تيانشان تورى
تيانشان تورى   ›   جاڭالىقتار   ›   ءۇرىمجى

شاعىن سەيىل باقشاسى قالا تۇرمىسىنا اناعۇرلىم جايلى بولدى

  5 - ايدىڭ 9 - كۇنى قالا تۇرعىندارى ءۇرىمجى جوعارى، جاڭا تەحنيكا كاسىپ سالاسىن اشۋ رايونىندا (جاڭا قالا رايونى) جيڭجياڭ جولى تەمىر جول باقشاسىندا سەيىلدەۋدە. بۇل باقشانىڭ جەر اۋدانى 57 مىڭ شارشى مەتر بولىپ، جول بويىنداعى شامامەن 100 مىڭ تۇرعىندى الەۋمەتتىك جاسىل القاپپەن قامدادى. سۋرەتتى شينجياڭ گازەتىنىڭ جالپىلىق اقپارات قۇرالدارى ءتىلشىسى حان لياڭ تۇسىرگەن

شينجياڭ گازەتىنىڭ جالپىلىق اقپارات قۇرالدارى ءتىلشىسى جاۋ يۋە

  ”بۇرىن شاعىن اۋماقتىڭ ورتاسى بىلىعىپ جاتاتىن، باقشا الىستا بولعاندىقتان، ۇيدەن شىقپايتىنبىز، قازىر شاعىن اۋماق جاڭالانعاننان كەيىن، ەسىك الدىمىزدان شاعىن سەيىل باقشاسى سالىنىپ، قولىمىز بوساي قالعاندا عيماراتتان ءتۇسىپ، سەيىلدەپ كەلەمىز“. 5 - ايدىڭ 7 - كۇنى ءۇرىمجى قالاسى جيانچۋان كوشەسى چىڭشىڭ حۋايۋان شاعىن اۋماعىنىڭ تۇرعىنى ساۋ شيۋلان نەمەرەسىن ەرتىپ، عيماراتتىڭ استىنداعى شاعىن سەيىل باقشاسىندا ەمىن - ەركىن بوي جازدى.

  ءۇرىمجى قالاسىندا چىڭشىڭ حۋايۋان سياقتى جاڭالانعاننان كەيىن، شاعىن سەيىل باقشاسى قوسىلعان كونە شاعىن اۋماقتار از ەمەس. كونە شاعىن اۋماقتاردى جاڭالاۋدى ىلگەرىلەتۋ بارىسىندا ءۇرىمجى قالاسى شاعىن اۋماقتى جاسىلداندىرۋعا، كورىكتەندىرۋگە ەرەكشە ءمان بەرىپ، بوس جەردىڭ ءبارىن جاسىلداندىرىپ، بارلىق جەرىنە كورىنىس ورنالاستىرىپ، شاعىن سەيىل باقشالارى تۇرعىنداردىڭ ەسىك الدىنا سالىنىپ، اسەم دە قونىسقا جايلى تۇرمىس ورتاسىن قالىپتاستىردى.

جانعا جايلىلىق جانىمىزدا

  5 - ايدىڭ 7 - كۇنى كۇن شۇلەن شۋاعىن توگىپ تۇردى، چىڭشىڭ حۋايۋان شاعىن اۋماعى جاراسىمدىلىق پەن تىنىشتىققا شومدى، 4 تۇرعىندار عيماراتىمەن قورشالعان، جەر اۋدانى 3000 شارشى مەترگە جۋىق مادەنيەت شاعىن سەيىل باقشاسى تۇرعىنداردىڭ ەسىك الدىنداعى سايران باعى.

  ءتىلشى سەيىل باقشاسىنىڭ تازا دا رەتتى ەكەنىن، ونداعى سايالى وسكەن اعاشتار مەن حوش ءيىسى اڭقىعان گۇلدەردى كوردى. نارتتاي قىزىل پارتيا تۋى ءمۇسىنى كوزگە ەرەكشە تۇسەدى، پارتيا تاريحى مادەنيەت ءدالىزى، قارتا ۇستەلى، دەنە شىنىقتىرۋ جابدىقتارى، جاساندى تاۋ، سامالدىق سياقتىلاردىڭ ءبارى بار. بۇقارالىق ۇلكەن ساحنادا ءسابي بالا ءتاي - ءتاي باسىپ بارادى؛ دەنە تاربيە شاعىن الاڭىندا كەيبىرەۋلەر مۋزيكا اسپاپتارىن ۇرلەپ، شەرتىپ ءان ايتسا، ەندى بىرەۋلەر شات - شادىمان بيگە باسۋدا.

  سول كۇنى قالا تۇرعىنى جاۋ يان قاشقار باتىس جولى جيڭيۋان شاعىن اۋماعىنداعى اكە - شەشەسىنىڭ ۇيىنە بارعانىندا، سول ماڭداعى بىرنەشە كونە شاعىن اۋماققا ورتاق مەنشىكتى، كەزىندە بىلىعىپ جاتاتىن، ونىڭ ۇستىنە قاراۋسىز قالعان توعايعا ءبىر ۇلكەن جاپ - جاڭا سەيىل باقشاسىنىڭ سالىنعانىن كورىپ قۋاندى، قۋراعان اعاشتار الىنىپ، جاڭادان ەگىلگەن تاس الما، قالامپىر گۇل اشىپ جايناپ تۇر. ”كەيىن بالامدى ەرتىپ اكە - شەشەمە امانداسا كەلگەنىمدە، سەيىلدەيتىن جاقسى جەر تابىلدى“، - دەدى ول قۋانىشپەن.

  قازىر ساۋ شيۋلانعا جايلىلىق سەزىندىرگەن، جاۋ ياندى تاڭعالدىرعان شاعىن سەيىل باقشالارى جاۋىننان كەيىنگى جاۋقازىنداي ءۇرىمجى قالاسىنىڭ كونە شاعىن اۋماقتارىنداعى تۇرعىنداردىڭ تۇرمىس ورتاسىن وزگەرتە باستادى.

بۇقارانىڭ ارمان - تىلەگىنە بەيىمدەلدى

  ”كونە شاعىن اۋماقتاردى جاڭالاۋدان بۇرىن، تۇرعىنداردىڭ اڭىسى ەڭ كۇشتى بولعان ءىس − شاعىن باسكەتبول الاڭى سياقتى باسىم كوپ جەرلەردىڭ اۆتوكولىك توقتاتۋ الاڭىنا اينالىپ، سەيىلدەپ ارەكەت جاسايتىن جەرلەردىڭ جوق بولعاندىعى ەدى“. ءۇرىمجى قالاسى تيانشان رايونى سۇيچۋان جولى اۋماعىن باسقارۋ كوميتەتى جيانچۋان شىعىس الەۋمەتتىك اۋماعىنىڭ پارتكوم شۋجيى جيا گۇييىن بىلاي دەدى: الەۋمەتتىك اۋماق تۇرعىنداردىڭ ۇسىنىسىن مۇقيات تىڭداپ، قاتىستى تاراۋلارعا اڭىس ەتتىك ءارى مۇنىمىز قابىل بولدى، كونە شاعىن اۋماقتاردى جاڭالاۋ بارىسىندا سەيىل - سەرۋەن، دەنە تاربيە الاڭىن كوبەيتۋدى ماڭىزدى مازمۇن رەتىندە ساناپ، تۇرعىنداردىڭ تۇرمىس ورتاسىن جاقسارتتىق.

  ەسىك الدىنداعى شاعىن سەيىل - سەرۋەن باقشا الاڭىندا ءبىر ءبيدى تامامداعان جيانچۋان شىعىس الەۋمەتتىك اۋماعىنىڭ تۇرعىنى، 75 جاستاعى لياڭ كاييۋان جەڭىلدەپ قالدى. جاڭالاۋدان بۇرىنعى جاعدايدى ەسىنە العاندا ول اسەرلەنە بىلاي دەدى: 10 جىلدىڭ الدىندا، بۇل جەر جاراقسىز كولشىك بولاتىن، ادام بويىنان اساتىن ۇلكەن قۇيعا جاز كۇندەرى ماسا، شىبىن ۇيمەلەپ، ورتاسى لاستانىپ، بىلىعىپ جاتاتىن. وسى بىرنەشە جىلدا ۇكىمەت كونە شاعىن اۋماقتاردى جاڭالاۋعا قارجى قوسۋ سەرپىنىن ارتتىردى، بۇگىنگى كۇنى ەسىك الدىمىز باقشاعا اينالدى، وتە تاماشا!

  لياڭ كاييۋان تىلشىگە بىلاي دەدى: 2016 - جىلدىڭ سوڭىندا سەيىل باقشاسى جاڭالانىپ سالىنا باستادى، الەۋمەتتىك اۋماق كادرلارى پىكىر العاندا ءىشىنارا تۇرعىندار بۇل ارانىڭ اۆتوتۇراققا وزگەرتىلىپ سالىنۋىنان الاڭداپ قوسىلمايدى، سونىمەن الەۋمەتتىك اۋماق كادرلارى قايتا - قايتا قىزمەت ىستەپ، وتباسىلارىن ارالاپ تۇسىندىرەدى. 2017 - جىلى سەيىل باقشاسىنىڭ 1 - مەرزىمدىك قۇرىلىسى سالىنىپ بىتكەننەن كەيىن عانا تۇرعىندار الاڭسىز بولادى. سوڭعى 2 − 3 جىلدا سەيىل باقشاسىندا ىركەس - تىركەس پارتيا تۋى ءمۇسىنى، بۇقارالىق ۇلكەن ساحنا سياقتىلار جاسالىپ، اناعۇرلىم كوپ قۇرىلعىلار تولىقتانىپ، كەمەلدەندىرىلدى، قازىر جۇرتتىڭ بارلىعى شاعىن سەيىل باقشاسى تاماشا دەسۋدە.

سەيىل باقشالارى قالا رايونىنىڭ بارلىق جەرىنەن تابىلادى

  سوڭعى جىلداردان بەرى، ءۇرىمجى قالاسىنىڭ كونە شاعىن اۋماقتارىندا سۋ، ەلەكتر، قۇبىر تورابى سياقتى نەگىزدىك قۇرىلعىلارى جاڭالانۋمەن بىرگە، قورشاعان ورتانى جاسىلداندىرۋ، كورىكتەندىرۋ دە قاتار ءجۇرىلدى. قالا رايونىنىڭ تۇستىگىنەن تەرىستىگىنە دەيىن شاعىن سەيىل باقشالارى بارلىق جەردەن تابىلادى، تۇرعىندار اۋماعى قونىسقا اناعۇرلىم جايلى بولا ءتۇستى.

  ”ءۇرىمجى قالاسىنىڭ كونە شاعىن اۋماقتارىن جاڭالاۋى نەگىزىنەن تيانشان رايونى، سايباق رايونى، جوعارى، جاڭا تەحنيكا كاسىپ سالاسىن اشۋ رايونى (جاڭا قالا رايونى)، شۇيموگوۋ رايونى سياقتى ورتالىق قالا رايوندارىنا شوعىرلانعان، سوڭعى جىلدارى ميدۇڭ رايونىنىڭ جاڭالاۋ مولشەرى دە جەدەل ارتتى. ءبىز كونە شاعىن اۋماقتارداعى بەلگىلەمەگە قايشى سالىنعان قۇرىلىستاردى شاعۋدا، كوشىرۋدە مۇمكىندىگىنشە كوگالدى جەرگە ورىن قالدىرىپ، جەرگىلىكتى جاعدايعا قاراي جۇمىس ىستەپ، شاعىن سەيىل باقشاسىن سالدىق“، - دەدى ءۇرىمجى قالالىق ورمان شارۋاشىلىعى جانە جايلىم مەكەمەسى (قالالىق باۋ - باقشا باسقارۋ مەكەمەسى) باۋ - باقشا باسقارۋ باسقارماسىنىڭ باستىعى لي زىجاڭ.

  2019 - جىلدىڭ سوڭىنا دەيىن ءۇرىمجى قالاسىندا 1091 شاعىن سەيىل باقشاسى، 83 شاعىن كول، 126 جاسىل جول سالىنىپ، قالا رايونىندا باقشا از، كوگال جەردىڭ تارالۋى بىركەلكى بولماۋ جاعدايى جاقساردى. بيىل شاعىن سەيىل باقشالارى قۇرىلىسى ءۇرىمجى قالاسىنىڭ ۇزدىكسىز ىلگەرىلەتەتىن حالىق تۇرمىسى قۇرىلىسىنداعى 10 ناقتى ءىس قاتارىنا ەنگىزىلدى، تۇتاس قالا 57 كونە شاعىن اۋماقتاعى بۇرىن بار كوگالدى جەردە شاعىن سەيىل باقشالارىن جاڭالاپ سالىپ، دەڭگەيىن وسىرمەكشى، قالاعا قاراستى رايونداردا شاعىن سەيىل باقشاسىنان 100ىن سالىپ، شاعىن سەيىل باقشالارىمەن ۇشتاستىرىپ، جاسىل جولدان 8ىن سالۋدى جوسپارلاۋدا.

  ”شاعىن سەيىل باقشاسى جان ساۋلىعى مەن ءتان ساۋلىعىنا پايدالى، اينالىپ بوي جازۋعا وتە وڭتايلى، تۇرعىندار ۇيدە جايلى تۇرمىس كەشىرۋمەن بىرگە، سىرتقا شىققاندا دا كوكتەم لەبىن سەزىنە الادى. ءبىز شاعىن سەيىل باقشالارىن جاڭالاۋ قۇرىلىسىن جەدەلدەتىپ، تۇرمىستا سەيىلدەيتىن جانە دەنە شىنىقتىراتىن، اڭگىمە دۇكەنىن قۇراتىن اناعۇرلىم كوپ كەڭىستىكتى جاراتىپ، تۇرعىندارعا اناعۇرلىم ويداعىداي قىزمەت وتەيمىز“، - دەدى لي زىجاڭ.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.