تيانشان تورى   ›   جاڭالىقتار   ›   ماڭىزدى حابارلار

شي جينپيڭ سانشيدە قىزمەت تەكسەردى

شي جينپيڭ سانشيدە قىزمەت تەكسەرگەندە بىلاي دەپ باسا دارىپتەدى

جاپپاي دوڭگەلەك داۋلەتتى قوعام ورناتىپ، قولايلى جاعدايدان پايدالانىپ العا ىلگەرىلەپ، جاڭا داۋىردەگى جۇڭگوشا سوتسياليزمنىڭ جاڭا تاراۋىن جازۋ كەرەك

  5 - ايدىڭ 11 - كۇنىنەن 12 - كۇنىنە دەيىن، جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ سانشيدە قىزمەت تەكسەردى. سۋرەتتە: 5 - ايدىڭ 11 - كۇنى تۇستەن كەيىن شي جينپيڭ داتۇڭ قالاسى يۇنجوۋ رايونىنداعى ورگانيكالىق كۇرەڭكەيدى ولشەمدەندىرىپ ءوسىرۋ بازاسىندا ەڭبەك ىستەپ جاتقان قىستاق تۇرعىندارىمەن ىقىلاسپەن اڭگىمەلەسۋدە. سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

    5 - ايدىڭ 11 - كۇنىنەن 12 - كۇنىنە دەيىن، جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ سانشيدە قىزمەت تەكسەردى. سۋرەتتە: 5 - ايدىڭ 12 - كۇنى تۇستەن بۇرىن شي جينپيڭ تاييۋان بولات - تەمىر توبى تاتتانبايتىن بولات، نازىك تاسپا بولات شەكتى سەرىكتەستىگىنىڭ ءوندىرىس سەحىندە قىزمەت تەكسەرگەن كەزدە وسى كاسىپورىننىڭ جۇمىسشى - قىزمەتكەرلەرىمەن ىقىلاسپەن اڭگىمەلەسۋدە. سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

  شينحۋا اگەنتتىگىنىڭ 5 - ايدىڭ 12 - كۇنى تاييۋاننان بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ تاياۋدا سانشيدە قىزمەت تەكسەرگەندە بىلاي دەپ باسا دارىپتەدى: پارتيا 19 - قۇرىلتايىنىڭ جانە 19 - كەزەكتى ورتالىق كوميتەتى ەكىنشى، ءۇشىنشى، ءتورتىنشى جالپى ماجىلىستەرىنىڭ رۋحىن جاپپاي دايەكتىلەندىرىپ، ورنىقتىلىق بارىسىندا ىلگەرىلەۋ قىزمەت جالپى ارناسىنان جازباي، جاڭا دامۋ ۇستانىمىنا تاباندى بولىپ، قامداۋ جاعىنداعى قۇرىلىمدىق رەفورمانى نەگىزگى جەلى ەتۋگە تاباندى بولىپ، ”التىنى ورنىقتىرۋ“ قىزمەتىن تىڭعىلىقتى، ويداعىداي ىستەپ، ”التىنى قامتاماسىز ەتۋ“ مىندەتىن جاپپاي تياناقتاندىرىپ، جاڭا تيپتى ايدارشا ۆيرۋس وكپە قابىنۋ ىندەتى اكەلگەن ءتيىمسىز ىقپالدى قۇلشىنا جەڭىپ، جوعارى ساپالى تيبىن جاڭالاپ دامۋدا اناعۇرلىم زور قادام تاستاپ، كەدەيلىكتەن ارىلتۋدان قامال الۋ شەشۋشى شايقاسىنىڭ شەشۋشى جەڭىسىنە جەتۋدىڭ نىسانالارى مەن مىندەتتەرىنىڭ ورىندالۋىنا شىنايى كەپىلدىك ەتىپ، جاپپاي دوڭگەلەك داۋلەتتى قوعام ورناتىپ، قولايلى جاعدايدان پايدالانىپ العا ىلگەرىلەپ، سانشيدىڭ جاڭا داۋىردەگى جۇڭگوشا سوتسياليزمدى امالياتتا ايگىلەۋىنىڭ جاڭا تاراۋىن جازۋ كەرەك.

  جازدىڭ باس كەزى، سانشيدىڭ بايتاق دالاسىنداعى ورقاش - ورقاش تاۋلار جاسىل جەلەك جامىلىپ، بارشا تىرشىلىكتەن جالىندى لەپ ەسەدى. 5 - ايدىڭ 11 -، 12 - كۇندەرى شي جينپيڭ سانشي ولكەلىك پارتكومنىڭ شۋجيى لوۋ ياڭشىڭ مەن ولكە باستىعى لين ۋدىڭ سەرىك بولۋىندا داتۇڭ، تاييۋان قاتارلى جەرلەرگە بارىپ، اۋىل شارۋاشىلىعى كاسىپ سالاسى بازاسىن، قونىس جاڭالاعان جاڭا قىستاقتى، مادەنيەت ەسكەرتكىشتەرىن قورعاۋ ورنىن، رەفورمادان ۇلگى كورسەتۋ اۋماعىن جانە كاسىپورىنداردى، ت.ب ارالاپ، ىندەتتەن ساقتانۋ - تىزگىندەۋدى ۇدايىلاندىرۋ جانە ەكونوميكالىق، قوعامدىق دامۋ قىزمەتىن ءبىر تۇتاس جوسپارلاپ ىلگەرىلەتۋ، كەدەيلىكتەن ارىلتۋدان قامال الۋ تابىستارىن بەكەمدەۋ جونىندە تەكسەرۋ - زەرتتەۋ جۇرگىزدى.

  5 - ايدىڭ 11 - كۇنى تۇستەن كەيىن شي جينپيڭ الدىمەن داتۇڭ قالاسىنىڭ يۇنجوۋ رايونىنا كەلىپ، ورگانيكالىق كۇرەڭكەيدى ولشەمدەندىرىپ ءوسىرۋ بازاسىندا قىزمەت تەكسەردى. داتۇڭنىڭ 600 نەشە جىلدىق كۇرەڭكەي ءوسىرۋ تاريحى بار، ول جەرگىلىكتى ورىننىڭ جەتەكشى كاسىبى. سوڭعى جىلدارى، جەتەكشى كاسىپورىنداردىڭ، سەلبەستىك كووپەراتيۆتەرىنىڭ باستاۋىندا كۇرەڭكەيدىڭ ءونىمى مەن ساپاسى تۇراقتى بولدى، ساتىلۋى مەن باعاسى دا قامتاماسىز ەتىلدى، بىلتىر كەدەي وتباسىلارىنىڭ ورتاشا 10 مىڭ يۋاننان استام كىرىس تابۋىنا دەم بەردى. شي جينپيڭ اتىزدى ارالاپ، كۇرەڭكەيدىڭ ءوسۋ جاعدايىن تەكسەردى. اتىز باسىندا ەڭبەك ىستەپ جۇرگەن قىستاق تۇرعىندارى قاۋمالاي كەلدى، شي جينپيڭ ولاردان كۇرەڭكەيدى اتىزدا باپتاۋ، بازار باعاسى، ءونىمنىڭ ساتىلۋى سياقتى جاعدايلاردى ۇعىستى. ول بىلاي دەپ اتاپ كورسەتتى: اۋىلداستار كەدەيلىكتەن ارىلعاننان كەيىن، مەنىڭ ەڭ كوڭىل بولەتىن ءىسىم − كەدەيلىكتەن ارىلتۋ تابىستارىن قالاي بەكەمدەپ، قايتا كەدەيلەسۋدەن قالاي ساقتانىپ، اۋىلداستاردىڭ كىرىسىنىڭ ۇزدىكسىز ارتىپ اۋقاتتانۋىنا شىنايى كەپىلدىك ەتۋ. كۇرەڭكەي كاسىبىن ويداعىداي قورعاپ، دامىتىپ، ءىرى كاسىپ سالاسىنا اينالدىرىپ، بۇكىل ەل بويىنشا ايگىلى ماركا قالىپتاستىرىپ، كۇرەڭكەيدى اۋىلداستاردىڭ ”بايۋ گۇلىنە“ اينالدىرۋلارىڭىزدى ءۇمىت ەتەمىن. شي جينپيڭ بىلاي دەپ باسا دارىپتەدى: جۇڭگو كوممۋنيستىك پارتياسى حالىق ءۇشىن ىستەۋ، حالىقتى باقىتقا كەنەلتۋدى ەڭ ماڭىزدى ساياسي ناتيجە، بۇقاراعا قانشالىقتى يگى، ناقتى ىستەر ىستەپ بەرۋدى ساياسي ناتيجەنى تەكسەرۋدىڭ ماڭىزدى ولشەمى ەتەدى. ءوسىرۋ بازاسىنان شىققان سوڭ، شي جينپيڭ سول ماڭداعى يۇنجوۋ رايونى شيپيڭ قالاشىعى فاڭچىڭ جاڭا قىستاعىنا بارىپ تەكسەرۋ - زەرتتەۋ جۇرگىزدى. بۇل قىستاق قونىس جاڭالاعان قىستاق، ارحيۆ تۇرعىزىلىپ، كارتچكالاندىرىلعان 77 كەدەي وتباسى، 158 كەدەي بار، 2018 - جىلى وسى جەرگە قونىس تەپكەننەن بەرى، كۇرەڭكەي ەرەكشە كاسىبى سياقتىلاردى دامىتۋعا سۇيەنىپ تۇگەل كەدەيلىكتەن ارىلدى. شي جينپيڭ قىستاقتىڭ شەبەرلىككە باۋلۋ قىزمەت وتەۋ پۋنكتىنە كەلىپ، جاڭا قىستاقتىڭ قونىس جاڭالاپ كەدەيلەردى سۇيەمەلدەۋ جاعدايىن ۇعىسىپ، كۇرەڭكەي كاسىپ سالاسىنىڭ كورمەگە قويىلعان قاتىستى ونىمدەرىن كورىپ، داتۇڭ قالاسىنىڭ كاسىپ سالاسى ارقىلى كەدەيلەردى سۇيەمەلدەۋدەگى، جۇمىستاندىرۋ ارقىلى كەدەيلەردى سۇيەمەلدەۋدەگى، كەدەيلىكتەن ارىلتۋدان قامال الۋ تابىستارىن بەكەمدەۋدەگى ءادىس - شارالارىن تولىق تۇراقتاندىردى. ول بىلاي دەپ اتاپ كورسەتتى: قونىس جاڭالاپ كوشىرۋدەگى ماقسات جايلى قونىستانۋ ماسەلەسىن شەشۋ عانا ەمەس، ونان دا ماڭىزدىسى، بۇقارانى اۋقاتتاندىرۋ. قونىس جاڭالاپ كوشىرگەننەن كەيىنگى جالعاستى سۇيەمەلدەۋدى كۇشەيتىپ، اۋىل - قىستاق كاسىپ سالالارىن جەرگىلىكتى جاعدايعا قاراي دامىتىپ، كاسىپ سالاسى نىساندارىن دەن قويا تاڭداپ، تابىسقا جەتۋ مولشەرىنە جانە باياندى دامۋعا شىنايى كەپىلدىك ەتۋ كەرەك. بۇقارانى يگىلىككە كەنەلدىرۋدى كورنەكتى ورىنعا قويىپ، كاسىپ سالاسى ارقىلى سۇيەمەلدەۋ، فينانستىق امانات - قارىز، اۋىل شارۋاشىلىعى قامسىزداندىرۋى سياقتى جاقتاردا ساياسات شىعارىپ، اۋىل - قىستاق ەكونوميكاسىنىڭ دامۋىنا پارمەندى قولداۋ كورسەتۋ كەرەك. نەگىزگى ساتى پارتيا ۇيىمدارى مەن پارتيالى كادرلار اۋىل - قىستاق كاسىپ سالاسى نىساندارىنىڭ ۇيىمداستىرۋشىسى، ىلگەرىلەتۋشىسى بولۋى ءارى بۇقارا مۇددەسىنىڭ جاقسى قورعاۋشىسى دا بولۋى كەرەك. شي جينپيڭ نەگىزگى ساتىداعى قالىڭ كادرلاردىڭ كەدەيلەردىڭ كەدەيلىكتەن ارىلۋىنا كومەكتەسۋ جولىندا جاساعان جاپالى قۇلشىنىستارىن تۇراقتاندىراتىندىعىن ءبىلدىردى.

  قونىس جاڭالاعان وتباسى باي گاۋشاننىڭ ۇيىندە شي جينپيڭ اۋلانى، قوناق بولمەنى، اس ءۇيدى، تازالىق ءۇيىن كورىپ شىقتى ءارى سۇپىنىڭ شەتىندە وتىرىپ وتباسىنداعىلارمەن اڭگىمە دۇكەنىن قۇردى. باي گاۋشان باس شۋجيگە بۇرىندارى جەر تولەدە وتىراتىندىعىن، ال قازىر بولەك اۋلاسى بار قاڭىلتاق كەرپىشتى ۇيگە كوشىپ كىرگەندىگىن، سول ماڭدا جۇمىستانىپ، تۇرمىس شارت - جاعدايىنىڭ كوپ جاقسارعاندىعىن، بىلتىر ۇلىنىڭ ۇيلەنگەندىگىن، بيىل نەمەرەلى بولعاندىقتارىن، تۇرمىستارىنىڭ بارعان سايىن جاقسارىپ كەلە جاتقاندىعىن ايتتى. شي جينپيڭ قۋانا بىلاي دەدى: كوممۋنيستىك پارتيا بۇكىل ىنتا - پەيىلىمەن حالىقتىڭ مۇددەسىن كوزدەيدى، قازىر الىمساق المايدى، سالىق المايدى، اقى المايدى، استىق تاپسىرمايسىزدار، قايتا كەدەي بۇقارانىڭ ناۋقاسىن ەمدەپ، ءدارى - دارمەك بەرەدى، ءۇي سالىپ بەرەدى، تەحنيكا ۇيرەتەدى، اۋقاتتانۋدىڭ جولىن كورسەتەدى، اۋىلداستاردى مۇنان دا جاقسى كۇندەر كۇتىپ تۇرعانىنا سەنەمىن. بيىل كەدەيلىكتەن ارىلتۋدان قامال الۋ شەشۋشى شايقاسىنىڭ شەشۋشى جەڭىسىنە جەتۋدىڭ جانە جاپپاي دوڭگەلەك داۋلەتتى قوعام ورناتۋدىڭ اياقتالاتىن جىلى، كەدەيلىكتەن ارىلتۋدان قامال الۋ تابىستارىن ءتۇرلى ءادىس - امالدارمەن بەكەمدەۋ كەرەك، كەلەسى قادامدا اۋىل - قىستاقتى گۇلدەندىرۋ ءىسىن جاقسى جۇرگىزىپ، اۋىلداستاردى اناعۇرلىم تاماشا تۇرمىسقا كەنەلدىرۋ كەرەك. قونىس جاڭالاپ كوشىرىلگەن بۇقارا تۇرلىشە قىستاقتاردان كەلگەن، بۇرىن بىتىراپ قونىستانسا، قازىر شوعىرلى قونىستانىپ وتىر. الەۋمەتتىك اۋماق قۇرىلىسى مەن باسقارۋدى كۇشەيتىپ، الەۋمەتتىك اۋماقتىڭ قورشاعان ورتاسىن جونگە سالۋدى كۇشەيتىپ، اۋىل - قىستاق رۋحاني وركەنيەت قۇرىلىسى مەن وتانشىلدىق تازالىق قيمىلىن ورىستەتىپ، بۇقارانىڭ جاڭا ۇيلەردە وتىرۋىنا ءارى جاڭا تۇرمىس كەشىرۋىنە شىنايى كەپىلدىك ەتۋ كەرەك.

  قىستاقتان اتتاناردا، قىستاق تۇرعىندارى باس شۋجيمەن قوشتاستى. شي جينپيڭ اۋىلداستاردىڭ تۇرمىسىنىڭ باقىتتى بولۋىن تىلەدى.

  كەشقۇرىم شي جينپيڭ يۇنگاڭ تاس ۇڭگىرىنە قىزمەت تەكسەرە كەلدى. يۇنگاڭ تاس ۇڭگىرى 1500 نەشە جىلدىڭ الدىندا سالىنعان، جۇڭگو مەن شەتەل مادەنيەتى، جۇڭگونىڭ از ۇلت مادەنيەتى مەن ورتا جازىق مادەنيەتى، بۇددا كوركەمونەرى مەن تاس ويما ونەرى توعىسقان مادەنيەت كوركەمونەر اسىل قازىناسى. شي جينپيڭ مۇسىندەردى، قابىرعا سۋرەتتەردى زەر سالا كورىپ، قىزمەتكەرلەردەن تاس ۇڭگىردەگى تاريحي مادەنيەت مۇرالارىنىڭ قورعالۋى سياقتى جاعدايلاردى ۇعىستى. ول بىلاي دەپ باسا دارىپتەدى: يۇنگاڭ تاس ۇڭگىرى − دۇنيە جۇزىلىك مادەنيەت مۇراسى، يۇنگاڭ تاس ۇڭگىرىن جاقسى قورعاۋ جۇڭگو جونىنەن ماڭىزعا يە بولىپ قانا قويماي، دۇنيە ءجۇزى جونىنەن دە ماڭىزعا يە. تاريحي مادەنيەت مۇرالارى قايتا تۋىندامايتىن، ورنىن وگەيسىتۋگە بولمايتىن باعالى بايلىق، قورعاۋدى قاشاندا ءبىرىنشى ورىنعا قويۋ كەرەك. ساياحاتتى دامىتۋدا قورعاۋدى العى شارت ەتۋ قاجەت، شەكتەن تىس ساۋداعا اينالدىرۋعا بولمايدى، ساياحاتتى ادامداردىڭ جۇڭحۋا مادەنيەتىن سەزىنۋ، مادەنيەت سەنىمىن كۇشەيتۋ بارىسىنا اينالدىرۋ كەرەك. يۇنگاڭ تاس ۇڭگىرىندە قامتىلىپ جاتقان ۇلتتاردىڭ ارالاسۋ، ىشتەسۋ، توعىسۋىنىڭ تاريحي ءمانىن ىشكەرىلەي اشىپ، جۇڭحۋا ۇلتى ورتاق تۇلعا تانىمىن كۇشەيتۋ كەرەك. باس شۋجيدى كورگەن ساياحاتشىلار: ”باس شۋجي سالەمەتسىز بە!“ دەپ الاقايلادى. شي جينپيڭ كوپشىلىككە قول بۇلعاپ قۇرمەت ءبىلدىردى ءارى كورىنىس وڭىرىندەگى قىزمەتكەرلەرگە ىندەتتەن ساقتانۋ - تىزگىندەۋدى ۇدايىلاندىرۋ بارىسىندا جەتەكشىلىكتى كۇشەيتىپ، ادامدار اعىنىن تىزگىندەپ، ادامداردىڭ كەڭ كولەمدى توپتالۋىنان ىندەتتىڭ قايتا تۋىلۋىنان ساقتانۋدى تاپسىردى.

  سانشي − مەملەكەت بويىنشا تۇڭعىش بۇكىل ولكە كولەمىندە، جان - جاقتى، جۇيەلى جۇرگىزىلگەن مەملەكەتتىك بايلىق تۇرىندەگى ەكونوميكانىڭ تيبىن جاڭالاۋداعى كەشەندى، سايكەستى رەفورما سىناق رايونى. 5 - ايدىڭ 12 - كۇنى تۇستەن بۇرىن شي جينپيڭ سانشي تيبىن جاڭالاۋداعى كەشەندى رەفورما ۇلگى كورسەتۋ رايونى ۇكىمەت ىستەرى قىزمەت وتەۋ ورتالىعىنىڭ رەفورمادا جاڭالىق اشۋ كورمە زالىندا ۇلگى كورسەتۋ رايونىنىڭ قۇرىلىسى جانە جۇمىس جۇرگىزۋ جاعدايى جونىندەگى تانىستىرۋدى تىڭداپ، جاڭا ونىمدەر كورمەسىن كوردى. شي جينپيڭ بىلاي دەپ باسا دارىپتەدى: ۇزاق ۋاقىتتان بەرى، سانشي كومىر كاسىبىمەن گۇلدەندى ءارى كومىر كاسىبىندە تىعىرىققا تىرەلدى، تەك كومىر كاسىبىنە عانا سۇيەنۋ كاسىپ سالاسىنىڭ ءبىر سىدىرعى بولۋىنا اپارىپ سوقتى. تيبىن جاڭالاۋداعى كەشەندى رەفورما ۇلگى رايونىن قۇرۋ − پارتيا ورتالىق كوميتەتىنىڭ سانشيگە جۇكتەگەن كەلەلى مىندەتتەردىڭ ءبىرى ءارى سانشيدىڭ تيبىن جاڭالاپ دامۋىن جۇزەگە اسىرۋداعى كەلەلى شارا. سانشيدە كوكەي تەستىلىك سەزىم بولۋى، ونان دا ماڭىزدىسى، ۇزاق بولاشاقتىق ستراتەگيالىق جوبا بولۋى كەرەك، دۇرىس ىستەردى تاباندىلىقپەن جالعاستىرىپ، تالىقپاي كۇش سالۋ، قايتالاماۋ، سارپالداڭعا تۇسپەۋ، تيبىن جاڭالاپ دامۋدىڭ تىڭ جولىن ەرتەرەك تابۋعا ۇمتىلۋ كەرەك.

  وسىدان كەيىن، شي جينپيڭ تاييۋان بولات - تەمىر توبى تاتتانبايتىن بولات، نازىك تاسپا بولات شەكتى سەرىكتەستىگىندە قىزمەت تەكسەردى، تەكسەرىپ - زەرتتەۋ جۇرگىزدى. بۇل كاسىپورىن وزىق ءوندىرىس تەحنولوگياسىنا سۇيەنىپ، ”توتەنشە جۇقا، توتەنشە مايدا، توتەنشە قاتتى“ سىندى ءونىم ەرەكشەلىگىمەن تەز دامىدى. شي جينپيڭ ءوندىرىس سەحىنا كىرىپ، كاسىپورىننىڭ تيپ جاڭالاپ، دارەجەسىن جوعارىلاتقان ونىمدەر كورمەسىن كورىپ، كاسىپورىننىڭ اينالىم جاعدايىن ۇعىستى. مايدالاپ جالتىراتۋ ماشينالارى شوعىرىنىڭ الدىندا، شي جينپيڭ قالىڭدىعى نەبارى 0.02 ميلليمەترلىك تاتتانبايتىن بولات جاپىراقشا ماتەريال ”قولمەن جىرتۋعا بولاتىن بولات“ ءونىمىن قىزىعا كوردى. شي جينپيڭ بىلاي دەپ اتاپ كورسەتتى: ءونىم مەن تەحنيكا كاسىپورىننىڭ تياناقتى جۇمىس جۇرگىزۋىنىڭ نەگىزى. كاسىپورىننىڭ عىلىم - تەحنيكادا جاڭالىق اشۋ جاعىندا تاعى دا قۇلشىنىس جاساپ، ەرلىكپەن بيىك بەلەسكە شىعىپ، تىرەكتى، وزىق جاساۋ كاسىبىن دامىتۋ جاعىندا تىڭ دا اناعۇرلىم زور قادام باسۋىن ءۇمىت ەتەمىن. قازىر بۇكىل ەلدە ىندەتتەن ساقتانۋ قىزمەتى جاڭا كەزەڭگە ءوتتى، ەلەۋلى ستراتەگيالىق تابىسقا قول جەتكىزۋمەن بىرگە، سىرتتان كىرۋدەن ساقتانۋدىڭ، ىشتە قايتا بەلەڭ بەرۋدەن ساقتانۋدىڭ قىسىمىنا ءدوپ كەلدىك، كاسىپورىننىڭ سەلقوستىق ىستەمەي، بوساڭسىماي، ساقتانۋ - تىزگىندەۋ شارالارىن ۇزدىكسىز مىقتاپ، ناقتى، ەگجەي - تەگجەيلى يگەرىپ، جۇمىستى، ءوندىرىستى اناعۇرلىم جاقسى قالپىنا كەلتىرىپ، ءوندىرىس حاۋىپسىزدىگىن، اقاۋسىز ءوندىرىستى ويداعىداي جۇرگىزىپ، زايا كەتكەن ۋاقىتتى ۇتىپ، بيىلعى نىسانالاردى، مىندەتتەردى قۇلشىنا ورىنداۋىن ءۇمىت ەتەمىن.

  فىنحى وزەنى سانشيدىڭ انا وزەنى ءارى حۋاڭحى وزەنىنىڭ ەكىنشى ۇلكەن تارماعى، تاييۋان قالا رايونىندا 9 نەگىزگى تارماق اعىنى بار. تاريحي سەبەپ سالدارىنان، فىنحى وزەنىنىڭ سۋى ءبىر مەزگىل اۋىر لاستاندى. 2017 - جىلى 6 - ايدا شي جينپيڭ سانشيدە قىزمەت تەكسەرگەن كەزدە فىنحى وزەنىنىڭ ”سۋ مولشەرىن مولايتۋ، سۋ ساپاسىن جاقسارتۋ، كەلبەتىن كورىكتەندىرۋ“ تالابىن العا قويدى. فىنحى وزەنىنىڭ سۋ ساپاسىن جوعارىلاتۋ، قالانىڭ ەكولوگيالىق ورتاسىن جاقسارتۋ ءۇشىن، تاييۋان قالاسى ”9 وزەندى“ كەشەندى جونگە سالۋ ينجەنەرياسىن باستاپ، 2018 - جىلى جاپپاي اياقتاتتى. 5 - ايدىڭ 12 - كۇنى تۇستە شي جينپيڭ فىنحى وزەنىنىڭ تاييۋان قالا رايونىنداعى جينياڭ كوپىرى بولىگىنە ارناۋلى بارىپ، تاييۋان قالاسىنىڭ فىنحى وزەنىن جانە ”9 وزەندى“ كەشەندى جونگە سالۋ، الاپتىڭ ەكولوگياسىن قالپىنا كەلتىرۋ سياقتى جاعدايلار جونىندەگى مالىمەتىن تىڭداپ، وزەن جاعالاۋىندا جاياۋ ءجۇرىپ فىنحى وزەنىنىڭ سۋىن جاقسارتۋ جانە ەكى جاعالاۋدىڭ ەكولوگياسىن قورعاۋ، قالا قورشاعان ورتا قۇرىلىسى سياقتىلاردى كورىپ، تاييۋاننىڭ فىنحى وزەنى جاعالاۋىنىڭ ەكولوگيالىق ورتاسىنىڭ وراسان زور وزگەرىستەرىن كورىپ ءسۇيىندى. شي جينپيڭ بىلاي دەپ اتاپ كورسەتتى: فىنحى وزەنىن جونگە سالۋ سانشيدىڭ ەكولوگيالىق ورتاسىن قورعاۋعا جانە ەكونوميكاسىن دامىتۋعا سايىپ قانا قالماستان، تاييۋاننىڭ، ءتىپتى، سانشيدىڭ تاريحي مادەنيەتىن جالعاستىرۋعا دا سايادى. تاۋ، سۋ، ورمان، اتىز، كول، جايلىمدى ءبىر تۇلعالاندىرىپ قورعاۋعا جانە قالپىنا كەلتىرۋگە تاباندى بولىپ، الاپتىڭ ەكولوگيالىق ورتاسىن قورعاۋدى كۇشەيتۋ مەن ەنەرگيا توڭكەرىسىن ىلگەرىلەتۋدى، جاسىل ءوندىرىس، تۇرمىس ءتاسىلىن جولعا قويۋدى، ەكونوميكانىڭ تيبىن جاڭالاپ دامىتۋدى جەبەۋدى ءبىر تۇتاس جوسپارلاپ، تاۋدى جونگە سالۋدى، سۋدى جونگە سالۋدى، اۋانى جونگە سالۋدى، قالانى جونگە سالۋدى ءبىر تۇلعالى ىلگەرىلەتۋگە تاباندى بولىپ، ۇزدىكسىز كۇش سالىپ، ”كورىكتى تاييۋان قالاسىنىڭ“ تاماشا كورىنىسىن تاعى ايگىلەپ، تاييۋاننىڭ باۋراۋ قۋاتىن، ىقپال كۇشىن ۇزدىكسىز ارتتىرىپ، تاييۋان حالقىنىڭ تابىس سەزىمىن، باقىت سەزىمىن، حاۋىپسىزدىك سەزىمىن كۇشەيتۋ كەرەك. وزەن جاعالاۋىندا سەيىلدەپ، دەنە شىنىقتىرىپ جۇرگەن كوپتەگەن قالا تۇرعىندارى باس شۋجيدىڭ كەلگەنىن كورىپ، جاپا - تارماعاي كەلىپ باس شۋجيگە امانداستى. شي جينپيڭ كوپشىلىكتىڭ دەنساۋلىعى مىقتى، تۇرمىسى كوڭىلدى بولۋىن تىلەدى.

  5 - ايدىڭ 12 - كۇنى تۇستەن كەيىن شي جينپيڭ سانشي ولكەلىك پارتكوم مەن ولكەلىك ۇكىمەتتىڭ قىزمەت مالىمەتىن تىڭداپ، سانشيدىڭ قىزمەتتەرىن تۇراقتاندىردى. شي جينپيڭ بىلاي دەپ اتاپ كورسەتتى: قازىر ەلىمىزدە ىندەتتىڭ سىرتتان كىرۋدەن ساقتانۋ قىسىمى ۇزدىكسىز زورايۋدا، ەل ىشىندە ىندەتتىڭ قايتا بەلەڭ بەرۋ حاۋىپ - قاتەرى باستان - اياق ورىن تەبۋدە. ىندەتتەن ساقتانۋ - تىزگىندەۋ سىندى ارقاۋدى بەرىك شيراتىپ، سىرتتان كىرۋدەن ساقتانۋعا، ىشتە قايتا بەلەڭ بەرۋدەن ساقتانۋعا تاباندى بولىپ، ساقتانۋ - تىزگىندەۋدىڭ ۇدايىلانعان مەحانيزمىن كەمەلدەندىرىپ، ىندەتتىڭ قايتا تۋىلۋىنان باتىل ساقتانىپ، الدىڭعى قول جەتكەن ناتيجەنى استە سەلگە كەتىرمەۋ كەرەك.

  شي جينپيڭ بىلاي دەپ باسا دارىپتەدى: كاسىپورىنداردىڭ ءوندىرىستى، تيجاراتتى قالپىنا كەلتىرۋدە ءدوپ كەلگەن قيىنشىلىقتار مەن ماسەلەلەردى اناعۇرلىم دەر كەزىندە، ءونىمدى شەشىپ، ىشكى سۇرانىستى كەڭەيتۋ ساياسات - شارالارىن ناقتى يگەرىپ، تۇلعالىق شارۋاشىلىقتى، اسىرەسە، جاساۋ كاسىبىن كۇشەيتىپ، ساپالىلاندىرىپ، ەلەۋلى قارجى قوسۋ نىساندارىنىڭ جەتەكتەۋ رولىن ساۋلەلەندىرىپ، ەنەرگيا توڭكەرىسىنىڭ كەشەندى رەفورماسى سىناق ءتۇيىنىنىڭ تالاپتارىن ويداعىداي تياناقتاندىرىپ، كاسىپ سالاسى قۇرىلىمىن رەتتەۋدى، ساپالىلاندىرۋدى ۇزدىكسىز ىلگەرىلەتىپ، ءبىر توپ وزگەرىس سيپاتتى، جەتەكشى سيپاتتى، نىشان سيپاتتى شارالار اتقارىپ، عىلىم - تەحنيكادا جاڭالىق اشۋدى زور كۇشپەن كۇشەيتىپ، جاڭا نەگىزدىك قۇرىلعى قۇرىلىستارىندا، جاڭا تەحنيكالاردا، جاڭا ماتەريالداردا، جاڭا جابدىقتاردا، جاڭا ونىمدەردە، جاڭا كاسىپ كۇيلەرىندە ۇزدىكسىز تىڭ ناتيجەگە قول جەتكىزىپ، مەملەكەت مەنشىگىندەگى كاسىپورىندار، مەملەكەت مەنشىگىندەگى مال - مۇلىك، قازىنا - سالىق، فينانس، تيجارات - ساۋدا ورتاسى، حالىقتىق شارۋاشىلىق، ىشكى سۇرانىستى كەڭەيتۋ، قالا مەن اۋىلدى توعىستىرۋ سياقتى ءتۇيىندى رەفورما سالالارىندا قامال الىپ، قيىنشىلىقتى جەڭىپ، سىرتقا ەسىك اشۋ ءتۇزىلىسىن، مەحانيزمىن اقاۋسىزداندىرىپ، جوعارى ساپالى دامۋدى قايراتتانا ىلگەرىلەتۋ كەرەك.

  شي جينپيڭ بىلاي دەپ اتاپ كورسەتتى: تۇنىق سۋ، جاسىل تاۋ باعالى بايلىق ۇستانىمىن بەرىك ورناتىپ، ”يوۋيۇي رۋحىن“ اسقاقتاتىپ، تاۋ، سۋ، ورمان، اتىز، كول، جايلىم جۇيەسىن جونگە سالۋدى ءبىر تۇتاس جوسپارلاپ ىلگەرىلەتىپ، ”ەكى تاۋ، جەتى وزەن، ءبىر الاپتىڭ“ ەكولوگياسىن قالپىنا كەلتىرۋدى، جاقسارتۋدى ويداعىداي يگەرىپ، حۋاڭحى وزەنى الابىنىڭ ەكولوگياسىن قورعاۋدىڭ جانە جوعارى ساپالى دامۋدىڭ مەملەكەت ستراتەگياسىن تىڭعىلىقتى اتقارىپ، تۇزىمدە جاڭالىق اشۋدى جەدەلدەتىپ، ءتۇزىمدى اتقارۋدى كۇشەيتىپ، جاسىل ءوندىرىس، تۇرمىس ءتاسىلىن قالىپتاستىرۋعا جەتەكتەپ، لاستانۋدان ساقتانۋدان جانە ونى جونگە سالۋدان قامال الۋ شايقاسىنىڭ جەڭىسىنە باتىل قول جەتكىزىپ، سانشيدىڭ حۋاڭحى جاعالاۋى ءوڭىرىن قورعاۋ بارىسىندا اشۋىن، اشۋ بارىسىندا قورعاۋىن ىلگەرىلەتۋ كەرەك.

  شي جينپيڭ بىلاي دەپ باسا دارىپتەدى: اۋىل شارۋاشىلىعىنىڭ، اۋىل - قىستاقتىڭ نەگىزىن كۇش سالا بەكەمدەپ، استىق ءوندىرىسىن ساياساتتىق قولداۋ تەبىنىن ارتتىرىپ، ەگىستىك جەردىڭ قىزىل سىزىعىن باتىل ساقتاپ، اۋىل شارۋاشىلىعىنىڭ قامداۋ جاعىنداعى قۇرىلىمدىق رەفورماسىن ىشكەرىلەي ىلگەرىلەتىپ، اۋىل شارۋاشىلىعىنىڭ، اۋىل - قىستاقتىڭ نەگىزدىك قۇرىلعى قۇرىلىسىن كۇشەيتۋ كەرەك. ەندى قالعان كەدەيلەردى كەدەيلىكتەن ارىلتۋ قىزمەتىن جاقسى ىستەپ، كەدەيلەردى قونىس جاڭالاپ سۇيەمەلدەۋدەن كەيىنگى جالعاستى سۇيەمەلدەۋدى جاقسى ىستەپ، قايتا كەدەيلەسۋدى قاداعالاۋ - ساقتاندىرۋدى جانە يكەمدى كومەكتەسۋ - سۇيەمەلدەۋدى كۇشەيتىپ، كەدەيلىكتەن ارىلتۋدان قامال الۋ مەن اۋىل - قىستاقتى گۇلدەندىرۋدىڭ ورگانيكالى ۇشتاسۋىن جەبەۋ كەرەك.

  شي جينپيڭ بىلاي دەپ اتاپ كورسەتتى: حالىقتى وزەك ەتكەن دامۋ يدەياسىنا تاباندى بولىپ، حالىق تۇرمىسىن قامتاماسىزداندىرۋ جانە جاقسارتۋ قىزمەتىن تىڭعىلىقتى جاقسى ىستەپ، بۇقارانىڭ ءىس جۇزىندىك قيىنشىلىعىن شەشۋىنە ناقتىلى كومەكتەسىپ، حالىق تۇرمىسىنىڭ تومەنگى شەگىن ساقتاپ، جۇمىستاندىرۋدى الدىمەن ويلاستىرۋ ستراتەگياسىن جانە بەلسەندى جۇمىستاندىرۋ ساياساتىن تياناقتاندىرىپ، جوعارى مەكتەپ بىتىرگەن وقۋشىلار، قوسىننان شەگىنگەن اسكەريلەر، شارۋا جۇمىسكەرلەر، قالا - قالاشىقتارداعى قيىنشىلىعى بار ادامدار سياقتى ءتۇيىندى قاۋىمدى جۇمىستاندىرۋ قىزمەتىن كورنەكتىلەندىرە جاقسى ىستەپ، وسى رەتكى ىندەتتە بايقالعان الەۋمەتتىك دەنساۋلىق ساقتاۋ جۇيەسى جاعىنداعى ولقىلىقتاردى، ءالسىز تۇستاردى جەدەل تولىقتاپ، قوعامدى جونگە سالۋ ءتۇيىنىن نەگىزگى ساتىعا قاراي ويىستىرۋ كەرەك.

  شي جينپيڭ بىلاي دەپ باسا دارىپتەدى: باي مازمۇندى تاريحي مادەنيەت، قىزىل مادەنيەت بايلىعىن تولىق اشىپ جانە پايدالانىپ، مادەنيەت قۇرىلىسىن كۇشەيتىپ، سوتسياليستىك وزەكتى قۇن كوزقاراسى ۇگىت - تاربيەسىن تاباندىلىقپەن ورىستەتىپ، تاڭداۋلى ءداستۇرلى مادەنيەتتى ىشكەرىلەي اشىپ، قالىڭ كادرلار مەن بۇقارانى ءمورالدىق قۇلىقتى جوعارىلاتۋعا، تاماشا سالت ورناتۋعا، مادەنيەت سەنىمىن كۇشەيتۋگە جەتەكتەۋ كەرەك.

  شي جينپيڭ بىلاي دەپ اتاپ كورسەتتى: ساياسي قۇرىلىستى ءبىر تۇتاس باسشىلىققا الۋعا تاباندى بولىپ، پارتيانىڭ ىشكى ساياسي ەكولوگيا قۇرىلىسىن مىزعىماي جاقسى يگەرىپ، مۇرات - سەنىم تاربيەسىن كۇشەيتىپ، نەگىزگى تاقىرىپتىق تاربيەنىڭ جەتىستىكتەرىن بەكەمدەپ، تەرەڭدەتىپ، ساياسي تارتىپكە جانە ساياسي قاعيداعا قاتاڭ بويسۇنىپ، پارتيانى جاپپاي قاتاڭ جونگە سالۋدىڭ تۇلعالىق جاۋاپكەرشىلىگىن تياناقتاندىرىپ، شىرىكتەسۋگە باتىنا الماۋدى، شىرىكتەسۋگە مۇمكىندىك بەرمەۋدى، شىرىكتەسۋدى ويىنا الماۋدى ءبىر تۇلعالى ىلگەرىلەتىپ، نەگىزگى ساتى پارتيا ۇيىمدارىنىڭ ساياسي يقۋاتى مەن ۇيىمدىق قۋاتىن كۇشەيتىپ، فورماشىلدىققا، تورەشىلدىككە باتىل قارسى تۇرىپ، ايقىن تۋ ۇستاي وتىرىپ ءتۇرلى بۇرىس ستيلدەرمەن كۇرەسۋ كەرەك.

  ديڭ شۋەشياڭ، ليۋ حى، حى ليفىڭ جانە ورتالىقتىڭ قاتىستى تاراۋلارىنداعى جاۋاپتى جولداستار قىزمەت تەكسەرۋدە بىرگە بولدى.

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.