شينحۋا اگەنتتىگىنىڭ گۋاڭجوۋدان بەرگەن حابارى (ليۋ شين، لي شياۋحۇي، لياۋ بينحۋا). جىڭ يلۇڭ، گۋاڭدۇڭنىڭ چاۋياڭىنان، 1979 - جىلى 1 - ايدا دۇنيەگە كەلگەن، 1997 - جىلى 12 - ايدا اسكەري قوسىنعا قاتىناسقان، 1998 - جىلى 12 - ايدا پارتياعا مۇشە بولعان، بۇرىنعى قارۋلى ساقشى گۋاڭدۇڭ باس اترەتى گۋاڭجوۋ تارماق اترەتى 4 - ۇلكەن اترەتىنىڭ ورىنباسار ساياسي جەتەكشىسى. 2013 - جىلى 3 - ايدىڭ 1 - كۇنى تۇستەن كەيىن جىڭ يلۇڭ سىرتقا شىعىپ سىرقاتىن ەمدەتپەكشى بولىپ جۋجياڭ وزەنىنىڭ باتىس توسپا كەمەتۇراعىنان ءوتىپ بارا جاتقاندا، سۋعا ءتۇسىپ كەتكەن ادامدى قۇتقارۋ بارىسىندا قۇربان بولدى، وعان قارۋلى ساقشى ءبولىمى ”حالىق ءۇشىن ءومىرىن ارناعان ادال قورعاۋشى“ داڭق اتاعىن بەردى، ”مەملەكەتتىك ءمورال ۇلگىسى“ بولىپ باعالاندى.
”قاجىرلىلىقپەن كۇرەس جاساۋ ونىڭ تابيعاتى ەدى، ماقساتقا جەتپەي تىنبايتىن“، بۇل جاۋىنگەر سەرىكتەرىنىڭ جىڭ يلۇڭ جونىندەگى اسەرى. 1998 - جىلى 7 - ايدا ول تۇرعان جەردە ەرەكشە اۋىر تاسقىن اپاتى تۋىلادى. جوعارى ورىن ءاسىلى ونى كۇزەتتە قالۋعا ورنالاستىرعان بولاتىن، ايتسەدە جىڭ يلۇڭ بەكىم حاتىن الىپ، تارماق اترەت باستىعىن ىزدەپ ىرىقتىلىقپەن ءوتىنىش بەرىپ، تاسقىنعا قارسى اتتانۋدىڭ ءبىرىنشى شەبىنە بارىپ تاس كوتەرىپ، قۇم دوربا ارقالاپ، سەل الىپ كەتكەن جەردى بىتەيدى. ءبىر جولى ول اتويلاۋ قايىعىن ايداپ بۇقارانى كوشىرەدى، ءبىر عيماراتتىڭ 3 - قاباتىنان باسپالداقپەن 60 جاستان اسقان ءبىر قاريانى ارقالاپ شىعا بەرگەندە، عيمارات گۇر ەتىپ قۇلاپ تۇسەدى.
جەتەكشى بولعان كەزىندە جىڭ يلۇڭ اتاعى شىققان ”جانسەبىل“ ەدى. ورتا اترەتتىڭ بەت - بەينەسىن وزگەرتۋ ءۇشىن، ول ۇنەمى تۇنىمەن ۇستەمە قىزمەت ىستەپ، ورتا اترەت قۇرىلىسى كەرەمەت وڭالادى، ءبىراق ءوزى اۋىر بەل ومىرتقاسى شودىرايۋ ناۋقاسىنا شالدىعادى. شيپاگەر نەشە رەت وعان وپەراتسيا جاساتۋدى ايتادى، ول قىزمەتكە ىقپال جەتكىزبەۋ ءۇشىن قالپىنا كەلتىرۋ ۋقالاۋىن جاساتىپ، ەمدەلۋدەن تارتىنشاقتاي بەرەدى. ەڭ سوڭىندا، كوپ جىلدار بويى كەنجە قالعان ورتا اترەت وزاتتاردىڭ قاتارىنا قوسىلادى.
2013 - جىلى 3 - ايدىڭ 1 - كۇنى تۇستەن كەيىن ءبىر ساياحاتشى گۋاڭجوۋ قالاسى جۋجياڭ وزەنى باتىس توسپا كەمەتۇراعىنىڭ گيدروفيلدىك تەكشەسىندە ابايسىزدان وزەنگە ءتۇسىپ كەتەدى. سىرقاتىن ەمدەتپەك بولىپ وسى ارادان جولشىباي ءوتىپ بارا جاتقان جىڭ يلۇڭ دەرەۋ وقيعا تۋىلعان ورىنعا قاراي جۇگىرىپ، اسكەري كيىمى مەن شاقايىن شەشە سالا وزەنگە سەكىرىپ تۇسەدى.
گيدروفيلدىك تەكشەنىڭ توسپا ەرنەۋى سۋ بەتىنەن 2 مەتر بيىك ءارى سۇيەنىش بولارلىق ەشتەڭە جوق بولعاندىقتان، جىڭ يلۇڭ مالتاۋدى بىلمەيتىن سۋعا ءتۇسىپ كەتكەن ساياحاتشىنى ءبىر قولىمەن ۇستاپ، ەندى ءبىر قولىمەن اعىنعا قارسى جاقىن ماڭداعى قالقىما زاتتارعا قاراي بار كۇشىمەن جۇزەدى. كەنەت، ءبىر سۇراپىل تولقىن ەكەۋىن ءبولىپ جىبەرەدى، جىڭ يلۇڭ جالعىز قۇتقارۋ دوڭگەلەگىن ساياحاتشىعا بەرىپ، ءوزى سۇراپىل تاسقىنعا شوگىپ كەتەدى. 3 - ايدىڭ 4 - كۇنى كەشكى ساعات 8دەن 50 مينۋتتا جىڭ يلۇڭنىڭ مۇردەسى ءسۇزىپ الىنادى، 34 جاستاعى جاس عۇمىر كوكتەمدە بۋىرقانىپ تاسىپ جاتقان جۋجياڭ وزەنىندە قالا بەرەدى.
قاھارمانداردا ۇزاق ساپار بولمايدى، قۇربان بەرۋ عانا ماڭگىلىك عۇمىر. ءار رەتكى چيڭميڭدە جانە جىڭ يلۇڭ قۇرباندى ەسكە الۋ كۇنىندە ادامدار جۋجياڭ وزەنى جاعالاۋىنا كەلىپ قاھارماندى ساعىنا ەسكە الادى. جىڭ يلۇڭنىڭ قاھارماندىق ىزگى ىستەرى قارۋلى ساقشى گۋاڭدۇڭ باس اترەتىندەگى كوماندير - جاۋىنگەرلەردى اسەرلەندىردى، ”جىڭ يلۇڭ“ الدەقاشان ءبىر رۋحاني نىشانعا اينالىپ، كوماندير - جاۋىنگەرلەردىڭ كوڭىل تۇكپىرىندە ۇيالاپ قالدى. تۇرعان جەرلەرى تاسقىن سياقتى توساتتان پايدا بولاتىن اپاتتارعا ۇشىراعاندا، باس اترەت ”جىڭ يلۇڭ ەكپىندىلەر اترەتىن“ ۇيىمداستىرىپ، سول جەردەگى بۇقارامەن بىرگە شۇعىل اپاتتان قۇتقارۋ جۇرگىزەدى. تاسقىننان كەيىن، ”جىڭ يلۇڭ حالىقتى ءسۇيۋ قىزمەت وتەۋ اترەتى“ اپاتقا ۇشىراعان بۇقارانىڭ ۇيىنە حال سۇراۋ بۇيىمدارىن بەرىپ، ولاردىڭ ءىس جۇزىندىك قيىنشىلىعىن شەشۋگە كومەكتەسەدى.
ءداۋىر ۇزدىكسىز دامۋدا، دەسەدە كوماندير - جاۋىنگەرلەردىڭ كوڭىل تۇكپىرىنە ۇيالاعان ”جىڭ يلۇڭ رۋحى“ جالعاسىپ، تىنباي جوڭكىلە اعىپ جاتىر.
