قورعانۋ قاسيەتى مەن جايلى بولۋ قۋاتى جونىندە ايقىن تالاپتار قويىلدى
«بالالار ماسكىسىنىڭ تەحنيكالىق ولشەمىنىڭ» تانىستىرۋ سيپاتىنداعى مەملەكەتتىك ولشەمى تاياۋدا مەملەكەتتىك بازار باقىلاۋ - باسقارۋ باس مەكەمەسى جاعىنان رەسمي جاريالاندى. ولشەمدە 6 جاستان 14 جاسقا دەيىنگى بالالار ماسكىسىنىڭ سىرتقى ٴپىشىنى مەن ساپاسى بەلگىلەنىپ، بالالاردىڭ فيزيولوگيالىق ٴوسىپ - جەتىلۋ ەرەكشەلىگىنە ساي، ماسكىنىڭ قورعانۋ قاسيەتى جانە تىنىس الۋ كەدەرگىسى سياقتى جايلى بولۋى جاعىندا ايقىن تالاپتار ورتاعا قويىلدى. بۇل بالالار ماسكىسىنىڭ ساپاسىن جۇيەگە ٴتۇسىرىپ، اتا - انالاردىڭ بالالار ماسكىسىن دۇرىس تاڭداۋىنا قولايلىلىق جاراتىپ بەردى.
ۇعىسۋعا قاراعاندا، «بالالار ماسكىسىنىڭ تەحنيكالىق ولشەمىندەگى» تانىستىرۋ سيپاتىنداعى مەملەكەتتىك ولشەمدە بالالار ماسكىسى بالالاردىڭ قورعانۋ ماسكىسى جانە بالالاردىڭ تازالىق ماسكىسى دەپ بولىنگەن، ٴارى 9 ٴتۇرلى باستى قۋات كورسەتكىشى ورتاعا قويىلعان. قورعانۋ قۋاتى جاعىندا، ولشەمدە بالالار قورعانۋ ماسكىسىنىڭ شاڭ - توزاڭ ٴسۇزۋ ونىمدىلىگى %95تەن، قورعانۋ ونىمدىلىگى %90تەن تومەن بولماۋى؛ بالالار تازالىق ماسكىسىنىڭ شاڭ - توزاڭ ٴسۇزۋ ونىمدىلىگى %90تەن، باكتەريانى ٴسۇزۋ ونىمدىلىگى %95تەن تومەن بولماۋ تالاپ ەتىلدى. جايلى بولۋ جاعىندا، بالالاردىڭ فيزيولوگيالىق ٴوسىپ - جەتىلۋ كەزەڭىندەگى تىنىس الۋ ەرەكشەلىگى ويلاستىرىلىپ، ولشەمدە بالالار قورعانۋ ماسكىسىنىڭ تىنىس شىعارۋ كەدەرگىسى مەن اۋا جۇتۋ كەدەرگىسى 45 پاسكالدان جوعارى بولماۋى؛ بالالاردىڭ تازالىق ماسكىسىنىڭ اۋا وتكىزۋ كەدەرگىسى 30 پاسكالدان جوعارى بولماۋى تالاپ ەتىلدى. ماسكى تاعۋدىڭ جايلى بولۋى جاعىندا، ولشەمدە تەڭشەۋگە بولاتىن ماسكى باۋىن ىستەتۋ ۇسىنىس ەتىلدى.
بالالار ماسكىسىن حاۋىپسىز ىستەتۋ جونىندە، ولشەمدە ايقىن ەسكەرتۋ بەرىلدى. مىسالى، بالالار ماسكى تاققان مەزگىلدە شۋلاماۋى نەمەسە ورتاشا جانە ورتاشادان جوعارى كۇشەمەلىلىكتە ارەكەت جاساماۋى، تىنىس الۋ كلاپانى مەن تىنىس الۋ كلاپانىنىڭ ىشىندەگى بولشەكتەردى سوكپەۋى؛ ەگەر تاققان مەزگىلدە تىنىس الۋى جايسىزدانۋ، تەرىگە رەاكسيا بەرۋ سياقتى اۋرۋ بەلگىلەرى بايقالسا، ماسكىنى دەر كەزىندە الىپ، قاجەت بولعاندا دەرەۋ ەمدەلۋ؛ ماسكىنى دەر كەزىندە اۋىستىرۋ، ماسكىنى جۋعاننان كەيىن قايتا ىستەتۋ جونىندە ۇسىنىس قويماۋ؛ تىنىس الۋى قيىنداسقان بالالارعا ماسكى تاعۋدى ۇسىنىس ەتپەۋ كەرەك.
ۇعىسۋعا قاراعاندا، «بالالار ماسكىسىنىڭ تەحنيكالىق ولشەمىندەگى» تانىستىرۋ سيپاتىنداعى مەملەكەتتىك ولشەمدى جۇڭگو كاسىپ سالاسى ىستەتەتىن توقىماشىلىق بۇيىمدارى سالاسى قوعامى ەمدەۋ اسپاپتارى، جەكەلىك قورعانۋ، ەمدەۋ - دەنساۋلىق ساقتاۋ، ادامزاتتىڭ جۇمىس ونىمدىلىگى، توقىماشىلىق ماتەريالدارى، تەكسەرۋ - ولشەۋ سياقتى جاقتارداعى مامانداردى ۇيىمداستىرىپ، ورتاق قۇراستىرىپ شىققان. (ءتىلشى چىن حايبو)
اۋدارعان: قادىر ماقان
