شينحۋا اگەنتتىگىنىڭ فۋجوۋدان بەرگەن حابارى (ءتىلشى ۋاڭ چىڭ). ”قۇتقارىڭدار مەنى... قۇتقارىڭدار مەنى!“، شۇعىل كومەك تىلەگەن داۋىستى ەستىگەن 22 جاستاعى چىن جوۋگۇي ەش ءارى - ءسارى بولماستان بۋىرقانا تولقىن اتقان تەڭىزگە جۇگىرىپ بارىپ، بارىن سالا قاتەردە قالعان بۇقارانى سۋى تاياز ورىنعا يتەرىپ اپارادى، ال، چىن جوۋگۇي بۋىرقانعان تولقىندا تەڭىزگە باتىپ كەتەدى.
چىن جوۋگۇي 1991 - جىلى 3 - ايدا دۇنيەگە كەلگەن، كوزى تىرىسىندە جۇڭگو حالىق قارۋلى ساقشى شۋەيۋانى شەكارا قورعانىس فاكۋلتەتى 13 - دۇيىنىڭ وقۋشىسى بولاتىن. 2013 - جىلى 7 - ايدىڭ 31 - كۇنى اۋىلى فۋجياننىڭ دۇڭشانىنا تۋىسشىلاي قايتقان چىن جوۋگۇي تەڭىز جاعاسىندا سەيىلدەپ جۇرگەندە، كەنەت، داۋىل سوعىپ، تىنىق تەڭىز ايدىنىندا 2 دە 3 مەتر بيىكتە اساۋ تولقىن كوتەرىلىپ، لاي - قۇمداردى جاعاعا قاراي ۇرادى، تەڭىزدە مالتاپ جۇرگەن ساياحاتشىلار قايتەرلەرىن بىلمەي ساسقالاقتاپ، ۇلار - شۋ بولىپ، ايعايلاي جاعاعا قاراي قاشادى.
ۋلار - شۋدىڭ اراسىنان چىن جوۋگۇي ”قۇتقارىڭدار مەنى... قۇتقارىڭدار مەنى!“ دەگەن ايعايدى ەستىپ، بۇرىلىپ داۋىس شىققان جاققا قاراعاندا، جاعادان 50 دە 60 مەتر الىستاعى تەڭىزدە بىرەۋدىڭ بىردە قالقىپ، بىردە باتىپ، قوس قولىن بۇلعاپ، جانتالاسىپ بارا جاتقاندىعىن كورەدى.
”شاتاق بولدى، بىرەۋ سۋعا كەتىپتى!“، سۋعا قانىق، جۇزە بىلەتىن چىن جوۋگۇي تەڭىزگە قاراي جان ۇشىرا جۇگىرە كيىمىن، اياق كيىمىن شەشىپ، تەڭىزگە سەكىرىپ، ەڭ تەز جىلدامدىقپەن سۋعا كەتكەن ادامعا جاقىندايدى. سۋعا كەتكەن ادامنىڭ كۇش - قۋاتى سارقىلىپ، سۋعا باتا باستايدى، چىن جوۋگۇي اساۋ تولقىنعا قارسى ءجۇزىپ، سۋعا كەتكەن ادامدى يىعىمەن جاعاعا اقىرىن يتەرەدى. مىڭ ءبىر ماشاقاتتى ارپالىس ارقىلى چىن جوۋگۇي سۋعا كەتكەن ادامدى قۇمدى جاعاعا تاياۋ حاۋىپسىز وڭىرگە يتەرىپ اپارادى.
بۇقارا قۇتقارىلادى، ال ەرلىكپەن ادام قۇتقارعان چىن جوۋگۇيدىڭ كۇش - قۋاتى سارقىلىپ، تەڭىزگە باتىپ، اساۋ تولقىن تەڭىزگە شوكتىرەدى دە ەرلىكپەن قۇربان بولادى. 2013 - جىلى 8 - ايدىڭ 4 - كۇنى چىن جوۋگۇيدىڭ سۇيەگى وقيعا تۋىلعان جەردەن شالعايداعى مالۋان شىعاناعىنىڭ ماڭىنداعى تەڭىز ايدىنىنان جاعاعا شىعارىلادى.
چىن جوۋگۇي قۇربان بولعاننان كەيىن قوعام حاۋىپسىزدىگى مينيسترلىگى وعان ”حالىق ءۇشىن باسىن ءباي تىككەن ونەگەلى وقۋشى“ داڭقتى اتاعىن تولىقتاپ بەردى ءارى وعان ”2 - دارەجەلى قاھارمان ۇلگى وردەنىن“ بەرەدى، وقۋ - اعارتۋ مينيسترلىگى وعان ”مەملەكەتتىك تاڭداۋلى ستۋدەنت“ داڭقتى اتاعىن تولىقتاپ بەردى.
قىسقا عانا اسكەري ومىرىندە چىن جوۋگۇي قىمباتتى ءومىرى ارقىلى جان تەبىرەنتەرلىك جاۋاپناما جازدى، ول ءومىردىڭ ءۇمىتىن وزگەلەرگە قالدىرىپ، ءولىمنىڭ قاتەرىن وزىنە قالدىرىپ، ايبىندى قاھارماندىق ماداق جىرىن جازىپ، ءىس - ارەكەتى ارقىلى ”حالىق قوعام حاۋىپسىزدىگى حالىق ءۇشىن“ دەگەن ايبىندى ۋادەنى امالياتتا ايگىلەدى.
