− باس شۋجي شي جينپيڭ حۋبەي ۋاكىلدەر ۇيىرمەسىنە كەلدى
شينحۋا اگەنتتىگىنىڭ تىلشىلەرى جاڭ شياۋسۇڭ، جۋ جيچاي
”ءسىزدى تەلەۆيزوردان كورگەنمىن“.
5 - ايدىڭ 24 - كۇنى تۇستەن كەيىن حالىق سارايىنىڭ شىعىس زالى، حۋبەي ۋاكىلدەر ۇيىرمەسى باياندامانى قاراعان ورىندا شىيان قالالىق تايحى شيپاحاناسى پارتكومىنىڭ شۋجيى، شيپاحانا باستىعى ۋاكىل لو جيە ءسوز العاندا، باس شۋجي شي جينپيڭ ونى تاني قويدى.
”ءسىز لو جيەسىز بە؟“، - دەپ سۇرادى باس شۋجي.
”ءيا“، - دەدى لو جيە ىشتەي تەبىرەنىپ.
”ءسىز ۋاكىلدەر دالىزىندە تىلشىلىكتى قابىلداعانىڭىزدا، ون نەشە ادامنان قۇرالعان ارناۋلى ەمدەۋ - كۇتىمدەۋ گرۋپپاسىن قۇرىپ، 87 جاستاعى ءبىر كاريانى ءساتتى ەمدەپ ساۋىقتىرعاندارىڭىزدى ايتتىڭىز. ىشكى موڭعۇل ۋاكىلدەر ۇيىرمەسىنە بارعانىمدا، ءسىزدى تىلگە الىپ، بۇل ءىستىڭ ماعان تەرەڭ اسەر قالدىرعاندىعىن ايتتىم. بۇل ءسوزىم گازەتكە دە باسىلدى“، - دەدى باس شۋجي كۇلىمسىرەگەن بەينەمەن.
ەندىگى ءسوز كەزەگىن العان لو جيە ءبىرىنشى شەپتە ىندەتپەن كۇرەسۋدەن العان اسەرىمەن بىرلەستىرىپ، نەگىزگى ساتىنىڭ ەمدەۋ - دەنساۋلىق ساقتاۋ جۇيەسى قۇرىلىسىن كۇشەيتۋ ۇسىنىسىن ورتاعا قويدى: ”كەزەكتە ۇكىمەت شيپاحانالارىندا، اسىرەسە، نەگىزگى ساتىداعى ەمحانالاردا سالماقتى جۇقپالى اۋرۋلاردان ساقتانۋ - تىزگىندەۋ جاعىندا ءالى دە ءبىرسىپىرا ولقىلىقتار بار، كوپتەگەن نەگىزگى ساتى ەمحانالارىنىڭ قۇرىلعى شارت - جاعدايى ناشار، توسەك، قورعانۋ ماتەريالدارى جانە كاسىپتىك ەمدەۋ - كۇتىمدەۋ قىزمەتكەرلەرى جەتكىلىكسىز“.
”شىياندا وسى جولى دياگنوزى تۇراقتانعان ناۋقاس نەشەۋ؟“ - دەپ سۇرادى باس شۋجي.
”672 ادام“، - دەپ جاۋاپ بەردى لو جيە.
”ناۋقاستان قايتىس بولۋ سالىستىرماسى قانشا؟“ - دەدى باس شۋجي ساباقتاي سۇراپ.
”％ 19. 1، ءبىز جيىنى 664 ناۋقاستى ءساتتى ەمدەپ ساۋىقتىردىق، مۇنىڭ اراسىندا ساۋىققان جاسى ەڭ ۇلكەن ناۋقاس 87 جاستا، ەڭ كىشىسىنىڭ تۋىلعانىنا نەبارى 29 كۇن بولعان“.
”ساقتانۋ - تىزگىندەۋ، ەمدەۋ قىزمەتىن ءبىرشاما جاقسى ىستەگەن ەكەنسىزدەر“، - دەدى باس شۋجي ماقۇلداي باسىن يزەپ.
”شيپاحانالارىڭىزدا جۇقپالى اۋرۋ جاعىنداعى ەمدەۋ - كۇتىمدەۋ قىزمەتكەرلەرىنەن قانشاۋى بار؟“
”جۇقپالى اۋرۋلار بولىمىندە 16 سەسترا، 10 شيپاگەر بار، بۇلاردىڭ اراسىندا دوكتورلىق ماعلۇماتقا يە 3 ادام بار“.
”ەگەر جاڭا تيپتى ايدارشا ۆيرۋس وكپە قابىنۋى سياقتى سالماقتى جۇقپالى اۋرۋ بولماسا، جايشىلىقتاعى جاعدايدا ۇلگىرە الاسىزدار ما؟“
”ەگەر قىسقا ۋاقىتتا مۇنشاما كوپ ناۋقاس ادام بولماسا، بۇكىلدەي ۇلگىرە الامىز“.
باس شۋجي باسىن يزەپ، ريزاشىلدىق ءبىلدىردى.
وسى جولى حۋبەي ۋاكىلدەر ۇيىرمەسىنىڭ باياندامانى قاراۋىنا قاتىناساتىندىعىن باس شۋجي شي جينپيڭ ارناۋلى ايتقان بولاتىن.
”وسى جولعى ەكى ماجىلىستە ىندەتتەن ساقتانۋ - تىزگىندەۋدىڭ قاجەتىنە نەگىزدەلىپ، ورتالىقتاعى باسشى جولداستار ۇيىرمەلەرگە بارۋ سانىن ازايتتى. مەن حۋبەي ۋاكىلدەر ۇيىرمەسىنە، ءسوزسىز، بارۋىمىز كەرەك دەگەندى ارناۋلى ايتتىم. سىزدەر حۋبەيداعى 60 ميلليوننان استام حالىقتىڭ ۋاكىلىسىزدەر، مەن كوپشىلىكپەن امانداسا كەلدىم“، - دەدى 5 ۋاكىلدىڭ ءسوزىن تىڭداپ بولعاننان كەيىن باس شۋجي شي جينپيڭ تەرەڭ سۇيىسپەنشىلىكپەن.
ونان سوڭ، باس شۋجي شي جينپيڭ ىندەتتەن ساقتانۋ - تىزگىندەۋ جۇيەسى رەفورماسى مەن الەۋمەتتىك دەنساۋلىق ساقتاۋ جۇيەسى قۇرىلىسى ماسەلەسى جونىندە ماڭىزدى ءسوز سويلەپ، لو جيە قاتارلى ۋاكىلدەر ورتاعا قويعان ۇسىنىس - پىكىرلەرگە جاۋاپ بەردى.
”اۋرۋدىڭ الدىن الۋ جانە ونى تىزگىندەۋ جۇيەسىنە رەفورما جاساۋ“، ”ىندەت جاعدايىن قاداعالاۋ، ساقتاندىرۋ جانە شۇعىل جاعدايعا توتەپ بەرۋ، اتتانىسقا كەلۋ قابىلەتىن جوعارىلاتۋ“، ”ەلەۋلى ىندەتتەن قۇتقارۋ - ەمدەۋ جۇيەسىن اقاۋسىزداندىرۋ“، ”الەۋمەتتىك دەنساۋلىق ساقتاۋ بويىنشا شۇعىل جاعدايعا توتەپ بەرۋ زاڭدارىن، زاڭ ەرەجەلەرىن كەمەلدەندىرۋ“، ”وتانشىلدىق تازالىق قيمىلىن ىشكەرىلەي ورىستەتۋ“... باس شۋجي شي جينپيڭ ماسەلەگە 5 جاقتان ىشكەرىلەي تالداۋ جاساپ، شارالاردى دالمە - ءدال ورتاعا قويىپ، كەزەكتەگى جاعدايدى تياناق ەتۋمەن بىرگە، بولاشاققا كوز جىبەردى.
ءماجىلىس زالى ەرەكشە جىم - جىرتتىققا شومدى، ۋاكىلدەر مۇقيات تىڭداپ، ۇقىپتىلىقپەن ەستەلىك الۋدا. ىندەتتىڭ قاسىرەتىن ءوز باستارىنان وتكىزگەن ۋاكىلدەر باس شۋجيدىڭ سوزىنەن شىنايى اسەر الدى.
”پارتيا ورتالىق كوميتەتى حۋبەي ولكەسىنىڭ ەكونوميكالىق، قوعامدىق دامۋىنا قولداۋ كورسەتۋ جونىندە ءبىرسىپىرا ساياساتتاردى اقىلداسىپ بەلگىلەدى. مەن پارتيا ورتالىق كوميتەتىنىڭ پارمەندى باسشىلىعىندا، حۋبەيدىڭ، ۋحاننىڭ قالىڭ كادر - بۇقاراسى ەل بىرلىگىنەن بەرىك قامال تۇرعىزىپ، وسى جولعى الاپاتتى باستان كەشىرگەن حۋبەيدىڭ، ۋحاننىڭ، ءسوزسىز، اۋىر سىناقتان سوڭ قايتا سەرپىلىپ، جاڭا داۋىردە ءتىپتى دە شۇعىلالى تابىستار جاراتاتىندىعىنا سەنەمىن“.
مەيىرىمگە تولى وسى سوزدەر تاباندىلىقپەن العا باسۋدىڭ كۇش - قۋاتىن جەتكىزدى.
(شينحۋا اگەنتتىگىنىڭ 5 - ايدىڭ 24 - كۇنى بەيجيڭنەن بەرگەن حابارى)
