(13 - كەزەكتى مەملەكەتتىك حالىق قۇرىلتايىنىڭ 3 - ماجىلىسىندە 2020 - جىلى 5 - ايدىڭ 28 - كۇنى ماقۇلداندى)
13 - كەزەكتى مەملەكەتتىك حالىق قۇرىلتايىنىڭ 3 - ءماجىلىسى مەملەكەتتىك حالىق قۇرىلتايى تۇراقتى كوميتەتىنىڭ «مەملەكەتتىك حالىق قۇرىلتايىنىڭ شياڭگاڭ ەرەكشە اكىمشىلىك رايونىنىڭ مەملەكەت حاۋىپسىزدىگىن قورعاۋ زاڭ - تۇزىمدەرى مەن اتقارۋ مەحانيزمىن ورناتۋ جانە كەمەلدەندىرۋ جونىندەگى قارارىن (جوبا)» قاراۋعا ۇسىنۋ جونىندەگى كەڭەستىك جوباسىن قارادى. ءماجىلىس بىلاي دەپ قارادى: بەرتىنگى جىلدارى شياڭگاڭ ەرەكشە اكىمشىلىك رايونىنىڭ مەملەكەت حاۋىپسىزدىگى حاۋىپ - قاتەرى كورنەكتى بولدى، ”شياڭگاڭ دەربەستىگى“، مەملەكەتتى بولشەكتەۋ، زورلىقتى كۇش لاڭكەستىك ارەكەتتەر سياقتى زاڭعا قايشى ءتۇرلى ارەكەتتەر مەملەكەتتىڭ يەلىك ۇقىعىنا، ءبىر تۇتاستىعىنا جانە تەرريتوريا بۇتىندىگىنە اۋىر قاتەر ءتوندىردى، شەتەلدەگى جانە شەكارا سىرتىنداعى كەيبىر كۇشتەر شياڭگاڭنىڭ ىستەرىنە اشىقتان - اشىق كيلىگىپ، شياڭگاڭنان پايدالانىپ ەلىمىزدىڭ مەملەكەت حاۋىپسىزدىگىنە قاتەر توندىرەتىن ارەكەتتەرمەن شۇعىلداندى. مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋ، ”ءبىر ەل، ەكى ءتۇزىم“ ءتۇزىم جۇيەسىنە تاباندى بولۋ جانە ونى كەمەلدەندىرۋ، شياڭگاڭنىڭ باياندى گۇلدەنۋىن، ورنىقتىلىعىن قورعاۋ، شياڭگاڭ تۇرعىندارىنىڭ زاڭدى ۇقىق - مۇددەسىن قامتاماسىزداندىرۋ ءۇشىن، «جۇڭحۋا حالىق رەسپۋبليكاسى نەگىزگى زاڭىنىڭ» 31 - تارماعىنىڭ جانە 62 - تارماعىنىڭ 2 - تارماقشاسىنىڭ، 14 - تارماقشاسىنىڭ، 16 - تارماقشاسىنىڭ بەلگىلەمەلەرى، سونداي - اق «جۇڭحۋا حالىق رەسپۋبليكاسى شياڭگاڭ ەرەكشە اكىمشىلىك رايونى ءتۇبىرلى زاڭىنىڭ» قاتىستى بەلگىلەمەلەرى بويىنشا مەملەكەتتىك حالىق قۇرىلتايى تومەندەگىدەي قارار شىعاردى:
ءبىرىنشى، مەملەكەت ”ءبىر ەل، ەكى ءتۇزىم“، ”شياڭگاڭدى شياڭگاڭدىقتار باسقارۋ“، وسكەلەڭ اۆتونوميا باعىتىنان اۋىتقىمايدى ءارى جاپپاي دۇرىس دايەكتىلەندىرەدى، شياڭگاڭدى زاڭمەن جونگە سالۋعا تاباندى بولىپ، نەگىزگى زاڭدا جانە شياڭگاڭ ەرەكشە اكىمشىلىك رايونىنىڭ ءتۇبىرلى زاڭىندا بەلگىلەنگەن شياڭگاڭ ەرەكشە اكىمشىلىك رايونىنىڭ نەگىزگى زاڭدىق جۇيە ءتارتىبىن قورعايدى، قاجەتتى شارا قولدانىپ، شياڭگاڭ ەرەكشە اكىمشىلىك رايونىنىڭ مەملەكەت حاۋىپسىزدىگىن قورعاۋ زاڭ - تۇزىمدەرى مەن اتقارۋ مەحانيزمىن ورناتىپ جانە كەمەلدەندىرىپ، زاڭ بويىنشا ساقتانىپ، مەملەكەتتىڭ حاۋىپسىزدىگىنە قاتەر توندىرەتىن ارەكەتتەر مەن قيمىلداردى توسادى جانە جازالايدى.
ەكىنشى، مەملەكەت شەتەلدەگى جانە شەكارا سىرتىنداعى ءارقانداي كۇشتىڭ ءارقانداي تاسىلمەن شياڭگاڭ ەرەكشە اكىمشىلىك رايونىنىڭ ىستەرىنە كيلىگۋىنە باتىل قارسى تۇرادى، قاجەتتى شارا قولدانىپ شەكتەيدى، شەتەلدەگى جانە شەكارا سىرتىنداعى كۇشتەردىڭ شياڭگاڭنان پايدالانىپ بولشەكتەۋ، اۋدارۋ، سىنالاپ كىرۋ، ءبۇلدىرۋ قيمىلدارىمەن شۇعىلدانۋىنان زاڭ بويىنشا ساقتانادى، مۇنى توسادى جانە جازالايدى.
ءۇشىنشى، مەملەكەتتىڭ يەلىك ۇقىعىن، ءبىر تۇتاستىعىن جانە تەرريتوريا بۇتىندىگىن قورعاۋ شياڭگاڭ ەرەكشە اكىمشىلىك رايونىنىڭ نەگىزگى زاڭدىق جۇيەسىنىڭ جاۋاپكەرشىلىگى. شياڭگاڭ ەرەكشە اكىمشىلىك رايونى شياڭگاڭ ەرەكشە اكىمشىلىك رايونىنىڭ ءتۇبىرلى زاڭىندا بەلگىلەنگەن مەملەكەتتىڭ حاۋىپسىزدىگىن قورعاۋ زاڭىن شىعارۋدى مۇمكىندىگىنشە ەرتەرەك ورىنداۋ كەرەك. شياڭگاڭ ەرەكشە اكىمشىلىك رايونىنىڭ اكىمشىلىك ورگانى، زاڭ شىعارۋ ورگانى، ءادىليا ورگانى مەملەكەتتىڭ حاۋىپسىزدىگىنە قاتەر توندىرەتىن ارەكەتتەردەن جانە قيمىلداردان قاتىستى زاڭ بەلگىلەمەلەر بويىنشا ءونىمدى ساقتانۋى، بۇلاردى توسۋى جانە جازالاۋى كەرەك.
ءتورتىنشى، شياڭگاڭ ەرەكشە اكىمشىلىك رايونى مەملەكەتتىڭ حاۋىپسىزدىگىن قورعاۋ قۇرىلىمى مەن اتقارۋ مەحانيزمىن ورناتىپ، اقاۋسىزداندىرىپ، مەملەكەت حاۋىپسىزدىگىن قورعايتىن زاڭ اتقارۋ كۇشتەرىن كۇشەيتىپ، مەملەكەتتىڭ حاۋىپسىزدىگىن قورعاۋ بويىنشا زاڭ اتقارۋ قىزمەتىن كۇشەيتۋ كەرەك. ورتالىق حالىق ۇكىمەتىنىڭ مەملەكەت حاۋىپسىزدىگىن قورعاۋ قاتىستى ورگاندارى قاجەت بويىنشا شياڭگاڭ ەرەكشە اكىمشىلىك رايونىنان قۇرىلىم قۇرىپ، مەملەكەتتىڭ حاۋىپسىزدىگىن قورعاۋعا قاتىستى قىزمەت جاۋاپكەرشىلىگىن زاڭ بويىنشا اتقارادى.
بەسىنشى، شياڭگاڭ ەرەكشە اكىمشىلىك رايونىنىڭ اكىمى شياڭگاڭ ەرەكشە اكىمشىلىك رايونىنىڭ مەملەكەت حاۋىپسىزدىگىن قورعاۋ قىزمەت جاۋاپكەرشىلىگىن ادا ەتۋ، مەملەكەت حاۋىپسىزدىگى تاربيەسىن ورىستەتۋ، مەملەكەتتىڭ حاۋىپسىزدىگىنە قاتەر توندىرەتىن ارەكەتتەر مەن قيمىلدارعا زاڭ بويىنشا تيىم سالۋ سياقتى جاعدايلار جونىندە ورتالىق حالىق ۇكىمەتىنە بەلگىلى مەرزىمدە بايانداما تاپسىرۋى كەرەك.
التىنشى، مەملەكەتتىك حالىق قۇرىلتايى تۇراقتى كوميتەتىنە شياڭگاڭ ەرەكشە اكىمشىلىك رايونىنىڭ مەملەكەت حاۋىپسىزدىگىن قورعاۋ زاڭ - تۇزىمدەرى مەن اتقارۋ مەحانيزمىن ورناتۋ جانە كەمەلدەندىرۋ جونىندە قاتىستى زاڭ جاساۋ ۇقىعىن بەردى، مەملەكەتتى بولشەكتەۋ، مەملەكەت اكىمياتىن اۋدارۋ، لاڭكەستىك ارەكەت جۇرگىزۋگە ۇيىمداستىرۋ سياقتى مەملەكەتتىڭ حاۋىپسىزدىگىنە اۋىر قاتەر توندىرەتىن ءارقانداي ارەكەتتەر مەن قيمىلداردان، سونداي - اق شەتەلدەگى جانە شەكارا سىرتىنداعى كۇشتەردىڭ شياڭگاڭ ەرەكشە اكىمشىلىك رايونىنىڭ ىستەرىنە كيلىگۋ قيمىلدارىنان شىنايى ساقتانادى، بۇلاردى توسادى جانە جازالايدى. مەملەكەتتىك حالىق قۇرىلتايى تۇراقتى كوميتەتى جوعارىداعى قاتىستى زاڭداردى «جۇڭحۋا حالىق رەسپۋبليكاسى شياڭگاڭ ەرەكشە اكىمشىلىك رايونى ءتۇبىرلى زاڭىنىڭ» 3 - قوسىمشا حۇجاتىنا ەنگىزىپ، شياڭگاڭ ەرەكشە اكىمشىلىك رايونىنىڭ جەرگىلىكتى ورىندا جاريالاپ اتقارۋىن ۇيعاردى.
جەتىنشى، بۇل قارار جاريالانعان كۇننەن باستاپ اتقارىلادى.
