەتى جونىندەگى پىكىرلەر مەن ۇسىنىستاردى تىڭدادى
شي جينپيڭ باسقاردى ءارى ماڭىزدى ءسوز سويلەدى
لي كىچياڭ قاتىستى جاعدايلاردى حابارلاندىردى، ۋاڭ ياڭ، ۋاڭ حۋنيڭ قاتىناستى
شينحۋا اگەنتتىگىنىڭ 5 - ايدىڭ 8 - كۇنى بەيجيڭنەن بەرگەن حابارى. 5 - ايدىڭ 8 - كۇنى جۇڭگو كوممۋنيستىك پارتياسى ورتالىق كوميتەتى جۇڭنانحايدا پارتيا سىرتىنداعى قايراتكەرلەردىڭ اڭگىمە ءماجىلىسىن اشىپ، جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ قىزمەتى جونىندە ءارقايسى دەموكراتيالىق پارتيا، توپتاردىڭ ورتالىق كوميتەتتەرىنىڭ، بۇكىل مەملەكەتتىك ساۋدا - ونەركاسىپشىلەر بىرلەستىگىنىڭ جانە پارتيادا، توپتا جوق قايراتكەرلەردىڭ ۋاكىلدەرىنىڭ پىكىرلەرى مەن ۇسىنىستارىن تىڭدادى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ اڭگىمە ءماجىلىستى باسقاردى ءارى ماڭىزدى ءسوز سويلەدى. شي جينپيڭ بىلاي دەپ باسا دارىپتەدى: اسا جاپالى قۇلشىنىس ارقىلى ۋحاندى قورعاۋ شايقاسى، حۋبەيدى قورعاۋ شايقاسى شەشۋشى تابىسقا قول جەتكىزدى، ىندەتتەن ساقتانۋ - تىزگىندەۋ توسقاۋىل شايقاسى ەلەۋلى ستراتەگيالىق تابىسقا قول جەتكىزدى، ىندەتتەن ساقتانۋ - تىزگىندەۋدى جانە ەكونوميكالىق، قوعامدىق دامۋ قىزمەتىن ءبىر تۇتاس جوسپارلاپ ىلگەرىلەتۋ بەلسەندى ونىمدىلىككە قول جەتكىزدى. ءبىز قىزمەتتەردى ۇزدىكسىز مىقتاپ يگەرىپ، جاقسى ىستەپ، ىندەتتەن ساقتانۋ - تىزگىندەۋ سىندى ارقاۋدى قاي - قاشان دا مىقتاپ شيراتىپ، جۇمىستى، ءوندىرىستى، وقۋدى قالپىنا كەلتىرۋدى تىڭعىلىقتى ىلگەرىلەتىپ، كەدەيلىكتەن ارىلتۋدان قامال الۋدىڭ شەشۋشى شايقاسىنىڭ شەشۋشى جەڭىسىنە جەتۋ نىسانا مىندەتتەرىن ورىنداۋعا، جاپپاي دوڭگەلەك داۋلەتتى قوعام ورناتۋعا شىنايى كەپىلدىك ەتۋىمىز كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەلەرى لي كىچياڭ، ۋاڭ ياڭ، ۋاڭ حۋنيڭ اڭگىمە ماجىلىسكە قاتىناستى. لي كىچياڭ جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ قىزمەتىنە قاتىستى جاعدايلاردى حابارلاندىردى.
اڭگىمە ماجىلىستە جۇڭگو گومينداڭ توڭكەرىستىك كوميتەتى ورتالىق كوميتەتىنىڭ ءتوراعاسى ۋان ىشياڭ، جۇڭگو دەموكراتيالىق وداعى ورتالىق كوميتەتىنىڭ ءتوراعاسى ديڭ جۇڭلي، جۇڭگو دەموكراتيالىق مەملەكەت قۇرۋ قوعامى ورتالىق كوميتەتىنىڭ ءتوراعاسى حاۋ ميڭجين، جۇڭگو دەموكراتيانى ىلگەرىلەتۋ قوعامى ورتالىق كوميتەتىنىڭ ءتوراعاسى ساي دافىڭ، جۇڭگو جۇمىسشى - شارۋا دەموكراتيالىق پارتياسى ورتالىق كوميتەتىنىڭ ءتوراعاسى چىن جۋ، جۇڭگو ادىلەت پارتياسى ورتالىق كوميتەتىنىڭ ءتوراعاسى ۋان گاڭ، 3 - قىركۇيەك عىلمي قوعامى ورتالىق كوميتەتىنىڭ ءتوراعاسى ۋ ۋيحۋا، تايۋان دەموكراتيالىق اۆتونوميا وداعى ورتالىق كوميتەتىنىڭ ءتوراعاسى سۋ حۇي، بۇكىل مەملەكەتتىك ساۋدا - ونەركاسىپشىلەر بىرلەستىگىنىڭ ءتوراعاسى گاۋ يۇنلۇڭ، پارتيادا، توپتا جوق قايراتكەرلەردىڭ ۋاكىلى سۇن چيشين ىركەس - تىركەس ءسوز سويلەدى. ولار مىنالاردى ءبىلدىردى: شي جينپيڭ جولداستى ۇيتقى ەتكەن جۇڭگو كوممۋنيستىك پارتياسى ورتالىق كوميتەتىنىڭ پارمەندى باسشىلىعىندا، بۇكىل ەل حالقى جوعارىدان تومەنگە دەيىن ءبىر نيەتتە بولىپ، ەل بىرلىگىنەن قامال ورناتىپ، ەلىمىزدىڭ ىندەتتەن ساقتانۋ - تىزگىندەۋ توسقاۋىل شايقاسىندا ەلەۋلى ستراتەگيالىق تابىسقا قول جەتكىزدى، ەل ىشىندەگى ىندەت نەگىزىنەن تىزگىندەلىپ، سىرتتان كىرۋ سيپاتتى ناۋقاستاردىڭ ارتۋ بەتالىسى بىرتىندەپ ازايىپ، ءوندىرىس، تۇرمىس ءتارتىبى جەدەل قالپىنا كەلىپ، ۇلتتىق ماقتانىش سەزىم، وزىنە سەنىم، ۇيىستىرۋ كۇشى بارىنشا قاۋلاپ، ەلىمىزدىڭ سوتسياليستىك ءتۇزىمىنىڭ ساياسي ابزالدىلىعى مەن جۇڭگونىڭ جاۋاپكەرشىلىك ارقالايتىن ءىرى ەل وبرازى تولىق ايگىلەندى. ولار جۇڭگو كوممۋنيستىك پارتياسى ورتالىق كوميتەتىنىڭ ىندەتتەن ساقتانۋ - تىزگىندەۋدى ۇدايىلاندىرۋدى ءبىر تۇتاس جوسپارلاپ ىلگەرىلەتۋ جانە ءوندىرىس پەن تۇرمىستىڭ قالىپتى ءتارتىبىن جەدەل قالپىنا كەلتىرۋ جونىندەگى ورنالاستىرۋىن القادى ءارى ۆاكسينانى زەرتتەپ اشۋدى، تەكسەرىپ بەكىتۋدى جانە قولدانۋدى جەدەلدەتۋ، ەلەۋلى ىندەتتەن ساقتانۋ - تىزگىندەۋدىڭ عىلىم - تەحنيكالىق تىرەگىن كۇشەيتۋ، توسىن الەۋمەتتىك دەنساۋلىق ساقتاۋ وقيعاسىنا توتەپ بەرۋ تاربيەسىن جانە دارىندى جەتىلدىرۋدى كۇشەيتۋ، جۇمىستى، ءوندىرىستى قالپىنا كەلتىرۋدى ىلگەرىلەتۋ، ەكونوميكالىق، قوعامدىق دامۋدىڭ ومىرشەڭدىك كۇشىن قالپىنا كەلتىرۋ، فينانس بازارىنىڭ ورنىقتىلىعىن قورعاۋ، ”التىنى ورنىقتىرۋ“ قىزمەتىن ىشكەرىلەي جاقسى ىستەۋ، ”التىنى قامتاماسىزداندىرۋ“ مىندەتىن تياناقتاندىرۋ، كەدەيلىكتەن ارىلتۋدان قامال الۋ شەشۋشى شايقاسىنىڭ شەشۋشى جەڭىسىنە جەتۋ مىندەتىن ورىنداۋعا شىنايى كەپىلدىك ەتۋ، جۇڭگونىڭ ىندەتكە قارسى اتتانۋ حيكاياسىن ويداعىداي بايانداۋ سياقتىلار جونىندە پىكىرلەر مەن ۇسىنىستاردى العا قويدى.
كوپشىلىكتىڭ ءسوزىن مۇقيات تىڭداعاننان كەيىن، شي جينپيڭ ماڭىزدى ءسوز سويلەدى. ول مىنالاردى ءبىلدىردى: توسىن تۋىلعان ىندەت الدىندا، جۇڭگو كوممۋنيستىك پارتياسى ورتالىق كوميتەتى وسكەلەڭ ءمان بەرىپ، حالىقتىڭ ءومىرىنىڭ حاۋىپسىزدىگى مەن دەنساۋلىعىن ءبىرىنشى ورىنعا قويۋعا تاباندى بولىپ، جالپى جاعدايدى ءبىر تۇتاس جوسپارلاپ، سالماقتىلىقپەن توتەپ بەرىپ، ساقتانۋ - تىزگىندەۋ مەن قۇتقارۋ - ەمدەۋدىڭ ءبىر قىدىرۋ شارالارىن باتىل جولعا قويىپ، ءبىر ايدان استام ۋاقىتتا ىندەتتىڭ ءورشۋ بەتالىسىن العاشقى قادامدا تەجەدى، 2 اي شاماسىنداعى ۋاقىتتا جەرگىلىكتى كۇندىك جاڭادان ارتقان ناۋقاستى ءبىر ورىندى سان ىشىندە تىزگىندەدى، 3 اي شاماسىنداعى ۋاقىتتا ۋحاندى قورعاۋ شايقاسىندا، حۋبەيدى قورعاۋ شايقاسىندا شەشۋشى تابىسقا قول جەتكىزدى. ءبىر ميلليارد 400 ميلليون جان سانى بار ءبىزدىڭ وسىنشاما ۇلكەن ەلىمىزدە مۇنداي ناتيجەلەردىڭ قولعا كەلۋى وڭاي بولعان جوق!
شي جينپيڭ بىلاي دەپ باسا دارىپتەدى: ىندەتكە قارسى اتتانۋدىڭ توتەنشە ساتىندە، ءارقايسى دەموكراتيالىق پارتيا - توپتار، بۇكىل مەملەكەتتىك ساۋدا - ونەركاسىپشىلەر بىرلەستىگى مەن پارتيادا، توپتا جوق قايراتكەرلەر مىزعىماستان جۇڭگو كوممۋنيستىك پارتياسىمەن بىرگە ويلاپ، بىرگە تۇرىپ، بىرگە ىستەپ، مىزعىماستان جۇڭگو كوممۋنيستىك پارتياسىمەن قيىندىقتى بىلەك بىرىكتىرە جەڭىپ، قيىن - قىستاۋ جاعدايدى بىرگە وتكەردى. ءارقايسى دەموكراتيالىق پارتيا - توپتاردىڭ ورتالىق كوميتەتتەرى، بۇكىل مەملەكەتتىك ساۋدا - ونەركاسىپشىلەر بىرلەستىگى جۇڭگو كوممۋنيستىك پارتياسى ورتالىق كوميتەتىنىڭ شەشىمدەرىن، ورنالاستىرۋلارىن باتىل دايەكتىلەندىرىپ، دەر كەزىندە باسشىلىق گرۋپپاسىن قۇرىپ، حابارلاندىرۋ شىعارىپ، قالىڭ مۇشەلەردى يدەيا مەن ارەكەتتى جۇڭگو كوممۋنيستىك پارتياسى ورتالىق كوميتەتىنىڭ شەشىمدەرىمەن، ورنالاستىرۋلارىمەن بىرلىككە كەلتىرۋگە ۇندەپ، دارىندى ارتىقشىلىعىن، اقىل - پاراسات ارتىقشىلىعىن، كەڭ كولەمدە بايلانىس جاساۋ ارتىقشىلىعىن ساۋلەلەندىرىپ، دەموكراتيالىق پارتيا - توپتاردىڭ 60 مىڭنان استام ەمدەۋ قىزمەتكەرلەرىن ىندەتتىڭ ءبىرىنشى شەبىندە ات سالىسۋعا جىبەرىپ، ىندەتتىڭ كەڭەيۋىنەن ساقتانۋ، كاسىپورىنداردىڭ جۇمىستى، ءوندىرىستى قالپىنا كەلتىرۋىنە كومەكتەسۋ، ىندەتتىڭ شەكارا سىرتىنان كىرۋىنەن ساقتانۋ - تىزگىندەۋ سياقتى ەلەۋلى ماسەلەلەردى توڭىرەكتەي وتىرىپ تەكسەرۋ - زەرتتەۋ جۇرگىزىپ، اقىل - كەڭەس بەرىپ، ءار دارەجەلى پارتكومدار مەن ۇكىمەتتەردىڭ يدەيالىق قىزمەتتى جاقسى ىستەۋىنە سەلبەسىپ، ۇگىت - تاربيەنى جانە قوعامدىق پىكىر جەتەكشىلىگىن كۇشەيتتى، سونىمەن بىرگە قالىڭ مۇشەلەردى بەلسەندىلىكپەن اقشالاي، زاتتاي جىلۋ اتاۋعا ۇندەپ، ىندەتتەن ساقتانۋ - تىزگىندەۋ قىزمەتىن جاقسى ىستەۋگە كۇش قوستى. شي جينپيڭ جۇڭگو كوممۋنيستىك پارتياسى ورتالىق كوميتەتى اتىنان كوپشىلىككە العىس ايتتى.
شي جينپيڭ بىلاي دەپ اتاپ كورسەتتى: كوپشىلىك سوزدەرىندە ەلىمىزدىڭ ىندەتكە قارسى اتتانۋ قىزمەتىن تولىق تۇراقتاندىردى، جۇڭگو كوممۋنيستىك پارتياسى ورتالىق كوميتەتىنىڭ ىندەتتەن ساقتانۋ - تىزگىندەۋ قىزمەتى جونىندەگى شەشىمدەرىن، ورنالاستىرۋلارىن القايتىندىقتارىن ءبىلدىردى ءارى ىندەتتەن ساقتانۋ - تىزگىندەۋدى ۇدايىلاندىرۋدى ۇزدىكسىز جاقسى ىستەۋ، ىندەتتەن ساقتانۋ - تىزگىندەۋدى جانە ەكونوميكالىق، قوعامدىق دامۋ قىزمەتىن ءبىر تۇتاس جوسپارلاپ ىلگەرىلەتۋ، الەۋمەتتىك دەنساۋلىق ساقتاۋ جۇيەسىن اقاۋسىزداندىرۋ سياقتىلار جونىندە سىندارلى پىكىرلەر مەن ۇسىنىستاردى العا قويدى، ءبىز مۇقيات اقىلداسىپ قابىلدايمىز.
شي جينپيڭ بىلاي دەپ باسا دارىپتەدى: ىندەتتەن ساقتانۋ - تىزگىندەۋ كۇرەسىندە ءبىز جۇڭگو كوممۋنيستىك پارتياسىنىڭ ورتالىقتانعان ءبىر تۇتاس باسشىلىعىنا تاباندى بولدىق، پارتيا، ۇكىمەت، ارميا، حالىقتىق قۇرىلىمدار، عىلىم - ءبىلىم سالاسى سياقتى بارلىق سالا جانە بارلىق جەر ءبىر تۇلعالى ارەكەت ەتىپ، وڭىرلەر، تاراۋلار دەرەۋ ءۇن قوسىپ، ىندەتتەن ساقتانۋ - تىزگىندەۋدىڭ حالىقتىق شايقاسىن، جالپى تۇلعالىق شايقاسىن، توسقاۋىل شايقاسىن جۇرگىزدى. ءبىز حالىقتى وزەك ەتۋگە تاباندى بولىپ، بۇكىل ەلدەگى ەڭ تاڭداۋلى شيپاگەرلەردى، ەڭ وزىق جابدىقتاردى، ەڭ شۇعىل قاجەتتى بايلىقتى شوعىرلاندىرىپ، ناۋقاستاردى بار كۇشپەن قۇتقارىپ - ەمدەۋگە كىرىسىپ، قۇتقارۋ - ەمدەۋ اقىسىن تۇگەلدەي مەملەكەت كوتەرىپ، تەكسەرۋ - ولشەۋ مولشەرىن، ەمدەپ ساۋىقتىرۋ مولشەرىن ەڭ جوعارى دارەجەدە جوعارىلاتىپ، جۇعىمدالۋ مولشەرىن، ءولۋ مولشەرىن بارىنشا تومەندەتتىك. ءبىز حالىق بۇقاراسىنا تىعىز ارقا سۇيەپ، بۇكىل ەل بويىنشا جۇمىلىپ، بۇكىل حالىق ات سالىسىپ، بىرلەسىپ ساقتانىپ، بىرلەسىپ تىزگىندەپ، بۇقارالىق ساقتانىپ، بۇقارالىق تىزگىندەپ، ەڭ بەرىك ساقتانۋ - تىزگىندەۋ جۇيەسىن ورناتتىق، بۇكىل ەلدەگى ءار ۇلت حالقى تۇرلىشە تاسىلمەن وسى رەتكى ىندەتتەن ساقتانۋ - تىزگىندەۋ كۇرەسىنە بەلسەندىلىكپەن ات سالىسىپ، مىزعىماس قۋاتتى كۇش ۇيىستىردى. ءبىز كۇشتى شوعىرلاندىرىپ ۇلكەن ءىس تىندىراتىن تۇزىمدىك ابزالدىلىقتى ساۋلەلەندىرىپ، بۇكىل ەل ءبىر تۇتاس جۇيە بولۋعا تاباندى بولىپ، تۇتاس قوعامنىڭ كۇشىن جۇمىلدىرىپ، ءار جاقتارداعى بايلىقتى جۇمىلدىرىپ، ىندەتكە قارسى اتتانۋدىڭ قۋاتتى بىرىككەن كۇشىن جەدەل قالىپتاستىرىپ، جۇڭگو كۇشىن، جۇڭگو رۋحىن، جۇڭگو ونىمدىلىگىن ايگىلەدىك. ءبىز جالپىلىق مەملەكەت قۋاتىن ءبىر تۇتاس جوسپارلاپ قولدانىپ، جان - جاقتىلى ادام كۇشىن ۇيىمداستىرۋ شايقاسىن، زاتتىق ماتەريال قامتاماسىزدىعى شايقاسىن، عىلىم - تەحنيكالىق اتويلاۋ شايقاسىن، بايلىق جىلجىمالى شايقاسىن جۇرگىزدىك. ءبىز عىلىم - تەحنيكالىق العاباسارلىقتى تىعىز سۇيەنىش ەتىپ، ءبىر اپتاعا جەتپەيتىن ۋاقىتتا جاڭا تيپتى ايدارشا ۆيرۋستىڭ تۇتاس گەن گرۋپپاسى قاتارىن تۇراقتاندىرىپ ءارى ۆيرۋستىڭ ۋلى ءتۇبىرىن اجىراتىپ، كوپ ءتۇرلى تەكسەرۋ - ولشەۋ سىناق ءدارىسىن دەر كەزىندە شىعارىپ، ءبىر توپ ءونىمدى ءدارى - دارمەكتەر مەن ەمدەۋ جوباسىن تەز سارالاپ تاڭداپ، كوپ تەحنيكالىق جەلىدە ۆاكسينانى زەرتتەپ - اشۋدى كلينيكالىق سىناق ەتۋ كەزەڭىنە ەنگىزدىك. ءبىز سوتسياليستىك وزەكتى قۇن كوزقاراسىن اسقاقتاتتىق، بۇكىل ەلدەگى ءار ۇلت حالقى قيىن - قىستاۋدى بىرگە وتكەرىپ، ءبىر نيەتپەن كۇش بىرىكتىردى، وتانشىلدىق، كوللەكتيۆيزم، سوتسياليزم رۋحى كەڭىنەن اسقاقتادى، ءبىر توپ قاھارمان ۇلگىلەر جارىققا شىعىپ، ءبىر نيەتپەن ىنتىماقتاسۋدىڭ، ەل بىرلىگىنەن قامال تۇرعىزۋدىڭ قۋاتتى رۋحاني قورعانىس شەبىن قۇرىپ، سوتسياليستىك رۋحاني وركەنيەت قۇرىلىسىن كۇشەيتۋدىڭ، سوتسياليستىك وزەكتى قۇن كوزقاراسىن اسقاقتاتۋدىڭ كەلەلى ءمانىن تولىق كورسەتتى، جۇڭحۋانىڭ تاڭداۋلى ءداستۇرلى مادەنيەتىنىڭ قۋاتتى كۇشىن تولىق ايگىلەدى. ءبىز حالىقارالىق اۋىس - كۇيىستى، سەلبەستىكتى كۇشەيتىپ، ىرىقتىلىقپەن قاتىستى مەملەكەتتەرگە جانە حالىقارالىق ۇيىمدارعا شامامىزدىڭ جەتىسىنشە كومەك كورسەتىپ، جاۋاپكەرشىلىك ارقالايتىن ءىرى ەلدىڭ جاۋاپكەرشىلىك ارقالاعاندىعىن ايگىلەدىك. ىندەتتەن ساقتانۋ - تىزگىندەۋ كۇرەسىنىڭ امالياتى جۇڭگو كوممۋنيستىك پارتياسىنىڭ باسشىلىعى مەن ەلىمىزدىڭ سوتسياليستىك ءتۇزىمىنىڭ، ەلىمىزدىڭ مەملەكەتتى جونگە سالۋ جۇيەسىنىڭ قۋاتتى ومىرشەڭدىك كۇشكە جانە ايقىن ابزالدىلىققا يە ەكەندىگىن، ءارقانداي قيىنشىلىقتى، بوگەتتى جەڭە الاتىندىعىن، ادامزات وركەنيەتىنىڭ العا باسۋى ءۇشىن ەلەۋلى ۇلەس قوسا الاتىندىعىن تاعى ءبىر رەت دالەلدەدى.
شي جينپيڭ بىلاي دەپ اتاپ كورسەتتى: وسى رەتكى جاڭا تيپتى ايدارشا ۆيرۋس وكپە قابىنۋى ىندەتىنە توتەپ بەرۋ ەلىمىزدىڭ ەلەۋلى ىندەتتەن ساقتانۋ - تىزگىندەۋ ءتۇزىلىسى مەحانيزمى، الەۋمەتتىك دەنساۋلىق ساقتاۋ جۇيەسى سياقتى جاقتاردا ورىن تەۋىپ وتىرعان كەيبىر ولقىلىقتارىن اشىپ كورسەتتى، اۋرۋدان ساقتانۋ - تىزگىندەۋ جۇيەسىن رەفورمالاپ، كەمەلدەندىرىپ، ادەتتەگى جاعداي مەن شايقاستىق كۇي ۇشتاستىرىلاتىن ەلەۋلى ىندەتتەن ساقتانۋ - تىزگىندەۋ، قۇتقارۋ - ەمدەۋ جۇيەسىن قۇرىپ، شۇعىل جاعدايعا توتەپ بەرۋ زاتتىق ماتەريالدارىن قامتاماسىز ەتۋ جۇيەسىن اقاۋسىزداندىرىپ، شەشۋشى، وزەكتى تەحنيكالاردان قامال الۋدىڭ جاڭاشا مەملەكەتتىك ءتۇزىلىسىن جەدەل ورناتىپ، وتانشىلدىق تازالىق قيمىلىن ىشكەرىلەي ورىستەتىپ، ەلىمىزدىڭ الەۋمەتتىك دەنساۋلىق ساقتاۋ جۇيەسىن ۇزدىكسىز كەمەلدەندىرىپ، تۇتقيىل تۋىلاتىن ەلەۋلى دەنساۋلىق ساقتاۋ وقيعالارىنا توتەپ بەرۋ قابىلەتى مەن ورەسىن شىن مانىندە جوعارىلاتۋ كەرەك.
شي جينپيڭ بىلاي دەپ باسا دارىپتەدى: كەزەكتە شەكارا سىرتىنداعى ىندەتتىڭ ءورشۋ، ارتۋ جاعدايى ءالى دە جالعاسۋدا، ەلىمىزدىڭ سىرتتان كىرۋدەن ساقتانۋ قىسىمى ۇزدىكسىز ارتۋدا، ەل ىشىندە ىندەتتىڭ قايتا بەلەڭ بەرۋ حاۋپى باستان - اياق ورىن تەۋىپ وتىر. سىرتتان كىرۋدەن ساقتانۋ قىزمەتىن دالمە - ءدال، ءونىمدى تۇردە ويداعىداي ىستەپ، ءتۇيىندى وڭىرلەردىڭ ىندەتتەن ساقتانۋ - تىزگىندەۋ قىزمەتىن ويداعىداي يگەرىپ، ىندەتتەن ساقتانۋ - تىزگىندەۋ شارالارىن ۇدايىلاندىرۋدى تياناقتاندىرىپ جانە كەمەلدەندىرىپ، ۇگىتتەۋدى، جەتەكتەۋدى كۇشەيتىپ، بۇقارانىڭ ءوزىن - ءوزى قورعاۋ جانە باسقارۋ تانىمىن كۇشەيتىپ، ىندەتتىڭ قايتا بەلەڭ بەرۋىنەن قاتاڭ ساقتانۋ كەرەك.
شي جينپيڭ كوپشىلىككە مىناداي ءۇش ءتۇرلى ءۇمىت ارتتى. بىرىنشىدەن، جۇڭگوشا سوتسياليزم جولىمەن بۇلجىماستان ءجۇرىپ، ساياسي تۇرعىدا بەرىك تۇرىپ، ”ءتورت سەنىمدى“ بەكەمدەپ، ۇزدىكسىز جۇڭگو كوممۋنيستىك پارتياسىمەن قول ۇستاسا العا ىلگەرىلەپ، ۋاقىتتىق قيىندىقتى بىرگە ەڭسەرۋ كەرەك. ەكىنشىدەن، ىندەتتەن ساقتانۋ، دامۋدى جەبەۋ ءۇشىن ۇزدىكسىز بەلسەندى رول اتقارىپ، ىشكەرىلەي تەكسەرۋ - زەرتتەۋ جۇرگىزىپ، كورەگەندىكپەن جوسپارلاۋدى جانە زاڭدىلىقتى ويلاۋدى كۇشەيتىپ، سارا پىكىرلەردى ورتاعا قويىپ، ”التىنى ورنىقتىرۋ“ قىزمەتىن ويداعىداي ىستەۋدى ىلگەرىلەتىپ، ”التىنى قامتاماسىزداندىرۋ“ مىندەتىن تياناقتاندىرۋ كەرەك. ۇشىنشىدەن، تاماشا قوعامدىق پىكىر رايىن قالىپتاستىرۋعا سەلبەسىپ، قوعام جاعدايى مەن جۇرت تىلەگىنە تىعىز نازار اۋدارىپ، كۇدىك - كۇماننان ارىلتۋ قىزمەتىن دەر كەزىندە ورىستەتىپ، جۇڭگونىڭ ىندەتكە قارسى اتتانۋ حيكايالارىن جاقسى بايانداپ، جاقسى ءۇن قاتىپ، وڭ ەنەرگيا تاراتۋ كەرك.
ديڭ شۋەشياڭ، ليۋ حى، سۇن چۇنلان، حۋاڭ كۇنميڭ، ساي چي، يوۋ چۋان، ۋاڭ ي، شياۋ جيە، جاۋ كىجى، حى ليفىڭ، جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك كەڭەستىڭ قاتىستى تاراۋلارىنىڭ جاۋاپتىلارى اڭگىمە ماجىلىسكە قاتىناستى.
پارتيا سىرتىنداعى قايراتكەرلەردەن چىن شياۋگۋاڭ، جىڭ جيانباڭ، گۋ شىڭزۋ، ليۋ شينچىڭ، حى ۋي، شاۋ حۇڭ جانە جياڭ زوجۇن، لي يۋەفىڭ، شيە جيڭرۇڭ، شاۋ فىڭ قاتارلىلار دا اڭگىمە ماجىلىسكە قاتىناستى.
